Bazlam aka gər mive dəbuw
20
1 I dəba ŋa ya ka,
i ŋgataha a gawla Mbulum ŋgiɗ,
a tarəra i gər ŋa i mbulum a.
Na i ahər ŋgar ka,
lèkilè duwa a riŋ ihər biy mahə̀ndə̀kà dər i biye ana kwitsikw hinne ya.
Dite batsah tsitsirɓe ana zubul ŋa hinne ya,
i ahər ŋgar mbaŋa asa.
2 A daha,
a gəs *kə̀rəm ata,
kamala megweɗe ya ka,
mesiwiɗ ana akahər ata piŋŋe ya.
Ŋgat ka,
Əbay sitene,
zləm ŋgar ka,
*Sadan.
I dəba ŋa ya,
hə̀ndə̀sl a dàn dər ŋgat.
A ndza i medènè mive dəbuw.
3 Aləka gawla Mbulum ata kùtsùkw a yà dər akaba ŋgat a biye ana zubul ŋa kwitsikw a.
A hə̀ndə̀k ahəraha aɗəm a fata nda lèkilè.
A dza aaka atwa,
dite na i huɗ mive ata dəbuw a ka,
a sle a aà məbànà gà mburma ana ika gər ahəɗ a asa tsiye.
Aləka mive dəbuw ŋa ata a da iɗəm a ka,
ti ta pìlere a iɗəm à ŋgat a.
Ama a ndze a aà bəra ka,
hinne asa tsa,
zaakwa pəra.
4 I dəba ŋa ya asa ka,
i ŋgataha a gà təv mendze gà Əbay.
Gà mburma a riŋ mandza ŋa ikəka.
Mbulum a vəl a tar ndzəɗa aà mege seriye a gà mburma ŋgiɗ.
Dite ka,
i ŋgataha a gà mezite gà mburma ana tə sasaya ika tar gər a ya mbaŋa.
Tə sasaya ika tar a ka,
aɗaba ana ti tsikewa parakka,
Yesuw ka,
BATSAH kwa ŋa,
dite agəra ana ti ɗifewa à bazlam Mbulum a mburma ya asa mbaŋa.
Aɗaba tar ka,
tàa dza gurmits a bəɗ a dukw dala ata,
kige tsa,
a mendzikiɗe ba ŋgar ŋa tsidze.
Dite tàa gəs lambà ŋgar aà mege aka yemere tar,
ku mege aà ahər tar ɓav tsidze.
I ŋgat a tar ka,
tar riŋ nda mesife.
Tar nda gà Yesuw ka,
gà Əbay,
ta kwere a mive dəbuw.
5 Taŋa na a ne ka,
gà malahalah ŋana ta mbalara i məməta ya ya.
Ama gà asiŋ gà mburma ŋgiɗ ka,
tàa mbalara i məməta ya zukw tsa,
say mive dəbuw ŋa ata à ndìv a iɗəm a dzekwiŋ.
6 Kamala taŋa ya ka,
maŋgayaba a ta ge a i təv gà mburma ana tàa lah aà məmbə̀lara i məməta ya ya.
Mbulum a pise a ter a ahəm.
Tar ka,
mesife tar a dzeye a asa tsidze.
Ti ti ne a ka,
gà ɓəzla mandəva kuɗa ika miɗ gà Mbulum nda Yesuw Kiristi.
Tar nda gà Yesuw Kiristi ka,
ti ta kwere a i huɗ mive dəbuw a.
Mbulum aka mba aà Əbay sitene
7 Na tàa dàn Əbay sitene a daŋgay,
aka ndza iɗəm mive dəbuw ka,
i dəba ŋa ya,
ti ta pìlere a iɗəm à ŋgat a.
8 Aləka aka ta medera iɗəm a ka,
a de a,
a bene a gà mburma ana ika gər ahəɗ tserdze ya asa.
Gà ahəɗ ata ka,
tə zal a tar gà Gakw,
nda Magakw.
Dite Əbay sitene ata ka,
a ti zeleye a ter a tserdze,
ti yehebe a gər a təv ilik ŋa,
na dite ka,
ti de a,
ti ta ge a guvəl aà Mbulum a.
Tar ka,
twìɗèkìkke hinne,
kamala hewiyeŋ ana i dula ya.
9 I ŋgat a tar ka,
tàa hadzalaya ba,
aà mede ku mege i ŋga ya,
ara ika gər ahəɗ a tserdze.
Tə daha,
tə lawaraya gà təv mendze gà mburma Mbulum,
nda kwite ana Mbulum a waya hinne ya.
Ama tə lawara tar tits ka,
akwa a tar aka tarəra i mbulum a,
birɗek a wanaya tar fit.
10 Dite i dəba ŋa ya ka,
Əbay sitene,
wele ana a banaya tar a ka,
ta gəs,
kùtsùkw ti yà ŋgat a akwa ana kamala duluv a.
Akwa ata a wene a ka,
wàfùfùffa.
I fata ya ka,
tàa mbər mandza aɗəm à gà dukw dala nda mala məma à guma ŋgar ata nda pàrsa ya.
Tì sèwèr a are i fata,
ku mege ndaapat,
ku mege ndaavəɗ hiywe aà biybiy.
Mandəvandəv seriye Mbulum ana a ta ge a ya
11 I dəba ŋa ya ka,
i ŋgataha a təv mendze Əbay duwa,
a ndza herrè.
Wele duwa a riŋ mandza ŋa ikəka.
Gà gər ahəɗ nda gəza mbulum ta ge magəɗa kwàrkwàr hinne,
silit tə təz ihər a,
dite ka,
wura a ta ŋget a ter a ziwiɗ asa tsidze.
12 I fata ya asa ka,
i ŋgataha a gà məməta tserdze asa mbaŋa,
ku mege gà bàba ŋana nda gà ɓəza ŋana tekeɗe ya.
Tar gà mehìtsèyè ŋa ika miɗ təv mendze Əbay ata.
I dəba ŋa ya asa ka,
misle ŋgiɗ a handaka ikaba gà wakita ya.
Ta wetse aɗəm ka,
dukw ana gà mburma ta geye ya,
dite ka,
ta hə̀ndə̀k ikaba wakita ŋgiɗ a asa mbaŋa.
Ama i huɗ wakita ŋgiɗ ata ka,
ta wetse aɗəm zləm gà mburma ana tàa ŋgat mesife ya.
Ta handaka ikaba wakita ata ya ka,
Mbulum a ge seriye a gà mburma ata ta mata ya.
A sàs a tar ikaba seriye ŋa ya ka,
kalkal dukw megemir tar ana ta geye ya.
Dukw ata ka,
a riŋ mewetse ŋa i huɗ wakita ata dukw ŋgar.
13 Ku mege gà mburma ana ta mataya i batsah duluv a tekeɗe ka,
yam ata à mère a à tar a.
Gà məməta ana i biye i təv mendze gà məməta ya tekeɗe ka,
tə dayara iɗəm a mbaŋa.
Mbulum a geye a tar seriye tserdze,
kalkal kamala biy megemir tar ana ta ge ya.
14 I dəba ŋa ya ka,
tə dza à gà dukw ana ta bets a mburma ya,
nda gà təv mendze gà məməta ana ti ndze a iɗəm a,
a akwa ata kamala duluv a.
Akwa ata ka,
təv məməta gà mburma ana ti ta mete a masula ŋa ya.
15 Ku mege weke,
na zləm ŋgar mewetse ŋa i huɗ wakita gà mburma ata tàa ŋgat mesife ya tsəka,
tì yè a ŋgat a akwa ata kamala duluv a mbaŋa.