Dioso itoroba Moisés pexanaenexa itsa-ibopanabeje
34
Bajaraxuacujinae, Jehová jumaitsi Moisés-jawabelia:—Nacuenebianame anija-ibopanayobeje, copiaya pitsi-ibopanamibeje carajutatsi. Bajarajota, icatsia yaquinarutsijitsianë paliwaisianëmi picani yaquinarubajë copiayapiji-ibopanamita, pa-ibopanabeje toxobiaxuabame. 2 Nexata, merawia bajayacunua naxaniawaetsianame nejunaenexa Sinaítsutojumabetsina tanecaxitajarabinexamë. 3 ¡Itsajiwiyo-ata pëtsa xamë yajawajunaimina! ¡Bajarapatsutoyenepanajawabelia-ata pëtsa pona! Apotaejitsipaenë caejiwiyo-ata. ¡Bajarapacuenia pëtsa pona panijadajubi pexaewanapaenexa po̱na bajarapatsutoyenepanabelia! —jai Jehová.
4 Nexata, Moisés nacueneba anija-ibopanayobeje pacuenia baja copiayapiji-ibopanamibejecuenia. Nexata, itsamatacabijawabelia, pepobajayacunua, bajaraponë pita bajarapa-ibopanayobeje. Cobenajunaya jane baja Sinaítsutojumabetsia, pacuenia Jehová tonajumecopatatsi. 5 Nexata, Jehová jane baja, runaica itarërëbota Sinaítsutojumabetsica. Nexata, bajarajotatsia Jehovábeje najuaponaponabeje Moisés-beje. Bajarajotatsia, nawënëtsipaebatsi Moisés. 6 Nexata, pewajënaewerena itsajota Moisés nuca, pexenetsijawata pinijijumeta pecuene nayabarajumaitsi mapacueniaje:
—¡Jehovánë! ¡Jehovánë!a Diosonë pinijisaë taxainaenë. Jiwi taitaxutotsoniataenë. Xanë raja asiwaya pexaniacuenia tayawenonaenë, asiwaya tataeyabiabinë. Jiwijawabelia bepijia apota-anaepanaenë nejamatabë-itonotabiabi-ata. Bajarapacuenia taxaniajainë-ata daxitacuenejawalia. 7 Ta-asiwajamatabëcuene apotanetowerewerecaenë. Nexata, xanë caejamatabëcuene xainajë tabejiobiataenexa pepobajayajebi jiwijawabelia, milnëta penaexanaponaewi pemomoxibitsaëtojawabelia, bajarapacuenia tasiwajamatabëcuenecaewabiabinë pamonae pijaneconi pexanaewi, pamonae apotanejumecowënëtabiabiwi, pibisiacuene pexanaewi-ata. Itsiata baitsi jane, bajarata-itsitsaponaponaenë-ata, apotaenë tsane aneconijibia pijaneconi pexainaejiwiyo naneconitsiaya-exanaenejewanë, bepianeconijibinëcuenia tataenexa. Biji rajane, naneconitsia-exanaenajë pajiwi pijaneconi pexainaejiwi, bajarapajiwi pijaneconi tsijumajopaenatsi pexijawabelia, pemomoxijawabelia, pemomoxi pexi, pemomoxijawabelia-ata tsaponae, penaexanaponaewi cuatro papemomoxibitsaëtobejejawabelia. Daxita bajarapamonae pemomoxi pexijawabelia naneconitsia-exanaenajë pijamonae pijaneconijamatabëcuene yabara —nacueneyabarajai Jehová.
8 Moisés nexata bepijiayo irataeya pitabarata bocajunua, pitapapatsijawa irabereca. Nexata, Jehovájawabelia najamatabëcuene-itajëtsiaya yaiyataeya bocajunua. 9 Moisés jumaitsi:
—¡Tajatuxanenë! ¡Tajatuxanenë! ¡Itsa pepacuene xamë nitaxutuabarëyamë, nexata paneyajawamëre! Pacuenia jumaitsimë xaniajamë. Pepacuene cajena mapamonaeje ajamatabëcuenetaja pecajumecowënëtsiyaniwa. ¡Itsiata baitsi jane, panesiwajamatabëcuenecaeware patajaneconi pata-exanaejawa, pibisiacuene pata-exanaeneconimi! ¡Panetaemanua bepanijajiwinëcuenia! —jai Moisés pewajëtsijawata. Jehová jejai. 10-26 […]
27 Icatsia penajumeliwaisicajonecujinae, Israel-pijinë pemomoxijawabelia, xuacujinae Jehová jumaitsi Moisés-jawabelia:
—¡Yaquinare jane baja mapaliwaisianëje, tsipaji raja bajarapaliwaisianëta najamatabëcuene-itajëtajë pexaniajailiwaisicuenia tacanaliwaisicajonejawa xamëjawabelia, israelitawijawabelia-ata, pacuenia bajarapaliwaisita panejumecowënëtawanapaejitsiamë! —jai.
28 Nexata, Moisés bajarajotatsia yajawaponapona Jehová cuarenta pamatacabibeje, cuarenta pamerawibeje yajawa. Bajarajotatsia, ponapona xaenejewa, apaenejewa-ata itsacuenemerayo. Yaquinarubanua bajarapa-ibopanatabeje jumawelia penaliwaisicajonejawa israelitawijawabelia, diez paliwaisibeje pitorobiliwaisianë, petonajumeliwaisicopatsijawa. 29 Peyaquinaeweretsicujinae, bajaraponë runaica Sinaítsutojumawetsica israelitawi pijataxunaebonëjawabetsica. Cobenarunaicanua pa-ibopanatabeje rubena Jehová petonajumecopatsiliwaisianëtsi. Pebarëcuaicuaijaicujinae Jehová, Moisés itabarabinejai. Itsiata, Moisés itsa baja runaica apona-itabarayapëtae pitabaraniweniwenaejawa. 30 Aarón, bajarapacuenia daxita Israel-pijinë pemomoxi, itsa tane Moisés pitabaraniweniwenaejaijawa, cujunawa pimoxoyotsijawa. 31 Moisés nexata junata Aarón, daxita pamonae penamatacaitorobiwi pijamonaetuatuajëta, pimoxoyotsinexatsi bajaraponë itsajota nuca. Moisés nexata barëcuaicuaijai bajarapamonaejawabelia. 32 Bajaraxuacujinae, cae-epatoyocujinae, daxita Israel-pijinë pemomoxi-ata cujibarena pimoxoyotsinexatsi. Moisés nexata tsipaeba paliwaisianë tonajumecopatatsi Jehová petsutojumatatsia. 33 Moisés baja itsa najumewereta pecuaicuaijaijawa bajarapamonaejawabelia, nexata xuacujinae na-itabara-acataxuaba pepanata.
34 Nexata, pamatacabi Moisés joneyabiaba Jehová pijacarpabojawabelia pebarëcuaicuaijaitsabiabinexa Jehovájawabelia, bajaraponë na-itabara-isinabiaba bajarapapana pepitsapaejawabelia. Pebarëcuaicuaijaicujinaetsi Jehová, bajaraxuacujinae, bajaraponë tsipaebabiaba icatsia daxita Israel-pijinë pemomoxijawabelia pacuenia Jehová yajawanajumecopatatsi. 35 Moisés pewecuapitsapaecujinae Jehová pijacarpabowecua, daxita bajarapamonae itsa taeyabiabatsi Moisés pitabaraniwejaijawa, nexata Moisés pitabaraniwejaijawa yabara na-itabara-acatabiaba pepanata. Bajarapacuenia bajaraponë exanabiaba paepatowajëtoponapona abaxë bajarapamonaetuatuajëta. Icatsia bajaraxuacujinae, itsa pona pebarëcuaicuaijainexa Jehová, bajaraponë na-itabara-isinabiaba bajarapapana.