Esaúpijinë pemomoxi, yabara peliwaisi
36
Mapamonaeje penaexanaewi Esaúpijinëjawawerena. Bajaraponë pijinia itsawënë Edom. 2 Esaúa pita acueyabi powabeje pijawajiwinexa, Canaán nacuapijipetiriawi; mapamonaeje: Ada, pexënatoyo Elón, heteowirianë, itsawa pijinia Aholibama, pexënatoyo Aná, Zibeón pexënato. Bajaraponë heveowirianë. 3 Pitanua Basemat, paxuanë Ismael pexënatoyo. Ismael pexënatoyo Nebaiot, pejuyapijiwa.b 4 Esaú barëxaina Adajawabelia pexënato, ponë wënëruba Elifaz. Basemat-jawabelia pijinia barëxaina pexënato, ponë wënëruba Reuel. 5 Aholibamajawabelia pijinia barëxaina acueyabi ponëbeje, Jeús, Jaalam, Coré-ata. Daxita bajarapamonae naexana pamatacabijawa Esaú abaxë ponapona Canaán nacuajawata.6-7 Esaú, pejuyapijinë Jacob-beje, xainabeje bitso ayaibitsaëtoxaneto pijadajubi, bajarapacuenia-ata pijajiwi peyajawaponaponaewibeje. Orijibia pijadajubibitsaëtonëbeje apotoyacaëjëpaetsibeje bajarapanacuapijipo̱na. Bajaraxuata, itsamatacabi Esaú wecuawarapa pejuyapijinë Jacob. Nexata barëpona pijawaxi, pexi yajawa, pebijiwi, petiriwaxi-ata, daxita pamonaenua yajawaponapona pijataxunaebojawata. Bajarapacuenia caponanua pijadajubibitsaëtonë, daxita xua bajaraponë xaina Canaán nacuata. Nexata bajaraponë pona itsanacuajawabelia, pewecuanatsatsinexa pejuyapijinë Jacob. 8 Bajarapacuenia Esaú (ponë itsawënë Edom) ponapona petsutonënacuajawa, Seir-nacuata.
9 Mapamonaeje pepitsapaponaewinua Esaújawawerena, ponë Edom nacuapijiwi pijasalinainë, pejinawanapaewi petsutonënacuajawa, Seir-nacuata. 10 Mapamonaeje Esaú pexi pebijiwi. Penaexanaewi pijawa Adajawata, Elifaz. Pijawa Basemat-jawata pijinia naexana Reuel. 11 Pamonae pijinia pebijiwi penaexanaponaewi pexënato Elifaz-jawawerena: Temán, Omar, Zefo, Gatam, Cenaz-ata. 12 Elifaz pijawa, cotocaewi pepitsiwa, pewënë Timna.c Bajarapowa toxaina pexënato pewënë Amalec. Daxita bajarapamonae Esaú pijawa Adajawawerena pepitsapaponaewi. 13 Pexënato Reuel-jawawerena pijinia pepitsapaponaewi mapamonaeje: Nahat, Zera, Sama, Miza-ata. Daxita bajarapamonae Esaú pijawa Basemat-jawawerena pepitsapaponaewi. 14 Acueyabiwa pijinia Esaú pijawa, Aholibama, bajarapowajawawerena penaexanaewi mapamonaeje: Jeús, Jaalam, Coré-ata. Aná pexënatoyo Aholibama, Zibeón pemomoyo. Daxita bajarapamonae Esaújawawerena pepitsapaponaewi.
15-16 Mapamonaeje namatacaitorobawanapa Esaú pemomoxituatuajëta: Esaú pexënato pepomatapijinë, Elifaz, pexi Temán, Omar, Zefo, Cenaz, Coré, Gatam, Amalec-ata. Bajarapamonae penamatacaitorobiwi pijamonaetuatuajëta, Edom nacuata. Bajarapamonae raja Ada pemomoxi tsaponaerena. 17 Esaú pexënato Reuel-jawawerena pamonae namatacaitorobawanapa pemomoxituatuajëta, Edom nacuata, mapamonaeje: Nahat, Zera, Sama, Miza-ata. Bajarapamonae raja Esaú pijawa Basemat-wënëwa, pemomoxi tsaponaerena. 18 Pamonae pijinia penamatacaitorobiwi pijamonaetuatuajëta, penaexanaponaewi Esaú pijawata Aholibama, Aná pexënatoyo, mapamonaeje: Jeús, Jaalam, Coré-ata. 19 Daxita bajarapamonae Esaúd pemomoxi, penamatacaitorobiwi tsawanapae pemomoxibitsaëtotuatuajëta,e Edom nacuata.
Seir, horeowirianë, pemomoxi, yabara Peliwais
20 Seir,f horeowirianë, barëponapona pijamonae Edom nacuata, Esaú pepatsiwajënaeya. Bajaraponë pexi pebijiwi mapamonaeje: Lotán, Sobal, Zibeón, Aná, 21 Disón, Ezer, Disán-ata. Bajarapamonae penamatacaitorobiwi tsawanapae pijamonaewiriawituatuajëta, Seir-jawawerena pepitsapaponaewi, Edom nacuata pejinawanapaewi. 22 Mapamonae Lotán pexi: Hori, Hemam-beje. Pematapijiwa Lotán pewënë Timna 23 Mapamonae pijinia Sobal pexi: Alván, Manahat, Ebal, Sefo, Onam-ata. 24 Zibeón xaina anijanëbeje pexënatobeje: Aja, Aná. Aná caxitajaraba meramëthë pepitsaparucaejawa, pacujinae paxa pijaburroxi to-ewetaponapona petsewitusatonacuata. 25 Seir pexënato, Aná, xaina anijajiwibeje pexijiwibeje; pebi pewënë Disón, petiriwa pijinia pewënë Aholibama. 26 Seir pexënato, Disón-wënënë pexi mapamonae: Hemdán, Esbán, Itrán, Querán-ata. 27 Seir pexënato, Ezer-wënënë pexi mapamonaeje: Bilhán, Zaaván, Acán-ata. 28 Seir pexënato, Disán, pexi mapamonaeje: Uz, Arán-beje.
29-30 Bajarapamonae penamatacaitorobiwi Seir nacuata, horeowiriawituatuajëta, mapamatabëxëyoje: Lotán, Sobal, Zibeón, Aná, Disón, Ezer, Disán-ata; caewiriamaëto canacujitsia, penamatacaitorobiwi.
Edom nacuata pamonae pepopeyanacua-ewetsiwi tsawanapae
31 Pamonae pepopeyanacua-ewetsiwi tsawanapae Edom nacuata, Israel-pijinë pemomoxi xainaenejewa abaxë pepopeyanacua-ewetsiwitsi. 32 Mapamonaeje: Bela, pexënato Beor, yanacua-eweta Edom-jawata, Dinaba tomarata. 33 Petëpaecujinae Bela, pecowëta yanacua-eweta Jobab, pexënato Zera, Bosra tomarapijinë. 34 Petëpaecujinae Jobab, pecowëta icatsia yanacua-eweta Husam, Temán nacuapijinë. 35 Petëpaecujinae Husam, pecowëta yanacua-eweta Hadad, pexënato Bedad. Bedad cuene-amoneyaba Madián pemomoxi, Moab nacuata pejinawanapaewi. Patomarata Hadad yanacuacua-eweta, pewënë Avit. 36 Petëpaecujinae Hadad, pecowëta yanacua-eweta juya Samla, Masreca tomarapijinë. 37 Petëpaecujinae Samla, pecowëta yanacua-eweta Saúl, Rehobot tomarapijinë. Rehobot tomara eca Éufrates-mene imoxoyojawata. 38 Petëpaecujinae Saúl, pecowëta juya yanacua-eweta Baal-hanán, pexënato Acbor. 39 Petëpaëpaecujinae Baal-hanán, juya pecowëta yanacua-eweta Hadar. Patomarata yanacua-ewetaponapona pewënë Pau. Bajaraponë pijawa pewënë Mehetabel, pexënatoyo Matred, pemomoyo Mezaab.
40 Mapamonaeje Esaúpijinë pemomoxi, caepemomoxibitsaëto canacujitsia, penamatacaitorobiwi pewënëanë pecanacopabiwi, pejinawanapaenacuanëjawa-ata: Timna, Alva, Jetet, 41 Aholibama, Ela, Pinón, 42 Cenaz, Temán, Mibsar, 43 Magdiel, Iram-ata. Bajarapamonae raja penamatacaitorobiwi tsanawanapae pijamonaetuatuajëta, Edom nacuata pejinawanapaewi. Bajarapamonae pijasalinainë Esaú. Bajaraxuata, bajarapanacua canacopata pewënëcuenia Edom.