Dioso itapeta anijanëbeje penamatacaitorobinëbejenexa penacuenebijawa Dioso Pijacarpabo
(Éxo. 35:30-36:1)
31
Jehová xuacujinae icatsia jumaitsi Moisés-jawabelia:2 —¡Nejumetaema xaniawaetsia! Xanë itapetajë Bezaleel, Judápijinë pemomoxijawawerena pepitsapaenë. Bajaraponë Uri pexënato, Hur pemomo. 3 Bajaraponë xanë Diosonë tajacuata jamatabëcuenecaëjëpaeya-exanajë Espíritu Santotaa peyabaracujaninexatsi, xaniawaetsia petsita-exanaenexa, xaniawaetsianua pebarënacuenebinënexa, pejamatabëcuenecaëjëpaenexatsi penacuenebijawata pexanaejawa daxitacuene pexaniawiriajawanë. 4 Nexata, bajaraponë pecujaninëtsi tsaponaponae pexanaenexa daxitacuenejawanë. Nexata, cuenecaëjëpatsi pecanacuenebijawa oronanitonëta, palatananitonëta, broncenanitonëtanua. 5 Nexata, bajaraponë petsiyapëtaenënua pexaniacuenia piojobinexa butujaiya pejucaenexanua pexania-itabëtsi-ibotoxi.b Bajarapacuenia petsiyapëtaenënua oronanitota pecatsanaejawa bajaraxuanë petsiwajënaefera-exanaejawata. Pecujaninëtsinua pexaniacuenia pecanacuenebijawa tablapanëta. Xaniawaetsia pecujaninëtsi pexanaejawa daxitawiria penacuenebijawa. 6 Nexata, bajaraponë peyawenonaenënexatsi to-itapetajë Aholiab, pexënato Ahisamac. Bajaraponë pijinia Dan-pijinë pemomoxijawawerena pepitsapaenë. Bajarapacuenianua pamonae peyawenonaewitsinexabeje jamatabëcuenecaëjëpaeya-exanajë, taneto-exanaenexa peyapëtaewicuenia daxitaxua ca-itorobatsi taneto-exanaenexamë. 7 Nexata, bajarapamonae neto-exanaena: Tajacarpaboxaneto itsajota panacaetuatabiabijitsiamë, bajarapacuenia tanajumeliwaisixaniawaetsibaulanexa patacanajumeliwaisicajonejawa pitajëtsi-ibopanabeje, bajarapacuenia pematapanua, xuanë-ata namatawenonaejitsia sacerdotewi pecanacuenebijawanënexa tajacarpabojawata, 8 bajarapacuenia pan pejebabiabimesanexa, xuanë-ata bajarapamesajawata pecanacuenebijawanënexa, bajarapacuenia pepopexania-oronanitota pexanae-itayotsicandelabrojawa, bajarapacuenia-ata pecanacuenebijawanënexa bajarapacandelabrojawata, bajarapacuenia inciensojawa petajuitabiabi-altar-jawanexanua, 9 bajarapacuenia-ata pa-altar-jawata dajubi tajuitabiabijitsia tawënëta daxita pecanacuenebijawanë yajawa, bajarapacuenia penacobequiatsiwaxixaneto palanganawënëjawa-ata, petsi-etsitabujawa yajawa. 10 Exanaenanua sacerdotewi penaxatatsijawanënexa, Aarón pijajawanë saicaya, bajarapijinia pacuenia pexinexa-ata, bajarapamonae penaxatabinexa paepatota nacuenebawanapa tajacarpabota sacerdotewicuenia. 11 Neto-exanaenanua pa-aceiterata tsimata-epanabiabijitsiamë paepatota jamatabëcuene-itajëtsijitsiamë ta-itapetsinëcuene, bajarapijinia pacuenia pexaniatuxujuwi-inciensojawanë xuanë sacerdotewi tajuitabiabijitsia taitabarata tajacarpabo-ënëjawata. Nexata, bajarapamonae bajaraxuanë exanaena daxita pacuenia xanë ca-itorobatsi ajena —jai Jehová. 12-17 […]
18 cNexata, Jehová pebarëcuaicuaijaicujinae Moisés Sinaítsutojawata, bajarajota nexata, rajutatsi anijapeyaquinae-ibopanabeje, Dioso pijacobecujaya, papanabejejawata yaquinaruta penajumecajoneliwaisid israelitawijawabelia pejumecowënëtawanapaenexatsi.