Jacob Dioso yawenonaeyapaebatsi Betel-jawata
35
Dioso jumaitsi Jacob-jawabelia:—Mabaja jotaje wecuapitsapaename neponaponaenexa Betel-jawabelia, neponaponaenexa bajarajotalia. Bajarajotalia, netonacuenebianame altar-jawa tawënëta nijaDiosonë, itsajota catsitanaitajëtatsi pamatacabi wecuanajetabijirawame nematapijinë Esaú —jai Dioso.
2 Nexata, Jacob jumaitsi pijamonaejawabelia, pamonae-ata yajawanajetaruca:
—Pacaetuatsianame daxitawiriawi jumapecataeya pexanaenëanë panexainaewi paxamë. Panawecuapenetsianame bajaraponëanë. Nexata, panawaename baja, panenaxatabinexa panija-ese panequiatsijawanë. 3 Bepijiawajëto ponaeniatsi Betel-jawabetsia itsajota nawita petsutonë. Bajarajotatsia raja, tonacuenebanutsijitsianë altar-jawa Dioso pewënëta. Bajaraponë raja neyawenonabiaba pacujinae xanë bitso najamatabëxainajë. Bajaraponë neyajawa tsabiabi itsabelia xanë ponaponajë —jai Jacob.
4 Nexata, bajarapamonae Jacob tocapatatsi bepijadiosonëcuenia petaewi pecobeta pexanaenëxi, daxitaxuanë-ata penamuxuxatabijawanë.a Jacob nexata capona pemëthëtetsinexa Siquem imoxoyojawabelia. Pinijinaebëxëpanajawata mëthëteta. 5 Pamatacabijawa Jacob barëpitsapa, nexata Dioso cujunawia-exana bajarapanacuata pejinawanapaewi, pamonae-ata namutua ena. Bajaraxuata, apopëbarajinaetsi Jacob, tsipaji Dioso junawia-exana.
6 Jacob daxita peyajawaponaewi barëpata baja Luz tomarayojawata. Bajarapatomarayo itsawënë pijinia Betel, pe-ecaetomarayo Canaán nacuata. 7 Nexata, bajarajota exananuta altar-jawa Dioso pewënëta. Bajarapataxunae wënëruba El-betel, tsipaji bajarajota Jacob tsitanaitajëtatsi Dioso pacujinae najetabijirawa pematapijinëwecua. 8 Bajarapanacuajawata tëpa Debora, Rebeca pe-ewetabiabiwamitsi. Bajarajota, mëthëtatsi Betel-imoxoyojawata pinijinaejawabëxëpanata. Itsajota mëthëta Debora, Jacob wënëruba «penamatanueyabinaebëxëpana»,b pejaiwënë.
9 Pamatacabi Jacob nawiata Padan-aram nacuajawawerena, bajarapamatacabi Dioso tsitanaitajëtatsi icatsia Betel-jawata. Nexata, bajarajota Dioso najumecapanepaeya cuene-itajëta Jacob-jawabelia peyawenonaenexa, xua-ata jumaitsitsi Peniel-jawata penajamatabënapitsia-exanaenexa. Jumaitsi mapacueniaje:
10 —Xamë picani newënë Jacob. Ajenaconoxae baja Jacob-wënë apowënëtsitecaemë tsane. Ajenaconoxae pamatacabijawaweliacujinae newënë baja tsane Israel —jai.
Nexata, xuacujinae Dioso pewënë-itothianaecujinae, icatsia jumaitsi:
11 —Xanë raja Diosonë, daxitawecua tacuenesaënë. Xainaename nexi ayaibitsaëtoxaneto, bajarapacuenia nemomoxi-ata tsane daxitanacuajawa peyacaëjëpaenexa. Itsamonae naexanaponaena nacua pe-ewetsiwi bajarapayajuwënëwi. Apocaewirianacuapijiwi nemomoxi tsane. Baitsi, xamëwecua pitsapaena itsabitsaëto nemomoxi caenacuapijiwinexa, itsabitsaëtonë pijinia itsanacuanëpijiwinexa. 12 Pa-ira rajutajë Abraham-pijinë, axa Isaac-ata, xamë-ata icatsia carajutsianatsi. Bajarapacuenia canacopatsiana nemomoxi pewajënaeyabelia —jai Dioso Jacob-jawabelia.
13-14 Dioso peponaecujinae itsajota barëcuaicuaijai tsanucae Jacob, nexata Jacob pita iboto. Mëthëtanuta iboto matacotanutsiaya nuta. Bajaraxuacujinae, bajaraponë vinorata, aceiterata-ata tsimata-epananuta bajarapa-iboto Dioso pewënëta. 15 Itsajota Dioso barëcuaicuaijaitsi Jacob, bajarapataxunae wënëruba Betel.
Raquel wecuatëpa Jacob
16 Bajaraxuacujinae, bajarapamonae wecuapona icatsia Betel nacuayo. Itsa baja to-imoxoyotsi pepatsinexa bajarapamonae Efrata tomara, bajarapamatacabi Raquel bitso wixaenotaponatsi. Bepijia apowecuanaexanaetsi. Nexata, bajarapowa namuto-epatota wecuanaexanatsi. 17 Raquel paepatota tsi-ayapëbejetsi bitso pewecuanaexanaenexatsi, nexata pewetsiwa jumaitsi Raquel-jawabelia:
—¡Pëtsa junawame ne-exanaenexa! ¡Ajamatabëcuenesaëmëre! Cawecuanaexanaejitsia raja itsapebinëyo —jai. 18 Itsa baja imoxoyo petëpaejawa, Raquel wënëruba bajaraponëyo Benonic pejumecopiarucaejumeyo. Bajarapowa bajarapanacuetonëyo wëmarëtëpa. Bajaraponëyo juya Israel nacoxiwënëruba Benjamín.d
19 Bajarapacuenia Raquel tëpa. Itsajota tëpa bajarapowa, bajarajota mëthëtatsi namutomuxuneneta, panamuto ruca Efrata tomarajawabelia pepatsinexa. Itsawënë pijinia maparucaeje bajarapatomara, Belén. 20 Israel mëthëtanuta iboto Raquel pewënëta pemëthëjawata. Bajarapa-iboto ajenaconoxae pamatacabijawa-ata abaxë nucae penayapëtaenexa Raquel pemëthëcuene.
21 Nexata, Israel najetaruca abaxë pepatsinexa Migdal-edar tomarajawabelia. Bajarajota pepatsicujinae, exananuba pijacarpaboxi peponaponaenexa cae-epatoyo. 22 Pamatacabijawa bajarapamonae jinawanapa bajarajota, Rubén matapijinë yajawamajita Bilha, paxa pijawacuenia petaewa, powa amoneya petonacuenebaponaponaewa Raquel-pijiwami. Nexata, Israel itsa yapëtane pexënato peyajawamajitsijawa bajarapowa, bajarapaliwaisi bitso amuxujitsibi.f
Jacob (Israel) pexi
Israel pexi xaina doce ponëbeje, mapamonaeje. 23 Ponëbeje xaina Leajawabelia: pexënato pepomatapijinë Rubén, xuacujinae Simeón, Leví, Judá, Isacar, Zabulón. 24 Ponëbeje xaina Raquel-jawabelia: José, Benjamín-beje. 25 Ponëbeje xaina Bilhajawabelia, Raquel pijajiwitowata: Dan, Neftalíbeje. 26 Ponëbeje xaina Zilpajawabelia, Lea pijajiwitowata: Gad, Aser-beje. Mapamonaeje Jacob-jawawerena pepitsapaponaewi, penaexanaewi bajarapamonae Padan-aram nacuajawatalia.
Isaac baja wecuatëpa pijamonae
27 Jacob bajaraxuacujinae pona, petaenexa paxa Isaac, Mamre tomarajawabelia. Bajarapatomara pijinia itsawënëbeje Arbawënë, Hebrón-wënë. Bajarajota, Abraham-pijinëmi copiaya ponapona, bajaraxuacujinae Isaac-ata. 28 Isaac baja itsa xaina ciento ochenta pawaibeje bajaraponë tëpa. 29 Tëpa pepuaperujunëyo bitso. Nexata, Esaú, Jacob-beje, paxapijinëmi mëthëtabeje. Pacuenia pijamonaemi petëpaewimi mëthëcabiaba,g bajarapacuenia bajaraponëbeje paxapijinëmi mëthëtabeje.