Sisem nakaan gañen nanap nꞌDiina hara Sakob bugo nꞌLeya
34
Funak fucee, Diina aleeh akoña hara Sakob bugo nꞌLeya, najow bu gaŋaalo gupaalool guleeh gukoña gacin dó mee mꞌmof mara Kanaan. 2 Hamor ammee áseef ehiwiit yaayu ababaj aleeh amaañen gurogool Sisem. Sisem nan añow mee Diina, nakaan gañen nanap nu ho. 3 Nan púr to mee, búyegehool mbóoni nꞌDiina jaram acamenool, nabantenoorool bu búyab. 4 Sisem narok paayool Hamor : « Uŋesom aleeh akoña aahu umu iyab. » 5 Sakob najam mara Diina ammee aleehool akoña gúpurenoopuren fújuret. Bare min emmee guleehool gumaañen gujojow gamat nꞌfutaŋaat, alobut haani waaf nanaakiil jaram gúbaañul.6 Hamor pay Sisem najow be elob bugo nꞌSakob. 7 Nan guleeh Sakob gumaañen gubaañulo mee nꞌfutaŋaat, ngujam elob yaayu, ntáañi'iil. Giiñiil ngutiñ máamak mara bakaaner Sisem gajel gáamak bu nꞌIsirayeel. Akankaan gañen nanap nꞌaleeh Sakob ; ban dáaru búyiik báamak. 8 Hamor nalob mꞌbugo arogiil : « Aleehom Sisem acamencamen aleehuul akoña. Icíinuuciin jisenool ho ayab. 9 Urúrooraal, njisenóli guleehuul gukoña uyab, éli may nusenuul guleehóli gukoña jiyab. 10 Alaal bu bucinoor, ésuk ye be ekaan yooluul njicin dó, njíjagak dó njibaj ró etaam. » 11 Ñeer Sisem fannaool nalob mꞌpay Diina bugo nꞌgúliinool arogiil : « Jibonket, jisenomool. Wanoowan njibilaam elob, ínje be esenuul wo. 12 Haani jibehom gúpañ gúruuk ngúruuke, be esenuul go. Sambil jisenomool iyab. »
13 Guleeh Sakob gumaañen nguŋar múluho ngubanten Sisem bugo mꞌpaayool Hamor mara gajel gan Sisem akaan mee áliiniil Diina. 14 Ngúsuupiil gurogiil : « Elí újuhut usenuul áliinoli jiyab mara buguul jisunnauti ; kankaan gajel bu nꞌéli. 15 Waaf wanur újuhe ukaan min usoŋ. Wo wommee amaañenóomaañen hooluul nasunnai naŋ éli. 16 No ñeer nubil mee esenuul guleehóli gukoña jiyab, buguul may njisenóli bugooluul. No alaal bu bucinoor nukaanaal bugan buganur. 17 Bare éeni jisoŋut min jisunnai, éli be ejow uŋar áliinoli nujow. »
18 Ñeer Hamor bugo nꞌaleehool Sisem ngusoŋ fuliik faafu. 19 Aleeh amaañen aahu ñeer nasommen min ajow akaan wan gulobool mee, mara gacamen gan acamen mee aleeh Sakob akoña. Dó nꞌfiilool ho ngurege min gujame. 20 Hamor bugo nꞌaleehool Sisem ngujow bu to nꞌfurehoorúm fammee mꞌmúnogenum ésuk yaayu min gulob mꞌbuganiil gurogiil : 21 « Bugan ge gukankaan bugan gajage bu nꞌalaal ban mof maamu muwunwuŋ, bugo be ereh. Gújuhe gulako dáare min gújagak ; nuyabaal guleehiil gukoña, bugo may nguyab guleeholaal gukoña. 22 Bare mimbil újuhaal ucinooraal nukaanaal bugan buganur, waaf wanur ngulobe. Amaañenóomaañen bu gasunnai naŋ min bugo gusunnai mee. 23 Eéni usoŋaal, bugo be éjool nucinooraal. Sikajiil son wan gubaj mee bu gáani wololaal. » 24 Bugan gaagu búroomiil galako to mee mꞌmúnogenum ésuk yaayu ngusoŋ furim Hamor bugo nꞌaleehool Sisem. Ñeer umaañen waawu peepe bugara ésuk yaayu ngusunnai.
25 Nꞌfunak fúfaaten faafu, nan jatiñ jaaju jommee ngayogen gasunnai mee, guleeh Sakob gammee Simeyoŋ bugo nꞌLéwi gúliin Diina nguŋar úkunduiil ngunogen nꞌésuk yaayu nan ebajut mee upooya. Ngumuk umaañen waawu peepe, 26 bu nꞌHamor bugo nꞌaleehool Sisem ró. Ngúŋarul áliiniil Diina nꞌyaŋ yara Sisem ngúpur. 27 Guleeh Sakob bugaagu ngujow gútebul fubaj fara bugan gacet mee peepe, mara gajel gan gukaan mee áliiniil. 28 Nguŋar sikajiil, sifaloiil son wanoowan wammee dó nꞌésuk yaayu nꞌgataama gaagu. 29 Nguŋar ukoñaiil, guleehiil nꞌfubajiil peepe, nguyiis siyaŋ saasu nguteb walako dó mee peepe.
30 Ñeer Sakob nalob Simeyoŋ bugo nꞌLéwi arogiil : « Jikaanankaan gapinoor gáamak. Buguul be ecil min ekanaaniit yaayu nꞌeperisiit yaayu gacin mee mꞌmof me gulahom. Jiñoñow mara alaal umeeŋutaal ; éeni guguumom, bugo be emugom bu nꞌfiilom ró peepe. » 31 Simeyoŋ bugo nꞌLéwi ngúsuupool gurogool : « Mee pére éli be ekat bo hajok mee áliinoli naŋ anoomena fukowool ? »