Jacob pexënatoyo Dina, yabara peliwaisi
34
Jacob, Leabeje, pexënatoyo Dina itsamatacabi pitsapa pesiwaxainaenexa pewënapejanawaxi bajarapanacuata pejinawanapaewi. 2 Itsiata baitsi jane, paepatota tane Siquem, Hamor pexënato, heveowirianë, bajarapatomarajawata penamatacaitorobaponaponaenë. Nexata, Siquem saya quenetsiataeyaxuaba bajarapowayo, jumejejainejewatsi. 3 Itsiata baitsi jane, bajaraxuacujinae Siquem bajarapowayo bitso ayaicuenia jitsipa. Nexata, bajaraponë jaitapona pacuenia bajarapowayo jamatabëcueneliwaisijëpaejitsiatsi pejitsipaenexatsi. 4 Nexata, penajamatabëcueneweretsicujinae, Siquem jumaitsi paxa Hamor-jawabelia:—¡Ponare, tanetojumaitsinexamë mapowaje pijamonaejawabelia tanetowajëcaenexamë, tsipaji bitso xanë jitsipajë bajarapowa tapitsinexa! —jai.
5 Jacob baja picani pexënatoyo Dina wënëtane Siquem pequenetsiataeyaxuabijawatsi. Bajarapacujinaeta-ata pijinia Jacob pexi pebijiwi cajinawanapa pijadajubi wayafuabelia. Nexata, bajaraponë jumetae-ata bajaraxua, itsiata abaxë moya. Itsaliwaisi apojumaitsi bajarapamonae patsinejewa. 6 Itsiata, bajarapaepatota Siquem-beje, paxa Hamor-beje pona Jacob-jawabelia pebarëcuaicuaijainexabeje.
7 Bajarapaepatota pijinia, Jacob pexi nawiabanajetarubena wayafowerena. Bajarapamonae nexata jumetane xua Siquem exana pejuyapijiwa Dinajawabelia. Nexata, tsi-atanetsi bitso bajarapaliwaisi bajarapamonae. Bitso anaepananua ayaicuenia bajarapaliwaisi itsa jumetane, tsipaji bajarapamonaenexa bitso topibisialiwaisitsi. Itsa jumetane Siquem Dina pequenetsiataeyaxuabijawatsi, bajarapamonae jamatabëcuene-itsi: «Bajaraponë picani itsa nacayaiyatane, caeto-ata bajarapitsicuene apobe-exanae», jamatabëjai.
8 Icatsia, Hamor barëcuaicuaijai Jacob, pexijawabelia-ata. Jumaitsi:
—Taxënato Siquem bitso bajarapowayo jitsipa. Nexata, xamë nexënatowayo, paxamë-ata papematapijiwimë, pexaniacuenia pacawajëtatsi panetocopatsinexa bajaraponë pepitsinexa. 9 Nexata, bajarapacuenia waxaitsi naexanaenatsi napenerimajiwitsi. Bajarapacuenia nexata paxamë pijinia panexi pebijiwi panecoxinotaponaena pataxënatowaxi. Paxanë-ata pijinia bajarapacuenia pataxi nacojiobaponaena paxamë panexënatowaxijawabelia —jai bajaraponë. 10 Icatsia, xuacujinae jumaitsi:
—Bajarapacuenia panacopabianame paxanëjawata wajanajuajinawanapaenexa, tsipaji raja panacuata pajinawanapajë ayainacuaxaneto itsajota paxamë-ata pacacuenecaëjëpa panejinawanapaejawa. Jamatejema pajinawanapaename bajarapa-iranëta. Bajarapacuenia naexanaenatsi wajanawijatsiwi namata-enetsia. ¡Mapanacuapiji-irayajuwënëjawa panawijarenua panenatocomuatsinexa panija-iranexa, panejinawanapaenexa! —jai Hamor bajarapamonaejawabelia.
11 Bajarapaepatota pijinia, Siquem jumaitsi Jacob-jawabelia, daxita Dina pematapijiwijawabelia-ata:
—Pexaniacuene pacawajëtatsi patanejumejejamënexa. Pacarajutsianatsi xua panewajëtame. 12 Apo-itsacuene ayaijawa panewajëtsi-atamë tsane tapitsijamatabëcuene panejuyapijiwa tanajamatabëcuenematamotsinexa, nexata amoneya pacarajutsianatsi itsacujirujawanë pematatsënëyo. ¡Itsiata baitsi jane, panetocopare panejuyapijiwa tapitsinexa! —jai Siquem.
13 Jacob nexata pexi jejai itajara yamaxë-itojorobiaya Siquem, Hamor-bejejawabelia, petoquenetsiataeyaxuabixaetsi pejuyapijiwa Dina. 14 Bajaraxuata, bajarapamonae jumaitsi:
—Paxanë apopanecuenecaëjëpae patarajutsinexa patajuyapijiwa ponë apopenabo-upiperabëcaucutsia-exanaenëjawabelia, tsipaji paxanënexa bajaraxua panetopibisiacuene. 15 Itsiata baitsi jane, paxanë pacajumejejai tsipaetsi mapaliwaisijawaliaje. Pacuenia paxanë pa-exanabiabajë, bajarapacuenia itsa pa-exanaejitsipame; baitsi caepebi canacujitsia paxamëtuatuajëta pejinawanapaewi benabo-upiperabëcaucubia-exana. 16 Nexata, bajarapacuenia pacarajutaponaejitsipatsi pataxënatowaxi panepitaponaenexa. Bajarapacuenia paxanë-ata papitaponaenajë panexënatowaxi. Nexata, bajarapacuenia paxanë pajinawanapaenajë paxamëtuatuajëta. Nexata, najuajinawanapaenatsi caebitsaëto wajanaexanaenexa. 17 Itsiata baitsi jane, itsa apopanejumecowënëtsimë tsane xua pacajumaitsitsi, panenabo-upiperabëcaucubinexa, nexata paxanë patajuyapijiwa apopacatocopatsitsi tsane. Rabiji papitsianajë, patacawecuacaponaenexa.a Nexata, bajarapacuenia-ata pacawecuapitsapaenatsi paxamë —jai bajarapamonae.
18 Hamor, pexënato Siquem-beje, bajarapajiwibeje jejaibeje, tsipaji bajarapaliwaisi tsitaxanepanatsibeje pacuenia jumaitsitsibeje. 19 Itsamatacabianë panepaponaenejewa, nexata Siquem jane baja nabo-upiperabëcaucutsia-exana, tsipaji bitso bajaraponë Jacob pexënatoyo jitsipa. Bajaraponë pijinia Siquem pijamonaetuatuajëta peyaiyataenëtsi tsaponaponae daxitawecua. 20 Nexata, bajaraponë, paxabeje, ponabeje tomara peyacaranatsijawapijibaupajawabelia, itsajota jiwi nacaetuatabiaba daxitacueneliwaisianë pecuaicuaijaitsabiabinexa. Bajarapamonaejawabelia jumaitsibeje:
21 —Marapamonae Jacob barëpexije, bajarapamonae wajanacayapëtaewi. Bajarapamonae jinawanapaejitsia waxaitsijawata. Bajarapamonaenua najamatabëxaina penawijatsinexa waja-irayajuwënëjawa, pejinawanapaenexa mapanacuajawataje. Waxaitsijawata, bitso xainatsi piniji-iranë bajarapamonae pejinawanapaenexa. Nexata, bajarapacuenia cuenecaëjëpa wajanacojiobaponaejawa bajarapamonae pexënatowaxijawabelia, bajarapijinia pacuenia, bajarapamonae-ata penacojiobaponaenexa wajaxënatowaxijawaberena. 22 Itsiata baitsi jane, bajarapamonae caebitsaëto wajanaexanaenexa, wajatuatuajëta pejinawanapaenexa, matapania jejai tsipae mapajamatabëcueneliwaisijawaliaje, waxaitsi daxitatsi pebijiwitsi itsa nabo-upiperabëcaucubia-exanaenatsi, pacuenia bajarapamonae exanabiaba. 23 Daxitaxuanë xaina, pijadajubi-ata, nexata bajaraxuanë waxaitsi wajajawa tsane. Saya caejawa waxaitsi jumejejaitsi tsane wajanabo-upiperabëcaucubia-exanaenexa naliwaisicajoneya. Nexata, bajarapamonae bajarapacuenia nacopabiana waxaitsijawata wajayajawajinawanapaenexa —jaibeje.
24 Daxita bajarapatomarapijiwi pebijiwi, pamonae pecuenecaëjëpaewitsi penawajabitsaëtsijawa, pewëjëawi penaweretsiwijawabelia, jejai pacuenia Hamor, pexënato Siquem-beje xua jumaitsi, penabo-upiperabëcaucubia-exanaenexa. Nexata, bajarapamonae nabo-upiperabëcaucubia-exana baja. 25 Itsiata, acueyabimatacabita, paepatota abaxë bajarapamonae to-atanetsi penabo-upiperabëcaucubia-exanaejawami, bajarapaepatota Simeón, Levíbeje, Jacob pexënatobeje, Dina pematapijinëbeje, pita pija-espadabeje caenë canacujitsia. Tsimaxëponabeje bajarapatomarapijiwijawabelia. Nexata, bajaraponëbeje daxita pebijiwi benajetarucabeje pija-espadanëta bajarapamonae xaniawaetsia nayamatamotsinejewa, tsipaji bajarapamonae apocuenecanaëjëtsi bajaraxua petocopiapatsinexatsi. 26 Bajarapacuenia yajawabeyaxuababeje espadata Hamor, pexënato Siquem-beje. Bajaraxuacujinae, Dina jutatsi Siquem pijabowecua. Barëponatsibeje pijanacuayaberena. 27 Bajaraxuacujinae, Jacob itsamonae pexi cotocaewi pata itsaxuayo bobena petëpaewi. Bajarapamonae jane baja, bajarapatomarapijiwimi pijajawanëmi wecuanotanajetarubena, penajamatabëcuenematamotsinexa petoquenetsiataeyaxuabixaetsi pejuyapijiwa. 28 Nexata, bajarapamonae nota pijadajubianëmi. Nota ovejamonae, vacamonae, burromonae, daxitaxuanë xaina bajarapatomarata, bajarapacuenia wayafuanëjawa. 29 Daxita pexaniacuenejawanë pecobecowëjawanëmi capona. Bajarapacuenia yajawacapona pamonae petaicaewi pejewaxi, petiriawi-ata. Nexata, bajarapamonae nacobetoxota daxitaxuanë xaina bonëjawa. 30 Bajaraponëbeje itsa patabeje boyaberena, Jacob jumaitsi pexënatobejejawabelia:
—Paxamëbeje bitso pinijiliwaisi panetsi-exanamebeje. Nexata, ajenaconoxaeta mapanacuapijiwije naca-itoyanaëcotsiana, pacuenia cananeomonae, ferezeomonae-ata. Nexata, bajarapamonae itsa nacaetuatsiana wajanacatsimaxëpatsinexa, wajanacabarënawajabitsaëtsinexa, xanë taxainaexae caejiwibeje pebijiwi patacabarëcuenecanawiatsinexa neto-ayapëbeje tsane. Nexata, nacacuene-amoneyabiana. Xanë nebeyaxuabiana. Paxamë-ata pacabena, daxita wajamonae yajawa —jai Jacob.
31 Itsiata baitsi jane, bajaraponëbeje jumecanawiata mapacueniaje:
—¿Aponacatsicarucae wajayamatamotsijawa Dina pequenetsiataeyaxuabijawami? Xamë tsaena jitsipame nexënatoyo petaenexatsi penaperabëcanajetabiabiwacuenia pewitota pibisiacuene pexanabiabinexa —jaibeje.