22
1 Aləka i dəba ŋa ya ka,
gawla Mbulum ata a ɗifiŋ à dula duwa a riŋ i fata mbaŋa.
Aɗaba yam ana i dula ata ya ka,
a vile a mesife a mburma.
A dəv ka,
twiytwiy hinne.
A dara ka,
ika təv mendze gà Mbulum nda Kəla Təmaŋ a.
2 A zlele a ka,
mbàwwa ndaka magər bàrama ana i huɗ kwite ata ya.
Na aà guva yam ata ka,
dizl ɗaf duwa a riŋ na a vile a mesife a mburma ya.
Ar ka,
tseke sula,
ndaka tseke ahər mezime,
dite naha ndaka tseke ahər gula asa mbaŋa.
A we a ka,
medzige kurwa gəra sula,
na i huɗ mive ilik a ya.
Kəla kiye a we a sik ilik.
Slàmbah ŋana ka,
a mbele a à gà slàla gà mburma ana ika gər ahəɗ pampam a tserdze.
3 Gà dukw ana Mbulum a vəl a tar mezelme tserdze ya ka,
ti de a a kwite ata tsidze.
Təv mendze ana i fata ya ka,
i gà Mbulum,
nda Kəla Təmaŋ.
Dite gà na ti zezem a ŋgat a ka,
ti ti dzer a gurmits a bəɗ.
4 Tar ka,
ti ta ŋget a a are ŋgar.
Dite ka,
ti ta wetse a zləm ŋgar aka yemere tar.
5 Həvəɗ ka,
a ta ge a i fata asa tsa.
Aɗaba gà pat nda lalampa ka,
ti ta ge a ŋgulum asa tsa.
Mbulum BATSAH kwa ŋa à gər ŋgar na à div a ka,
a vile a ter a dzaydzay a.
Dite tar ka,
ti ta ge a Əbay aà biybiy.
Yesuw a riŋ a deriŋa
6 I dəba ŋa ya ka,
gawla Mbulum a gweɗiŋ:
«Gà bazlam aaha ka,
gà ndzer ŋa,
pàrsa iɗəm tsa.
Mbulum BATSAH kwa ŋa,
mala məvəla Mezite Mesife ŋgar a gà ɓəzla məma à guma ŋgar na a slərra gawla ŋgar a,
dite ka,
a ɗif à dukw ana a ta ge a ba bise ya,
a gà ɓəzla meslire ŋgar.»
7 Yesuw a gwa:
«Tsarakum,
dzum zləm lele.
Iye ka,
Yàa à mimèra bise.
Maŋgayaba ika gər gà na ta gis a ahəm aà gà bazlam ana i huɗ wakita aaha ya,
aɗaba Mbulum na a ɗif dər a.»
8 Iye Yuhana na i tsaraka gà dukw ata tserdze ya,
nda zləm gà,
dite i ŋgatar nda are gà asa mbaŋa ya.
Aləka i tsaraka,
i ŋgat a gà dukw ata tserdze ya ka,
i dza gurmits a bəɗ aka miɗ gawla Mbulum ata a ɗifiŋ dər a,
i waya mazàmbàɗà à ŋgat.
9 Ama ka,
aka viliŋ vatwa tsa.
A gweɗiŋ asa:
«Iye tekeɗe ka,
mala meslire Mbulum,
kamala kurum ana nda gà damər yak kà màwum à guma ŋgar,
kə̀ gə̀sawum ahəm aà gà bazlam ana i huɗ wakita aaha tserdze ya mbaŋa.
Ama seyiŋ tsa,
zàmbaɗa ka,
à Mbulum ivaɗ.»
10 I dəba ŋa ya ka,
Yesuw a gweɗiŋ asa:
«Ka ta kaha gà bazlam ata Mbulum a ɗifek dər,
kər ihər ki wetse a a huɗ wakita ya tsa,
ɗif dər a mburma.
Aɗaba gà dukw ata ti ta ge a ba ka,
bise.
11 Iye ihər i gweɗe a a gà mburma ana ta gewa dukw ana ŋgwala tsiye:
Na a sàs a kurum megeye bakal ka,
dum a ba dər aka miɗ aka miɗ dukw kurum.
A kurum gà na gà gəzləŋ kurum manəsa ŋa,
aruwaŋ iɗəm a ka,
na a sàs a kurum ki ndzwim a kataya ka,
dum dər aka miɗ aka miɗ,
aruwaŋ kurum ata ma ndza aà kurum pəra.
Ama wele ana ŋgwal ŋa,
a tsahən aà Mbulum a ka,
ma da aka miɗ aka miɗ nda mege dukw ana ŋgwal ŋa ya.
Dite wele ana ŋgat tsəɗaŋŋa ika miɗ Mbulum a tekeɗe ka,
ma da aka miɗ aka miɗ nda mazazama kamala taŋa ya mbaŋa.»
12 I dəba ŋa ya,
Yesuw a gwa asa:
«Gwim metsehe lele.
Yàa à mimèra bise.
I ta mère a ka,
nda gà dukw mayaba gà mburma i ahər gà,
i ta pìl a dər,
ku mege weke a ŋget a kalkal kamala megemir ŋgar ana a gewa ya dukw ŋgar.
13 Aɗaba iye na i lah aà megeye gà duwa tserdze ya.
Iye riŋ daga aka ana gà duwa tserdze tar riŋ zukw tsiye.
Iye na malahalah ŋa ika gər gà duwa tserdze ya,
dite ka,
iye na i ti ndìv a à gà dukw ata tserdze ya asa mbaŋa.»
14 Kamala taŋa ya,
maŋgayaba a ta ge a i təv gà na ta bereye a aà gà petek tar a tsəɗaŋŋa lele ya.
Tar na ti ta ŋget a vatwa,
aà mada a ŋgwal kwite ata ya.
Dite tar asa na ti ta ŋget a vatwa aà mazəma mawà dizl ɗaf ata a vile a mesife a mburma ya mbaŋa.
15 Ama gà na tar ti ne kamala gà kəra ya,
nda gà ɓəzla mèdè,
nda gà na ta gewa muva ya,
kige tsa,
gà na ta batsawa mburma ya,
nda gà na tə dzawa gurmits a bəɗ ka,
a fəla tar a,
nda gà ɓəzla pàrsa ana ta waya masasa pàrsa ya ka,
bàlaarì tar ti ndze a ka,
i bəra,
ti de a a ŋgwal kwite ata tsidze.
16 «Iye Yesuw na i slər a kurumara gawla Mbulum gà ya,
na dite a ɗif a kurum à dukw ata,
a kurum gà mburma Mbulum ana mayahaba gər ŋa i təv ilik ŋa,
ku mege i ŋga tserdze ya.
Iye ka,
wele ana kà vavawum ɗa ŋgat daga piŋŋe ya.
I dara ka,
i gwala Dawda a.
Dite iye asa ka,
*mawusawus madə̀và mbulum ana a dəv parakka lele ya.»
17 I fata ya ka,
gà Mezite Mesife Mbulum nda makasl Kəla Təmaŋ ata ta gweɗe a:
«Dara.»
Ku mege weke na aka tsaraka taŋa ka,
ta gweɗere a:
«Dara.»
Wele ana yam aka kəɗ ŋgat a ka,
ma dara.
Dite wele ana a waya yam ana a vile a mesife a mburma ya ka,
ma dara,
ta viler a biy taf,
ti niwer a dər tsa.
Mandəvandəv mifefile
18 Iye Yuhana,
i be a à ɗaf a gà mburma ana ti tsereke a gà bazlam ana i huɗ wakita aaha,
Mbulum a ɗif a tar dər a tserdze.
Wur ana à sìkèh a dər aaka ya ka,
Mbulum tekeɗe,
a ti sikehe a à mesewere are ana ti ɗif dər i huɗ wakita aaha ya mbaŋa.
19 Dite wele ana à nikiɗ a dər ihər a ya mbaŋa ka,
Mbulum tekeɗe,
a ti dzik a ihər mawà dizl ɗaf ata a vile a mesife a mburma ya,
nda gà təv mendze ana i huɗ kwite ata tsəɗaŋŋa,
ti ɗif dər i huɗ wakita aaha ya mbaŋa asa.
20 Ama iye,
wele ana i ɗif à gà dukw aaha ndzer,
pàrsa iɗəm tsiye,
iye riŋ ihər i gweɗe a kurum a ka:
«Iye riŋ aà vatwa,
i dere a ka,
bise.»
Kwa gà mburma Mbulum tserdze ka,
gwaɗakwar:
«Haya,
dara,
Yesuw Batsah mə̀r ŋa.»
21 Ŋgwal ana Yesuw BATSAH kwa ŋa a ge a kwa ya ka,
ma ndza i təv kurum gà mburma ŋgar tserdze aà biybiy.