मरकुस 2

यीशु गा व्दारा टे लखवा गा बिमारी के सासजा

चोटोका दिन बदोन, यीशु कफरनहूम पुरान डाबोलटे हेन। एठा डेगा कुरकू मालुमजेकी यीशु डी उरान डाबोलटे हेन। 2 एठा घोनेच कुरकू जामाएन इनी कारण पूरा उरान कुरकू भेट्टेन। एटो टाएन की दराजो गा बल्ला दारोमेन कुरकू टे भेटटीके डा, एठा यीशु दिकु तलान नी परमेश्वर गा वचन गा खाबोर गघाल लक्के डा। 3 एठा अदा कुरकू म्या लखवा गा बिमारी कोरोके दिकुगा, डी उफुन कुरकू नी ठुलटे डिचके यीशु मेरान सालेनेच। 4 पेनो गर्दी गा वोजीटे डियागा मेरान बान आदिरदुका। मेटे दिकुनी डी कोरोके जो पदळी इटान यीशु डा डी पदळी खुल्लाटे कोरा आरुके, डी कोरोके चाटाई के उफुन भी कोनाटे ठोलटे इटान आराम्बोटे आगुरुकेनेच। 5 मेटे यीशुनी डी उफुन कुरकू गा विश्वास डोके मेटे देटेन डी लखवा गा बिमारी कोरोके मंडीके, “हे सोपती, इंज आमगा पापो के मापोएबा होय।” 6 जब घोनेच मूसा गा नियम इथूमिठाच जो डी उरान सुबानके डा, जो चोचकाभी यीशुनी मंडीके डेगा विषय के दिकु इकुका मनेन बिचार लज्जे, 7 “इनी कुरकू एनोगो बाकी मंडी होना डा! चोयाकी एनोगो मंडीटे इनी कोरो परमेश्वर गा खिलाफबेन दडाबा होय। परमेश्वर आराटे जेकाभी पापोके मापोए बाने।” 8 तुरुटो यीशुनी मालुम्जे डा की दिकु चोच बिचार लाक्के। एठा यीशुनी दिकुके मंडीके, “आपेन एनोगो बाकी बिचार होना डा।” 9 चोच इंजेन लखवा गा बिमारी मिठाचके इनी मंडी असान होय? “कि अमागा पापो के मापोएबा होय।” देटेन इनी मंडीकि एठाभी आसान होय, “की बिडे डो, अमागा चाटाई ठुले, डो सेंद्राए?” 10 “पेनो इंज मेन्बाकी आपे चिनाए की इंज कोरो गा कोण पृथ्वी लिंजेन पापो गा मापो जिऊ गा हाक दोडोबा।” मेटे यीशुनी लखवा गा बिमारी मिठाचके मंडीके, 11 “इंज अमाटे मंडीवा होय, बिडे डो, अमागा चटाई ठुलटे अमा उरान सेने।” 12 डिका टेमोन इनी कोरो बिटजे, डिचनी हेजे चाटाई ठुलटे हेजा उरान ओले, सेबाई कुरकू डिचके दोडो लाक्के डा, एठा हैरानजे, एठा परमेश्वर गा जीमू रीमे लज्जे की दाटे मंडी लाज्जे, “आले एनोगो चोलाका बान दोडूका।”

यीशु व्दारा मत्ती के हाको

(मत्ती 9:9-13; लूका 5:27-32)

13 यीशु हेजा उफून चेलाकू सेंग्गोन म्या ठेको दबोलटे गलील गा समुद्र गा धुराटे ओले। एठा घोनेच कुरकू दियागा मेरान हेन एठा यीशु दिकुके परमेश्वर गा वचन इथू लाज्जे। 14 डेगा बादोन जब यीशु चेल्के डा, मेटे डिचनी लेवी जीमू गा म्या कोरो डोकेनेच दियागा दुसरा जीमू मत्ती डा। दिया बाटे जीमू हलफाईस डा, डिच उरा गा टेक्सा सा डा, डिच हेजा गा टेक्सा सा गा नका जगान सुबानटे डोकेनेच, एठा यीशुनी डीचके मंडीके, “इंजा चेला आरु घाल्जी इंजा गेल्ला हेजे।” एठा लेवी तेंगेनजे हेजा कमाय गा जगा अराटे एठा यीशु गा चेला आरु घाल्जी इंजा टाऊटे हेजे।

15 एठा थोळासा दिन गा बादोन यीशु एठा दियागा चेलाकू लेवी गा उरान आटाजोम लाक्के डा। एठा घोनेच टेक्सा सा मिंकू एठा आलग्गो कुरकू डिचके पापी मेंडडा डी कुरकू डी उरानके डा, एठा डिच भी दिकु गेल्ला आटाजोम लाक्के डा, चोयाकी दिकु सेबाईकु यीशु गा टाऊटे ओले। 16 येटेन डोके की मूसा गा नियम इथूमिठाच कुरकू दिकुके जो फरीसि कुरकू डा। दिकुनी इनी डोके डा देटेन पापिकू एठा टेक्सा असिमिनकू गा सथोन आटा जोजोम लक्के होय। दियागा चेलाकू टे मंडीके, “देटेन नी टेक्सा असिमिनकू एठा पापिकू गा सथोन नी जोम्बा डो नुनुवा होय!” 17 जब यीशुनी इनी आजुम्टे दिकुके मंडीके, “सजा कुरकून जळीबुटी जिऊ कोरो जारुरत बाऊ पेनो बिमरी कुरकून जारुरत होय। इंज डी कुरकूके हाको घाल्जी बान हेज्दुका जो खुदकेका धर्मी मेन्बा, पेनो डी कुरकूके हाको हेन जो पापी होय।”

उपासो टे जूळातिन्ज के प्रश्न

(मत्ती 9:14-17; लूका 5:33-39)

18 यूहन्ना गा चेलाकू, एठा फरीसि कुरकू बिना आटा जोजोम उपासो दोडो डा। एठा म्या दिन थोडा कुरकू यीशु गा मेरान हेनडो कोम्बाराके, “दिकू नी हेके डो एठा डियटे येडेन मंडीके, यूहन्ना गा चेलाकू एठा फरीसि कुरकू चोया बिना आटा जोमा गा उपसो दोडो डा, पेनो अमागा चेलाकू उपसो बान दोडो?” 19 यीशुनी दिकू टे मंडीके, “जब टाएन इंज इंजागा चेलाकू सथोन होय, दिकु बिना जोम गा उपसो बान दोडो, चोयाकी दिकु खुशी ममानातिंजबा होय। देनोगो का नावरा गा सोपतीकु दियागा सथोन ब्याह गेन खुशी मानतिंजे लाक्के होय।” 20 पेनो एगो दिन हेजेवा, जब नावरा दिकु सेंग्गोन बान थंदळ डी टेमो बिना आटाजोम उपसो डोएबा। 21 अगर इंजगा शिक्षा के जुना रितो टे बेल्लाएवा, डो ऐगो दायेवा जुना आंगी मठान उनाई आंगी ठिगरा जुळतिन्जकी। उनाई ठिगरा टोरमेडेबा एठा आंगी त्याकिवा। इंजा शिक्षा इनी आंगी गा रोंगो बेकारजुवा। 22 ऊनाई अंगूर गा रेस्सो के जुना कातळे गा झोरान जे काभी बान दोडो, बान तो अंगूर रेस्सो जुना कातळे झोरा टयागेवा, एठा अंगूर गा रेस्सो बाएरा भी खराबोउवा, पेनो उनाई अंगूर गा रेस्सो उनाई कातळे झोरान भेटटेवा होय।

यीशु पवित्र दिन गा प्रभु

(मत्ती 12:1-8; लूका 6:1-5)

23 परमेश्वर गा म्या पवित्र दिन, जब यीशु दियागा चेलाकू खिटीनींजटे चेल्के डा मेटे दियागा चेलाकू गुंहू गा जौ देडेज लज्जे डो जोजोम लज्जे। 24 मेटे अदा फरीसि कुरकू नी यीशु टे मंडीके, “डोगे, अमा चेलाकू एनोगो कामय चोया दाडावा? जो मुसा गा नियम गा रोंगो परमेश्वर गा पवित्र दिनेन दडा सही बाऊ होय?” 25 यीशु नी दिकुके मंडीके, “चोच आपेनी बान पळातिनज्दुका घोनेच टेमो पेला आलेगा खापेट जुनाकू दाऊद नी चोच डाके जब दियागा सोपतिकू रांगेजका डा।” 26 डी टेमोन अब्बियातार परमेश्वर गा महायाजक डा। मेटे दाऊद बेल्लाउमिनी परमेश्वर गा डेरान ओले डी सोकळाके जोफे जो परमेश्वर के भार जीटे पेळेचके एठा हेजा गा सोपतीकूके जीके। जो मूसा नियम गा रोंगो बस परमेश्वर गा याजककुन का जोजोम गा अनुमति डा। 27 मेटे यीशुनी इनी बातोके मंडी स्याके, परमेश्वर नी हेजा पवित्र दिनके कुरकू गा घाल्जी आरुके होय, पेनो कुरकूके परमेश्वर गा पवित्र दिन गा घाल्जी बान आरुडुका। 28 इनिघाल्जी इंज कोरो गा कोण पवित्र दिन गा मठान हाकगेल्ला दोडोबा।