Fúcihum 29

Les épouses et les enfants de Jacob

Sakob narehoor nꞌRaseel

Púr to, Sakob najok dó mꞌbulago'ool ajollen bu ban bunak búpureul mee. 2 Bu funak fucee, naŋanden ekoloŋ nꞌgataama gaagu tan nja guremen mee sikooreiil. Natook to sikoore sífaajiir sara sísaaja son sijaameen min sifiihoe. Elánkiin yáamak egubene butum ekoloŋ yaayu. 3 Nan nja sikoore saasu síling mee, ngufaren élankiin yaayu min guremen so gufaak, ngubaañen yo guguben.

4 Sakob nasonken umaha waawu arogiil : « Gutiom, béy njípurulo ? » Ngúsuupool gurogool : « Haran núpurulo. » 5 Narogiil : « Jímimir Laban aleeh Nahoor ? » Ngúsuupool gurogool : « Eem, úmiroomir. » 6 Narogiil : « Buu nakaane ? » Ngúsuupool gurogool : « Umu bo nꞌgásuumaay. Aleehool akoña han gurege mee Raseel umue néjool son ekooreool. » 7 Sakob narogiil benen : « Bunak burondoŋ bu gahomen sikoore saasu. Jiremen so jifaak, njibaañ bu gamat. » 8 Ngúsuupool gurogool : « Ujúhut ufaren élankiin yaguben mee butum ekoloŋ yaayu sikoore saasu bálingut. Elí be enaak so nsíling peh nufaren yo min újuh uremen so. » 9 Nan Sakob ammee nelob mꞌbugo, Raseel no nátiiŋulo mee son ekoore paayool mara ho may amaha. 10 Sakob nan añow mee Raseel aleeh akoña hara maamaayool Laban, son sísaaja saasu nꞌsijaameen saasu, nacik min afaren élankiin yaguben mee butum ekoloŋ yaayu min aremen ekoore maamaayool. 11 Sakob nsúumool jaram agaab Raseel nahuu. 12 Narok Raseel : « Injé mꞌpaayi ubajibaj, jaayom Rebeka. » Raseel natey agaan paayool. 13 Nan Laban ajam mee mara Sakob ammee aleeh áliinool ajaalojow, natey ngurehoor, nagaabool, naŋarool bu yaŋool. Ngútiiŋ, Sakob narante bulago'ool. 14 Laban narogool : « Aw maregen fúsimom. » Sakob nacin nꞌyaŋ Laban butum fujenna.

Sakob nayab ukoña

15 Funak fucee Laban narok Sakob : « Aw anom, let yo yommee aw bu gújagagom emontoŋ. Ulobom bacaami. » 16 Tooge Laban guleehool gukoña goono gúruba. Anafaan aahu gurogool Leya min áriita aahu gurogool Raseel. 17 Leya bañeererool búgallogallo min Raseel ejanjaŋ, uñeerool mat upooñool. 18 Sakob nacamen Raseel. Narok Laban : « Injé bu gújagagi símit futok nꞌsíruba min usenom aleehi áriita Raseel iyab. » 19 Laban násuupool arogool : « Isonsoŋ. Esenool aw ekoloe esenool acee. Ulako taahe síndo'om. » 20 Sakob nalako símit futok nꞌsíruba ngújagak Laban mimbil ájuh ayab Raseel. Bare símit saasu nsinogoorool naŋ gunak gupinaay mara gacamen Raseel.

21 Ñeer Sakob narok Laban : « Símit san ukahoora mee sítintiiŋ. Usenom akoñaom iyab. » 22 Laban nahomen bugan bugara ésuk yaayu, nakaan gagaan gáamak. 23 Bare nan tinak tijon mee, Laban nátinen aleehool Leya asen Sakob min guŋot nu fuk faafu. 24 Laban naŋar amiigeelool akoña han gurege mee Silipa asen aleehool Leya min akaan ájagagaool.

25 Nan tinak tikahen mee, Sakob nañow mara taŋ bugo nꞌLeya nguŋohe ! Sakob narok Laban : « Taŋ buu nukaanaam mee mee ? Let mara eyab Raseel ecile min íjagak bu nꞌaw ? Waa ucile nubantenom ? » 26 Laban násuupool arogool : « Múkaaniinaayoli musoŋut aleeh áriita buñuuho akat to atiool anafaan. 27 Ñeer ufaak élabati yara gagaan ge, niseni Raseel min ubaañ újagak nꞌínje símit futok nꞌsíruba benen. » 28 Sakob nasoŋ, nafaak élabati yaayu bugo nꞌLeya. Ñeer Laban nasenool aleehool Raseel ayab. 29 Naŋar may amiigeelool Biliha asen aleehool Raseel min akaan ájagagaool. 30 Sakob nanap may nꞌRaseel, nacamenool reg Leya. Naroŋ gújagak bu nꞌLaban benen símit futok nꞌsíruba.

Gabugoor Sakob

31 Nan Acehériit mee añow mee mara Leya gukaanutool dó naŋ Raseel, nasen Leya gabugoor min Raseel ájuhut sah afaret. 32 Leya naŋar búteb nabaj aleeh amaañen narogool Ruben (yo yommee : Jiñoñow, aleeh amaañen). Narok : « Acehériit mee ápurenampuren nꞌñisuu ; maareer araaŋom bu gacamenom. » 33 Leya nabaañ aŋar búteb nabaj aleeh amaañen árubahen min arok : « Héeya, Acehériit mee nan ajam mee mara gucamenutom, nasenom aleeh acee amaañen. » Narogool Simeyoŋ (yo yommee : ajanjam). 34 Nabaañ bandiŋ aŋar búteb nabaj aleeh amaañen. Narok : « Maareer araaŋom be ejogom mara ibajoobaj guleeh gumaañen goono gúfaajiir. » Sakob narok aleeh aahu Léwi (yo yommee : ejok). 35 Nabaañ bandiŋ benen aŋar búteb nabaj aleeh amaañen abaaligen min arok : « Ñaañe isasal Acehériit mee. » Narok aleeh aahu Suda (yo yommee : esal). Ñeer nayihen gabugoor.