21. Yéesu gucumboocumb ngucafool
21. Jésus est trahi et jugé
Esondaar ngujok Yéesu
1 1 Nan Yéesu alob mee gurim gaagu afaak,
najaoor nꞌulagenaool bu nꞌgaagu gahaja gara gásilimb gara Seduron.
Ngunogen nꞌgafat gaam bo mee.
2 2 Yudas,
habilool mee ecumb,
ámimir tin taahu,
mara Yéesu nja ajojow dó bugo nꞌulagenaool.
3 3 Ñeer Yudas naŋar gayooŋ gara esondaariil nꞌupooya gan unafaan úsimena waawu nꞌefarisiit yaayu guboñulo mee,
min gujow gutoogiil dó.
Guyekenyeken gutiilum gasasap,
gujaaŋa son mutiigum.
4 4 Yéesu nemma námire wabilool mee ebaj peepe,
najow ngurehoor.
Narogiil :
« Ay njiŋese ? »
5 5 Ngurogool :
« Yéesu hara Nasaret.
» Narogiil :
« Injé umee.
» Tooge Yudas,
habilool mee ecumb,
umu to mꞌbugo nayihoe.
6 6 Nan Yéesu arogiil mee :
« Injé umee »,
bugo peepe nꞌgubaañ búsol,
nguloh nꞌetaam.
7 7 Nabaañ asonkeniil :
« Ay njiŋese ?
» Ngurogool :
« Yéesu hara Nasaret. »
8 8 Narogiil :
« Iroguurok ínje fannaom ho maame.
Eéni maregen maregen ínje njiŋese,
jikahen ulagenaom ngujow. »
9 9 Furim faafu fan alob mee afaak farok mee :
« Paam,
haani hanur aliimut mꞌbugan gan usenaam mee »,
mo nfukaane.
10 10 Ñeer Simoŋ Piyeer,
hayeken mee bákundu,
náñagul bo fác nátiiŋ nesaat gawos gárib gara ájagaga anafaan úsimena háamak aahu.
Ajágaga aahu gajaool Malikus.
11 11 Yéesu narok Piyeer :
« Ubaañen bákundui nꞌgafoon bo.
Pére mat irem nꞌéraanum yara sílaam yan Paayom asenaam mee ? »
Nguŋar Yéesu bu nꞌAnaas
12 12 Ñeer gayooŋ esondaar yaayu bu nꞌanafaaniil ró,
nꞌupooya bugara unafaan Esúiif yaayu,
ngujok Yéesu gukok.
13 13 Ngumundum guŋarool bu nꞌAnaas ammee arol Kayiif.
Ganaay gaagu Kayiif aameen mee anafaan háamak hara úsimena.
14 14 Ban Kayiif ho amus mee arok Esúiif yaayu :
« Koloe an hanur acet bu mꞌbugan gaagu peepe. »
Piyeer narien, narok alet alagena Yéesu
15 15 Ñeer Simoŋ Piyeer nꞌapaalool alagena acee ngulagen Yéesu.
Tooge alagena aahu námimir anafaan úsimena háamak aahu,
yo ecile nanogen nu ganur nꞌYéesu bu ñara dáara fukeelum fara anafaan úsimena háamak aahu.
16 16 Bare Piyeer nayiho bo tíyaŋ acik gápeegum gaagu.
Ñeer alagena aahu hámiroor mee nꞌanafaan úsimena háamak aahu,
nápurul ájool alob nꞌájagaga akoña hapooye mee gápeegum gaagu,
min akahen Piyeer nanogen.
17 17 Ñeer akoña aahu narok Piyeer :
« Aw mee let acee nꞌulagena bugara amaañen aahu ?
» Narogool :
« Injé ilet ró mꞌbugo. »
18 18 Tootook min újagaga waawu bugo nꞌupooya waawu gusapene to sambun ngugongen so ngon ngárumo mara nínif.
Piyeer may nan to mꞌbugo ngárumo.
19 19 Dó nꞌyaŋ yaayu,
anafaan úsimena háamak aahu nasonken Yéesu mara ulagenaool son may wan aliigen mee bugan.
20 20 Yéesu narogool :
« Nilolob ípuren fácil bugan gaagu ŋanto pas.
Nanoonan niliigeliik bugan nꞌgúrehoorumiil gara éciin Atúuha son dó nꞌyaŋ yara Atúuha,
tan nja Esúiif yaayu peepe guhomenoor mee.
Bajut ucee wan ilobe ikoopen.
21 21 Ñeer waa ucile nusonken ínje ?
Usonken gáyentenaam mee waa nilobiil :
bugo gúmimir set wan nja ilob. »
22 22 Nan Yéesu alob mee gurim gaagu,
acee nꞌupooya gan to mee nalaaŋool garaab,
narogool :
« Mee nubile ésuup anafaan úsimena háamak aahu ? »
23 23 Yéesu narogool :
« Eéni ilobut maregen,
uliigom tuu nikajene.
Bare éeni nilolob maregen,
waa ucile nutegom ? »
24 24 Púr to,
Anaas naboñ Yéesu bakoger gusen Kayiif,
anafaan úsimena háamak aahu.
25 25 Simoŋ Piyeer,
ho naroŋ to nayihoe nan gárumo.
Ngurogool :
« Aw may ulet acee nꞌulagenaool ?
» Narien.
Narogiil :
« Ilet ró mꞌbugo. »
26 26 Acee nꞌújagaga anafaan úsimena háamak aahu,
atii amaañen han Piyeer asaat mee gawos narogool :
« Iñowuti nu ho bo nꞌgafat gaagu ? »
27 27 Bare Piyeer nabaañ arien.
To bújooŋoor,
gaŋana ngurok. a
Pilaat nátoomuloor Yéesu
28 28 Mꞌbújom pím,
ngúpurenul Yéesu nꞌyaŋ Kayiif,
nguŋarool bu nꞌyaŋ águwerunaar aahu Pilaat hara mof mara Room.
Bare Esúiif yaayu fannaiil gunogenut dó nꞌyaŋ yaayu mimbil guset,
ngújuh gúcaho mꞌPaak yaayu.
29 29 Ñeer Pilaat nápurul atoogiil tíyaŋ narogiil :
« Amaañen aahu umu,
jiroge waa nalaare ? »
30 30 Ngurogool :
« Eéni aleheen akaana kóji,
mat uŋareenulool useni. »
31 31 Narogiil :
« Buguul fannauul jiŋarool jicaf,
naŋ min guyuhoumuul gurok mee.
» Ngurogool :
« Guyuhoumóli gusenutóli bulago bara jamuk an. »
32 32 Dó peepe mbil furim faafu fan Yéesu alob mee fukaano,
fammee fara eliik buu nabile ecet eeno.
33 33 Ñeer Pilaat nabaañ anogen dó nꞌyaŋool,
nawook Yéesu narogool :
« Aw ommee áyiih Esúiif yaayu ? »
34 34 Yéesu narogool :
« Wan ulobe mee,
aw upinoor wo teer gucee gulobi múmbaam ? »
35 35 Pilaat násuupool arogool :
« Mee pére ínje Asúiif ?
Bugara mofi fannaiil bu nꞌunafaan úsimena bugooluul ró gujoguli gusenom.
Waa nukaane ? »
36 36 Yéesu narogool :
« Jáyiihom jilet jara duniya ye.
Eéni kaanenkaan jara duniya ye,
újagagaom boheen futiik múmbaam jambil iloh nꞌguñen unafaan Esúiif yaayu.
Jáyiihom jilet jara baabe nꞌetaam. »
37 37 Ñeer Pilaat narogool :
« Aw taŋ áyiih ?
» Yéesu narogool :
« Aw fannai uroge ínje áyiih.
Injé ibajibaj níjool nꞌduniya be elob niliik bugan maregen maamu.
Anooan ammee mꞌmaregen,
ho be ejam furimom. »
38 38 Pilaat narogool :
« Waa wommee maregen maamu?
»
Nan alob mee afaak,
nabaañ ápurul atook bo Esúiif yaayu narogiil : « Injé iñowut wan amaañen aahu akajene wátiiŋe jamugool.
39 39 Bare min emmee mꞌmúkaaniinaayuul nja jikahenkahen an ansoon nꞌfukuh nꞌgagaan ganoogan gara Paak,
teer jicamencamen ikahenuluul áyiih Esúiif yaayu ? »
40 40 Ngulako nak gurok máamak :
« Haani,
let ho.
Ukahen Barabas !
» Ban Barabas aahu acooca bugan.
Sílaam Yéesu
41 1 Ñeer Pilaat nasen bulago min guŋar Yéesu gukaruwaas.
42 2 Esondaar yaayu ngukaanool gájuwo gájuujuuk cám,
nguŋar gúgook gabaje unuk gukaan fugang guroopool nꞌfukow.
43 3 Nak gucigool ngúfookulool gurok :
« Ayíih Esúiif yaayu,
ulobe nꞌaw !
» Mo ngutegeool mee uraab.
44 4 Pilaat nápurul benen narok Esúiif yaayu :
« Yoo,
bu gápurenuluul ho bu tíyaŋ min jímir mara iñowut wanoowan nu ho wátiiŋe jamugool. »
45 5 Ñeer Yéesu nápurul min akaanoe gájuwo gaagu gájuuk mee,
nꞌfugang fara unuk waawu dó nꞌfukowool.
Pilaat narogiil :
« Amaañen aahu umee. »
46 6 Nan unafaan úsimena waawu nꞌupooya waawu guñowool mee,
ngukaaw gurok :
« Ufaaŋool nꞌekuruwa !
Ufaaŋool nꞌekuruwa !
» Pilaat narogiil :
« Buguul fannauul jiŋarool jifaaŋ nꞌekuruwa !
Injé iñowut wanoowan nu ho wátiiŋe jamugool. »
47 7 Esúiif yaayu ngurogool :
« Elí ubabaj fuyuhoum faroge :
ho be ecet mara najogoorojogooro Aleeh Atúuha. »
48 8 Nan Pilaat ajam mee balober baabu,
nareg násebie.
49 9 Nabaañ anogen nꞌyaŋool,
narok Yéesu :
« Aw hara béy ?
» Bare Yéesu ásuuputool.
50 10 Ñeer Pilaat narogool :
« Mat úsuupom ?
Umírut mara nibabaj sembe sara gakaheni son sembe sara efaaŋi nꞌekuruwa ? »
51 11 Yéesu narogool :
« Ujúhut ubaj sembe sanoosan nꞌínje éeni Atúuha asenuti so.
Yo ecil mee,
an aahu abehaam mee nꞌguñeni ababaj júnube yarege bájalako yiiya. »
52 12 No ñeer Pilaat aŋes mee bu gakahen Yéesu.
Bare Esúiif yaayu nguyaaŋenool gurok :
« Eéni ukahenool,
yo yommee áyiih aahu Sesar let abugei.
Anooan ajogooroe áyiih,
ho alahoor Sesar. »
53 13 Nan Pilaat ajam mee balober baabu,
nápurenul Yéesu bu tíyaŋ,
nalako tan nja acafa alako mee.
Gajow to « tarihi mee mꞌbálankiin »,
nꞌgúlobum éhebura gurok to Gabata.
54 14 Tooge funak faafu fo fommee funak fara gacookoor gagaan gara Paak.
Tinak nticaaŋ,
Pilaat narok Esúiif yaayu :
« Ayíihuul umee ! »
55 15 Bare bugo ngukaaw gurok :
« Acet !
Acet !
Ufaaŋool nꞌekuruwa !
» Pilaat narogiil :
« Jiroge ifaaŋ áyiihuul nꞌekuruwa ?
» Unafaan úsimena waawu ngurogool :
« Elí ubajut áyiih acee halet Sesar. »
56 16 Ñeer naseniil ho be efaaŋ nꞌekuruwa.