GÉNESIS 33

Jacob, Esaúbeje, nasiwajamatabëcuenexanepanabeje

Jacob itsa tane tajëjawawerena abaxë Esaú penajetarucaejawa pijajiwi yajawa cuatrocientos ponëbeje, nexata pewajënaeyota pexi totsana caewa canacujitsia. 2 Bajarapacuenia amoneya petonacuenebiwatsibejejawabelia-ata pexi pexainaewi totsata. Bajarapowabeje copiaya namataxainaeya barënucaeya-exanabeje pexi. Bajaraxuacujinae, Lea pexi yajawa saicaya cotocaewi barënuca. Bajaraxuacujinae, Raquel, Josébeje nucabeje pecopiarucaebitsaëtojawata. 3 Bajaraxuacujinae, Jacob mata-enenalia pematapijinë. Itsa baja, imoxoyo najetaruca, nexata Jacob irataeya bocabiabajunua penajetarucaenë siete xuabeje. Bajarapacuenia Jacob exana pepatsijawaberena penajetarucaenë Esaú. 4 Nexata, Esaú itsa tane bajarapacuenia, cujinaerena pejuyapijinëjawaberena. Bajarapaepatota, wëtaicarucapona. Naitabaratsutsuniaya nacopiapitabeje. Bajarajota, daxitanëbeje naitaxutuanuabeje ayaicuenia. 5 Bajaraxuacujinae, Esaú taenuba petiriawi, pexi yajawa penubenaejawa. Nexata, yanijoba:

—¿Detsa mapamonaeje neyajawaponaewi tsaja? —jai.

Nexata, Jacob jumecanawiata:

—Bajarapamonae raja taxi, Dioso tanerajutsiwi —jai.

6 Nexata, amoneya petonacuenebaponaponaewatsibeje, pijawacuenia pexainaewabeje, cujirenabeje. Bajarapaepatota, bocajunuabeje irataeya Esaú pitabarata. 7 Bajaraxuacujinae, icatsia Lea pexi yajawa barërena. Bajarapacuenia itsi. Bajarapacuenia Raquel-ata pexënato yajawa José irataeya bocajunua bajaraponë pitabarata. 8 Nexata, xuacujinae Esaú yanijoba. Jumaitsi:

—¿Dexua najamatabëxainame nexanaenexa dajubicaponaewijawabelia, pabitsaëtonë caxibajarabaponarenajë tarenanë? —jai Esaú.

Nexata, Jacob jumecanawiata:

—Bajaraxua cato-itorobatsi tacarajutsicuenia, pexaniajamatabëcuenia tanetaenexamë —jai Jacob.

9 Nexata, Esaú jumecanawiata:

—¡Jume raja! Xanë raja pijinia xainajë ayaijawa. ¡Canacopare saya necobecowë dajubi! —jai Esaú.

10 Itsiata, Jacob jumaitsi:

—¡Jume! ¡Pexaniacuene ne-exanare! ¡Itsiata, xua carajutatsi, pire, tsipaji baja xamë itsa ca-itabaratanetsi beta-itabarataecuene Dioso! 11 Jitsipajë pepacuene nepitsijawa xua xanë amoneya carajutatsi. Bajaraxuanua catocanajetarucatsi, tsipaji Dioso bajaraxua pexaniacuenia neyawenona taxainaenexa. Itsacuenejawa-ata aponetsisajinae —jai. Jacob icatsia orijibia napëna jumaitsi tsaponae. Belia nexata baja, Esaú muxunajejaitsi. Nexata baja, wecuapitatsi amoneyacuenia dajubi perajutsijawa Jacob.

12 Nexata, Esaú icatsia jumaitsi:

—Nexata baja, ponaenatsi majotawecuaje. Nexata, xanë pacatsiwajënaenamataxainaenatsi paxamëwecua, tacowëwelia paneponaenexa —jai Esaú.

13 Nexata, Jacob jumecanawiata:

—Tamatapijinë, xamë yapëtaneme pejewaxi tayajawanajetarucaejawa. Bitso bajarapamonae apocaëjëpaetsi bajarapacuenia tabarëponaejawa abaxë. Nexata, xanënua benajamatabëxainajë tajadajubi yabara, tsipaji tajadajubi itsamonae xaina pexi. Nexata, xanë itsa barëponaejitsipajë caecuenia, bajarapamonae belia pecacueranae yatëpaejitsipa namuto-epatua. 14 Nexata, xamë ponaename namataxainaeya. Xuacujinae, xanë beaxayo cotocaewa najetarucaenajë tajadajubi yajawa. Nexata, xuacujinae waxaitsibeje nacaxitajarabianatsibeje Seir nacuajawata —jai Jacob.

15 Nexata, Esaú jumaitsi:

—Je, xanepana. Nexata, catocopatsianatsi itsamonae pamonae yajawaponaponajë —jai Esaú.

Itsiata, Jacob jumaitsi:

—¡Jume, apoxanepanae! ¿Detsa xuajitsia xanë cajamatabë-itonotsipatsi? —jai Jacob.

16 Nexata, Esaú bajarapamatacabi barënawiata daxita pijajiwi Seir nacuajawabelia. 17 Esaú baja penawiatsicujinae, Jacob pijinia naropota peponaenexa Sucot tomarajawabelia, bajarajota pijabo penacuenebanutsinexa, pijadajubi-ata pijabobërëtoxi petonacuenebinexa. Bajaraxuata, bajarajota wënëruba Sucot.

18 Itsa Jacob nawiatanajetaruca Padan-aram nacuawerena, bajaraponë patajopa pexaniacuenia Canaán nacuata. Bajaraponë ponapona Siquem tomara imoxoyojawata. 19 Jacob-nua comuata irayo cien ponëbejeta palatanëanë Siquemta, baitsi Hamor pemomoxiyajuwënënëjawabelia. Bajarajota nexata, pijaboxi nacueneba. 20 Bajarajotanua, altar-jawa-ata nacuenebanuta. Bajarapa-altar wënëruba El-elohe-israel.