Pacuenia exanaejitsia inciensopërëtoxi petajuitabiabi-altar-nexa
(Éxo. 37:25-28)
30
Xuacujinae, icatsia Jehová jumaitsi Moisés-jawabelia:—Bajarapacuenia exanaeya-exanaename acacianaepijitablapanëta tsiquiri-altar-jawayo, sacerdotewi petajuitabiabinexa bajarapajumata inciensopërëtoxi. 2 Bajaraxuayo exanaena cuarenta y cinco pacentímetrobeje piapiajawa, bajarapacuenia-ata epatajërëtsialia, najëpaeya penacopatsinexa. Pijinia peyenepana-apiajawa athëbëabetsina xainaena noventa pacentímetrobeje. Bajarapa-altar-jawayo pexanaejawata, cae-upi canacujitsia mata-erubiana, caejawacuenia penaexanaenexa. 3 Nexata, bajaraxua jumaxatatsia-exanaename pepopexania-oronanitota, bajarapacuenia cuatro pamata-etobeje pexanaejawanë-ata. Daxita matatoyorotsia penacuenebiwi muxubërë-itane-exanaename itabëtsiaya orojawata —jai Jehová. 4-10 […]
Pacuenia caepebi canacujitsia matamotsijitsia penacapanepaematamonexa
11 Icatsia, Jehová barëcuaicuaijai Moisés-jawabelia. Jumaitsi mapacueniaje:
12 —Pacujinae namata-ëjëtsianame Israel-pijinë pemomoxi, nexata daxita nenamata-ëjëtsicapanepaecujinae caepebi canacujitsia nerajutsiana xanë Jehovánëjawaberena pijacujaya penacomuatsimatamo, pewecuapanepaenexa petëpaejawa pinijidomaeta. Bajarapamatamo pejamatabëcuene, nexata bajarapamonaejawabelia apotocopiajopae tsanetsi petëpaecuene nenamata-ëjëtsijamatabëcuene. 13 Pamonae baja namata-ëjëtaponame caenë canacujitsia nerajutsiana cinco pagramobeje palatananitonë xanë Jehovánëjawaberena, penacapanepaematamonexa. Nexata, nerajutsiana saya caesiclo epatua, pasiclo-arewejawa pacatocaëjëtatsi panecanacuenebinexa tajacarpabojawata palatananitota. 14 Daxita papebijiwi nenamata-ëjëtsiwi veinte pawaibeje pexainaewi pewajënaeyabelia, bajarapamonae nerajutsiana bajarapapenacomuatsimatamo xanë Jehovánëjawaberena. 15 Bajarapamatamo tanerajutsijawata xanëjawaberena, najëpaeya nerajutaponaena, bitso pexainaewi-ata, bepejiobiwi-ata. Nexata, itsanë-ata apotoxanepanaetsi pecunuajawa, tsiquirijawayo-ata tanerajutsinexa. Najëpaeya cinco pagramobeje nerajutaponaena. 16 Nexata, bajarapacuenia caetuatsianame bajarapapalatananitonë israelitamonae pecarajutsijawa penacapanepaematamocuenia. Nexata, bajaraxuanë canacuenebianame tajacarpabojawata. Nexata, bajarapamatamo pejamatabëcuene, xanë Jehovánë najamatabënapitabiabianajëa Israel-pijinë pemomoxi taitaxutotsoniataenexa, tanerajutsixae bajarapapenacapanepaematamo —jai Jehová Moisés-jawabelia.
Pacuenia exanaejitsia mera pe-epacanutsipalanganajawa
17 Icatsia, Jehová jumaitsi Moisés-jawabelia mapacueniaje:
18 —Bajarapacuenianua nacuenebanutsia-exanaename penacobequiatsiwaxixaneto, palanganawënëjawa, sacerdotewi penacobequiatabiabijawanexa. Exananutsiana broncenanitota. Nexata, bajaraxua nutsia-exanaename tajacarpabopanabojawata. Nexata, bajaraxua nucaena tuatuajëta piniji-altar-jawabeje, tajacarpabobejetuatuajëjawata. Nexata, bajarapapalanganajawata epacanutsiana mera, 19 bajarapamerata Aarón, pexi-ata penacobequiatabiabinexa, bajarapacuenia penataxuquiatabiabinexa-ata. 20 Nexata, bajarapamonae nacobequiatabiabiana, nataxuquiatabiabiananua pejonewajënaeya tajacarpabo-ënëabelia tanetonacuenebabiabinexa tajacuene, bajarapacuenia-ata paepatota altar-jawata pijinia tajuitabiabijitsia dajubi xanë Jehovánëjawaberena. Bajarapacuenia itsa exanaena, apotëpae tsane. 21 Nexata, bajarapacuenia nacobequiatabiabiana, nataxuquiatabiabiananua petëpaeyaniwa. Nexata, mapaliwaisije tonajumacotapajë daxitamatacabijawabelianexa Aarón, pemomoxijawabelianexa-ata tsaponae, pejumecowënëtabiabinexa —jai Jehová.
22-33 […]
Pacuenia exanaejitsia inciensopërëtoxi
34-35 Jehová icatsia xuacujinae jumaitsi Moisés-jawabelia:
—Nexata, notsia-exanaename pexaniawiriatuxujuwinanijawanë najëpaeyacuenia. Notsia-exanaename mapawiriatuxujuwijawanëje: pexaniawirianaenanijawanë, gálbanonanijawanë, manuamenepijitsele pejumabococaquiatsibenoxi, pepo-inciensopërëtuxujuwijawanë-ata. Daxita bajarapatuxujuwijawanë najëpaeya notsia-exanaename, penacuenebiwi pematajërëabinexa pexaniawiria-inciensotuxujuwijawa pexanaenexa, ëxanënexa saicaya. Nexata, bajaraxua barë-exanaena taja-inciensojawanënexa. Itsa exanaena bajarapa-inciensojawa xaniawaetsia nacuenebiana. Pacuenia pecujaniwitsi pexaniatuxujuwiranë ba-exana, bajarapacuenia nacuenebia-exanaename. 36 Nexata, bajarapa-inciensoyajuwënëjawa caquiatsiana, pepobeno pejutsinexa. Nexata, bajarapabenojawa sacerdotewi buatabiabiana pijataxunaeta tajacarpabo-ënëta peyatu-ucutsipana pënëwetsina, penajumeliwaisixaniawaetsibaula pitabarata. Itsajota baitsi pacacaxitajarababiabijitsiatsi Lugar Santísimojawata. Nexata, bajarapa-inciensojawa bitso ëxanënexa tsane. Bajaraxuata, panetoyaiyataename. 37-38 ¡Nexata, bajaraxuanë pëtsa panato-exaname cuenejëpaeyacuenia paxamë itaxutejema panecanacuenebiyaniwa! Nexata, pajiwi nato-exanaena natsiquejemaya pijacujaya penatotajuitsinexa bajarapapexaniatuxu petuxuninexa, nexata bajarapajiwiyo panawecuacapitsapaeya-exanaename panejinawanapaetaxunaewecua saicaya, apotajajiwiyajuwënënëcuenia panetaeyabiabinexa, tsipaji bajarapa-inciensojawa itapetajë ëxanënexa saicaya —jai Jehová.