लूला टी मिठाच कोरोके सासजा
(मत्ती 12:9-14; लूका 6:6-11)
3
डबोलटे यीशु टे आराधना जगा नी ओले। देडेन म्या कोरो डा डियागा टी लूला डा। 2 आराधना जगान नी अदा फरीसि कुरकू यीशु लिजेन आनोवा टोकाके डा म्या वजा घाघटा लाक्के डा। इनीघाल्जी दिकु यीशुके ध्यान टे दोडो लाक्के डा, दिकु डिचके परमेश्वर गा पवित्र दिनेन सजाएच्बा की बाने। 3 यीशुनी लूला टी मिठाच कोरो टे मंडीके, “सेबाई कुरकू तालान तेगेन्जू म्हणजे आमके कुरकू दोयामी होना।” 4 एठा डिचनी कोम्बराके मूसा गा नियम रोंगो, “चोच परमेश्वर आलेके दियागा गा पवित्र दिन कुरकू गा भालाई दडा हुकुम जेवा या बुरा दडा गा? चोच दिकु आलेके जेगा जीवन बबाचातिंज गा हुकुम जेवा होय या डिचके घोगेच्जा?” पेनो इनी कुरकू कयोमके। 5 एठा यीशु खिजोएन, जब यीशु दिकु कोने डोके भेवा नराजोके डा चोयाकी दिकुनी यीशु गा सेंग्गोन बान आजुम्गा इन्कारके। एठा डी कोरो टे मंडीके, “अमा टी इंज कोनेन बळातिंज्के।” डी कोरोनी यीशु कोनेन बळातिंज्के एठा दिज्या टी साजायेन। 6 मेटे फरीसि कुरकू बल्लान ओले तुरुटो हेरोदेस राजा गा साथो जीउमिंकू सेंग्गोन बेल्लाटे योजना आरू लाज्जे कि यीशुके चोफर टे घोजेचबा।घोंजा गा यीशु मेरान हेजे
7 एनेगा बादोन यीशु हेजा गा चेलाकू सेंग्गोन कुरकू टे लेंक्कीन गलील समुद्र गा धुरान ओले। एठा गलील जिल्हा गा टे कुरकू गा म्या खाट गर्दी डियागा टाउटे ओले। 8 दिकु कुरकू यरूशलेम शहर, एठा यहूदिया जिल्हा गा आलग्गो पुराटे, एठा इदूमिया जिल्हान, एठा यरदन गडान गा पूर्वा कोनटे, एठा सोर एठा सैदा शहरेन गा आसो पासो टे कुरकू गा म्या गर्दी इनी आजुम्टे दिया मेरान हेन। की यीशु टोनोंगो अचाम्बो कमाय दडा लाक्के डा। 9 एठा यीशु नी हेजा चेलाकू टे मंडीके, “इंज्के सुबान घल्जी म्या सनीसा डोंगा साली, म्हणजे इंज्के कुरकू तलान दाबातिंजू बाकी होना।” 10 चोयाकी यीशु घोनेच कुरकूके साजकु डा। इनिघाल्जी जो कुरकू बीमारडा, डिचके उठा घाल्जी सोडू डा। 11 जब भी भूतोकु मुके कुरकू डिच्के दोडोवा, दिकु दिज्या सम्मान डिच्के मानजिउगा घाल्जी सोटजू। एठा इनी मंडी डोन चिल्लतिंजू डोन की अमा परमेश्वर कोंटे होय। 12 एठा यीशुनी दिकुके खट्टेका चतारायकेकू एठा मंडीके, “जेकाकेभी बाकी गघाल की इंज परमेश्वर गा कोण होय।”
यीशु व्दारा बारा चेलाकू कलमके मिंकू
(मत्ती 10:1-4; लूका 6:12-16)
13 इने बदोन, यीशु मेरा गा म्या टुक्की लिजेन ओले एठा डी कोरोकुके मेरान हाकोलेकु। दिकुके डीचनी हेजा चेला हारूघल्जी कलमके डा। एठा दिकु डी गर्दी टे दिया मेरान हेके। 14 मेटे डीचनी दिकु तलाटे बारह कोरोकुके कलामके चेलाकू घल्जी ठहरातिंजकेकु, यीशु इनीघल्जी डाके, ताकि डिच दियागा सथोन थंदळवा, एठा देटेन खाबोर गघाल घल्जी कुलकेकु। 15 एठा यीशुनी चेलाकूके भूतोकुके कोखाला गा हाकगेल्ला डोकी। 16 एठा दिकू बारह चेलाकू होय, दिकुके यीशु कलमके डा, शमौन डियागा जीमू डिचनी पतरस डोके। 17 एठा जब्दी गा कोनटे याकूब एठा याकूब गा डाई टे यूहन्ना डिय गा जीमू डिचनी बुअनरगिस मतलब बरसातिंजू कुला गा खिजो आवाज एठा बाणतो बरसातिन्जुवा गा कोनटे डोके। 18 एठा अन्द्रियास एठा फिलिप्पुस एठा बरतुल्मै एठा मत्ती एठा थोमा एठा हलफईस गा कोनटे याकूब एठा तद्दै एठा शमौन कनानी (देश भक्त डा)। 19 एठा यहूदा इस्करियोती डिचनी यीशु के दुश्मान गा टीन उटाकेनेच डा।
यीशु एठा शैतान
(मत्ती 12:22-32; लूका 11:14-23; 12:10)
20 जब यीशु हेजा चेलाकू सेंग्गोन हेजा उरान हेन, एठा देडेन खाट गर्दी जमाएन, की डिच आटा भी बान जोम्दुका। 21 जब दियागा सगाकु दियागा कमाय गा बारेन इनी आजूम्कें, चोयाकी कुरकु मंडी डा, दियागा दिमाग होशोन बाऊ डा, इनिघाल्जी दिकु डिचके उरान सा कोशिश लाक्के डा। 22 एठा मूसा गा नियम इथूमिठाच गा गुरजी जो यरूशलेम शहर टे, इनी मंडी डा, “डीजेन शैतान होय, डिच भूतोकु गा मुख्या, शैतान गा सारा टे भूतोकुके कोलाकुवा होय।” 23 एठा यीशु दिकुके मेरान हाको टे, दिकुटे उदाहरणेन नी मंडी लाक्के, “शैतान चोलाकाभी हेजा का भूतोकुके कुरकु टे बाल्लान बान ओठ, 24 अगर म्या देशो गा कुरकु इकु इकुका लाडाई टासो मेटे दिकुगा देशो नशोऊबा।” 25 एठा अगर म्या सगाकु गा कुरकु एक-मेग गा खिलाफबेन जू, डो इनी सगाकु म्या सतोन बान थंडळ। 26 अगर शैतान हेजा का खिलाफबेन लाडाई डाये टासो, मेटे डिच आरु बान थंडळ, एठा डिच नशोऊबा,
27 एठा यीशु नी शैतान गा बाराबोर म्या ताखातदार कोरो टे डाके डिजा मेरान म्या उरा होय, म्या कोरोके पेला डी ताखातदार कोरो तोतोल होना, बस मेटे दियागा उरा मुवा, दियागा दामा कोरो टे दामा सेगेवा डो उराके लुतातिन्जेवा।
28 “इंज आपे टे सच्चो मंडीवा कुरकु गा सेबाई पापो एठा बुराई जो परमेश्वर या तुनिका कोरो खिलाफबेन दडाबा होय, दिकुगा मापोऊ बाने होय।” 29 पेनो जो जे काभी पवित्र आत्मा गा खिलाफबेन मंडीवा? मेटे परमेश्वर डी कोरोके चोलाकाभी मापोऊ बाने होय, “एठा परमेश्वर डी कोरो हमेशा का घाल्जी पापो आंदाएबा।” 30 चोयाकी दिकु इनी मंडी डा, की दिजेन भूतोकु भेटटीके होय।
यीशु गा आंटे एठा दाई
(मत्ती 12:46-50; लूका 8:19-21)
31 डबोल टे यीशु आंटे एठा दियागा सनी बोकोकु सेंग्गोन हेन, दिकु बल्लान तेगेनटे जेकाकेभी डिचके तालन हाको कुलकेनेच। 32 मेटे गर्दी डियागा आजू-बाजून सुबानके डा, एठा डिचनी डियाटे मंडीके, “डोगे, अमागा आंटे एठा आपे गा सनी बोको आमके बल्लान हाको लाक्के।” 33 यीशु नी डिचकेनी जवाब जीके, “इंजा आंटे एठा इंजा सनी बोको जे होय?” 34 एठा डिच्नी दिकू लींजेन जो डिय गा आसो पासोन सुबान के डा, नजर अन्डटे मंडीके, “डोगे, इंजा आंटे एठा इंजा डाई इनकू होय, 35 चोयाकी जो परमेश्वर गा इच्छा लींजेन सेंद्रावा, देडेन इंजगा सनी बोको, एठा बोकोजाई, एठा आंटे होय।”