Israel-pijinë pemomoxi nato-exananuta oronanitota pexanaebecerro
32
Itsa baja israelitamonae tane Moisés abaxë piajibitsarucaejawa bajayajebi petsutojawabetsia runaenejewatsica, nexata bajarapamonae nacaetuata matatoyorotsia Aarón-jawabelia pejumaitsinexa:—Paneto-exananutsianame itsadiosonë wajanacamatacaponaenënexa, tsipaji Moisés, wajanacajutsinë Egipto nacuawecua, apoyapëtaetsi xua tocopiapatatsi. Ajibi tsipae pematatsënëa wajanacamatacaponaenënexa —jai bajarapamonae.
2 Nexata, Aarón jumaitsi bajarapamonaejawabelia:
—Je xanepana. Nexata, pawecuanotsianame panijawajiwi, panexënatonëxi, panexënatowaxi-ata penatsimuxurubi-arete orojawanë. Nexata, panetocapatsianame xanëjawaberena —jai Aarón.
3 Nexata, daxita bajarapamonae jejai. Penatsimuxurubi-arete orojawanë nawemuxujona, pecaetuatsinexa. Nexata, bajaraxuanë tocapata Aarón-jawaberena. 4 Bajaraponë nexata pita. Bajaraxuacujinae, bajarapa-orojawanë seta isotota, pepora pexanaenexa. Bajarapasetsi-orojawa epana becerrojumapecataeya petsiwajënae-exanaejawabelia. Bajaraxuacujinae, pecainaecujinae, bajaraponë canacueneba martillota beformón-jawata, xaniawaetsia becerro jumapecataeya pebitocuenia pejëpaeyabinexa pe-ucubaponaejawata. Nexata, Israel-pijinë pemomoxi bajaraponëyo petaejawata najumaitsi:
—Tajamonae, waxaitsi Israel-pijinë pemomoxitsi, maraponë wajadiosonëje, ponë wajanacajutsinë Egipto nacuajawawerena —najai tsaponae.
5 Aarón itsa jumetane bajarapamonae pejumaitsitsaponaejawa, Aarón nexata tonacuenebanuta altar-jawa bajarapajumapecataebecerro pitabarata. Bajaraxuacujinae, peweretsicujinae, bajaraponë ayaijumeta jumaitsi jiwijawabelia:
—Tajamonae, merawia to-exanaenatsi pijafiesta pewënëta jehováa —jai.
6 Itsamatacabi pepobajayacunua, bajarapamonae capata dajubimonae petotajuitsinexa altar-jumata daxitanë, pejamatabëcuenecaewia-exanaenexa pijaneconi. Itsadajubi pijinia totajuita caejamatabëcuene penajuaxainaexae bajarapajumapecataenëjawabelia. Petotajuitsicujinae, taxuxuaba bajarapajumapecataenë pemuxuneneta pexaejawa, pematawëjëa-apaejawanua piataneranë. Bajaraxuacujinae jane baja, nonobapuna. Naitacanitsiaya namuxusita pebarëyanexa, bajarapacuenia taxuxuaba orijibia pibisiacuene pexanaponaenexa. 7 Bajaraxuata, Jehová jumaitsi Moisés-jawabelia, Sinaítsutojumawecua perunaenexatsica:
—¡Naxatsia! ¡Runaremeca baja nijamonaejawabereca, tsipaji raja pamonae jutame Egipto nacuawecua najamatabëcuenebijiana xanëwecua, pibisiacuene pexanaenexa! 8 Bepijiayo saya bajarapamonae wecuanatsata xanë paliwaisi tonajumecopatajë. Nexata, bajarapamonae nato-exana pesetsi-oronanitonë becerrojumapecataenë pijadiosonënexa, pematabacabëta yaiyataecuenia penawajëcaenexa Diosowecua. Bajarapacuenia totajuitanua dajubimonae. Nexata, pexaniacuenia pewënëxaniatsijawata najumaitsi tsaponae bajarapajumapecataenë yabara: «Tajamonae, waxaitsi Israel-pijinë pemomoxitsi, mara ponëje wajadiosonë, ponë wajanacajutsinë Egipto nacuajawawerena», najai tsaponae —jai Jehová Moisés-jawabelia.
9 Jehová orijibia jumaitsi Moisés-jawabelia:
—Xanë yapëtaniji bajarapamonae pitsiwicuene. Saya piajamatabëcuenetajawi tanejumecowënëtabiabinexa tacanajumecopatsiliwaisi. 10 Bajaraxuata, aeconoxae necuenecopatsianame tawerebiabinexa, tanacuene-itajëtsinexa xanë ta-anaepanaejawa ayaicuenia bajarapamonaejawabelia. ¡Pëtsa necuene-itawetame! Necopatsianame xanë tajitsipaecuenia ta-exanaenexa bajarapamonaejawabelia. Itsiata baitsi jane, xamëjawawerena nemomoxi capitsapaenajë ayainacuaxanetopijiwinexa, bajarapamonae tajajiwinexa —jai Jehová.
11 Moisés itsiata yapijiwicuaicuaijai ajumesaëya Jehovájawabelia perunaewajënaetsica. Jumaitsi:
—Jehová, ¿dexuajitsia xamë nacuene-itajëtsijitsiamë bitso nebara-anaepanaejawa nijajiwijawabelia? Xamë raja bajarapamonae jutame Egipto nacuajawawerena pinijinecuenesaëta nitajëtsicuenia pecacuenecaëjëpaenëcuene. 12 Apoxanepanae newerebiabijawa nijajiwi, tsipaji Egipto nacuapijiwi xamë yabara jumaitsi tsipae: «¿Yeera? Jehová juta Israel-pijinë pemomoxi mapanacuawecuaje pewerebiabinexa petsutonacuajawatalia, pewecuawerebiabinexa mapanacuaje», jai tsipae xamë yabara. Apoxanepanae ne-exanaejawa bajarapacuenia. ¡Jamatabëcuenecaeware baja nebara-anaepanaejawa, pibisiacuenia nesiwanajamatabëxainaejawa! 13 ¡Najamatabënapire xua bajayatami nijajiwimëjawabelia najumecapanepaeya jumaitsimë, Abraham, Isaac, Israel-banajawabelia! Bajarapamonaejawabelia najumecapanepaeya jumaitsimë mapacueniaje: «Cayawenonaenatsi nemomoxi penaexanaponaenexa bitso ayaibitsaëtoxaneto. Pacuenia athëbëtatsia perubenaejawa tulupu jiwi aponamata-ëjëtsicapanepae, bajarapacuenia pitsinexa. ¡Daxita mapa-iraje pacarajutsianatsi paxamënexa, panemomoxi pecanacopataponaenexa panewënamuto pejinawanapaenexa daxitamatacabijawabelianexa», nejaijawa najamatabënapire bajarapamonaemijawabelia! Nexata, nejumaitsicowëya xanepana ne-exanaejawa —jai Moisés peyapijiwicuaicuaijaijawata bajarapamonae.
14 Nexata, xuacujinae Jehová najamatabëcuenecataita papibisiacuene picani siwanajamatabëxaina peto-exanaenexa pijajiwijawabelia. 15-16 Nexata jane baja, Moisés runaica bajarapatsutojumawetsica. Bajaraponë catsica anija-ibopanayobeje, Dioso pijacobecujaya peyaquinae-ibopanayobeje daxitayenepananeniabeje, daxita petonajumecopatsiliwaisianëtsi.
17 Moisés baja patajopa itsajota Josué ewetsiaponaponab pajubobëxëpanajawawetsia. Nexata, bajaraxuacujinae najuarunaicabeje. Itsa imoxoyotanajetarucabeje pijataxunaebojawabetsica pepatsinexabeje, Josué jumetane pewawajaijawa bajarapamonae. Nexata, jumaitsi Moisés-jawabelia:
—¡Najumetaema pewawajaijawa wajataxunaebojawatareca! Saya jumejëpa bepenawajabitsaëtawanapaejawa —jai Josué
18 Nexata, Moisés jumecanawiata:
—¡Jume raja! Apobepenabejamatabëcuenejumenë raja. Aponetsitajumejëpae-ata pebarëyajamatabëcuenejumenë pecuene-amoneyabixae pijawajabitsaëwi penabejawata. Bajarapacuenia apojumejëpaenua penamatanueyabijamatabëcuene pecuene-amoneyabixaetsi pijawajabitsaëwi petsimaxëpatsiwitsi. Xanë saya netsita jumejëpa peyawajibiwajianë —jai Moisés Josuéjawabelia.
19 Nexata baja, itsa patanajetarucabeje bajarapamonae pijataxunaebonëjawata, Moisés jane baja taenuta becerrojumapecataeya pexananutsinë oronanitota. Tanenua bajarapamonae petoyawajibanubenaejawa. Bajarapaepatota, bitso Moisés anaepana ayaicuenia. Nexata, payaquinae-ibopanabeje cobenarunaica Sinaítsutojumawetsica, irabelia bixanaxuaba. Bajarapa-ibopanamibeje toxotoxocajunuabeje. Bajaraxua toxobiaxuaba Sinaítsutotabujawata. 20 Bajaraxuacujinae, Moisés wecuapita itsajota nuca bajarapabecerrojumapecataeya pexananutsinë. Bajaraxua nexata, isotojawabelia seta pepora pexanaenexa. Pesetsicujinae, penanito penaexanaejawami caquiata pepabeno pexanaenexa. Bajarapabeno pexanaecujinae, merajawabelia tsitawenowenota. Bajarapamera apaeya-exana israelitamonae. Nexata, bajarapamonae bajarapa-orobenota pematajërëatsimera apa. 21 Moisés nexata jumaitsi Aarón-jawabelia:
—¿Detsa xua pijacato-exanae mapamonaeje, xamë juya pinijineconi neto-exanaenexa? —jai Moisés.
22 Nexata, Aarón jumecanawiata Moisés:
—¡Tajatuxanenë, pëtsa anaepaname xanëjawaberena! Xamë yapëtaneme xaniawaetsia pacuenia bajarapamonae caematacabi canacujitsia najamatabëxainabiaba pibisiacuene pexanaenexa. 23 Tsipaji bajarapamonae nejumaitsi mapacueniaje: «¡Paneto-exanare diosonë, ponë wajanacamatacaponaenënexa, tsipaji apoyapëtaetsi xua tocopiapatatsi Moisés, ponë picani nacajuta Egipto nacuajawawerena!», nejai tsaponae. 24 Nexata, xanë jumaitsinë bajarapamonaejawabelia: «Pamonae xaina orojawanë pawecuanotsianame, panecapatsinexa xanëjawaberena», janë bajarapamonaejawabelia. Nexata, bajarapamonae bajaraxuanë nerajuta. Bajaraxuacujinae, xanë setajë bajarapa-orojawa isotota. Nexata, bajarapacuenia naexana becerrojumapecataenëcuene pijacujaya —jai Aarón najumetsënëtsiaya.
25 Nexata, Moisés cuenetane israelitamonae pibisiacuene pexanawanapaejawa, tsipaji Aarón cuenecopata bajarapacuenia pexanaenexa. Nexata, Moisés wënëca-ura pewënëliwaisicapo̱naeyaniwatsi pijawajabitsaëwi. 26 Nexata, bajaraxuacujinae Moisés pona penucaenexa panamuto cuaibopata bajarapamonae pijataxunaebojawaberena. Bajarajota nexata, jumaitsi tsanucae:
—Pamonae Jehová pejitsipaewi pejumecowënëtsinexa, bajarapamonae xanëjawaberena nanubenae —jai.
Nexata, daxita Levípijinë pemomoxi jejai. Nanubena Moisés pemuxuneneta.
27 Nexata, Moisés jumaitsi Levípijinë pemomoxijawabelia:
—Jumaitsi raja mapacuenia Jehová, waxaitsi Israel-pijinë pemomoxitsi wajaDioso: «Paxamë, caenë canacujitsia, pana-epacëbianame panija-espadanë. Nexata, xuacujinae paponaename panijataxunaebonëjawabelia, paneponaenexa caecarpabojawa canacujitsia, bajarajota panebeyaxuabaponaenexa pebijiwi panijamonaejiwi, paneyapëtaejiwi, panemuxuneneta pejinawanapaewi-ata. Itaxutejema pabeyaxuabaponaenamec daxita panijataxunaebonëjawa», jai Jehová —jai Moisés Levípijinë pemomoxijawabelia.
28 Nexata, Levípijinë pemomoxi exana pacuenia Moisés itorobatsi Jehová. Bajarapamatacabita, beyaxuaba bejamatabëcujiru tres mil ponëbeje. 29 Nexata, xuacujinae Moisés jumaitsi bajarapamonaejawabelia:
—Ajena paxamë Levípijinë papemomoximë panajamatabëcuene-itajëtame Jehová papeca-itapetsiwi papijasacerdotewinexamë, panejumecowënëtsixae panebeyaxuabaponaejawata panijamonaejiwi, panexijiwi-ata, pabejiobiataenejewamë. Nexata, ajena Jehová pexaniacuenia pacayapëtaeya-exana papecayawenonaeyapaebijawa daxitacuenejawalia —jai Moisés.
30 Itsamatacabijawabelia, icatsia Moisés jumaitsi daxita Israel-pijinë pemomoxijawabelia:
—Paxamë cajena bitso pinijineconi panatsi-exaname Jehovájawabelia. Itsiata baitsi jane, xanë junaeniajë Sinaítsutojumabetsia ajenaconoxae itsajotatsia ponapona Jehová, bajarajotatsia patacatowajëcaenexa, papecabarajamatabëcuenecaewinexa panijaneconi —jai Moisés.
31 Nexata, Moisés icatsia pona Sinaítsutojumabetsia, Jehovájawabelia pejumaitsinexa:
—Pepacuene cajena mapamonae Israel-pijinë pemomoxi exana pibisiacuene. Nexata, natsi-exana pinijineconi xamëjawabelia, pexanaexae oronanitota pexanaediosonë. 32 Xanë itsiata pexaniacuene cawajëtatsi bajarapamonae ne-itaxutobejiobiataenexa, nesiwajamatabëcuenecaewinexa pijaneconi. Itsa aposiwajamatabëcuenecaewijitsiamë, nexata xanë-ata newënë-iquinaename nijabaxutowecua, pabaxutota wënëyaquinarubabiabame nijajiwi —jai Moisés petowajëtsijawata israelitamonae yabara.
33 Itsiata, Jehová jumecanawiata Moisés-jawabelia mapacueniaje:
—Pajiwi pibisiacuene exana xanë wënë-iquinaenajë tajabaxutowecua. 34 Barëponaename tobejena panacuajawabelia imata catsipaebatsi nebarëponaenexa. Xanë raja taja-ángelnë itorobianajë pecamatacaponaenexa. Itsiata, pamatacabi tocopiapatsianatsi tananeconitsia-exanaenexa pijaneconijamatabëcuene, bajarapamatacabita xanë naneconitsia-exanaenajë pibisiacuene pexanaexae —jai Jehová
35 Nexata, Jehová tocopatsia-exana pinijidomae petëpaenexa Israel-pijinë pemomoxi, penawajëcaexae becerrojumapecataeya pexanaenëjawabelia, Aarón ponë peto-exananutsinë.