Dioso itapeta Sábadomatacabi peyaiyataematacabinexa
—Marapacuenia Jehová naca-itoroba waja-exanaenexaje. 5 Pacaetuatsianame panecobecowëyajuwënëjawanë ofrendacuenia panerajutsinexa Jehovájawabelia. Daxita pamonae jitsipa perajutsinexa ofrendacuenia Jehová, parajutaponaename caenë canacujitsia xua pajitsipame panejamatabë-ëthëtojawawetsina. Nexata, pacapatsianame orojawanë, palatajawanë, broncejawanë-ata. 6 Bajarapacuenia-ata pacapatsianame daxitawiriamaëtoxi, perajejaimaëtonë, pesaëjaimaëtonë, petsobiamaëtonë-ata, bajarapacuenia pexaniawirialinojilomaëtonë, bajarapacuenia cabra pewejumaxunaena̱mi-ata. 7 Bajarapacuenia pacapatsianame oveja pebitonë pebocotonëmi, petsobiarata pejabucaebocotonë, bajarapacuenia itsapexaniawiriabocojawanë-ata. Pacapatsianamenua acacianaepijitablapajawanë-ata, 8 bajarapacuenianua olivacuaipiji-aceiteranë lámparanexa. Pacapatsianame pexaniatuxujuwijawanë, pematajërëabinexa itsa-olivacuaipiji-aceiterata, petsimata-epacaera pexanaenexa Jehová pitapetsiwitsi, bajarapacuenia itsawiriajawanë pexaniatuxujuwipërëtoxi inciensojawanë, Jehovájawabelia petotajuitabiabijawanënexa. 9 Bajarapacuenia pacapatsianame mapitsiwiria-ibotoxije: ónice-ibotoxi, itsa-ibotoxi penamatamotsijawanë-ata, pitabëtsi-ibotoxinexa sacerdotewi pepopenamatacaitorobinë naniawelia penajumaxuabicorobë, efod-wënëjawa, petsicofiarubinexa, bajarapacuenia penatsimipabërutsipanajawata perubinexanua — jai Moisés. 10-19 […]
Israelitawi capata jamatabëcuenebarëyaya pija-ofrendajawanë
20 Moisés bajarapacuenia pejumaitsicujinae, nexata daxita israelitawi nawiaba pijacarpabonëjawabelia Moisés-wecua, pejaitsinexa xuanë rajutsijitsia. 21 Nexata, pamonae pejamatabë-ëthëtowetsina pepacuene jitsipa perajutsinexa, bajarapamonae capata daxitaxua namatawenona pecanacuenebinexa Jehová pijacarpabonexa. Bajarapacuenia daxitaxua canacuenebijitsia bajarapabo-ënëjawata. Bajarapijinia pacuenia daxitaxuanë namatawenonaejitsia pecanacuenebinexa sacerdotemonae penaxatabijawanënexa-ata. 22 Nexata jane baja, capata pebijiwi, petiriawi-ata jamatabëcuenebarëyaya ofrendacuenia perajutsinexa. Nexata, capata daxitacuenewiria oronanitota pexanaejawanë: penacuaibosicëbijawanë, penacobesixatabijawanë, penatsimuxurubi-aretejawanë, penamaxëcëbijawanë-ata. Daxita bajaraxuanë oronanitota pexanaejawanë bajarapamonae ofrendacuenia capata Jehovánexa. 23 Pamonae-ata pexainaewi capata perajejaimaëtonë, pesaëjaimaëtonë, petsobiamaëtonë, pexaniawirialinojilomaëtonë-ata. Pamonae pijinia xaina chivona̱ pejumaxunaena̱mi, ovejaboco petsobiarata pejabucaebocotonë, itsapexaniawiriabocotonë-ata, daxita bajaraxuanë capata ofrendacuenia 24 Itsamonae pijinia capata palatananitojawanë, broncenanitojawanë-ata perajutsinexa ofrendacuenia. Bajarapacuenia itsamonae capata acacianaepijitablapajawanë pexanaenexa daxitaxua canacuenebijitsia bajarapabo pexanaejawata. 25 Papetiriawi pijinia yapëtane pefirabijawa jilomaëtoxicuenia pejucaenexa, bajarapamonae pejitsipaewi firaba perajejaimaë, pesaëjaimaë, petsobiamaë-ata. Powaxi pijinia yapëtane pecuejawa pepananë pejucaenexa, bajarapowaxi bitso pexaniawiria linowiriapapaëbërëpananë juca, pecapatsinexa. 26 Bajarapijinia pacuenia itsapetiriawi, pamonae xaniawaetsia firababiaba chivo pejumaxunaena̱mi, bajarapamonae-ata capata pefirabijawanë, pejitsipaecuenia pejamatabë-ëthëtowetsina perajutsinexa. 27 Bajarapijinia pacuenia pamonae penamatacaitorobiwi capata ónice-ibotoxi, itsapexaniawiria-ibojawanë-ata, bitso penamatamotsijawanë, petsicofiarubinexa sacerdotewi pepopenamatacaitorobinë naniawelia penajumaxuabicorobë, efod-wënëjawa, bajarapacuenia-ata penatsimipabërutsipanajawata perubinexa. 28 Bajarapamonae-ata capata petuxujuwijawanë, bajarapacuenia olivacuaipiji-aceiteranë pitayotsinexa, bajarapacuenia itsa-aceiteranë, petsimata-epacaeranënexa pamonae Jehová pijacuene petonacuenebiwinexa, penajamatabë-itajëtsinexa Jehová pitapetsijawatsi. Bajarapacuenia capatanua pexaniatuxujuwijawanë inciensojawanë, xuanë tajuitabiabijitsia Jehová pewënëta, bajaraPonë pijacarpabo-ënëta.
29 Daxita Israel-pijinë pemomoxi jamatabëcuenebarëyaya ayaijawa capata wecua-asiwanejewa, perajutsinexa ofrendacuenia Jehová pewënëta. Nexata, pebijiwi, petiriawi-ata, jamatabëcuenebarëyaya capata, pacuenia Jehová tonajumecopatatsi Moisés-jawabelia bajarapamonae pexanaenexa. Nexata, bajarapamonae tocapata ofrendacuenia pacuenia bajarapamonae najamatabëcuenecaëjëta Jehovájawabelia perajutsinexa.
Dioso itapeta Bezaleel, Aholiab-beje penamatacanacuenebinëbejenexa
(Taemanua Éxodo 31:1-11)
30 Moisés xuacujinae jumaitsi daxita israelitawijawabelia:
—¡Pacanaëjëre mapacueneje! Jehová itapeta Bezaleel, Uri pexënato, Hur pemomo, Judápijinë pemomoxibitsaëtoyajuwënënë. 31 Bajaraponë Dioso Espíritu Santota jamatabëcuenecaëjëpaeya-exanatsi, peyapëtaeya-exanaenexatsi daxitacuene, pecanaëjëtsinexa pacuenia exanaejitsia, daxitacuenenua petsiyapëtaenënexa. 32 Nexata, bajaraponë yapëtaejitsia oronanijawanëta pecanacuenebinexa pexaniacuenia, palatananijawanëta, broncenanijawanëta-ata, 33 bajarapijinia pacuenia pecanacuenebinexa pexaniawirianamatamotsi-ibotoxi pexaniacuenia pitabëtsia-exanaenexa, pecataicarubinexanua bajarapa-ibotoxi orojawanëta, bajarapacuenia naejawanëta penacuenebinexa itsacuenejawanë-ata. Daxita bajaraxua Dioso Espíritu Santota jamatabëcuenecaëjëpaeya-exanatsi pexanaenexa. 34 Bajarapijinia pacuenia, Dioso Espíritu Santota caëjëpaeya-exanatsi Aholiab, Ahisamac pexënato, Dan-pijinë pemomoxibitsaëtoyajuwënënë. Bajaraponëbeje Dioso Espíritu Santota jamatabëcuenecaëjëpaeya-exanatsibeje itsamonae-ata pecujarubinexa, peyapëtaeya-exanaenexa daxita pexanaecuene. 35 Bajaraponëbeje cuenecaëjëpaeya-exanatsi pexaniacuenia penacuenebinexabeje itsacuenejawanë, xaniawaetsia pecapitsapaenexa pejamatabë-ëthëtota pecanaëjëbicuenia. Nexata, bajaraponëbeje yapëtaejitsia pexaniacuenia pecapitsapaenexa pejorocaejawata, pitanecuejawa perajejaipananë pexanaejawata, bajarapacuenia pesaëjaitsautsaucaepananë pexanaejawata, petsobiapananë, linowiriapapaëbërëpananë pexanaejawata-ata. Bajarapacuenianua caëjëpaeya-exanatsibeje pejucaenexa pexaniapitanejawanë bajarapapaëbërëpananëta pecuejawata.