19
1 I dəba ŋa ya ka,
i tsarakara mifefile duwa a ɗera i mbulum a,
a ɗe ka,
kamala ana gà mburma hinne ta fèfil a ya.
Ta gwa ka:
«Zàmbaɗakwa à Mbulum.
Ŋgat na a mbəl à kwa ya.
Mezlibe ana tì zlibe a dər a ka,
hinne.
Ndzəɗa ŋgar ka,
a za duwa tserdze.
2 Ŋgat ka,
mala ndzer ŋa,
a gewa seriye a mburma ka,
ndaka vatwa ŋa lele hiywe.
Aka gəs dəm ata muva ŋa ya,
nda seriye,
aɗaba ana a nəs à mburma ika gər ahəɗ tserdze
nda mege dukw ŋgar ata ŋgwala tsiye ya.
A vəlar mesewere are ka,
agəra ana a bats gà ɓəzla meslire ŋgar,
a dza à məmbəz tar a bəɗ a.»
3 I dəba ŋa ya ka,
ta mà aaka asa,
ta gwa:
«Zàmbaɗakwa à Mbulum,
agəra hədzək ana a tsilere a i kwite ata ya ka,
à ndìv a tsa,
a tsil a aà mbulum ka,
kamala taŋa ya aà biybiy.»
4 I dəba ŋa ya asa ka,
gà bàba ŋa ata dzik səla gəra faɗ a,
nda gà dukw ata faɗ nda gà mesife ya,
tə dza gurmits a bəɗ aka miɗ Mbulum ana ŋgat mandza ŋa ika təv mendze Əbay ŋgar a.
Tə zàmbaɗa à ŋgat,
ta gwa:
«Zàmbaɗakwa à Mbulum.
*Amin.»
Mandə̀ɗà daala wele ana a ndzikiɗ ba Kəla Təmaŋ a, a bəra
5 I fata ya ka,
mifefile ŋgiɗ duwa a ɗera i təv mendze Əbay ata ya.
A gwa ka:
«Zlə̀bum à Mbulum BATSAH kwa ŋa,
kurum gà ɓəzla meslire ŋgar
nda gà na tə dzawar gurmits a bəɗ a tserdze,
ku mege kurum gà bàba ŋana,
kige tsa,
kurum gà ɓəza ŋana tekeɗe ya.»
6 Aləka ka,
i tsarakara mifefile ŋgiɗ duwa ya,
a ɗera asa ka,
kamala ana gà mburma hinne ta fèfil a ya.
A ɗera asa ka,
kamala maazaw ana a dze a a bəɗ dzuruvva ika madzundzuruv a ya.
Dite a ɗera asa ka,
ŋgùzlar kamala malaka mbulum ana a lak nda ndzəɗa ya.
Dukw ana i tsaraka ya ka,
ta gwa:
«Zàmbaɗakwa à Mbulum BATSAH kwa ŋa,
aɗaba ndzəɗa fit dze ka,
i ahər ŋgar.
Ŋgat na a kwere a duwa tserdze ya.
7 Ŋgayakwa ba ndzəɗakkà,
dite kà zlə̀bakwa à ŋgat,
aɗaba pat məpaslà ahər wele ata
a ndzikiɗ ba Kəla Təmaŋ a,
aka sle.
A zle a daala kuɗa.
Makasl ŋgar ata ka,
aka lə̀mbaɗa ba a bəɗ lele,
a riŋ ihər a veve a ŋgat.
8 Tàa vəlar ŋgwal petek ana
aruwaŋ ihər tsa kìlèfìffe,
dite a dəv tizlzlè asa ya.
A tike aka ba.»
Ŋgwal petek ata ka,
kamala megweɗe ya,
ŋgwal dukw ana gà mburma Mbulum ta ge a ya.
9 I dəba ŋa ya asa ka,
gawla Mbulum a gweɗiŋ:
«Wetse aka wakita ka:
Maŋgayaba ika gər gà mburma ana tàa zal a tar,
ta gwaɗa a tar,
dumara a megirive mandə̀ɗà daala Kəla Təmaŋ a bəra ya ya.»
Dite gawla Mbulum ata a gweɗiŋ asa:
«Bazlam aaha ka,
ndzer,
pàrsa iɗəm tsa.
A dara ka,
ika arah Mbulum a.»
10 I tsaraka kataya ka,
i dza gurmits a bəɗ aka miɗ ŋgar,
i waya mazàmbàɗà à ŋgat.
Ama a gweɗiŋ:
«Ki ge kamala taŋa ya tsa.
Aɗaba iye tekeɗe ka,
mala mege megemir Mbulum taf masakəŋa,
kamala kurum ana nda gà damər yak kà zazamum ndzer Yesuw ana a ɗif dər a ya.
Seyiŋ tsa,
zàmbaɗa ka,
à Mbulum ivaɗ.»
Ndzer Yesuw ata a ɗif dər a,
na a vile a ndzəɗa a gà ɓəzla məma à guma ŋgar a.
Wele ana a tsəl aka piris herrè ŋa ya
11 I dəba ŋa ya ka,
i ŋgataha a gəza mbulum mahə̀ndə̀kà ŋa iɗəm a tùwaŋŋà.
Dite piris herrè ŋa a riŋ mehìtsè ŋa iɗəm i fata dzèŋŋe.
Wele duwa a riŋ mandza ŋa ikəka tùŋŋa,
tə zalar «Mala ndzer ŋa,
wele ana a gewa duwa ka,
ndaka vatwa ŋa ya.
» A ge a seriye a mburma,
à gis a ka,
ndaka vatwa ŋa mbaŋa.
12 Are ŋgar ka,
ndìzlzle kamala arah akwa ya.
Felère i gər ŋgar,
dite a ndìwìɗ gər nda lèrèwdze Əbay ŋgar digiɗìzze.
Ta wetse zləm duwa aà ba ŋgar.
Ama zləm ata ka,
wura a sər tsa,
say ŋgat ŋa à gər ŋgar ɗekɗek pəra na a sər a.
13 Tùmbùlum ŋgar ka,
gwizem gwizem məmbəz ihər hinne.
Zləm ŋgar ana ti ɗer a ka,
«Bazlam Mbulum. »
14 Gà slàla gà sliwdze ana pampam i gər ŋa i mbulum a,
na tə zazam ŋgat a.
Tar gà mandzàyà ŋa ika gà piris ana tə ndza herrè ya.
Gà petek ana ika tar a ka,
gà ŋgwal ŋa lele herrè,
aruwaŋ ihər tsa asa mbaŋa.
15 Dukw ana a dere a i bazlam ŋgar a ka,
masalama ana matasla ŋa,
a zəm hapəpəpa ya.
A kweteɓe a dər akaba ka,
gà mburma ana ta gəs ahəm ŋgar tsiye tserdze.
A ne a ka,
Əbay ana a ta kwere a tar nda ndzəɗa ika gər tar a tserdze.
A ta ɓile a aka ter a ka,
mbiymbiy kamala manàhà dukw ana ti ɗwitsewara iɗəm yam ŋa ya.
Kamala taŋa ya,
a ti ɗif a à taŋa ka,
à matsəɓatsəɓ Mbulum ana ŋgat mala makwàrà gər ahəɗ tserdze ya.
16 Petek ŋgar ka,
ta wetse ahər zləm ŋgar,
nda gà aka gus ŋgar mbaŋa.
Ta wetse ka:
«Əbay ika gər gà Əbay tserdze,
dite ŋgat asa ka,
Batsah ŋana ika gər gà bàba ŋana ya.»
17 I dəba ŋa ya ka,
i ŋgataha a gawla Mbulum ŋgiɗ,
a riŋ mehìtsè ŋa dzèŋŋe ika are pat.
A fàfəl nda magala ŋgəlakəkka,
a zalara a gà məmba ana ta beyewa nda gəza mbulum a tserdze.
A gwaɗa a tar:
«Dumara,
kà yahum ba gər aka batsah megirive ana Mbulum a ge a ya.
18 Dumara,
kà zəmum məməta gà Əbay nda biy gà sliwdze,
dite nda gà Əbay tar ŋana mbaŋa.
Ka zəmum məməta gà piris nda biy gà na tə tsala aaka ya,
dite nda məməta gà mburma ana tserdze ya asa mbaŋa,
ku mege biy gà ɓele nda biy gà na ti ziwe a gər tar a,
dite ku mege biy gà gawla nda gà na tar gà ɓəza ndirkiz mba tekeɗe ya.»
19 I dəba ŋa ya,
i ŋgataha a dukw dala ata tar nda gà Əbay gər ahəɗ,
nda gà sliwdze tar,
ti yahaba gər aà mege guvəl aà gà wele ana mandza ŋa ika piris herrè ŋa ata ya,
nda gà sliwdze ŋgar.
20 *I təv ana tar ihər ta ge a guvəl ata ya ka,
gà wele ata nda gà sliwdze ŋgar a,
ta gasa gà dukw dala ata nda wele ana a gwa aà ba ŋgar ka,
waytsa iye mala məmà à bazlam Mbulum,
tsaatsa pàrsa ya fit.
Aɗaba ŋgat na a geye gà dukw mene aà mburma ika miɗ dukw dala ata ya.
Kamala taŋa ya,
a banawa gà na lambà dukw dala ata aà ba tar,
dite bəla ku mege gà na tə dzawa gurmits a bəɗ a mendzikiɗe ba ŋgar a ya.
Gà wele ata nda gà sliwdze ŋgar a,
ta gasa gà dukw dala ata nda mala məma à guma ŋgar a ka,
tə dza à tar a magər akwa kamala a duluv a,
nda are kataya.
Ama akwa ata ka,
ar ka,
kamala dukw ana a wene a wàfùfùffa ya.
21 Ama gà sliwdze dukw dala ata ka,
mala piris aaha ndeɗiŋa ya,
a batsaya tar fit nda masalama ana a dere a i bazlam ŋgar a ya.
Dite gà məmba tserdze tə dara,
ti yahaba gər,
tə zəm gà məməta tar ata fit ka,
a sleye a tar huɗ zìhhwe zìhhwe.