Fúcihum 27

Jacob fuit, le rêve de Jacob

Sakob nabanten paayool min áruwaool

Isaak nan áfaanul mee, gúcilool ngujok jaram ñeer añowériit. Funak fucee nawook aleehool amaañen átiyaara : « Esawu ! » Nátuulool : « Oóo ! Nuroge ? » 2 Narogool : « Uñoñow ifallenfallen máamak ban ímirut funak fara ecehom. 3 Uŋar fúkangai son elaaceni yara silaŋen min ujow bu futaŋaat uyimulom énunkureŋ. 4 Nuñulom yo súum naŋ min icamen mee, nutebulom yo itogoñ ifaak níruwai bala icet. » 5 Tootook min Rebeka akohe nan gáyenteniil.

Ñeer nan Esawu ápur mee ajow bu futaŋaat fuyimulool énunkureŋ yaayu, 6 Rebeka narok aleehool Sakob : « Ijanjam paayi nelob bugo nꞌati'i Esawu. 7 Arogoorok ajow amugulool énunkureŋ nꞌfutaaŋaat nañulool yo súum natogoñ yo afaak, náciin Acehériit mee min ásoonienool bala acet. 8 Ñeer úyentenom jak min ukaan wan emmee néjool be elobi. 9 Ujow bu nꞌekoore yaayu nuŋarulom dó ubarak úruba wara ejaameen wajajak min iñul wo paayi súum, naŋ min nja acamen mee. 10 Nuteb usen paayi atogoñ min áruwai bala acet. »

11 Sakob násuup jaaool arogool : « Umímir atiom Esawu afalefalet, ínje ifalehut. 12 Eéni paayom amamayenom, ho be émir arok ínje gabantenool. Mat áruwaom, ho bu garankaom. » 13 Jaaool nalobool hank arogool : « Injé ibaji, danka yaayu ñeer mbil ejok ínje ! Uyéntenom déhooro, nujow uŋarulom ubarak waawu. »

14 Ñeer Sakob najow áŋarul wo asen jaaool, nañul wo súum naŋ min nja paayool acamen mee. 15 Rebeka naŋar wañ wareg mee bajak wara aleehool átiyaara Esawu wan dó mee nꞌyaŋ yaayu, asen aleehool ásola Sakob akaano. 16 Naŋar ubaŋ wara ubarak waawu aguben guñen Sakob son ekondoorool yakuur mee, 17 afaak nasenool eluu yaayu yan añul mee súum son fúmbuur.

18 Sakob najow bu dó mꞌpaayool narogool : « Paam ! » Isaak nátuulool : « Oóo ! Aw ay nꞌguleehom ? » 19 Sakob násuupool arogool : « Injé Esawu, aleehi átiyaara. Ikankaan wan urogaam mee. Ñeer uyuho nutogoñ wan ibajulo mee nꞌfuyim faafu ufaak, núruwaom. » 20 Isaak narogool : « Bare mo nuraŋenulo yo ! » Násuupool arogool : « Acehériit mee Atúuhai abaŋ yo mꞌbulago'om. » 21 Isaak narok Sakob : « Ucigulom nimamayeni min ímir teer maregen aw ommee aleehom Esawu. » 22 Ñeer Sakob nacik paayool Isaak. Isaak namamayenool narok : « Furim faafu fara Sakob, bare guñen gaagu gara Esawu. » 23 Guñen Sakob ngufalet mee naŋ gara atiool Esawu, Isaak afaasutool, nasoŋ bu gáruwaool. 24 Isaak nabaañ asonkenool : « Maregen aw aleehom Esawu ? » Sakob násuupool arogool : « Eem, ínje Esawu. » 25 Isaak narogool : « Ugabulom eluu yaayu itogoñ mimbil íruwai. » Sakob nagabool eluu yaayu atogoñ. Naŋarulool may bunuk arem. 26 Ñeer Isaak narogool : « Ucigulom nugaabom ! » 27 Nacigulool nagaabool. Isaak najam gatiiŋ gara wañool náruwaool arok :

« Gatiiŋ ge, gara aleehom. Gunogoonogoor naŋ gatiiŋ gara ekunko yan Acehériit mee ásooniene.

28 Emít ekaan Atúuha abehuli gamon,

nakaan may etaami nenog

min múcahoaayi mumeeŋ son bunuk !

29 Mbil fiilóofiil nfusoŋi,

min giil gaagu peepe guyahi gújuul.

Nóoni anafaan guti'i

min guleeh jaai guyahi gújuul !

Atúuha adanka gabili mee gadanka,

násoonien gabili mee gáruwa. »

30 Nan Isaak afaak mee gáruwa Sakob, Sakob nápurul. Apúrulopur dó mꞌpaayool déhooro, Esawu nábaañul nꞌfuyim fan ajow mee. 31 Ho may nañul yo súum, natebúl asen paayool min arogool : « Paam, uyuho, nulako jak min utogoñ eluu yaayu yan iŋaruli mee ufaak, ñeer núruwaom. » 32 Isaak narogool : « Aw ay hoom ? » Narogool : « Injé Esawu, aleehi átiyaara. » 33 Isaak najaahali jaram atelen narok : « Taŋ ñeer ay amugulaam mee énunkureŋ natebúl asenom itogoñ bala útiiŋul ? Ho níruwa mee ban éruwa yaayu uyu nu ho. »

34 Ñeer Esawu nan ajam mee balober paayool, nakooret nayah sikaaw sáamak. Náciin paayool arogool : « Paam, úruwaom may ! » 35 Isaak násuupool arogool : « Ati'i kum ajaalo abantenom taahe min ayab éruwa yaayu yan ibileeni mee esen. » 36 Esawu narok : « Naŋaŋar gajow gara Sakob jak (abantena) mara abantenambanten ñoono ñáruba. Nabohambot funafaanet, jaat bandiŋ nabaañ abohom éruwa. » Nabenen arogool : « Uŋañenut éruwa ecee bu nꞌínje ? » 37 Isaak násuupool arogool : « Irúwaooruwa mimbil áani anafaani ban gutiool peepe bu gáani újagagaool. Ho be ebaj múcahoaay son bunuk. Iŋañenut ecee bu nꞌaw. » 38 Esawu najok to liŋ nꞌelobool : « Erúwa yanur déhooro nubaje ? Paam, úruwaom may ! » Ajúhut ajok mufuool, nayah sikaaw. 39 Paayool narogool : «

Tanootan nucine, etaam yaayu mat enog,

ubiloot eñow gamon galoheúl mee nꞌémit.

40 Aw be éroŋum mꞌbákundui,

ban noon ájagaga ati'i.

Bare nan ubiloot mee esoŋool, aw be epak nꞌfumiigeelehi.^a »

Sakob natey bu Haran bo nꞌLaban

41 Ñeer Esawu nabaŋ Sakob funamben mara éruwa yan ayab mee mꞌpaayool. Esawu narok dó mꞌbúyegehool : « Nan paayom abil mee ecet, ínje be emuk atiom Sakob. »

42 Rebeka nan gugaanool mee gapinoor gara aleehool átiyaara Esawu, naboñ guwoogulool Sakob min arogool : « Ati'i Esawu gapinoorool bu galugen, ho be emugi. 43 Maareer úyentenom jak ! Utey bu Haran bo nꞌáliinom Laban. 44 Nucin bo jaram fiiñ ati'i fuyoom, 45 nulako bo jaram amojen wan ukaanool mee. No ñeer ínje be eboñ guŋaruli mara icamenut jipagom funak fanur márubauul. »

46 Ñeer Rebeka najow arok Isaak : « Buroŋom bútaañitaañi mara búkaanum úsaabulom ehiitiit yaayu gammee ukoña Esawu. Eéni Sakob bandiŋ ayab akoña hara mof me, hanogoore nꞌukoña Esawu, nicet ñeer kolo. »