36
»Bajaraxuanë panecapatsicujinae, nexata Bezaleel, Aholiab-beje, pamonae-ata Jehová pecuenecaëjëpaeya-exanaewitsi peyabaracujaniwinexatsi pexaniacuenia penacuenebinexa, tonacuenebiana Jehová pijacarpabo, pacuenia netonajumecopata pexanaenexa, daxitaxuanë-ata canacuenebijitsia bajarapacarpabo-ënëta peto-exanaenexa —jai Moisés Israel-pijinë pemomoxijawabelia, Jehová petonajumecopatsicueniatsi. Israelitawi bitso capatapona ayaijawa penamatawenonaejawawecua Dioso pijabonexa.2 Bajaraxuacujinae, Moisés junata Bezaleel, Aholiab-beje, daxita pamonae-ata Jehová pecuenecaëjëpaeya-exanaewitsi peyabaracujaniwinexatsi pexaniacuenia penacuenebiwinexa, pamonae-ata pejitsipaewi petonacuenebinexa. Daxita bajarapamonae pata penacuenebinexa Jehová pijacarpabo. 3 Nexata jane baja, bajarapamonae nota Moisés-jawata daxitaxua Israel-pijinë pemomoxi ofrendacuenia pecapatsijawanëmi, petaxuxuabinexa penacuenebijawa Jehová pijacarpabo. Itsiata, orijibia Israel-pijinë pemomoxi tsitecaeya caebajayacunua canacujitsia capatapona itsacuenejawanë perajutsinexa ofrendacuenia. Saya cuenejitsipaeya capatabiaba itorobinejewatsi. 4 Ayaijawa matatoxenetsia pecapatsixae, nexata daxita penacuenebiwi bajarapacarpabo copaba penacuenebijawa, peponaenexa Moisés-jawabelia. 5 Nexata, jumaitsi bajaraponëjawabelia:
—Mapamonaeje bitso ayaijawa capatapona, ofrendacuenia perajutsinexa Jehová pijacarpabonexa, bitso patanamatawenonaejawawecua matatoxenetsia bajarapabonexa —jai Moisés-jawabelia bajarapamonae.
6 Nexata, Moisés itoroba itsamonae Israel-pijinë pemomoxi pijataxunaebonëjawa, petsipaebinexa daxitajiwijawabelia orijibia apopenamatawenonaejawa pematatsënëa Jehová pijacarpabonexa. Bajarapamonae nexata jumaitsi tsanajetarubenae bajarapamonae pijataxunaebonëjawa:
—¡Orijibia, pëtsa itsajiwiyo-ata baja rajuta pematatsënëa ofrendacuenia Jehová pijacarpabonexa, pebijiwi, petiriawi-ata! —jai tsanajetarubenae.
Bajarapacuenia nexata cuene-itaweta Israel-pijinë pemomoxi pecapatsijawa orijibia, ofrendacuenia perajutaponaejawa, 7 tsipaji baja xaina bitso ayaijawa penamatawenonaejawawecua Jehová pijacarpabo pexanaenexa. Baitsi, peweretsicujinae bajarapabo, nacopatsijitsia bajaraxuayajuwënëjawanë. 8-38 […]
C37-C38 […]