La reunion de Joseph avec ses frères
(Audio de ce chapitre disponible dans Gagur gara Mútiliŋ
Sakob naboñ guleehool bu nꞌEsípt.
42
Sakob ban ammee Kanaan, najam mara babaj múcahoaay nꞌEsípt. Narok guleehool : « Waa njon taahu mbuñeeroor ? 2 Ijanjam gurok babaj múcahoaay nꞌEsípt. Jijow bu bo jínoomul min uroŋaal, jambil bacaar bumugolaal. » 3 Ñeer gutii Suseef gammee guñen ngujow bu nꞌEsípt bu fúnoomul múcahoaay. 4 Bare Sakob akahenut Benseme atii Suseef najawoor nꞌgutiool mara násebisebi jambil waaf ubajool. 5 Guleeh Sakob ngútiiŋ nu ganur nꞌgucee gajae may bu funoom múcahoaay, mara bacaar baabu buruuruuk máamak dó mꞌmof maamu mara Kanaan.Suseef nakaan gutiool gúnuur
6 Tooge Suseef acile fukow fara funoomen múcahoaay dó mꞌmof mara Esípt. Gutiool nan gútiiŋulo mee, nguyah gúriiŋiil nꞌetaam fácilool. 7 Nan Suseef añow mee gutiool, nafaasiil. Nacamenut mee gufaasool, narufuleniil : « Béy njípurulo ? » Ngurogool : « Kanaan núpurulo, bu funoom múcahoaay. »
8 Suseef afaafaas gutiool ; bugo gufaasutool. 9 Ñeer Suseef nawosen síyaut san áyauheen mee mara gutiool. Narogiil : « Buguul úñundena ! Jijaalojow be eñow tan mofóli mubajut mee sembe. » 10 Ngúsuupool gurogool : « Haani ! Anafaanóli, éli ujaalojow bu funoom múcahoaay déhooro. 11 Búroomoli peepe amaañen hanur abajóli. Elí bugan bugara maregen, ulet úñundena. » 12 Suseef násuupiil arogiil : « Let maregen, jijaalojow be eñow tan mofóli mubajut mee sembe. » 13 Ngúsuupool gurogool : « Haani ! Anafaanóli, éli goono guñen nꞌgúruba, paayóli hanur, Kanaan núpurulo. Atióli áriita umu to mꞌpaayóli. Bare aceeóli alilliim. » 14 Suseef narogiil : « Ilobuulob yo ; buguul úñundena. 15 Injé be eñow teer wan jilobe mee maregen. Nikali mꞌburoŋ bara áyiih aahu, mat jípur taahe atiuul áriita bajaaloot. 16 Jiboñ aceeuul min ajow aŋarulool ; bugaagu para bu gulako nꞌfupeek. Mo ínje be eñow teer wan jilobe mee maregen. Naŋ let mo, ikali mꞌburoŋ bara áyiih aahu mara buguul úñundena. »
17 Ñeer Suseef naŋar gutiool apeek butum gunak gúfaajiir. 18 Funak fúfaajiiten, narogiil : « Eéni jikaan wan ibil mee elobuul, buguul be eroŋ mara ísebisebi Atúuha. 19 Eéni buguul bugan bugara maregen, jisoŋ min aceeuul alako nꞌfupeek, bugaagu nguŋar múcahoaay maamu gusen buganuul gammee mꞌbacaar. 20 Púr to, njiŋarulom atiuul áriita. Mo ínje be émir mara maregen njilobe ban mat jicet. » Gutiool ngusoŋ wan Suseef alobiil mee.
21 Nguloboor dó mꞌbugo : « Nko uñowaañow wan ukaanaal mee atiolaal. Ahuoorolaal manooman ujantenutaalool, yo ecil mee búyiik mbulohulolaal. » 22 Ñeer Ruben narok : « Ilobuulob yo set : “Jambil jikaan aleeh aahu mákojie !” Bare jijamutom. Ñeer alaal ubugee necaam ecehool. » 23 Nemma Suseef ababaj álowula gúlobum, gutiool ngujok ajamut elobiil. 24 Ñeer Suseef nañago to mꞌbugo min feegool uhuu. Afaak, nábaañul bu to nꞌgutiool be elob mꞌbugo. Najok Simeon, nakogool fáciliil. 25 Púr to, Suseef narok újagagaool : « Jipuusen gulaaceniil múcahoaay ban njibaañen anooan síkoriool jikaan dó nꞌfulaacenool. Njiseniil wan gubil mee fúcaho mꞌbulago. » Suseef maa nakaan maa maa bu nꞌgutiool. 26 Gutiool ngújup múcahoaay maamu nꞌsifaloiil min gujow.
Gutii Suseef ngubaañ bu Kanaan
27 Nan gútiiŋ mee tan gubil mee gaŋot, aceeiil najal fulaacenool be esen efalo'ool éful, natook dó síkoriool. 28 Narok gutiool : « Hóh ! Gubaañenaam síkoriom, usee nꞌfulaacenom. » Ngúkubo, ngúsebi ngusonkenoor : « Waa ucile Atúuha nakaanolaal maa ? »
29 Nan gútiiŋ mee Kanaan to mꞌpaayiil Sakob, ngugaanool peepe wabajiil mee. 30 Ngurogool : « Amaañen acil mee fukow fara mof maamu alolob nꞌéli nꞌsembe. Najogóli naŋ bugan gajaalo bu gáñunden mofiil. 31 Nurogool : “Ulet úñundena, éli bugan bugara maregen. 32 Paayóli hanur, guleeh guñen nꞌgúruba nabaje. Aceeóli alilliim, áriita aahu umu to mꞌpaayóli nukahulo bo Kanaan.”
33 Ñeer amaañen aahu narogóli : “Eéni buguul bugan bugara maregen, jikahom taahe atiuul acee min bugaagu guŋar múcahoaay maamu gusen buganuul gammee mꞌbacaar. 34 Jifaak njiŋarulom atiuul áriita min sehom jilet úñundena bare buguul bugan bugara maregen. No ñeer nibiluul mee gabaañen atiuul Simeon ban bu gakahenuul njijawoor naŋ min súumuul mee dáare mꞌmof mee.” »
35 Nan gommee ngawuhul gulaaceniil, anooan natook síkoriool dó nꞌfulaacenool. Nguñow síkori saasu, ngúsebi bu mꞌpaayiil Sakob ró. 36 Paayiil narogiil : « Bakaaneruul be ecil mat iŋañen aleeh ! Suseef alet, Simeon may alet, bandiŋ njicamen be eŋar Benseme ! Dáaru peepe be eloh nꞌínje ! » 37 Ruben narok paayool : « Eéni ibaañenuloohi Benseme, újuhe umuk guleehom gumaañen gammee gúruba. Usenomool gañen nꞌgañen, ban be ebaañenuli ho. » 38 Ñeer Sakob narogool : « Haani, aleehom Benseme mat ajawoor mꞌbuguul. Atiool Suseef acecet, ho noonool aŋañoe nꞌjaayiil. Nífaanul mee, néeni waaf ubajool dó nꞌgajawooruul, ínje be ecet nꞌgáwusaet mara buguul. »