Isaak nawoogúl Sakob min abehool furim
28
Isaak ñeer nawoogúl Sakob min áruwaool. Afaak nasenool fuyuhoum fe : « Jambil uyab akoña hara dáare Kanaan. 2 Uyuho ujow bu Padan-Aram, bo mꞌpaayi afaan Betuwel habaj mee jaayi, nuŋes dó akoña nꞌguleeh Laban ammee áliin jaayi. 3 Emít ekaan Atúuha ara sembe ásoonieni, naseni gabugoor meeŋ jaram giil gamemmeeŋ gúpurul dó, min óoni paayiil afaan ! 4 Mbil aw mꞌbúbajumi gásoonien gan Atúuha ásoonien mee Aburaham góoni mꞌbuguul, mbil ucil mof me man aseneen mee Aburaham tan ucong maa maa jaat. » 5 Ñeer Isaak nakahen Sakob min ajow bu Padan-Aram bo nꞌLaban, ammee aleeh Betuwel arameen aahu. Laban áliinool Rebeka jaw Sakob bugo nꞌEsawu.6 Esawu nañow mara paayool Isaak áruwaruwa Sakob afaak, narogool ajow bu Padan-Aram aŋesúl bo akoña, ban najam mara asenoosen fuyuhoum arogool jambil ayab akoña hara dáare Kanaan. 7 Nañow may mara Sakob anaanaak paayool bugo nꞌjaaool min ajow bu Padan-Aram. 8 Ñeer Esawu no námir mee mara guleeh gukoña bugara Kanaan mooliil músuumut paayool Isaak. 9 Najow atook Isumayeel, aleeh Aburaham, min áyabul dó nꞌguleehool Mahalat áliin Nebayot abenen to ukoñaool gammee gúruba.
Síyaut Sakob
10 Sakob nápur Beer-Seba be ejow bu Harana. 11 Najow jaram átiiŋ ticee, bunak mbon neloh, nafor to élankiin, naŋar yo nákag fukowool min aŋot to. 12 Nan aŋar mee gaŋot, náyaut añow ejiŋum yayuhoe nꞌetaam jok nꞌémit. Simalayika Atúuha nak sijiŋ nsiwalo. 13 Nañow Acehériit mee min ayuhoe fácilool. Narogool : « Injé emmee Acehériit mee, Atúuha hara paayi afaan Aburaham bugo mꞌpaayi Isaak. Mof maamu umu tan ufiiho mee mee, ínje be eseni mo aw mꞌbúbajumi. 14 Búbajumi be emeeŋ naŋ garuus gammee nꞌetaam. Mbucin kábiriŋ nꞌgápurum tinak bu nꞌgálohum tinak, nꞌgañeni gárib káŋ bu nꞌgañeni gamay. Aw mꞌbúbajumi, mooluul mubil mee ecil nísoonien fiilóofiil nꞌdúniya. 15 Injé fannaom umu nꞌaw. Banooban noon nejow, ínje bu gapooyi ban bu gabaañenuli bu taahe nꞌetaam ye, mara mat ikaheni ínje bakaanut wan irogi mee. »
16 Ñeer Sakob náliyo, narok : « Maregen maregen, Acehériit mee umu taahe ban ínje ímireenut ! » 17 Nabaj ásebi min arok benen : « Bare taahe mo nsálenie mara butum bara émit. Seset yaŋ yara Atúuha. » 18 Ñeer Sakob nayuho noono mꞌbújom, naŋar élankiin yaayu yan ákag mee fukowool ayihen náyuh yo éduuliin nꞌélaut yo min ekaan fúwosenum. 19 Nasen to gajow gara Betel (yo yommee : yaŋ yara Atúuha) bare no ésuk yaayu gurok yo Lúus. 20 Ñeer náciin arok : « Eéni maregen Atúuha umu nꞌínje, napooyom nꞌgajaoor gan emmee nu go, nasenom múcahoaay son bubonnoor, 21 éeni ibaañe nꞌgásuumaay bu yaŋ paayom, Acehériit mee be ekaan Atúuhaom. 22 Elánkiin yaayu yan iyihen mee nyoono yaŋ yara Atúuha, ban wanoowan nasenaam, ínje be esenool dó wakaan mee guñen : éjako. »