32
Ñeer Laban nayiho noono mꞌbújom, nagaab guleehool gukoña bugo nꞌguleehiil, náruwaiil afaak, naat.Sakob násebi búrehoor nꞌEsawu
2 Sakob nápur to, nafaalen dó mꞌbulago'ool. Simalayika Atúuha nsíjool ngurehoor. 3 Nan añow so mee narok : « Taahe gayooŋ gara Atúuha gon to. » Narok to Mahanayim (yo yommee : uyooŋ úruba).
4 Sakob naboñ bugan tíro bu nꞌatiool Esawu ban ammee mꞌmof mara Seyiir dó nꞌurager wammee Edom. 5 Naseniil furim arogiil : « Mbil jirok anafaanom Esawu : “Injé ájagagai Sakob iroge nꞌguñen Laban nilakoeene bo nirabenulo mee káŋ bu jaat. 6 Ibajulobaj siyaha, sísaaja, sijaameen, nꞌsifalo, újagaga umaañen nꞌukoña. Yo ecil mee níboñul buganom bu nꞌaw ammee anafaanom mbil újuh uyabom jak.” »
7 Bugan gan Sakob aboñ mee ngúbaañul bu to nu ho. Ngurogool : « Ujojow bu bo nꞌati'i Esawu. Bare umu ngahomenoor be éjool bu búrehoor nꞌaw, mꞌbuganool ró gátiiŋe siceme sibaagiir (400). » 8 Sakob násebi máamak, najaahali. Nafanjen buganool uyooŋ úruba bu nꞌsikajool son siñonkomeool ró, 9 mara nꞌgapinoorool : Eéni Esawu atiigen gacee gayooŋ naheek go, gaagu ngújuh gupak.
10 Ñeer Sakob náciin arok : « Acehériit mee, Atúuha hara paayom afaan Aburaham bugo mꞌpaayom Isaak, aw urogaam mee ibaañ bu mꞌmofom to nꞌfiilom ban aw be ekaanom jak. 11 Injé ájagagai to nꞌaw irehoorehoor máamak, bare ucamenancamen, núriikenom. No nan emmee nétip fal fe fara Suruden, egol déhooro nikeneene. Maaréer ñeer ínje umee nꞌfukow fara uyooŋ úruba. 12 Icíiniciin, upagenom nꞌatiom Esawu, mara ísebisebi jambil ájool amugom ásuupoor dó ukoñaom nꞌguleehom. 13 Aw kum urogaam mee be ekaanom jak máamak ban be ekaan búbajumom bumeeŋ naŋ buruus bara gapana fal ban an ájuhut apin. »
14 Sakob naŋot to nu fuk faafu. Fara gajom naŋar dó nꞌsikaj san ayeken to mee bu gájii atiool Esawu : 15 sijaameen siceme síruba (200) nꞌgújikel so gafaakan, sísaaja siceme síruba (200) nꞌgújikel so gafaakan, 16 siñonkome gafaakan nꞌguñen (30) sababaj guleeh gan son gamoob, siyaha gafaŋ gúruba (40) nꞌgujiŋa guñen son sifalo sikoña gafaakan nꞌsimaañen guñen. 17 Nafanjen sikoore saasu, ekooreóokoore nasen yo acee nꞌújagagaool. Narogiil : « Jiloh fácil njikat eŋaan etuhoor sikoore saasu. » 18 Sakob narok ájagagaool átiyoora : « Eéni jirehoor nꞌatiom Esawu, nasonkeni : “Aw hara ay ? Béy non ejow ? Ay acile ekoore yammee fácili ?” 19 núsuupool urogool : “Yara ájagagai Sakob. Aroge ájiijii ekoore yaayu anafaanool Esawu. Bare ho fannaool umu néjool.” » 20 Furim fanur faafu nasen mee áruten bugo nꞌáfaaten aahu bu mꞌbugaagu gammee ngalagen sikoore saasu ró. Sakob nabenen to : « Maa njibil mee elob nꞌEsawu nan jibil mee búrehoor. 21 Njigaanool set mara ájagagai Sakob umu bo néjool mꞌbúsol. » Nꞌgapinoor Sakob, éeni akaan mee, nan Esawu abil mee eñow wan aŋarulo mee be éjiool, fiiñool bu gawalo nicee nawalenool jak. 22 Ñeer sikoore saasu nsijow tíro, min Sakob aŋot tan gulakoeen mee bugo nꞌuyooŋ waawu.
Sakob nataj bugo nꞌamaañen acee
23 Bu nu fuk faafu, Sakob nayiho, naŋar ukoñaool gammee gúruba, emiigeelool ukoña gammee gúruba nꞌguleehool gammee guñen nu hanur, nátipeniil nꞌgásilimb gammee Yabok. 24 Sakob nátipeniil nꞌgásilimb gaagu son wan abaj mee peepe afaak, 25 naŋaño to noonool. Amaañen acee nataj nu ho jaram bunak bukahen. 26 Amaañen aahu nan añow mee mat ájuh aheek Sakob, nategool nꞌgájaaliin ákabul bugo ró mꞌbútaj. 27 Amaañen aahu narok Sakob : « Bunak ubu ngakahen, ukahenom nijow. » Sakob narogool : « Mat ikaheni nujow ; úsoonienom peh. » 28 Amaañen aahu nabaañ arogool : « Aw gajai buu ? » Sakob násuupool arogool : « Gajaom Sakob. » 29 Amaañen aahu nabenen arogool : « Maareer mat guwoogi Sakob. Bugo be ewoogi Isirayeel (yo yommee : hataj mee nꞌAtúuha), mara aw utataj nꞌAtúuha bu mꞌbugan ró, nuheekiil. » 30 Sakob narogool : « Ubonket ugaanom gajai. » Amaañen aahu násuupool arogool : « Waa ucile nusonkenom gajaom ? » Ñeer amaañen aahu násoonienool to, ngukahoor. 31 Sakob narok : « Niñoñow buhul bara Atúuha ban ínje umu mꞌburoŋ. » Ñeer narok to Penuwel (yo yommee : buhul bara Atúuha). 32 Nan bunak búpurulo mee, Sakob nátip gayahen gammee Penuwel, nak ajiik mara gájaaliinool gategi mee. 33 Yo ecil mee káŋ bu jaat, bugara Isirayeel gutogoñériit gacil gajok mee fuboŋ bu nꞌgájaaliin, mara Atúuha to natek mee Sakob.