Fúcihum 31

Sakob naŋar fiilool natey yaŋ Laban

Tooge Sakob ajanjam min guleeh Laban guroge mee mara ho aguboe fubaj faafu peepe fara paayiil ban nu fo nákaanum mee asaanum. 2 Sakob nañow mara Laban akaanutool ró maareer naŋ no. 3 Ñeer Acehériit mee narok Sakob : « Ubaañ bu mꞌmof mara paayi afaan to nꞌfiili. Injé bu gáani nꞌaw. »

4 Sakob ban ammee ngamat nꞌfutaŋaat, naboñ guwoogulool Raseel bugo nꞌLeya. 5 Narogiil : « Iñoñow mara paayuul akaanutom dó naŋ no, bare Atúuha hara paayom umu nꞌínje. 6 Buguul fannauul jímimir mara imumuk eniinom ngújagak paayuul. 7 Bare paayuul abantenambanten ; nak álowuloor bacaamom ñamemmeeŋ. Bare Atúuha akahutool min akaanom ñiñuget. 8 Paayuul nan arogaam mee mara sikaj sammee tam tam so sommee bacaamom, so peepe nsibaj muleeh makaane tam tam. Nan arogaam mee mara sikaj sapaar mee so sommee bacaamom, ñeer so peepe nsibaj muleeh mabaje upaar. 9 Maa Atúuha ayabulo mee ekoore yaayu mꞌpaayuul asenom. 10 Tooge nin naanu nan nja sikaj saasu sommee njíŋooho, niñow nꞌsíyaut gújikel gammee mbujiŋ sísaaja saasu, gucee ngubaj upaar, gaagu gon tam tam, gaŋaño mee guliisiis.

11 Amalayika hara Atúuha nawoogom dó nꞌsíyaut saasu arok : “Sakob !” Nítuulool : “Oóo.” 12 Narogom : “Uráahulo min uñow gújikel gaagu peepe gammee ngúpañ nꞌekoore yaayu : gucee gubabaj upaar, gaagu gukaan tam tam, gaŋaño mee guliisiis. Ikankaan dáaru peepe mara niñoñow wan Laban ammee nekaani. 13 Injé emmee Atúuha ara Betel tan uyihen mee élankiin yan úyuh mee éduuliin nukaliom. Ñeer úpur mꞌmof me min ubaañ bu mꞌmof man ubaji mee.” »

14 Raseel bugo nꞌLeya ngúsuupool gurogool : « Mee pére éli ubabaj gaŋar gacee bo mꞌpaayóli ? 15 Ajogólijok naŋ sijawoora mara anoomenólinoomen, nabaañ aŋar énaafulo'oli atiñ. 16 Fubaj faafu peepe fan Atúuha ayabulo mee mꞌpaayóli, éli nꞌguleehóli ucil fo. Ukaan wan Atúuha arogi mee peepe. »

17 Ñeer Sakob nahomenoor be ejow. Najiŋen guleehool nꞌukoñaool nꞌsiñonkome saasu. 18 Naŋar may sikajool son fubajool peepe fan abaj mee to Padan-Aram min aat bu bo mꞌpaayool Isaak mꞌmof mara Kanaan. 19 Tooge Laban bajaer bu gásahul bufal sísaajaool. Nan gommee nejow, Raseel nákuet únaati paayool. 20 Sakob may nabuuy atey balobut Laban, arameen aahu, mara bóohool. 21 Naŋar wan abaj mee peepe min atey átip eraal yan guroge mee Afúrat min ajow ajooŋoor nꞌsimontaañ sammee dó Galaad.

Laban nateylen Sakob

22 Tíiŋ funak fúfaaten, ngugaan Laban mara Sakob atetey. 23 Laban naŋar bugan bugara yaŋool, nateylenool wátiiŋe gunak futok nꞌgúruba, jaram atoogenool nꞌsimontaañ sammee dó Galaad. 24 Bare tíiŋ nu fuk, Atúuha nalob nꞌLaban, arameen aahu, nꞌsíyaut arogool : « Mbil úkaanum elob nꞌSakob táañi. » 25 Nan Laban atoogen mee Sakob, tootook min Sakob ayihene síguuhool dó nꞌsimontaañ sammee Galaad. Laban mꞌbuganool nguyihen to may sooliil síguut. 26 Laban nawook Sakob, narogool : « Taŋ buu nukaanaam mee mee ? Waa ucile nubantenom ? Nuŋar bandiŋ guleehom gukoña naŋ emiigeel gan ngujoge nꞌfutiik ! 27 Waa ucile nujow balobutom ? Nubuuy mee naŋ akuu ! Eéni ulobeenanlob, ínje boheen eŋar sisabar nꞌsikontiŋ min ítineni nꞌufooñ súum máamak. 28 Ukahutom min igaab guleehom gukoña bugo nꞌguleehiil níruwaiil. Bakaaneri bara agonoa. 29 Ijúheene ikaanuul kóji, bare Atúuha hara paayi arogandok fugen nu fuk mbil íkaanum elob nꞌaw táañi. 30 Maregen, usommensommen ejow bu nꞌyaŋ paayi. Taŋ ñeer waa ucile núkuet únaatiom ? »

31 Sakob násuupool arogool : « Isébiensebi jambil ubot guleehi gukoña. 32 Ñeer an han uñum mee etook dó nꞌwaafool únaati'i, mbil acet. Buganolaal ubugee, ñeer uŋes. Wanoowan nuñowe nꞌéli wiiya, nuŋar. » Tooge Sakob ámirut mara Raseel ákuehulokuet únaati paayool Laban.

33 Laban naŋes dó nꞌéguut yara Sakob, nꞌyara Leya son saasu sara emiigeel ukoña gúruba gaagu. Bare añowut dó haani waaf. Nan ápurulo mee nꞌéguut yara Leya, nanogen nꞌyara Raseel. 34 Tooge Raseel aŋaŋar únaati waawu akoopen nꞌelakoúm eñonkome yaayu min alakoúm yo. Laban naŋes nꞌéguut yaayu peepe bare añowut. 35 Raseel narogool : « Paam, ubonkehom mara níjuhut mee iyiho, yoolóli ekoña'aay yon nꞌínje. » Laban naŋes únaati waawu añowut wo.

36 Ñeer Sakob náñigen narotoor Laban arogool : « Waa nikaane wafeegut ? Ñiñuget buu nikaane ñacil mee nuteylenulom ? 37 Uyáwulooyawuloor wañom peepe, mee utootook dó wan ucile ? Uliik wo buganola gammee taahe min gúkohulola. 38 Ikaane símit soono gafaakan to nꞌyaŋi. Bajut ésaaja son ejaameen yawalene dó nꞌekoorei. Imusut itogoñ haani fújikel dó nꞌsikaji. 39 Imusut iŋaruli ekaj yan énunkureŋ futaŋaat emuge ; éeni kankaan ínje nja icaam. Ekaj yanooyan ékuehi nu fuk teer tufunak, nja usonkenansonken yo. 40 Tufunak gásupa nja gumugammuk, gárusa ñook nñuyogenom ban ibajériit gaŋot. 41 Ibaje símit gafaakan nꞌyaŋi, nijágagi símit guñen nꞌsibaagiir mara guleehi gukoña gammee gúruba, son símit futok nu yanur min ibaj nꞌaw ekoore. Aw núlowuloor bacaamom ñamemmeeŋ. 42 Eéni Atúuha, ho han Aburaham áyinen mee ban ho han nja akaan mee paayom Isaak natelen aameenut nꞌínje, aw boheen gakahenom jaat neet waroorom. Bare Atúuha añoñow sílaamom son búyogom ; nákohulola nꞌfuk fawuj mee. »

Sakob napaalaay bugo nꞌLaban

43 Laban násuup Sakob arogool : « Guleeh gukoña gaagu búgumbaam, guleehiil búgumbaam, sikoore saasu súmbaam son wan uñeere mee mee peepe wúmbaam. Ñeer jaat waa níjuhe ikaan bu nꞌguleehom gukoña bugo nꞌguleehiil gan gubaj mee ? 44 Taahe ñeer ala gammee gúruba, útugena furim min baj gáseedo nꞌetuhoorola. »

45 Sakob naŋar élankiin ayihen mimbil ekaan fúwosenum. 46 Narok buganool : « Jíforul sílankiin. » Nguhomen so jaram kaan fújaac, ngúcaho to nꞌfújaac faafu. 47 Laban narok to Yegar-Sahaduta min Sakob arok to Galeed (yo yommee : fújaac fara gáseedo).^a 48 Laban narok : « Fújaac fe fo fommee jaat áseedo'ola. » Ecil mee ngurok to Galeed. 49 Ngurok to may Misipa (yo yommee : élinga) mara Laban arorok : « Mbil Acehériit mee áani apooya fuyuhoum fe nan ubilohaal mee búñowoor. 50 Eéni ukaan guleehom gukoña gúnuur, nuyab bandiŋ ukoña gucee ubenen to mꞌbugo, let an abilola etiib. Ukáanum, Atúuha fannaool bu gáani áseedo etuhoorom nꞌaw. »

51 Laban nabaañ arok Sakob : « Uñoñow fújaac fara sílankiin saasu son élankiin yan uyihen mee, usee netuhoorola. 52 Fújaac fara sílankiin saasu son élankiin yan uyihen mee, so sibil mee gáani éseedo'ola. Injé mat imus iwuj fújaac fe ijooŋoor baabu nꞌaw nꞌgapinoor gafeegut. Aw may mat umus uwuj fújaac fe son élankiin yaayu bu baabe nꞌínje nꞌgapinoor gafeegut. 53 Mbil Atúuha hara Aburaham bugo nꞌhara Nahoor acaf etuhoorola. » Ñeer Sakob nakali nꞌAtúuha han nja akaan mee paayool Isaak natelen. 54 Akali afaak, násimen to nꞌemontaañ yaayu. Nawook buganool bu fúcaho. Gúcaho gufaak, nguŋot to nꞌemontaañ yaayu.