Judá pecopena Tamar-beje, yabara peliwaisi
38
Pamatacabijawa José canajetatsi Egipto nacuapijiwijawabelia, bajarapamatacabijawa pijinia Judá wecuanatsata daxita pematapijiwi peponaponaenexa Hirawënënëjawabelia, Adulam tomarajawata peponaponaenë. 2-3 Bajarajota peponaponaejawata, bajaraponë tane cananeowirianë, Súa, pexënatoyo. Nexata, bajaraponë coxipita. Nexata, bajaraponë itsa pijawa imoxoyoba, bajarapowa baja nacoxita. Itsa wecuanaexanatsi baja pexënatonëyo, wënëruba Er. 4 Bajaraxuacujinae, icatsia bajarapowa nacoxita. Itsa wecuanaexanatsi baja, bajaraponëyo wënëruba Onán. 5 Icatsia, xuacujinae nacoxita. Itsa wecuanaexanatsi baja, bajaraponëyo wënëruba Sela. Bajaraponëyo naexana pacujinaeta Judá barëponapona Quezib-tomarajawata.6 Bajarapanacuata ponapona Tamar-wënëwayo. Judá pexënato matapijinë Er nacojiobia-exana Tamar-jawabelia. 7 Itsiata baitsi jane, Jehová apotsitaxanepanaetsi Er, bitso piacujirubejenëxae. Nexata, bajaraponë tocopatatsi petëpaenexa. 8 Nexata, bajaraxuacujinae Judá jumaitsi pexënato Onán-jawabelia:
—Pitsianame nematapijinëmi pijawa cowëwa, wajacujirucuenia nexi nexainaenexa bajarapowajawabelia nematapijinëmi pewënëta, daxitajiwi petaenexa nematapijinëmi pepopexicuenia, bajarapacuenia pijawiriamaëto penaxuabiyaniwa —jai.
9 Itsiata baitsi jane, Onán yapëtane barëxainae-ata tsipae bajarapowajawabelia pexënato, bajaraponë apopetotaejawanexatsi pexënatocuenia. Bajaraxuata, bajaraponë paepatota pijawa itaxutuajinabiaba, bajaraponë najamatabëxainabiaba apopejitsipaejawa pijawa pecoxitsijawa. Bajaraxuata, wecuaxuababiaba irabelia pijapebicujiru, bajarapacuenia pematapijinëmi pijawiriamaëto penacopatsiyaniwa bajaraponë pejamatabëcuene. 10 Itsiata baitsi jane, Jehová bitso apotsitaxanepanaetsi xua Onán exanaponapona pijawajawabelia. Nexata, bajaraponë-ata tocopatatsi petëpaenexa. 11 Bajaraxuacujinae, Judá jumaitsi pecopena Tamar-jawabelia:
—Ponaponaename abaxë axa pijabota amona pecawecuatëpaewacuenia, taxënato abaxë Sela penaweretsinëjawabelia —jai. Bajarapacuenia Judá jumaitsi, tsipaji bajaraponë jamatabë-itsi Sela yabara: «Belia, tëpaejitsipa bajaraponë-ata, pacuenia pematapijinëmibeje tëpa», jamatabëjai. Nexata, bajarapacuenia Tamar pona paxa pijabota peponaponaenexa.
12 Bajaraxuacujinae, ayaibexëacujinae, Judá pijawa tëpa, Súa pexënatoyo. Bajaraponë baja itsa copata pijawami pewënajamatabëxainaeya peponaponaejawa, nexata bajaraxuacujinae, pona Timnat nacuajawabelia, itsajota pijajiwi jinawanapa oveja pena̱xunaewi. Bajaraponë yajawapona Hira peyanabinënexatsi, peyapëtaenëtsi Adulam tomarapijinë. 13 Itsa Tamar wënëliwaisitane paxuyo peponaejawanexa Timnat-jawabelia pena̱xunaenexa pija-oveja, 14 nexata bajarapowa najonota pejumaponaponaenawa, panawa jamatabëcuene-itajëta pamona pewecuatëpaewacuenetsi. Bajaraxuacujinae, pepana pita penaitabaracaranatsinexa, itsajiwi-ata peyapëtaeyaniwatsi. Nexata, bajarapowa wecuapona paxa pijabo, pe-ecajopaenexa Enaim tomarayo peyacaranatsijawapijibaupamuxuneneta. Enaim tomarayo eca Timnat-jawabelia peponaenamutomuxuneneta. Bajarapowa bajarapacuenia exana, tsipaji yapëtane Sela baja penaweretsinëjawa tsaponaponae. Itsiata, abaxë pijamonae apopecopatsijawatsi penapitsinexabeje paxuyo Judá pejumaitsicowëya. Bajarapowa eweteca bajarajota, paxuyo penajetarucaenexa Timnat-jawabelia peponaenë.
15 Paepatota Judá najetaruca, itsa tane bajarapowa, nexata bajaraponë jamatabë-itsi: «penaperabëcanajetabiabiwaa meta pibisiacuene pewitota pexanabiabinexa», siwajamatabëjai, tsipaji bajarapowa naitabaracaranata. 16 Nexata, bajaraponë namutowecua toquetajopa, bajarapowajawabelia peponaenexa. Bajaraponë yapëtaenejewa xaniawaetsia pecopenacuene, natsimaxëjunata pequenetsiataenexa. Jumaitsi:
—¿Ajena cae-epatoyonexa netonacopatsipame wajana-imoxoyobinexabeje? —jai Judá.
—¿Detsa xua jane nerajutsianame itsa cajumejejaitsi tane-imoxoyobijamatabëcuenemë? —jai bajarapowa.
17 —Cato-itorobianatsi tajachivobitsaëtoyajuwënënëyo pejananëyo —jai Judá.
—Je, xanepana —jai bajarapowa.
Icatsia, xuacujinae jumaitsi:
—Itsiata baitsi jane, netopuenetsianame nexaniajainexa itsacuenejawa taneto-itorobiwajënaeyamë —jai.
18 Nexata, Judá jumaitsi:
—¿Detsa xua jitsipame tacatopuenetsijawa taxaniajainexa? —jai.
—Necobenanucaejawanë. ¡Nerajure nenawësicëtsisellojawa pemaëto yajawa, nijanaebonua! —jai bajarapowa.
Judá nexata bajaraxuanë rajuta. Bajaraxuacujinae, bajaraponë bajarapowa quenetsiatane. Nexata, bajarapamatacabi bajarapowa nacoxita baja bajaraponë pejamatabëcuene. 19 Judá pewecuaponaecujinae, Tamar pijinia pona paxa pijabojawabelia. Bajaraxuacujinae, naitabara-isina penaitabaracaranatsipanami. Bajaraxuacujinae, bajarapowa icatsia naxatata panawa jumaponaponabiaba penajamatabëcuene-itajëtsinexa pamona pewecuatëpaewacuenetsi.
20 Bajaraxuacujinae, itsamatacabijawabelia peyapëtaenëtsijawabelia Judá ca-itoroba chivo pejananëyo, Adulam tomarapijinë, bajarapapetiriwa petowecuacanawiatsinexatsi picani xua topueneta pexaniajainexa. Itsiata baitsi jane, ponë ca-itoroba apocaxitajarabi bajarapapetiriwa. 21 Nexata, bajaraponë bajarajotalia yanijoba pebijiwita pamonae bajarajota pejinawanapaewijawabelia:
—¿Jica majotaje powa Enaim tomarapijiwa ecabiaba namutomuxuneneta, penaperabëcanajetabiabiwa pibisiacuene pewitota pexanabiabinexa? —jai bajaraponë bajarapamonaejawabelia.
Nexata, bajarapamonae jumecanawiatatsi:
—Majotaje cajena caewa-ata apoponaponae penaperabëcanajetabiabiwa pibisiacuene pewitota pexanaenexa —jai bajarapamonae.
22 Nexata, bajaraponë baja nawiataponarena itsajotarena ponapona Judá. Bajaraxuacujinae, jumaitsi Judájawabelia:
—Apocaxitajarabinë baja bajarapapetiriwa. Icatsianua, bajarajotalia pamonae pebijiwi jinawanapa nejumaitsi: «Majotaje cajena caewa-ata apoponaponae powa penaperabëcanajetabiabiwa pibisiacuene pewitota pexanabiabinexa», nejai bajarapamonae —jai Judájawabelia.
23 Nexata, Judá jumecanawiata:
—Jema baja xua topuenetajë canacopatsi, bajarapacuenia itsamonae wajanacawënëcapo̱capo̱naeyaniwabeje waxaitsibeje bajarapowa wajajaitarutsijamatabëcuene. Itsiata baitsi jane, yapëtaena xanë picani tacaca-itorobijawa chivo pejananë. Itsiata, xamë apocaxitajarabimë bajarapowa —jai.
24 Xuacujinae, bejamatabë acueyabi pajuametobejecujinae, itsamonae pata Judájawaberena, pejumaitsinexatsi:
—Tamar raja xamë necopena, bajarapowa itsamonae tsaena pebijiwi barëmajitabiabatsi. Nexata, bajarapacuenia pexanabiabixae, bajarapowa baja ajenaconoxae nacoxita —jai.
Nexata, bajaraponë asaëya jumaitsi:
—¡Pajure pijabowecua! ¡Patajuire! —jai.
25 Nexata, bajarapowa itsa jutatsi pijabowecua, bajarajota tonajume-itoroba paxuyojawabelia mapejumaitsijumeje: «Maxuanë ponë pijajawanëje, bajaraponë raja pejamatabëcueneta nacoxitajë. Xamë taename xaniawaetsia maxuanëje neyapëtaenexa pajiwi pijajawanë. ¿Jipatsa meta jane pijasello penawësicëtsimaëto yajawa, bajarapacuenia pijanaebo-ata?», jai bajarapowa petonajume-itorobijawata. 26 Itsa nexata Judá yapëtane bajaraponë pijajawacuene, jumaitsi:
—Bajarapowa xua jumaitsi xaniajai. Bajarapowa pexaniacuene exana xanëwecua, tsipaji taxënato Sela aporajutsinë pamonanexa tajumaitsicowëya —jai. Bajaraxuacujinae, bajaraponë baja pematatsënëa bajarapowa apoquenetsiatae.
27 Pamatacabi Tamar itajëtsijitsia pexinacuetobeje, nexata bajarapowa tsaena yacotaponapona anijajiwibeje Judá pexinacuetobeje. 28 Paepatota bajarapasapalanëbeje naitajëtsijitsiabeje, ponëyo copiaya maxëpitsapaica, pewetabiabiwa penacoxitsiwi cobetabucëta petsobiajilomaëtota. Jumaitsi: «Bajaraponëyo copiaya pitsapaica», jai. 29 Itsiata baitsi jane, bajaraponëyo icatsia namaxëcajuniya. Nexata juya, icatsia naexana juyapijinëminexa picani. Bajarajota, bajarapowa jumaitsi: «¿Detsa pacuenia catocopata xamë copiaya nenaexanaenexa?», jai. Bajaraxuata, bajaraponëyo wënëruba Fares. Bajaraponë nacopata nexata pepomatapijinë. 30 Bajaraxuacujinae, naexana matapijinëminexa, ponë cobetabucëtatsi petsobiajilomaëtota. Bajaraponëyo wënëruba Zara.