Fúcihum 35

Sakob najow acong Betel

Funak fucee, Atúuha narok Sakob : « Uyuho min ujow bu Betel nucong to. Nuteep to fúsimenum bu nꞌínje Atúuha hápuruli mee nan ommee netey ati'i Esawu. » 2 Ñeer Sakob narok fiilool mꞌbugan gan to mee nu ho : « Jikahen únaati wan to mee mꞌbuguul mara ulet Atúuhaolaal, njitaaso set njikaano wañ ucee. 3 Alaal be ejow bu Betel, to nibil mee gateep fúsimenum bu nꞌAtúuha harandenaam mee nan táañiaam mee ban náriikenom nꞌgajawoorom. » 4 Ñeer nguŋar únaati waawu peepe wan guyeken mee son siloŋuloŋiil^a gusen Sakob. Sakob nafogen wo fataam bununuk báamak baabu bacik mee Sisem 5 gufaak, nguyuho gujow. Atúuha nakaan min bugan bugara sísuk san gucinoor mee gúsebi jaram haani an ahaañiut galagen guleeh Sakob.

6 Ñeer Sakob mꞌbugan galalenoor mee nu ho peepe ngútiiŋ Lúus (gajow yo gaagu Betel) bo mꞌmof mara Kanaan. 7 Nateep to fúsimenum narok tin taahu El-Betel (yo yommee : Atúuha ara Betel), mara to Atúuha ápurulo mee Sakob nan ammee netey atiool.

8 Debora akoña háwayil mee Rebeka, nacet. Ngufogool cik Betel fataam bununuk báamak baabu min gurok bo « Bununuk bara mufuu. »

9 Sakob bápurerulool Padan-Aram, Atúuha nápurulool benen násoonienool. 10 Narogool : « Gajai Sakob, bare mat gubaañ guwoogi mee, bugo be ewoogi Isirayeel. » Maa Atúuha arogool mee Isirayeel. 11 Nabaañ arogool : « Injé emmee Atúuha ara sembe. Aw bu gabugoor meeŋ, nóoni uyooŋ wamemmeeŋ paayiil afaan, ban gúyiih be épurul dó mꞌbúbajumi. 12 Mof man irok mee be esen Aburaham bugo nꞌIsaak, be eseni mo bu mꞌbúbajumi bambo mee néjool. »

13 Atúuha najow akahool to tan gulako mee elob. 14 Ñeer Sakob naŋar élankiin ayihen tan gulako mee elob nꞌAtúuha, náyuh yo bunuk son éduuliin min eñaao. 15 Sakob narok tin taahu tan gulob mee bugo nꞌAtúuha Betel.

Benseme nabaji, Raseel nacet

16 Ñeer Sakob bugo nꞌfiilool ngúpur Betel. Ngujow jaram gujooŋoor Afúrata, Raseel nataaso, bare ayoyok dó nꞌgataaso gaagu. 17 Nan ayok mee máaamak nꞌgataaso gaagu, akoña ammee ngajogoorool narogool : « Jambil úsebi. Aleeh amaañen nuŋarulo benen. » 18 Nan ammee nejow be ecet, narok aleeh aahu Ben-Oni (yo yommee : aleeh hara búyogom), bare paayool Sakob narogool Benseme (yo yommee : aleeh hara gañen gárib). 19 Ñeer Raseel nacet, ngufogool mꞌbulago bara Afúrata, gajow yo gaagu Beteleem. 20 Sakob naŋar élankiin ayihen to nꞌfuyaak fara Raseel. Káŋ bu jaat maa, élankiin yaayu uyu to.

21 Sakob ajojow jaram awuj Migidal-Eder, nayihen éguuhool. 22 Ngom bo mee mꞌmof maamu, Ruben nafiihen Biliha ammee amiigeel Raseel han asen mee araaŋool Sakob. Paayool najam yo.

Ujow guleeh gumaañen bugara Sakob

Sakob guleehool gumaañen goono guñen nꞌgúruba. 23 Leya guleehool bugo gommee : Ruben ammee aleeh átiyaara hara Sakob, ho atuuhen mee Simeyoŋ, Léwi, Suda, Isakaar bugo nꞌSabulon. 24 Raseel guleehool : Suseef bugo mꞌBenseme. 25 Biliha ammee amiigeel Raseel guleehool : Daan bugo nꞌNefutali. 26 Silipa ammee amiigeel Leya guleehool : Gaad bugo nꞌAseer. Ubuge gommee guleeh Sakob gumaañen gan abaj mee Padan-Aram.

Ecet Isaak

27 Sakob nátiiŋ to mꞌpaayool Isaak nꞌésuk yan guroge mee Mamure mꞌmof mara Kiriyat-Aruba (gajow yo gaagu Heburon) tan Aburaham bugo nꞌIsaak gucongeen mee. 28 Isaak abaabaak símit ceme nꞌgafaŋ gubaagiir (180) ; 29 gabaagool ngujak mee, nacet, najow atook bo sipaayool gufaan. Esawu bugo nꞌSakob gammee guleehool gumaañen ngufogool.