22. Yéesu nafaaŋi n'ekuruwa
22. Jésus est crucifié
Yéesu nafaaŋi nꞌekuruwa
32 32 Ñeer esondaar nguŋaroor umaañen gucee gúruba ukaana kóji bu jamugiil nu ganur nꞌYéesu.
33 33 Nan gútiiŋ mee tan guroge mee "esend",
ngufaaŋ Yéesu nꞌekuruwa.
Ukaana kóji gammee gúruba ngufaaŋiil may,
anooan nꞌekuruwaool min gubet Yéesu etut,
aahu nꞌgañenool gárib,
aahu nꞌgañenool gamay.
34 34 Ñeer Yéesu náciin arok :
« Paam,
ubonkehiil mara gúmirut wan gon nekaan.
» Esondaar yaayu ngukaan bújeh be émir min gubile gawaajoor wañool.
35 35 Bugan ngon to nguyihoe ngon neñeer.
Unafaan Esúiif yaayu nak gúfookulool gurok :
« Apagempagen gucee :
apa apagenooro,
éeni maregen ho ammee Kirista han Atúuha acaap mee ! »
36 36 Esondaar yaayu may ngúfookulool :
ngucigool ngusenool bunuk bafifir arem
37 37 ngurogool :
« Eéni maregen aw ommee áyiih hara Esúiif yaayu,
aw fannai upagenooro ! »
38 38 Fatiya fukowool nꞌekuruwa yaayu babaj to busafer baroge :
« Aahe áyiih hara Esúiif yaayu. »
Akaana kóji aahu hajok mee émiremma
39 39 Acee nꞌukaana kóji gafaaŋi mee nak ajel Yéesu arok :
« Let aw ommee Kirista aahu ?
Upagenooro,
nupagenóli may ! »
40 40 Bare aahu narotoorool narogool :
« Taŋ aw úsebiut Atúuha,
aw hayab mee etek yanogoore nꞌyoola ?
41 41 Ala maregen bacaam bara bakaanerola nuyabaale :
bare ho akaanut wajagut. »
42 42 Afaak narok :
« Yéesu,
mbil uwosenom nan ubil mee ganogen nꞌJáyiihi. »
43 43 Yéesu narogool :
« Be elobi maregen me.
Jaat déhooro aw bu gáani nu ganur nꞌínje nꞌArijana. »
Ecet yara Yéesu
44-45 44-45 Nan bunak bujooŋoor mee etut fukow,
mmooc bíp mꞌmof maamu peepe káŋ jaram buŋaaho.
Gábil gáamak gáginden mee tañaao mee ñara dáara yaŋ Atúuha,
ngujiso nꞌetut go jaram yah bo.
46 46 Ñeer Yéesu nayah fukaaw fáamak arok :
« Paam,
ínje umu nebaŋ yaaloorom nꞌguñeni.
» Nan alob mee gurim gaagu afaak,
nawalo.
47 47 Anafaan esondaar yaayu,
nan añow mee dáaru peepe,
nasal Atúuha arok :
« Amaañen aahu ume,
maregen an átiliŋe naameen. »
48 48 Bugan gaagu gajaalo mee meeŋ bu buñow wabaj mee,
nan guñow mee gufaak,
ngúlowulo goot.
Ntáañi'iil jaram nak gutek úgangiil.
49 49 Gupaal Yéesu peepe,
bu nꞌukoña waawu ró galagenulool mee kábiriŋ Gálile,
guyihoyiho kuhi min guñeer wakaan mee.
Gafok Yéesu
50-51 50-51 Bajembaj acee amaañen gajaool Suseef,
ho an hara ésuk Esúiif yaayu yan guroge mee Arimate.
Amaañen aahu kankaan an ásuume nátiliŋ,
ban naameen nenaak éjool yara Jáyiih Atúuha.
Ho ananap mꞌbugara fujoj fáamak faafu,
bare ñaañe asoŋut bapinoorer mꞌbakaaner bara gupaalool gan dó mee nꞌfujoj faafu.
52 52 Amaañen aahu najow atook Pilaat min áciinool naŋar eñalen Yéesu bu gafok.
Pilaat nasoŋ.
53 53 Ñeer Suseef nawalenúl eñalen yaayu fatiya nꞌekuruwa yaayu,
naguub yo nꞌgábil afaak,
nabaŋ yo mꞌbúwaay bawogi nꞌfúlankiin fáamak dan an amusut afogi.
54 54 Funak faafu,
fo fommee fara gacookoor múcahoaay mara funak fara fulako fabil mee búnogeni gárusa.
55 55 Ukoña gápurulo mee Gálile nu ganur nꞌYéesu,
ngujaaoor nꞌSuseef jaram guñow fuyaak faafu ban nguñow buu eñalen Yéesu ebaŋi dó nogoor.
56 56 Ngoot bu gacookoor esantiñaajo mꞌmuloosoor be ekaan eñalen yaayu.
Nan funak fulako fútiiŋ mee,
ngúyolen,
naŋ min fuyuhoum Atúuha fulob yo mee.a