Isaak bugo nꞌAbimelek
26
Nin naanu mbaj bandiŋ bacaar mꞌmof maamu balet bara jaa guroŋ Aburaham. Ñeer Isaak nahomenoor be ejow nꞌgara Geraar tan Abimelek áyiih hara efilisiit yaayu acin mee. 2 Acehériit mee nápurul to Isaak narogool : « Jambil ujow bu nꞌEsípt, aw be econg mꞌmof man ibili mee eliik. 3 Nucong to, ínje bu gáani nꞌaw ban bu gásoonieni, mara aw mꞌbúbajumi nibil mee esen mof maamu peepe. No ínje be ekaan wan ukahoor mee mꞌpaayi Aburaham. 4 Injé be ekaan min búbajumi bumeeŋ naŋ síwuut sammee nꞌémit ban be eseniil mof maamu peepe. Mooliil mubil mee ecil nísoonien giil gaagu búroom go gammee nꞌdúniya. 5 Be ekaan mee mara Aburaham ajamanjam, nasoŋom, najok fuyuhoumom. »6 Ñeer Isaak nacong to Geraar. 7 Nan bugara ésuk yaayu gusonkenool mee mara akoñaool, násuupiil arogiil : « Ume áliinom. » Rebeka ajajak pak ; yo ecil mee násebi erogiil akoñaool, jambil gumugool moola. 8 Bacongerool to mbupiyo mee, funak fucee Abimelek áyiih ara efilisiit yaayu nayuugenúl nꞌepalanteerool, nañow Isaak mbuñumoor nꞌakoñaool Rebeka. 9 Abimelek naboñ guwoogulool. Narogool : « Taŋ aw Rebeka akoñai ! Waa ucile nurogóli áliini ? » Násuupool arogool : « Uñow mee ilob yo, ísebisebi jambil icet moola. »
10 Abimelek nabaañ arogool : « Buu nukaanóli mee mee ? Ŋañoeene fáriit acee mꞌbuganom najaleen gábil akoñai ban aw boheen ecilóli nulaar miñ. » 11 Abimelek narok ñeer ésuk yaayu peepe : « Amaañen aahu ume bugo nꞌakoñaool, anooan agore acee mꞌbugo, ínje be emugool. »
12 Nꞌémit yaayu uyu, Isaak anaanaaf nꞌurager wammee dó mꞌmof maamu, nayim warege ñoono ceme wan anaaf mee, mara Acehériit mee ásoonienoosoonien. 13 Ñeer fubajool nfureg nfubenenoe jaram akaan asaanum háamak. 14 Nabaj sikoore sara sísaaja, sijaameen son siyaha, nꞌújagaga gamemmeeŋ. Ñeer efilisiit yaayu nguciiñool, 15 ngufogen sikoloŋ saasu peepe san újagaga paayool Aburaham guwook mee ho bo mꞌburoŋ. 16 Abimelek narok ñeer Isaak : « Urególireg sembe máamak, aw be épur nꞌésugoli ! »
17 Isaak nápur, najow acong nꞌgásilimb gara Geraar. 18 Nákaawul sikoloŋ san újagaga paayool guwook mee min efilisiit yaayu gufogen so mꞌbaceher paayool Aburaham. Nabaañen so ujow wan paayool akaaneen so mee.
19 Funak fucee, újagaga Isaak nguwok ekoloŋ dó nꞌgásilimb gaagu, nguloh nꞌgafuy. 20 Umaha bugara Geraar ngúmuyen umaha bugara Isaak, ngurogiil : « Mal maamu moolóli. » Ñeer Isaak narok ekoloŋ yaayu Esek (yo yommee : gámuy) mara yo ecil mee gámuy gaagu. 21 Ujágaga Isaak nguwok ekoloŋ ecee. Nekaaniil búñagoor benen, narok yo Sitana (yo yommee : búrorogoor). 22 Nápur to, nabaañ awok ekoloŋ éfaaten, yo ekaanut gámuy. Narok yo Rehobot (yo yommee : waawaay) mara naroge maareer Acehériit mee abaŋolaabaŋ tin tawaaye mbil fubajolaal fubeneno dáare mꞌmof me.
23 Nápur to, najow bu Beer-Seba. 24 Nátiiŋ to, Acehériit mee nápurulool nu fuk faafu arogool : « Injé emmee Atúuha hara paayi Aburaham, jambil úsebi. Injé umu nꞌaw ban bu gásoonieni. Be ekaan min búbajumi bumeeŋ, mara ájagagaom Aburaham. » 25 Isaak nateep to fúsimenum min nak áciin to Acehériit mee. Nayihen to síguuhool. Ujágagaool nguwok to ekoloŋ ecee.
26 Nan gommee ngawok ekoloŋ yaayu, Abimelek nápurul Geraar be eñow Isaak. Najawoorúl nꞌasaabaool Ahusat bugo mꞌPikol ammee anafaan utiigaool. 27 Isaak nasonkeniil arogiil : « Taŋ waa njikaalo ? Jicamenutom jaram jikamulom síndouul ! » 28 Ngúsuupool gurogool : « Uñoñow mara Acehériit mee umu nꞌaw. Ñeer ujamooraal nukaliaal ; alaal bu bapaalaay. 29 Maregen maregen, éli ukaanuti gúnuur, majage déhooro nukaani, ban ukahenikahen nujow nꞌgásuumaay. Ñeer ukalióli mara mat ukaanóli kóji. Aw maareer Acehériit mee ásoonienisoonien. » 30 Ñeer Isaak násiil súum ngúcaho gupooñ, ngurem. 31 Fara gajom mꞌbújom, nguyuhoáali min gukalioor gufaak, nakaheniil ngoot nꞌgásuumaay.
32 Funak fanur faafu, újagaga Isaak ngújool gurogool : « Ekoloŋ yan ommee ngawok éfafah. » 33 Isaak narok ekoloŋ yaayu Siba (yo yommee : gakali) ecimee káŋ bu jaat ésuk yaayu ngurok yo Beer-Seba : ekoloŋ yara gakali.
Búyab bara Esawu