Awiya gəza mbulum nda gər ahəɗ ana awiya ŋa ya
21
1 I dəba ŋa ya asa ka,
i ŋgataha a gà gəza mbulum awiya ŋana nda gər ahəɗ ana awiya ŋa ya.
Ama gà gəza mbulum malahalah ŋana,
nda gər ahəɗ malahalah ŋana ka,
tar riŋ asa tsa,
tàa dzeye.
Dite batsah duluv tekeɗe,
a riŋ asa tsa,
aka dzeye mbaŋa.
2 I fata ya ka,
i ŋgataha a kwite ana tsəɗaŋŋa ya.
Ama kwite ata ka,
Yeruzalem awiya ŋa ana a tarəra i gər ŋa i mbulum a ya.
Mbulum a lə̀mbaɗa ka,
lele,
a tsahən ndzer.
Ar ka,
kamala daala ana a lə̀mbaɗa ba ŋgar tsèɓtsèɓ lele,
a waya a de a a zal a.
3 I dəba ŋa ya asa ka,
i tsarakara mifefile duwa,
a ɗera ika təv mendze Əbay ata ya.
Ta fàfəl nda magala ŋgəlakəkka,
ta gwa:
«Araha,
Mbulum aka lə̀mbaɗa təv mendze ŋgar ika magər gà mburma ka,
dite ti ndze a nda gà tar.
I dəba ŋa ya,
ti ne a gà mburma ŋgar mbaŋa.
Ŋgat à gər ŋgar na a ne Mbulum tar a.
4 A ta bere a aà tar tuwa à are tar a tserdze.
Ti ta mete a asa tsa,
dite gà dukw ana à tsìɓ a ter a ya ka,
a riŋ asa tsa mbaŋa.
Ti tiwe a asa tsa,
dite duwa ilik a ta wir aà ter a asa tsidze.
Gà dukw ana gà miviye ŋa ya tserdze ka,
ti ta ge a riŋ asa tsa.»
5 I dəba ŋa ya ka,
wele ana mandza ŋa ika təv mendze Əbay ata ya,
a gwa:
«Tsarakum,
araha i ta geye a gà duwa tserdze ka,
gà awiya ŋa.»
I dəba ŋa ya asa ka,
a gweɗiŋ:
«Wetse taŋa fit aka wakita,
aɗaba bazlam aaha ka,
ndzer,
pàrsa iɗəm tsa.»
6 A gweɗiŋ asa:
«Gà bazlam ata tserdze ya ka,
aka ge ba,
aka ndəv.
Iye na i lah aà megeye gà duwa tserdze ya.
Iye riŋ daga aka na gà duwa tserdze tar riŋ zukw tsiye,
dite ka,
iye na i ti ndìv a à gà duwa tserdze ya asa mbaŋa.
Ku mege weke,
na bəla yam aka kəɗ ŋgat ka,
ma dara,
i viler a biy taf,
a siŋa.
Yam ata a dere a ka,
i biye yam ana a vile a mesife a mburma ya.
7 Wur ana aka mba aà dukw bakal gər ahəɗ a ka,
a ŋget a gà dukw ata.
Iye i ti ne a Mbulum Tsir ŋgar,
dite ŋgat tekeɗe,
a ti ne a kəla gà mbaŋa.
8 Ama gà na ta ge a magəɗa ya,
nda gà na ta gəs bazlam Mbulum nda ndzer tsiye,
dite nda gà na gəzləŋ tar manəsa ŋa ya,
gà ɓəzla məbatsa mburma nda gà ɓəzla megeye muva,
nda gà mèdè,
kige tsa,
gà na tə zàmbaɗawa à gà fəla tar a,
nda gà ɓəzla pàrsa,
gà tar ata tserdze ya ka,
tì dzèwe a ter a a akwa ana kamala duluv a,
a wene a wàfùfùffa ya.
I fata kuɗa,
na məməta masula ŋa ya.»
Bazlam aka gər Yeruzalem awiya ŋana
9 I dəba ŋa ya,
misle ŋgiɗ ilik i liwiŋ gà gawla Mbulum ata təsəla,
gà tasà aà tar i ahər,
maràhàyà ŋa nda gà mandəvandəv mesewere are iɗəm təsəla akahər ata ya,
a dara a təv ga ya.
A dara ka,
a gweɗiŋ:
«Dara,
i ɗifek a à daala ana Kəla Təmaŋ a zle a ya.»
10 I fata ya tsara ka,
Mezite Mesife Mbulum a dara aka gər gà ya,
dite gawla Mbulum ata a da à iye a gər kwite batsah ŋa ana zubul ŋa saləllà hinne ya.
Mi daha ka,
a ɗifiŋ à Yeruzalem ana tsəɗaŋŋa,
a tarəra i gər ŋa i mbulum a ya.
11 Kwite ata ka,
a dəv twiytwiy kamala kur ana tsakala ŋa hinne,
à sìkim a ba tsiye.
A wìtiɗe a ka,
kamala kwataramà ya,
nda gà kamala kur ana tə zalar *yaspa ya mbaŋa asa.
Ndzəɗa ana tì zlibe a dər à Mbulum a,
na a riŋ a wìtiɗ a i fata ya.
12 Ama kwite ata ka,
malàwàrà ŋa tits nda zlagam.
Zlagam ata ka,
dàbàsa ŋa dəbazəzza,
dite zubul ŋa kwitsikw asa mbaŋa.
Gà biye hərmaga ihər ka,
kurwa gəra sula.
Gà gawla Mbulum kurwa gəra sula,
tar gà mehìtsè ŋa ika biye hərmaga ata,
tar riŋ ta kesliŋa.
Dukw mahə̀ndə̀kà biye hərmaga ata ka,
ta wetse ahər zləm gà slàla Isərayel ana pampam kurwa gər sula ya.
13 Kwite ata ka,
gwezleviyek tseke faɗ.
I huɗ gà təv ata faɗ a ka,
biye hərmaga ihər makər makər:
Makər ndaka tseke pat ana a mbəzawara ya,
makər ndaka tseke pat ana à dìɗ a ya,
dite makər ndaka tseke gular,
makər ŋa aaha ndaka tseke yam asa mbaŋa.
14 Zlagam ata ka,
madzàha ŋa nda gà kur kurwa gəra sula.
Ta wetse ahər zləm gà ɓəzla meslire Mbulum ana kurwa gəra sula ya mbaŋa.
Tar ka,
gà ɓəzla mazazama Kəla Təmaŋ ata.
Taŋa gà kur ata tserdze ya ka,
zləm gà mburma ata ikəka ilik ilik tserdze.
15 Gawla Mbulum ata a fèfiliŋ a ka,
zəva duwa a riŋ ihər məvəɗa ŋa nda gura i ahər ŋgar.
Zəva ata ka,
dukw melìvè duwa.
A daha ka,
a live dər gà kwite ata nda biye hərmaga ŋa,
nda zlagam ŋa ana a lawara kwite ata tits a.
16 Kwite ata ka,
ar tseke faɗ,
dite a geye akaba kalkal asa mbaŋa.
Gawla Mbulum a live kwite ata nda zəva ŋgar ata.
A live ka,
ar maya simir ide ide dəbuw kurwa gəra sula tseke faɗ.
Dite zubul ŋana tekeɗe,
kalkal kamala taŋa ya mbaŋa.
17 I dəba ŋa ya ka,
gawla Mbulum ata a daha,
a live zlagam ata.
Zùbəl ŋana ka,
zubul tsegwilek dərməka nda dzik faɗ gəra faɗ.
A live dukw ata ka,
kalkal kamala ana gà mburma ti liveyewa duwa ya.
18 Tə zlazl zlagam ata ka,
nda kur ana tə zalar yaspa ya.
Kwite ata ka,
tə zlazl nda gura ana tsakala ŋa hinne ya.
A wìtiɗ a ka,
kamala kwataramà ya.
19 Tə làmbaɗa zlagam ata ka,
nda gà medzibe gà kur ana pampam,
a tsahən hinne ya.
Gà malahalah gà kur ana tə dza dərraha zlagam ata ya ka,
biy ŋgiɗ tə zalar yaspa.
Masula ŋana ka,
tə zalar *safira.
Məmakər ŋana asa ka,
tə zalar *kaldedun.
Dite məfaɗ ŋana ka,
tə zalar *imiradi.
20 miìzləm ŋana ka,
tə zalar *sardunik.
Mendilik ŋana tə zalar *sardis.
Matəsəla ŋana ka,
tə zalar *kirisulit.
Matsamakər ŋana ka,
tə zalar *beril.
Metswiɗ ŋana ka,
tə zalar *tupas.
Makurwa ŋana tekeɗe,
tə zalar *kirisuparus.
Makurwa gəra ilik ŋana ka,
tə zalar *hiyesin.
Dite makurwa gəra sula ŋana ka,
*amistus.
21 Kamala taŋa ya,
gà biye hərmaga ana ihər a ka,
kurwa gəra sula.
Kəla dukw mahə̀ndə̀kà aɗəm ŋa ka,
malàmbàɗà ŋa nda kur ana tə zalar perile ya.
Ama gà bàrama ana i huɗ kwite ata ya ka,
tə làmbaɗa nda gura ana tsakala ŋa hinne,
à wìtiɗe a twiytwiy kamala kwataramà ya.
22 Ama kəla ka,
Yàa ŋgataha a ga Mbulum a huɗ kwite ata tsa,
aɗaba gà Mbulum BATSAH kwa ŋana a za duwa tserdze ya,
nda wele ana a ndzikiɗ ba Kəla Təmaŋ a,
tar riŋ i fata.
Təv ata na a ne təv meheme ya.
23 I samata ka,
gà kiye nda pat riŋ tì div a i kwite ata asa tsa.
Medìve tar ka,
a ge a ŋgulum asa tsa,
aɗaba ndzəɗa ana tì zlibe a dər à Mbulum a,
na à div a i fata ya.
Dite Kəla Təmaŋ ata,
na a ne lalampa i kwite ata ya mbaŋa.
24 Kamala taŋa ya,
gà mburma ana i gà slàla pampam ika gər ahəɗ tserdze ya,
ti ti sìweye a i təv dzaydzay ŋa ata i kwite ata ya.
Dite gà Əbay gər ahəɗ ti ndzekehe aɗəm a gà limana tar,
ta vile a a Mbulum.
25 Gà dukw mahə̀ndə̀kà biye hərmaga ata ka,
ti ti ndze a tùwaŋŋà,
mahə̀ndə̀kà ŋa iɗəm a wurwas kataya.
Ku mege ndeɗime tekeɗe,
ta hìndìk aɗəm a tsa,
aɗaba i fata ka,
həvəɗ a riŋ a ta ge a asa tsidze.
26 Gà mburma ti ti ndzekehe aɗəm a gà ndzəɗa ŋgwal gà dukw tar ana ika gər ahəɗ a tserdze.
Ti de a dərraha a fata,
aà mazàmbàɗà dər a Mbulum.
27 Ama gà dukw ana gà ŋgwal ŋa tsa tserdze ya ka,
ti ti de aɗəm a tsa.
Gà na gà gəzləŋ tar gà manəsa ŋa ya,
nda gà ɓəzla pàrsa ka,
vatwa tar a riŋ aà mada aɗəm tsidze.
Na a de aɗəm a ka,
say gà mburma ana ta ŋgat mesife,
ta wetse zləm tar a wakita Kəla Təmaŋ a.