Jacob tsiwajënaenacuenexaniawaeta penacaxitajarabinexa pematapijinë Esaú
32
Jacob itsa abaxë najetaruca namuto-epatua Canaán-jawabelia penawiatsinë, Dioso pija-ángelewi mata-enenanajetarubenatsi. 2 Nexata, Jacob itsa tane bajarapamonae, jumaitsi:—Dioso raja pijawajabitsaëwi pijataxunaebo —jai. Bajaraxuata, bajaraponë wënëruba bajarapataxunae Mahanaim. a
3 Nexata, Jacob itoroba pewajunupaebiwinexatsi Seir irajawabelia, Edóm nacuayajuwënë-irayo, petsipaebinexa Jacob pepatsijawa yabara Esaújawabelia. 4 Nexata, yajawanajume-itoroba mapaliwaisije:
—Pajumaitsimë tsane tamatapijinë Esaú: «Nejuyapijinë Jacob raja xamë nitabarata beweliajamatabëcuenenë tsaponaponae, cajumaitsirena mapacueniaje: ‘Labán-jawatalia bajayajebi ponaponajë. 5 Xainajë vaca, burro, oveja. Jiwi-ata xainajë amoneya tanetonacuenebiwi pebijiwi, petiriawi-ata,’ cajairena. Bajarapacuenia catonajume-itoroba, pexaniacuenia panenacopiapitsinexabeje», pajamë tsane —jai Jacob.
6 Nexata, itsa bajarapajiwibeje nawiarenabeje baja, pejumeliwaisicaponaenëtsibeje, nexata Jacob-jawaberena itsa baja parenabeje, jumaitsibeje:
—Paxanëbeje palianëbeje patataenexabeje nematapijinë Esaú. Bajaraponë rabaja renajitsia pijacujaya, pecacopiapitsinexa pijajiwi yajawa cuatrocientos ponëbeje —jaitsibeje.
7-8 Jacob itsa jumetane bajarapacuenia, bitso junawa ayaicuenia. Jamatabëcuenebëjainua. Nexata, pijajiwi tsata anijabitsaëtobejecuenia. Bajarapacuenia pijadajubi-ata caewiria canacujitsia tsata anijabitsaëtobejecuenia jiwi yajawa, tsipaji bajaraponë jamatabëjumaitsi: «Itsa Esaú patsiarena tanebarënawajabitsaëtsinexa, nexata itsabitsaëto itsa cuene-amoneyabatsi, itsabitsaëto caëjëpa pewecuapanepaejawa», jamatabëjai.
9 Nexata, bajarapaepatota Jacob wajëta Diosojawabelia. Jumaitsi mapacueniaje:
—Jehová, tamopijinë Abraham, taxa Isaac-ata pijaDiosomë, xamë nejumaitsimë: «Nawiaremena nijamonaejawaberena, axa pija-irajawaberena. Cayawenonaenatsi pexaniacuenia», nejamë. 10 Bajarapacuenia tane-itaxutotsoniataexaemë, neyawenoname baja, apoxainae-atanë picani xua yabara pexaniacuenia taneyawenonaenexamë. Apocatoxanepanae-ata picani xua yabara nesiwajamatabëcuenebarëyajitsiamë, itsiata baja, neyawenoname, tsipaji xanë pamatacabi tajabowecua pitsapajë, itsa nicabajë mapameneje, Jordán mene, itsacuenejawayo apocapitsapaenë. Caejawa saya tajanaeboyo. Bajayata, caenëyo-atanë, itsiata, ajenaconoxaeta xainajë ayaibitsaëto tajajiwi dajubi, tajamonae-ata. Nexata, yacaëjëpa anijataxunaebobejenexa pamonae ta-ewetsiwinexa. 11 TajaDiosomë, pepacuene bitso xanë junawajë. ¡Panecapanepare tamatapijinë Esaú pecobewecua, tanebeyaxuabiyaniwa, tajawabeje-ata pebeyaxuabiyaniwatsi, bajarapacuenia taxibitsaëto-ata! 12 Bajarapacuenia panecapanepaename, tsipaji xamë nejumaitsimë najumecapanepaeya taneyawenonaenexamë pexaniacuenia, taxainaponaenexa tamomoxi ayaibitsaëto, pacuenia manuamenepiji-atsapërë aponamata-ëjëtsicapanepaetsi, bajarapacuenia bajarapamonae pepitsapaenexa itsamatacabi —jai Jacob pewajëtsijawata, Dioso peyawenonaenexatsi.
13 Jacob bajarapamerawi barëmajita abaxë bajarajota. Bajarapamerawinua totsana xua rajutsijitsia pematapijinë Esaú amoneyacuenia. 14 Totsata doscientos ponëbeje pesorowabi chivo, veinte ponëbeje pijinia pebitonë. Totsatanua doscientos ponëbeje pesorowabi oveja, veinte ponëbeje pijinia pebitonë. 15 Bajarapacuenia totsata treinta ponëbeje camello pexi yajawa. Totsatanua cuarenta ponëbeje vaca pesorowabi. Bajarapacuenia totsata diez ponëbeje pijinia vaca pejanatorowi. Totsata veinte ponëbeje burro pesorowabi, diez ponëbeje pijinia pebitonë. 16 Bajaraxuacujinae, Jacob rajutapona dajubi pijajiwijawabelia caewiriawi canacujitsia, bajarapamonae caebitsaëto canacujitsia saicayacuenia penawecuacaponaenexa. Yajawanajumecopatanua mapacueniaje:
—Panajetarubenaename natsatsiaya pepobitsaëtoxicuenia saicayayo napëtajayotsiaya —jai.
17 Nexata, Jacob copiayapijibitsaëto pewetsinëjawabelia itoroba mapacueniaje. Jumaitsi:
—Itsa pacacaxitajarabiana Esaú, itsa pacayanijobiananua, itsa pacajumaitsi tsane: «¿Detsa belia paponame? ¿Detsa ponë papijajiwimë? ¿Detsa maponë pijadajubije patocanajetarubename?», itsa pacajai, 18 nexata paxamë pajumaitsimë tsane: «Patajatuxanenë Jacob raja, xamë nitabarata beweliajamatabëcuenenë tsaponaponae pijanëxi, pecato-itorobiwi raja amoneyacuenia. Bajaraponë raja cotocaewa najetaruca», pajamë tsane —jai Jacob. 19-20 Bajarapacuenia Jacob jumaitsi tsaponae cotocaewi pitorobiwijawabelia, bajarapacuenia acueyabibitsaëtojawabelia-ata. Daxita pamonae itorobapona, bajarapacuenia yajawanajumecopatapona. Bajarapacuenia Jacob exana, tsipaji bajaraponë jamatabë-itsi: «Bajarapacuenia xanë itsa cato-itorobaponaenatsi, nexata tamatapijinë jamatabëcuenexanepanaeya-exanaenajë ëtacaxitajarabijawabelia. Nexata, bajarapacuenia belia necopiapitsiana pexaniacuenia Esaú», jamatabëjai Jacob. 21 Nexata, Jacob natsiwajënae-itoroba penicabinexa Jaboc-najato pecaponaewi, perajutsiwinexa Esaú. Jacob bajarapamerawi nacopatanuca pijataxunaejawata, abaxë pemajitsinexa.
Jacob barënatoroba ángelnë Peniel-jawata
22 Bajarapamerawi Jacob namatacota pitorobinexa pijawajiwi. Nexata, ya-itawaba pijawabeje, amoneya petonacuenebiwatsibeje yajawa, pexi once ponëbeje-ata penicabia-exanaenexa Jaboc-najato itsapanabelia. 23 Bajaraponë baja itsa nicabia-exana bajarapanajato itsapanabelia, yajawanicabia-exana daxita pecobecowë. Nexata, bepijiayo nawiarena pijataxunaejawaberena. 24 Bajarajota, nacopatanuca caenë pija-epato. Bajarapaepatota, bajaraponë barënataica athëbëwetsica peponaenë peyananianaejawabelia. 25 Itsa bajaraponë athëbëwetsica peponaenë pebarënataicaejawata, tane apopecuenecaëjëpaejawatsi pecuene-amoneyabijawa. Nexata, bajaraponë pemarapawi pejayatajarabijawatatsi Jacob topadenedenecajunua. Bajaraxuata, Jacob jayujayuna. 26 Nexata, Jacob petsimaxëpatsinëtsi jumaitsitsi:
—¡Necopare baja taponaenexa, tsipaji raja bitso matacabi tsaponae! —jaitsi.
Itsiata baitsi jane, Jacob jumejai. Nexata jumaitsi:
—Apocacopatsi tsanetsi itsa aponecuene-itajëtsimë tsane Dioso pexaniacuenia taneyawenonabiabijawanexa —jai Jacob.
Nexata, bajaraponë pebarënatorobinëtsi jumaitsi:
27 —¿Detsa pawënëmë? —jaitsi.
Nexata, Jacob jumecanawiata:
—Xanë raja Jacob tawënë —jai.
28 Nexata, pebarënatorobinëtsi jumaitsi:
—Ajenaconoxae rabaja bajarapawënë apowënëtsitecaemë tsane. Cawënërubianatsi rabaja Israel, tsipaji niacuenesaënë Diosojawabelia. Jiwijawabelia necuene-amoneyabinënua —jaitsi. Nexata baja, bajarapaepatota Jacob wënërubatsi Israel.b
29 Nexata, bajaraxuacujinae Jacob yanijoba:
—¿Detsa xamë pawënëmë? —jai.
—¿Detsa xuajitsia newënë yanijobame? —jaitsi. Itsiata, aponawënëtsipaebitsi. Nexata, bajarajota cuenetsitajëtatsi Dioso peyawenonaejawanexatsi pexaniacuenia.
30 Nexata, bajarapataxunaeta, itsajota natorobabeje, Jacob wënëruba Peniel,c tsipaji bajarajota bajaraponë jumaitsi: «Dioso pepacuene taja-itaxutocujaya taniji, xanë, abaxë itsiata, asaënë tsaponaponae», jai Jacob.