José yapëtaeya-exana anijanëbeje xua yabara amajitsinaebeje
40
Bajaraxuacujinae, itsamatacabijawabelia Egipto nacua pewetsinë anaepana petonacuenebaponaponaenëtsibejejawabelia. Itsanë pijabota vinora pemitsacaponabiabinëtsi. Itsanë pijinia pan pemitsa-exanabiabinëtsi. Bajaraponëbeje apopejitsipaecuene to-exana pijatuxanenë. 2 Nexata, faraón anaepana petonacuenebinëtsibejejawabelia, ponë vinora pemitsacaponabiabiwitsi pewetsinëjawabelia, ponë-ata pan pemitsa-exanabiabiwitsi pewetsinëjawabelia. 3 Nexata, bajaraponëbeje itorobatsi wajabitsaëwi penamatacaitorobabiabinëjawabelia, bajaraponë pe-etsinexatsibeje penaneconitsiwi pejebabiabibota, pabota José ponapona. Wajabitsaëwi penamatacaitorobabiabinë pijabojawata xaina penaneconitsiwi pejebabiabibonexa. 4 Nexata, wajabitsaëwi penamatacaitorobabiabinë José tocopatatsi pewetaponaponaenexa penaneconitsinëbeje. Petocopatsicujinae, bajaraponëbeje bajayajebi ponaponabeje bajarapananeconitsiwi pejebabiabibota.5 Itsamerawi penaneconitsinëbeje najua-amajitsinaebeje. Vinora pemitsacaponabiabiwi pewetsinë amajitsinae. Bajarapijinia pacuenia, pan pemitsa-exanaewi-ata pewetsinë amajitsinae. Nexata, caenë canacujitsia, xaina saicaya piamajitsinaecuene. Bajarapacuenia caemajitsinae canacujitsia xaina xua yabara amajitsinaebeje petocopiapatsijawanexatsibeje. 6 Nexata, bajayacunua José itsa taejopalia penaneconitsinëbeje, caxitajarabetabeje bitso najamatabëxainaeya pe-ecaejawabeje. 7 Nexata, José yanijoba mapacueniaje:
—¿Detsa xuajitsia bitso paxamëbeje ajena pa-itabaranayapëtanemebeje panenajamatabëxainecaejawabeje? —jai.
8 Nexata, bajaraponëbeje jumecanawiatabeje:
—Ajena pamerawi panajua-amajitsinaenëbeje, itsiata, ajibi itsanë patanetsipaebinënexabeje xua yabara pa-amajitsinaenëbeje —jaitsibeje bajaraponëbeje.
Nexata, José jumaitsi:
—Dioso cuenecaëjëpatsi bajarapajamatabëcuene wajanacatsipaebinexa xua pa-amajitsinaemëbeje. ¡Xanë saya jamatejema panetsipaebarebeje xua pa-amajitsinaemëbeje, Dioso papecayapëtaeya-exanaenexabeje! —jai.
9-10 Nexata, vinora pemitsacaponabiabiwi pewetsinë tsipaeba piamajitsinaejawa Joséjawabelia mapacueniaje:
—Ta-amajitsinaejawata taniji uvamacanae pexainaejawa acueyabi pamaxëranabeje. Bajarapa-uvamacanae juwapona pejanabaxu. Pitsapapona pejananamatonotsijawa-ata. Bajarapamatonomi naexana petsobia-uvaruanë. 11 Bajarapaepatota tsaena, cobenanucajë faraón pijavaso tamitsacaponabiabijawata vinora. Xanë tsaena ucutajë uvacuairuyajuwënëjawa, tamitsayujucaenexa uvabarëmenera bajarapavasojawabelia. Bajaraxuacujinae, icatsia xanë tsaena faraón-jawabelia tsicoberutajë bajarapavaso, vinora piapaenexa —jai.
12 Nexata, José jumaitsi:
—Xua xamë amajitsinaemë xaina mapajamatabëcueneje. Xua taneme acueyabi pamaxëranabeje, bajaraxua raja catsitajëta acueyabi pamatacabibejenexa. 13 Nexata, acueyabi pamatacabibejecujinae, faraón icatsia catotaena xamë yabara nenacuenebaponaponaejawa. Icatsia, faraón orijibia catocopatsiana newajënaeyabelia xamë nemitsacaponabiabinexa vinora pijavasota, pacuenia copiayami exanabiabame. 14 Pamatacabi xamë maxua catocopiapatsiana, xanë nenajamatabënapitsianame, pexaniacuene tacato-exanaejawa. Xanë pexaniacuene neto-exanaename. Neyapijiwicuaicuaijamë tsane faraón-jawabelia, tanejutsinexa mapabowecuaje. 15 Xanë raja nenacobetoxota tajanacuawecua, hebreomonae pejinawanapaenacuawecua. Apojitsipaenë matawëjëa mapabota penaneconitsiwi pejebabiabibojawata taponaponaejawa, tsipaji itsacuene pibisiacuene apo-exanaenë picani tanenaneconitsia-exanaenexa —jai José.
Nexata, bajaraponë picani jejai.
16 Bajarapaepatota, jumetane pan pemitsa-exanabiabiwi pewetsinë José xaniawaetsia petsipaebijawata pacuenia amajitsinae vinora petocaponabiabinë faraón-jawabelia. Nexata, bajaraponë jumaitsi:
—Xanë pijinia amajitsinaenë mapacueniaje. Amajitsinaenë tamatabocotota tsaena matanajetarucajë acueyabi xuabeje, bemapirejawanë-ënëta pejejawa penioponaepan pexanaejawanë. 17 Copiaya pe-ecaemapirejawa bajarapa-ënëta canajetarucajë daxitawiria pexaniapexanaejawanë galletacuenia faraón-nexa. Bajarapaepatota, tsaena athëbëwetsica pepunaewi tsimaxërunaica pexaenexa bajarapagalletajawanëmi, pexaenexa tamataponaejawami. Nexata tsaena, newemataxane —jai pan pemitsa-exanabiabiwi pewetsinë Joséjawabelia.
18 Nexata, José jumecanawiata:
—Xua xamë amajitsinaemë xaina mapajamatabëcueneje. ¡Xua taneme acueyabi bepamapirebeje nemataponaejawa pan peya-ënëaponaejawanë, bajaraxua raja acueyabi pamatacabibejenexa catsitajëta! 19 Nexata, acueyabi pamatacabibejecujinae, faraón icatsia nijacuenemi catotaena xamë yabara nenacuenebaponaponaejawami. Nexata, bajaraponë itorobiana pijajiwi pecabeyaxuabinexa. Cawësicaucutsiana bumacata naejawata athëbëwetsica. Nexata, bajarapacuenia pepunaewi cawixaena pecabeyaxuabarutsijawata —jai José.
20 Bajaraxuacujinae, acueyabi matacabita faraón fiesta exana, pijacumpleañonexa. Bajaraponë pinijipexaejawaxaneto exana daxitanexa pamonae petonacuenebiwitsi pecobena-ewetsicueniatsi Egipto nacua, pamonae-ata pejunatsiwi fiesta penataenexa, bajarapamonae penajuaxaenexa. Nexata, daxitajiwi pitabarata, faraón itoroba pijajiwi pejutsinexa ponëbeje penaneconitsinëbeje, peto-ewetsinë vinora pemitsacaponabiabiwi, bajarapacuenia peto-ewetsinë pan pemitsa-exanabiabiwi. 21 Bajarajota nexata, vinora pemitsacaponabiabinëmi bajaraponë icatsia orijibia tocopata bajarapanacuenebijawa petonacuenebaponaponaenexatsi, pacuenia copiayami ba-exanaponapona. 22 Itsiata baitsi jane, pan pemitsa-exanaewi pewetsinë tsi-itorobatsi pebeyaxuabinexatsi pewësicëtarutsicueniatsi bumacata naejawajawatsica, pacuenia baja José jumaitsi piamajitsinaejawa yabara. 23 Itsiata baitsi jane, ponë vinora pemitsacaponabiabinë, xua José jumaitsi peyapijiwicuaicuaijainexatsi faraón-jawabelia, apojumenajamatabënapitsitsi. Nacofënëta saya.