José pacuenia ponapona Potifar pijabota
39
Pacujinae José caponatsi Egipto nacuajawabelia, Egipto nacuapijinë Potifar comuatatsi Ismael-pijinë pemomoxijawabelia, ponë pecaponaenëtsijawaberena. Bajaraponë Potifar pewetaponaponaenë, penamatacaitorobinënua wajabitsaë peya-ewetsiwitsi Egipto nacua pewetsinë. 2 José, baitsi jane itsiata, Jehová yajawatsi. Bajaraxuata, daxita bajaraponë toxanepanaponatsi peponaponae-epato pijatuxanenë Potifar pijabojawata. 3 José pijatuxanenë yapëtanetsi Jehová peyajawajawatsi. Yapëtanetsinua pacuenia Jehová peyajawaxaetsi, José xaniawaetsia topitsapaponatsi daxitaxua bajaraponë ewetsia-exanatsi. 4 Nexata, bajaraponë petsitaxanepanaponaexaetsi, bajaraxuata asiwaya naëcotatsi. Nexata, belia itsamatacabi, pijatuxanenë peyawenonaenëcuenia itapetatsi, peto-ewetaponaponaenënexa pijabojawata penacuenebiwi, daxitaxua-ata xaina pecobecowë. 5 Pamatacabijawa Potifar tsicopata José peto-ewetsinexatsi pijabojawata daxitaxua yajawaxaina, nexata Jehová pexaniacuenia yawenonaponatsi Potifar José pejamatabëcuene. Bajarapacuenia daxitaxua xaina pijabojawata, xua-ata xaina wayafota pe-ubijawanë, dajubi-ata Jehová rajutaponatsi ayaijawa. 6 Nexata, José xua to-ewetaponapona, bajaraxuanë aposiwajamatabëcuenebëjai itsacuenejawayo-ata. Jamatejema saya ponapona.José raja bitso pexanianë, peyaxaniawaetsinënua. 7 Nexata, itsamatacabi Potifar pijawa jitsipatsi José. Nexata, itsamatacabijawabelia jumaitsitsi:
—¡Naxatsia! ¡Nabocare xanëjawata! —jaitsi.
8 Itsiata baitsi jane, José apojejai. Jumecanawiata mapacueniaje:
—¡Nejumetaema xamë xaniawaetsia! Tajatuxanenë raja pijawamë. Xanë majotaje tanetocopatsinë tane-ewetsia-exanaenexa daxitaxua xaina. Bajaraponë itsacuenejawa-ata aposiwajamatabëcuenebëjai tato-ewetaponaponaecujinaerena. 9 Ajibi itsanë mapabopijiwi tanejamatabëcuenematatoxenetsinë, tajatuxanenë saya caenë. Bajaraponë ne-ewetsia-exana daxitaxua xaina. Netsicopata daxita tato-ewetsinexa. Xamë pijawaxaemë, tajatuxanenë itsiata, aponetsicarucae taca-ewetsinexa caeto-ata. ¿Detsa nexata xuajitsia xanë bajarapitsipibisiacuene exanaejitsipajë, neconi tanatsi-exanaenexa Diosojawabelia? —jai José. Wecuapona baja bajarapaepatota bajarapowa.
10 Itsiata, bajarapowa bajarapacuenia ajamatabëcuenesaë tsanajetarucae caematacabi canacujitsia Joséjawabelia pejunatabiabijawa pebarëbocaenexatsi picani. Itsiata, bajaraponë apojejai tsabiabi. 11 Itsamatacabijawa José pona pijatuxanenë pijabojawabelia, itsacuenejawaxi penacuenebinexa. Bajarapaepatota pijinia, itsajiwi-ata bajarapabojawata apoponaponae. 12 Nexata, Potifar pijawa natsimaxëwaetabatsi José.
Jumaitsitsi:
—¡Naxatsia! ¡Nebarëbocare majotaje! —jaitsi.
Bajaraponë apojejai. Pewaetabanucaejawatatsi naniawelia penaxatatsijawa, bajaraponë pepitsatabijirawijawata bajarapowa wejumajonotaxuabatsi. Nexata, Potifar pijawa cobenanuca José penaxatatsijawami. 13-14 Nexata, bajarapowa itsa tane José pepitsatabijirawijawa, penaxatatsijawa pecobenanucaejawanua, nexata bajarajota, junataxuaba ayaijumeta amoneya pijabota petonacuenebawanapaewitsi.
Jumaitsi:
—¡Panejumetaema xaniawaetsia! Tamona maberenaje nacatsicapata mapitsihebreonë, bajaraponë nacaquenetsiataeya wajanacataenexa. Bajaraponë raja junua tanetaenexa bojawalia itsa caewanë, tanebarëbocaenexa picani. Jane baitsi, xanë wawajanë tsaxuabi bitso asaëya. 15 Nexata, bajaraponë itsa nejumetane tawawajaijawa daxitasaëta, bajaraponë pitsatabijirawa. Nexata, xuabatabijirawa penaxatatsiyajuwënëjawami —jai bajarapowa amoneya petonacuenebiwitsijawabelia.
16 Bajaraxuacujinae, bajarapowa xaniawaeta bajarapanaxatatsiyajuwënëjawa José pijajawa, ëpepatsijawabelia pamona pijabojawaberena. 17 Nexata, bajarapowa icatsia tsipaeba bajarapacuenia pamonajawabelia. Jumaitsi:
—Mapahebreonëje, amoneya wajanacatonacuenebaponaponaenë, ponë capatame maberenaje, bajaraponë junua wajaboyaberena tanequenetsiataenexa. 18 Itsiata baitsi jane, xanë wawajanë tsaxuabi daxitasaëta. Nexata, bajaraponë cujinaetabijirawiaya pitsatabijirawa. Penaxatatsiyajuwënëjawami xuabatabijirawa. Bajarapacuenia raja ne-exana nijajiwitonë —jai pamonajawabelia.
19 Itsa bajarapacuenia jumetane Potifar pijawa petsipaebijawatsi, nexata bajarapaepatota, José pijatuxanenë bitso anaepana. 20 Nexata, bajarapacuenia waetabatsi José. Itorobatsi pe-etsinexatsi Egipto nacua pewetsinë penaneconitsiwi pejebabiabibojawabelia. 21 Itsiata baitsi jane, penaneconitsiwi pejebabiabibojawabelia ecae-ata José, Jehová itaxutotsoniatanetsi. Yajawatsaponaetsi. Bajaraxuata, penaneconitsiwi pewetsinë tsitaxanepanatsi José pecuenejawalia. 22 Nexata, José tocopatatsi peto-ewetsinënexa daxita penaneconitsiwi pejebabiabibota. Bajarapacuenia nexata, José bajarajota penamatacaitorobaponaponaenë daxita penaneconitsiwi, xua-ata penaneconitsiwi nacuenebabiaba. 23 Daxita pacuene José to-ewetaponapona pijatuxanenë, aponamatawenonae bajaraponë petaeyabiabinexa. Aposiwajamatabëbëjai-ata. Saya jamatejema. José xua tocopatatsi peto-exanabiabinexa pexaniacuenia topitsapabiabatsi, tsipaji José yawenonaponatsi Jehová. Bajarapacuenia nexata pewajënaeyabelia xua nacueneba xaniawaetsia topitsapaponatsi Jehová pejamatabëcuene.