MARK
मरकुस
यूहना बपतिस्मा जिउमिठाच गा खबोर
(मत्ती 3:1-12; लूका 3:1-18; यूहन्ना 1:19-28)
1
परमेश्वर गा कोण यीशु मसीह गा अच्छा खाबोर गा सुरुवात। 2 देनोगो का यशायाह जो परमेश्वर गा कोनेटे मंडीमिठाच गा पुस्ताक गेन ओल्के होय, “डोगे इंज इंजागा खबोर जिउमिठाचके कुलेच्बा जो अमा घल्जी कोरा सुटेबा।” 3 “सुनसान जगान म्या खबोर जीउमिठाच यूहन्ना गा आवाज अजुमू लाक्के होय, प्रभु गा हेजे गा घल्जी कोरा तैयारे एठा दिया घल्जी सळक्को सीधाए मेना डे लिंजेन डिच सेंदराबा होय।” 4 एठा डीका खबोर यूहन्ना बपतिस्मा जिऊमिठाच हेन, एठा इनी खाबोर गघाल डा, “आपना-आपना पापोके आराटे परमेश्वर कोनेन मन बबादला मेटे परमेश्वर आपेके मापोकोम्बा।” 5 यहूदिया म्या जिल्हा गा, एठा यरुशलेम शहर गा घोनेच थंदळ कुरकू यूहन्ना गा खबोर आजोम हेन, एठा इकुका पापो काबुलटे यरदन गडाननी दियाटे बपतिस्मा सावे। 6 म्याकोम जो परमेश्वर कोंटे खबोर गघाल मिठाच यूहन्ना बपतिस्मा जिऊमिठाच गा आंगी ऊँटो गा हूपटे आरुके डा। एठा देटेन हेजे मयांग गेन कतळे टे आरुके म्या पट्टा ठोलके डा, एठा देटेन तोतोरकू एठा निलीकू डा जोजोम डान। 7 जब यूहन्ना बपतिस्मा जिउमिठाच घालके डा डिचनी कुरकूके मंडीके डा, “म्या कोरो जो इंजाटे चोटोका खाट महान होय, जलदिका हेजेवा होय, इंज्नी इनी लायको भी बाने होय, की दियागा दास गा रुपोन होम्बाटे दियागा बुट्टा कोखला लयको बाने।” 8 इंज नी आपेके डा टे बपतिस्मा जीके होय, पेनो देडेन आपेके पवित्र आत्मा टे, बपतिस्मा जेवा।यीशु गा बपतिस्मा
(मत्ती 3:13-4:11; लूका 3:21-22; 4:1-13)
9 दि दिनेन, यीशुनी गलील जिल्हा गा नासरत पुराटे हेनडो, यरदन गडान यूहन्ना टे बपतिस्मा सावे। 10 एठा मेटे देडेन डा टे ओलेट जेडो बाल्लान ओट्जेन, एठा तुरुटो डिचनी बदळा खुल्ला डोके एठा परमेश्वर गा आत्मा के कबूत्तर गा रुपोन अपना मठान आगुरुटे डोकेनेच। 11 एठा बदळा कोनेटे आवाज हेन, आम इंजगा अच्छा कोण होय, अमाटे इंज खुशो के होय।
यीशु गा मुके डा
12 यीशु गा बपतिस्मा सगा बादोन पवित्र आत्मा नी तुरुटो डिचके सुनसान जगान कुलकेनेच। 13 सुनसान जगान नी चालीसो दिन एठा चालीसो रातो टाएन, मेटे शैतान नी डीचके अंदाजोएच लक्के डा। एठा देटेन जानवरकु गेलटा पेळाके डा, एठा स्वर्गदूत दियागा ध्यान दोडो गा वोजीटे सेवा दडा लाज्जे।
गलीलेन यीशु गा खबोर
(मत्ती 4:12-17; लूका 4:14-15)
14 थोळा दिन गा बादोन जब यूहन्ना जेलेन येंडाकेनेज गा, एनेगा बादोन यीशुनी गलील जिल्हान ओले एठा कुरकूके परमेश्वर गा राज्य गा बारेन अच्छा खाबोर जिउ डा। 15 यीशुनी मंडीके, “परमेश्वर गा कालाम्के टेमो पुराएन होय, एठा परमेश्वर गा राज्य मेरान हेन होय। इनिघाल्जी आपे गा पापो टे मन बबादला एठा आपे अच्छा खाबोर लींजेन विश्वास डोए।”
उफून भुई के हाकोकेकु
(मत्ती 4:18-22; लूका 5:1-11)
16 म्या दिन मेटे यीशु गलील जिल्हा गा समुद्र गा धुरा-धुराटे चेल्के डा, मेटे डिचनी शमौन एठा डियागा सनी डाई टे अन्द्रियास के समुद्र गेन जली येंडाटे डोकेनेच। चोयाकी दिकु भूईकु डान। 17 यीशु नी डीकूके मंडीके, “इंजा टाऊटे हेजे, आए टाएन आपे काकूकु उठा डा।” पेनो नका टे इंज आपेके इथूकोम्बा की कुरकूके इंजा मेरान विश्वासेन टोनोंगो सा होना। 18 दिकू तुरुटो काकू उठामिंकू जली आराटे यीशु गा चेलाकिंज आरोएन। 19 जब यीशु धुरा-धुराटे सेंद्रा लठ्ठाका थोळासा एठा सम्मान ओले, मेटे डिचनी एठा बारी दाई टे ताकिंज के डोकेकिंज। दिकिंज गा जीमू याकूब एठा यूहन्ना डा। डिकु जब्दी कोंटे डा। दिकुके डोंगान जली सुटिटे डोकेनेच। 20 देनोगो का दिकुके यीशुनी डिच्के डोकेनेच, दिकुके मंडीके, इंजागा सेंग्गोन हेजे एठा इंजागा चेला आरोए। एठा दिकुनी हेजा जब्दी बाटे एठा कामय दडा मिंकूके डोंगान आराटे यीशु गा चेला आरु घाल्जी दियागा टाऊटे ओले।
भूतो टे कोरोके आराकेनेच
(लूका 4:31-37)
21 यीशु एठा दियागा चेलाकू कफरनहूम पुरान हेन। जब परमेश्वर गा पवित्र दिनa हेन, मेटे यीशु आराधना जगा गेन ओलेडो एठा इथूलाक्के। 22 कुरकू डियागा शिक्षानौर टे बिचारजे। चोयाकी मूसा गा नियम इथूमिठाच गुरजी गा रोंगो बाऊ पेनो हाकगेल्ला गा सेंग्गोन शिक्षानौर जिऊ डा। 23 जब यीशु इथूका लाक्के डा, अचानक आराधना जगा नी म्या कोरो डान, दियेन भूतोकू डा। 24 डिचनी कल्लटे मंडीके, “हे नासरत पूरान थांदळ मिठाच यीशु, आलेन अमाटे चोच कामय? चोच आम आलेके ननाशो घांजी हेन? इंज आमके अच्छा टे हडाई-कि अमा जे होय? अमा जीटा परमेश्वर गा पवित्र कोंटे होय जो परमेश्वर कोनेटे हेन होय।” 25 यीशु नी भूतो मुके कोरोके कल्लाटे मंडीके, “कयोमे एठा डि कोरो टे वोटजु।” 26 मेटे भूतो डी कोरोके इटान बोचोकेनेच एठा कोळेच्टेका, चिल्लातिंजटे डियाटे वोटजे। 27 मेटे आराधना जगान नी घोनेच कुरकू अचाम्बोएन दो एक-मेग टे कोकाम्बारा लज्जे, “येटेन घोनेच एकदम अलग्गो शिक्षा होय, आले चोलाका भी एटो हाकगेल्ला इथूलाक्के लठ्ठाका बान आजुम्दुका।” देडेन हाकगेल्ला भी भूतोकु के भी हुकूम जेवा होय, एठा भूतो भी डियागा हुकुम आजुम्बा होय। 28 तुरुटोका कुरकू दुसराकुके यीशु गा वोजीटे डाकेमिनी अचाम्बो कामय बारेन गघाल लज्जे। एठा गलील जिल्हा गा आसो-पासोन थांदळमिंकू कुरकून यीशु गा खाबोर गा बारेन मालूम्जे।
बिमारी के सासजा
(मत्ती 8:14-17; लूका 4:38-41)
29 एनेगा बादोन यीशु एठा दियागा चेलाकू आराधना जगाटे ओले, शमौन एठा अन्द्रियास गा उरान ओले। एठा याकूब एठा यूहन्ना दिकुगा सेंग्गोन डा। 30 डी टेमो शमौन गा कणकर राँवा डा एठा डिच राँवा गा वोजीटे बिंदीलेंका गिटीच्के डा। जब यीशु उरान आदिरजे, मेटे चेलाकू हेन डो यीशुके घाल्के शमौन गा कणकर टे राँवा लाक्के डा। 31 यीशुनी दियागा टी उठाटे डिचके बिंदिल टे बिट घाल्जी मदत डाके, एठा दिका टेमोन राँवा आगोरोएन। मेटे शमौन गा कणकर टेनी सेबाईकु घल्जी आटा डा जिऊ वोजीटे सेवा डाके। 32 डी दिन सिंगुरूप, जब की पवित्रb दिन ओले डान मेटे डी पुरा गा। मेटे कुरकू घोनेचकु का बेमार जे ऐठा दिकू देन भूतोकू डा यीशु गा मेरान साले। 33 कफरनहूम पुरा गा कुरकू खाट घोंजा शमौन एठा आंद्रियास गा उरा सम्मान जमाएन। 34 मेटे यीशुनी डी सेबाई कुरकूके जो अलग्गो-अलग्गो रोंगो बिमारी टे कासु डा, दिकुके साजाकेकू, एठा भूतोकुके कोलाकेकु, एठा भूतोके हेजा सम्मान मंडी दाडुका, चोयाकी भूतोकुन मालूम डा की यीशु मसीह परमेश्वर गा कोन्टे होय।
एकलान यीशु मसीह गा प्रार्थना दडा
(लूका 4:42-44)
35 आंगुटे ठायका उजालउ गा पेला, मेटे यीशु बिटजे डो म्या येनोगो जगान देटेन डिच एकलान थंदळ टे प्रार्थना दडा लज्जे। 36 जब शमौन डो एठा दियागा सोपतिकुन इनी मालुम्जेकी डी जगाटे यीशु ओले होय, मेटे दिकु डिच्के घागटा लज्जे। 37 जब दिकुनी यीशु घाटाकेनेच, मेटे शमौन एठा सोपतीकु डिचके मंडीके “घोनेच कुरकू आमके घागटा लाक्के डा।” 38 यीशुनी दिकुके मंडीके, “हेजे आबू डी गाँवेन डो जो आसो पासोन पुरान बो, म्हणजे इंज कुरकू तालन भी परमेश्वर गा खाबोर गघाल होना। चोयाकी इंज इनीघाल्जी दुनियान हेन होय।” 39 मेटे यीशु एठा दियागा चेलाकू गलील जिल्हा गा घोनेच पुरान ओले एठा दिकुगा आराधना जगान परमेश्वर गा खाबोर जीऊ लाक्के डा, एठा भूतोकुके कोखाला डा।
यीशु नी कोढया के ससाजा
(मत्ती 8:1-4; लूका 5:12-16)
40 म्या दिन म्या कोरो यीशु गा मेरान हेन डी कोरो कोळ्या गा बिमारी डा, डी कोरो यीशु मसीह टे बिनती डावे डो मंडीके दियागा सम्मान टोपेरे तेकाटे मंडीके, “इंजेन मालुम होय की अमा मेरान इंज्के ससाजा गा शाक्ति टाकू होय। अगर आम इंजा मदत दडा टासो डायेबा होय।” 41 यीशुनी दिया लिंजेन आस्वान हेन डो। हेजा टी डी कोरो लिजेन डोके जो कोळया डा, एठा डिच्के मंडीके, “आम सजायु।” 42 एठा दिका टेमो डी कोरो पुराका साजाएन। 43-44 मेटे यीशुनी डी कोरो हुशार टे मंडीके, “जेकाकेका बाकी गघाल की इंज्नी आमके सजाकेमी, अराधना गा जगान सेने एठा परमेश्वर गा याजक गा घाले की सजाएन होय। एठा परमेश्वर गा घांजी डी बलीके पेडेजे डेगा विषय गेन मूसानी घोनेच टेमो पेला दडा घाल्के। ताकि परमेश्वर गा याजक इनी घालेवाकी की अमा सपा मेंबाकी एठा इनीज सेबाई कुरकू गा घांजी गवाही मेंबाकी की अमा साजाएन।” 45 पेनो डी कोरो डी जगाटे ओलेडो एठा घोनेच कुरकूके घाल्के की यीशुनी डिचके सजाकेनेच। इनी कारण टे यीशु सपा-सपा पुरान बान सेंदुका, पेनो यीशु शहर टे बाल्लन सुनसान जगान थंडळके। एठाभी हार जगाटे कुरकू दिया मेरान हेजे डा।