Israel-pijinë pemomoxituatuajëta Dioso apopeyajawanexatsi
33
Bajaraxuacujinae, Jehová jumaitsi Moisés-jawabelia:—Majotawecuaje barëpitsapaename israelitawi, pamonae jutame Egipto nacuajawawerena, nebarëponaenexa pa-irajawabelia najumecapanepaeya jumaitsinë tarajutsinexa Abraham, Isaac, Jacob-pijinëjawabelia-ata, pejinawanapaenexa pemomoxi bajarapanacuata. 2 Itsiata baitsi jane, pacatsiwajënaenamataxainaeya-exanaenatsi xanë taja-ángelnë, bajaraponë papecawecuatorotsinexa bajarapanacuata pejinawanapaewi, cananeomonae, amorreomonae, heteomonae, ferezeomonae, heveomonae, jebuseomonae-ata. Bajarapamonae jutsia-exanaenajë bajarapanacuawecua, bajarapamonaemi pijanacuamita juya panejinawanapaenexa tajumaitsicowëya panijasalinaiwimijawabelia. 3 ¡Paponare pa-irabelia nawita pexaecuene! Itsiata baitsi jane, xanë apopacayajawa tsanetsi paxamëtuatuajëta, tsipaji belia namuto-epatualia pacawerebiabijitsipatsi, tsipaji bitso paxamë pane-ajamatabëcuenetajawi patanejumecowënëtabiabiyaniwamë —jai Jehová.
4 Nexata, bajarapamonae itsa jumetane bajarapaliwaisi Moisés petsipaebijawatatsi, apotsixanepanaetsi. Bitso najamatabëxainaeya jinawanapa. Nexata, caejiwiyo-ata apoponaponae naitabëtsiaya, picani panaitabëtsijawanëta naitabëtabiaba. 5 Bajarapacuenia najamatabëxainaeya jinawanapa, tsipaji Jehová pejumaitsijawa Moisés-jawabelia: «¡Jumaitsimëre mapacueniaje israelitamonaejawabelia: ‘Bitso cajena paxamë pepacuene pane-ajamatabëcuenetajawi tsawanapae! Nexata, itsa xanë pacayajawa tsipaetsi cae-epatoyo-ata, pacawerebiabijitsipatsi padaxitamë. Aeconoxaeta, panawecuajebianame xuanë naitabëtsiaya pacajinawanapabiabame. Bajarapacuenia pajinawanapaename panaitabëtsinejewamë, tanajamatabëweretsijawabelia xua jamatabë-exanajë paxamëjawabelia,’ jamëre!», pejaijawa Jehová.
6 Bajarapaliwaisi pejumetaecujinae Horeb-tsutojawata,a israelitawi nexata baja copabawanapa penaitabëtsijawami.
Moisés tixita israelitawi pijataxunaebonëwecua pacarpaboyota wajëcabiaba Diosojawabelia
7 Nexata, Moisés wecuatixita Israel-pijinë pemomoxi pijataxunaebonëwecua penawajëcabiabicarpaboyo,b icatsia penacuenebanutsinexa bajarapamonae saicaya pijataxunaebonëwecua. Bajarapacarpaboyo itsajota nuca wënëruba «petonacaetuatabiabiboyo penawajëcabiabinexa Jehovájawabelia», pejaiwënë. Nexata, pacujinae pajiwiyo jitsipa Jehovájawabelia liwaisi peyanijobijawa, nexata ponabiaba bajarapacarpaboyojawabelia. 8 Nexata, itsa Moisés ponabiaba bajarapacarpaboyojawabelia, daxitajiwi nubenabiaba wayafuabelia pijabonë baupamuxuneneta, caejiwi canacujitsia. Bajarapamonae pëtaeyabiabanubena Moisés pejonejawa bajarapaboyojawabelia. 9 Moisés pejoneyabiabicujinae bajarapacarpaboyojawabelia, nexata piapiapajubo benaesituruto runabiabica bajarapacarpaboyo jumabetsica. Bajaraxuacujinae, bajarapaboyopijibaupamatatsënëta imoxoyojawata rucabiabajopa. Nexata, bajarapaepatota Jehová barëcuaicuaijai tsabiabi Moisés. 10 Paepatota pijinia, bajarapamonae taeyabiaba bajarapapiapiapajubojawa imoxoyo perucajopaejawa bajarapacarpaboyo baupamatatsënëta, nexata pijabonë baupamuxuneneta pematabacabëta nubenabiaba yaiyataecuenia, penajamatabëcuenerajutsinexa Jehovájawabelia.
11 Bajarapacarpaboyojawata, Jehová, Moisés-beje, nabarëcuaicuaijaibeje tsabiabi pijacujaya bepenayapëtaenëbejecuenia. Pebarëcuaicuaijaicujinae bajaraponë nawiatabiaba pijataxunaebojawaberena. Itsiata baitsi jane, peyawenonabiabinëtsi Josué, Nun pexënato, bajaraponë bajarapabo-ënëwecua apopitsapabiabi.
Dioso icatsia najumecapanepaeya jumaitsi peyajawanexa Israel-pijinë pemomoxi
12 Moisés nexata jumaitsi Jehovájawabelia:
—Tajatuxanenë, xamë nejumaitsimë picani mapamonae tamatacaponaenexa Egipto nacuawerena nerajutsiapaebi-iranexajawabelia. Jane baitsi itsiata, xamë aponejumaitsimë ponë icatsia neyajawa-itorobijitsiamë tanebarëmatacaponaenënexa. Asiwaya netaeyabiabame. Benijamonaenënëcuenia netaeyabiabame. Neyapëtaeya-exanamenua tanesiwajamatabëcuene-itaxutuajamatejemajawamë xua cato-exanaponaponatsi. 13 ¡Itsa pepacuene xaniajamë tanesiwa-itaxutuajamatejemajawamë, nexata neyapëtaeya-exanare nesiwanajamatabëxainaeliwaisi bajarapamonae yabara, jamatejema pijinia xanë tacanamata-ëjëtsinexa pataneyawenonaejawamënexa! ¡Bajarapacuenianua, xaniawaetsia netsitajëre tacato-exanaenexa nejitsipaecuenia, aponejitsipaecuenia ta-exanaeyaniwa! ¡Nexata, mapamonae bejiobiataema, tsipaji raja xamë nijajiwi! —jai Moisés.
14 Nexata, xuacujinae Jehová jumecanawiatatsi:
—¡Jamatejemamëre! Xanë raja tajacuata cayajawa tsanetsi. Bajarapacuenia pacayawenonaenatsi panecuene-amoneyabinexa panijawajabitsaëwi, jamatejema panejinawanapaenexa bajarapanacuatalia —jai Moisés-jawabelia.
15 Itsiata baitsi jane, Moisés mapacuenia jumecanawiataje:
—¡Itsa baitsi jane, xamë apopaneyajawajitsiamë nijacujaya, pëtsa nexata panecapitsapame majotawecuaje! 16 Tsipaji itsa xamë apopaneyajawajitsiamë nijacujaya, ¿denexata pacuenia payapëtaenajë itsamonaewecua patanesiwajamatabëcuenebarëyajawamë? Matapania itsa paneyajawamë, bajarapacuenia nacuene-itajëtsianame daxitajiwijawabelia patane-itapetsijawamë daxitajiwiwecua panijajiwinexanë, saicaya mapanacuata pejinawanapaewiwecuaje —jai Moisés.
17 —Je, xanepana. Xua xamë daxita nejumaitsimë, nexata xanë exanaenajë, tsipaji xanë xamëjawabelia asiwaya catanetsi, betajamonaenëmëcuenia tacataeyabiabinexa. Casiwajamatabëcuenebarëyatsinua —jai Jehová Moisés-jawabelia.
18 Moisés icatsia orijibia jumaitsi:
—¡Netocopare tataenexa nijanivenivenaecotia! —jai.
19-20 Itsiata baitsi jane, Jehová jumecanawiatatsi mapacueniaje:
—¡Jume raja! Xaniajanë pacuenia cajumaitsijitsiatsi. Itsajiwi-ata cajena apocuenecaëjëpaetsi tane-itabarataenexa,c tsipaji itsa netaejitsipa tëpaejitsipa. Itsiata, xamë catocopatsianatsi netaenexa daxita taca-itaxutotsoniataejawa. Bajarapacuenianua nejumetaename Jehovánë, tacanawënëpaebijawa. Xanë baitsi pajiwi jitsipajë taitaxutotsoniataenexa, bajarapajiwi itaxutotsoniataenajë. Pajiwi-ata jitsipajë asiwaya tayawenonaejawa, asiwaya yawenonaenajë —jai Jehová Moisés-jawabelia.
21 Icatsia, Jehová jumaitsi:
—¡Taema! Tamuxuneneta itsajota xanë nucajë. Bajarajota, nuca iboyenepanawajujawa. ¡Nucare bajarapa-ibotojumata! 22 Nexata, paepatota tacotia ca-imoxoyotanajetaruca, xanë canutsianatsi bajarapa-ibowajujawata. Nexata, tacobeta cayapijiwi-acatsianatsi ta-itabaraniweniwenaecotia pecaxenetsijawabelia. 23 Bajaraxuacujinae, nacobetixitsianajë xamëwecua paepatota caxenetatsi. Nexata jane baja, nejumapënëtaename. Itsiata baitsi jane, aponitabaracotiataemë tsane —jai Jehová.