Mimbezle kwite Babila ana a mbazla ya
18
1 I dəba ŋa ya ka,
i ŋgataha a gawla Mbulum ŋgiɗ a riŋ a tarəra i gər ŋa i mbulum a.
Ndzəɗa ŋgar ka,
batsah ŋa hinne.
Dite medìve ŋgar ana à div a ya ka,
a ge dzaydzay ika gər ahəɗ tserdze.
2 A fàfəl nda magala ŋgəlakəkka.
I huɗ mifefile ŋgar ata ya ka,
a gwa:
«Batsah kwite Babila aka mbazla bìrìm,
leheɗ leheɗ.
Babila aka mbazla fit kweleŋ.
Kwite ata ka,
a ne təv mendze gà sitene.
Gà medzibe gà sitene ana pampam a ka,
i fata,
nda gà məmba ana gà ŋgwala tsiye ka,
tsakufkuf tar mandza ŋa i gà rəŋga ŋa.
3 Kwite Babila ata aka mbazla ka,
aɗaba ana a vəl ba ŋgar fit aà mege mezelme nda təv muva ya.
Gà mburma ana ika gər ahəɗ a tserdze,
tàa saya guzum ŋgar,
dite gà Əbay gər ahəɗ ana tserdze ya,
tàa geye muva nda gà ŋgat asa mbaŋa.
Gà ɓəzla metsèkèle ibam,
ta geye Əbay hinne ka,
agəra kàzlàŋa ŋgar ana sik sik sik,
a tsahən aà mburma ya.»
4 I dəba ŋa ya,
i tsarakara mifefile ŋgiɗ,
a ɗera i gər ŋa i mbulum a.
I huɗ mifefile ata ka,
a gwa:
«Kurum gà mburma gà ka,
dumara i liwiŋ tar a,
tsəka,
na bəla ka dzum ahər aà bakal tar ka,
ki ta ŋgetwime a mesewere are kamala tar a mbaŋa.
5 Dum ika magər tar a,
aɗaba bakal tar ka,
aka beha hinne,
a ɗeme a ba tsa.
Mbulum a sər,
dukw tar ata ta geye ŋgwala tsiye ka,
aka mətsar gər tsa.
6 Ta mà a tar aɗəm à mesewere are ŋa kamala ana tar ti sèwèr a mburma ya mbaŋa.
Dukw tar ana ta ge a gà misle ŋgiɗ a ka,
ta mà a tar dər aɗəm,
mà za taŋa.
Na bəla tàa tə̀f meɗwìtsè dukw tar ata ŋgwala tsa,
makwàsà ŋa ya,
a mburma dits a kəzləm ka,
tə tafa a tar aɗəm kəzləm sula mbaŋa te.
7 Ta vəl a tar mesewere are hinne,
arəv ma da dər aà tar a dùwaɗ,
kamala Əbay tar ana ta ŋgat hinne,
ta gewa məburnun a mbaŋa.
Ta gwaɗawa i gər tar ka:
“Waytsa mə̀r ka,
gà Əbay,
kwite mə̀r mandza ŋa ka,
hùɓùkkwa kamala mendze madakwa məkəs a tsa.
Labara duwa a ta ge a ba i təv mə̀r tsidze.”
8 Aɗaba taŋa,
mesewere are a ti dere a aka gər tar a ka,
gər melik tsara.
Gà dukw məməta nda tuwa,
nda gà may ti dere a aka kwite tar a ka,
pat ŋa ilik.
Dite akwa a wene a tar hilɓèk hilɓèk fit mbaŋa.
Aɗaba Mbulum BATSAH kwa ŋa ilik na batsah ŋa ya.
Ŋgat na a ge a ter a seriye ya.»
9 I təv ana gà Əbay ata ika gər ahəɗ tserdze ta geyewa muva i kwite ata ya,
ti ta ŋget a a hədzək akwa ana a wene a kwite ata ya ka,
ti tiweye aàba a hinne,
gəzləŋ a wir aà teriŋa.
Aɗaba i təv ana tar mandza ŋa iɗəm a ka,
kìɗìŋŋa madzala gà gər tar aà mege məburnun pəra.
10 Ti ta hitse a ka,
diriŋ aà kwite ya,
aɗaba ti ta ge a magəɗa hinne,
agəra mesewere are ana a geba i fata ya.
Ta gweɗe a ka:
«Waya ba mə̀r a,
waya,
batsah kwite Babila aaha ndzəɗa ŋa hinne ya,
a mbazla leheɗ leheɗ gər melik tsara ana,
meme?»
11 Gà ɓəzla metsèkèle ana ika gər ahəɗ tserdze ya tekeɗe,
ti tiwe aàba a hinne,
arəv a wir aà ter a mbaŋa,
agəra kwite ata a wànà ya,
aɗaba ana wura a ti sekeme a gà dukw tar ata asa tsiye ya.
12 Gà dukw tar ata ka:
gà gura nda gà ndzemde məvəɗa siŋgwe ana tsəzlzla ya,
nda gà kur ana pampam tsakala ŋa hinne,
à sìkim a ba tsiye,
dite nda gà petek sak,
nda gà na a ndza nduzzwa ya,
ndəna a ndza ndizze ndeyndey a,
nda gà asiŋ gà petek ana gà ŋgwal ŋa pampam a.
Dite gà dukw ana tə dzawuwa dər a mbaŋa ka,
gà dizl ana pampam,
gà tsakala ŋa hinne,
à sìkim a ba tsiye,
nda gà dukw ana tə làmbaɗaya nda zlir matswaslu ya,
kige tsa,
nda dizl ŋgwal ŋana.
Gà asiŋ gà biy ŋgiɗ ka,
ta vaɗa ara,
nda ndzemde məvəɗa kur siŋgwe,
kige tsa,
nda gà kwàtamà mbaŋa asa.
13 Gà mburma ata tə dzawuwa ka,
à gà medzibe gà wirdè ana a ze hwaŋŋa lele ya mbaŋa,
dite nda gà slàmbah gà dukw ana a ze lele ya asa mbaŋa.
Tə dzawuwa a gà guzum nda mal,
nda gà daw,
nda gà gùfa,
dite nda gà sla nda təmaŋ,
nda gà piris,
nda puspus ana tə dànawa aà gà piris,
nda gà mburma ana ti ne à tar gà ɓele ya mbaŋa.
Wura a ti sìkim a duwa i ahər tar a asa tsidze.
Kamala taŋa ya,
ti tiwiŋa,
ta gweɗe a a gà mburma ana i kwite ata ya:
14 «Gà dukw ata gà matsahəna ŋa,
kà wayum mesikime ya ka,
a riŋ asa tsa.
Gà limana kurum nda gà Əbay kurum tserdze ka,
aka ndəv,
ki ŋgetwime a asa tsidze.»
15 Dite gà ɓəzla metsèkèle ana ta ŋgatawara siŋgwe hinne i kwite ata ya ka,
ti ta hitse a diriŋ aà təv ata ya,
aɗaba ta ge a magəɗa agəra mesewere are ana a geba i fata ya.
Ti ti tiwe aàba a hinne,
ta ge a matsəɓatsəɓ.
16 Ti ta gweɗe a ka:
«Waya ba mə̀r a,
waya,
batsah kwite aaha aka mbazla bìrìm kweleŋ dze ana,
meme?
Ar ka,
kamala məkəs ana a dza akaba petek nduzzwa ŋa,
ndəna a ndza ndizze ndeyndey a,
dite nda gà petek sak ana ŋgwal ŋa lele ya.
Madùwàyà ba ŋgar ata ka,
nda gà ŋgwal gà dukw maslawa ana ta vaɗa nda gura,
biy ŋgiɗ ibam,
tə làmbaɗa nda kur ana tsakala ŋa hinne,
à sìkim a ba tsiye.
17 Ama kinehe gà dukw ŋgar ata ka,
tàa nəsaya fit gər melik tsara ana,
meme?»
Dite gà mburma ana gà slə̀làh yam tar a riŋ nda gà ɓəzla məpaka ŋa,
nda gà ɓəzla megemir tar,
dite nda gà taŋa tə sùwayawa nda slə̀làh yam a tserdze,
ta ŋgatawa iɗəm dukw mayaba tar a ka,
ti ta hitse a diriŋ aà kwite ata ya mbaŋa.
18 Tàa ŋgataha a hədzək akwa ana tùtùkwtùkkwa,
a tsəl aà mbulum a ka,
ta fàfəl nda magala ŋgəlakəkka,
ta gwa:
«Kwite ŋgiɗ a riŋ kamala kwite aaha ya ka,
a riŋ asa tsidze.»
19 Tə tuwaya aàba hinne,
tə ndàya ahəɗ a gər,
ta fàfəl nda magala ŋgəlakəkka,
ta gwa:
«Waya ba mə̀r a,
waya,
batsah kwite aaha a mbazla ya.
Gà na slə̀làh yam tar a riŋ,
ta ŋgatawara iɗəm limana i fata ya ka,
hinne.
Ama,
araha kinehe ka,
aka nəs gər melik tsara ana,
meme?»
20 Kurum gà mburma ana i gər ŋa i mbulum a,
ŋgayum ba agəra kwite aaha a mbazla ya.
A kurum gà ɓəzla meslire Mbulum,
nda gà ɓəzla məma à guma ŋgar,
dite nda gà asiŋ gà mburma ŋgar tserdze,
ŋgayum ba,
aɗaba Mbulum aka ge a tar seriye agəra dukw ana ta gewa a kurum a.
21 I dəba ŋa ya ka,
gawla Mbulum ana ndzəɗa ŋa hinne ya,
a daha,
a zla batsah kur ana kamala bur melìgire ya,
dìɗìm a yà a batsah duluv,
dite a gwa:
«Batsah kwite Babila tekeɗe,
tì yè a ka,
nda ndzəɗa kamala taŋa ya mbaŋa.
Ziwiɗ wura a ta ŋgeter a asa tsidze.
22 Gà mburma ana i kwite kurum ata ti dzeyewa gandzavəl a,
nda gà na tə làhawa dimis a,
dite nda gà na ta vàtawa vagam,
kige tsa,
mezleliŋ a ka,
tar riŋ asa tsa.
Kamala taŋa ya,
duwa ilik a ti ɗere a i təv kurum a asa tsidze.
Ti ta ŋget a a gà ɓəzla malàmbàɗà gà duwa i təv kurum asa tsa mbaŋa.
Wura a tserekere a gà melìgire ana a ɗewara i təv kurum ata ya asa tsidze.
23 Gà lalampa kurum tekeɗe,
ti ti div a dzaydzay asa tsa mbaŋa,
na i təv kurum a.
Ti ti tsereke a Mewideye duwa huwwa biy gà na ti ndzek a gà daala ya,
nda gà daala ana ti deye a a zal a asa tsidze,
na i fata ya.
Aɗaba piŋŋe ka,
gà ɓəzla metsèkèle ana i kwite kurum a,
tə za dər gà asiŋ ŋa ana ika gər ahəɗ tserdze ya,
nda limana.
Dite kà banayawum mburma tserdze,
ku mege i ŋga,
nda gà dukw gà mèdè kurum ata nda pàrsa ya.
Aɗaba taŋa na a nəs à kurum nda seriye ya.»
24 Mbulum a samata məmbəz gà ɓəzla məma à guma ŋgar nda biy gà mburma ŋgar ana tserdze a dza à bəɗ a ka,
i kwite tar.
Kamala taŋa ya,
məmbəz gà na ta batsaya tar ika gər ahəɗ tserdze ya ka,
ika gər tar.