Jacob rencontre Esaü et retourne à Isaac, la mort d’Isaac
Sakob bugo nꞌEsawu ngurehoor
33
Ñeer Sakob nan ammee népur tin taahu, náraahulo naŋanden Esawu néjool nꞌumaañen siceme sibaagiir (400). Nawaajoor guleeh gaagu : Leya nꞌguleehool, Raseel nꞌguleehool, nꞌújagagaool ukoña gammee Silipa bugo mꞌBiliha anoaan guleehool. 2 Naŋar Silipa bugo mꞌBiliha nꞌguleehiil abaŋ fácil, Leya nꞌguleehool nguroobiil to min Suseef bugo nꞌRaseel gulako mꞌbúsol. 3 Ho fannaool nalohiil fácil min ayah gújuul ñoono futok nꞌñúruba jaram ajooŋoor atiool. 4 Ñeer Esawu nan añowool mee, nateyúl ngurehoor, náñag aroopool, nagaabool, nguhuu márubaiil.5 Esawu náraahulo nañow ukoña waawu nꞌguleeh gaagu narogool : « Ubugu búgey hoom ? » Sakob narogool : « Ubugu guleeh gan Atúuha abonket mee nasen ínje ammee ájagagai. »
6 Silipa, Biliha, nꞌguleehiil ngújool guyahool gújuul. 7 Leya bugo nꞌguleehool ngújool guyahool gújuul, Suseef bugo nꞌjaaool Raseel nguyahool may gújuul. 8 Esawu nasonkenool arogool : « Sikoore san irehoorulo mee bu waa ? » Sakob násuupool arogool : « Mimbil aw anafaanom, újuh ubonkehom nuyabom jak. » 9 Esawu narogool : « Atiom, fubajom futoogantook, ñeer uŋar fiiya. » 10 Sakob násuupool arogool : « Ubonket, jambil ukaanom mee ! Eéni ubaŋutom funamben, uŋar wan íji'i mee. Búrehoorom nꞌaw nogoonogoor naŋ buhul bara Atúuha niñowe mara nuwalenanwalen jak. 11 Atúuha akankaan bulago'om mbujak ban ibabaj waaf waawu peepe wan icamen mee. » Ñeer íciiniciin ubonket uyab wan iseni mee. Sakob nahuoor Esawu jaram asoŋ nayab.
12 Esawu narogool : « Uyuho nujawoora, ínje be elohi fácil. » 13 Sakob násuupool arogool : « Anafaanom, úmire guleeh gaagu gubajut sembe, ban sísaajaom, sijaameenom son siyahaom usu ngamooben. Eéni urogaale ejow nu so tariya funak fanur, sikaj saasu peepe be ecet. 14 Anafaanom, íciiniciin, ubonket ujow tíro. Injé nitankenuul nꞌguleeh gaagu son sikoore saasu jaram nan ibil mee étiiŋ yaŋ anafaanom bo Seyiir. » 15 Esawu narogool : « Ñeer ínje be ekahi gucee mꞌbuganom gan ujawoorulo mee. » Sakob násuupool arogool : « Tíiŋut mo. Injé sambil gajamoor gon nꞌetuhoorola. » 16 No funak fanur faafu Esawu abaañ mee bu Seyiir.
17 Sakob ho najow bu Sukot. Nateep bo yaŋool, nayihen síguut bu nꞌsikooreool. Yo ecil mee ngurok tin taahu Sukot (yo yommee : síguut).
Sakob nacong cik ésuk yara Sisem
18 Sakob ápurulopur Padan-Aram, najow nꞌgásuumaay jaram átiiŋ nꞌésuk yan guroge mee Sisem mꞌmof mara Kanaan. Nayihen to síguuhool sijooŋoor ésuk yaayu. 19 Etaam yan ayihen mee síguuhool anoonoom yo wátiiŋe ukuparu ceme mꞌbúbajum Hamor habaj mee Sisem. 20 Nayihen to fúsimenum, narok to El-Elohe Isirayeel (yo yommee : Atúuha ammee Atúuha hara Isirayeel.)