Bazlam aka gər dəm duwa muva ŋa
17
1 I dəba ŋa ya ka,
gawla Mbulum ŋgiɗ ilik ika magər gà gawla Mbulum ata təsəla,
dite gà tasà aà tar i ahər təsəla asa ya,
a dara a təv gà ya,
a gweɗiŋ:
«Dara,
i ɗifek a dər,
meme na Mbulum a ta vile a mesewere are a dəm ata muva ŋa ya.
Dəm ata muva ŋa ya ka,
kamala megweɗe ya,
kwite ana mazlazla ŋa aà guva gà dula pampam hinne ya.
2 Ŋgat ka,
gà Əbay ana ika gər ahəɗ a tserdze,
ta geyewa muva nda gà ŋgat.
Dite asa ka,
gà mburma ana ika gər ahəɗ a tserdze,
tə sayawa guzum ŋgar,
ta kwayawa dər,
ta gewa dər muva nda gà ŋgat mbaŋa asa.»
3 I dəba ŋa ya asa ka,
Mezite Mesife Mbulum a dara aka gər gà ya,
dite gawla Mbulum ata a da à iye a kusak.
Iye riŋ i ndze a i fata ka,
i ŋgataha a məkəs duwa,
ŋgat mandza ŋa ika dukw dala.
Dukw dala ata a ndza ka,
nduzzwa.
Gà gər ikəka təsəla.
Gà mbukum ŋgar ka,
kurwa.
Aà ba ŋana tekeɗe,
maràhà ŋa nda mewetseye gà duwa ihər.
Gà dukw ata ta wetseye ya ka,
gà ŋgwala tsa ndeyndey,
ti ndeveye a dər a Mbulum.
4 Məkəs ata ka,
petek ikəka nduzzwa,
dite petek ŋgiɗ ka,
a ndza ndizze ndeyndey.
A dùwaya ba nda dukw maslawa ŋgar hinne,
gà gura nda gà medzibe gà kur ana pampam,
tsakala ŋa hinne,
à sìkim a ba tsiye.
Dite kup duwa a riŋ malàmbàɗà ŋa nda gura i ahər ŋgar mbaŋa.
Kup ata ka,
maràhà ŋa nda dukw bakal,
dukw ana biy metsike tsiye,
kamala megweɗe ya ka,
megeye muva ŋgar ana a gewa ya.
5 Ta wetse zləm ŋa aka yemere ŋgar.
Dukw ata ta wetseye ahər a ka:
«Iye batsah kwite Babila,
məmər gà dəm ana gà muva ŋa ya,
dite nda megeye gà dukw ana ŋgwala tsa,
ika gər ahəɗ tserdze ya.»
Ama zləm kwite Babila ka,
dèrze ikəka,
na aà metsereke ya.
6 I samata məkəs ata ka,
makwàyà ŋa nda məmbəz gà mburma Mbulum ana a sa ya.
Ta batsaya gà mburma ata ka,
aɗaba ana ti ɗifewa à zləm Yesuw parakka ya.
Dite məkəs ata ka,
a sa məmbəz tar.
I ŋgatar ka,
a ge aà iye kamala dukw mene aà mburma ya hinne.
7 Dite gawla Mbulum ata a gweɗiŋ:
«Aàmala na a ge aà kər kamala dukw mene aà mburma ya ya?»
A gweɗiŋ asa:
«Tsaraka,
i ɗifek a à dukw ana makàhà ŋa aka gər gà məkəs aaha nda dukw dala ata gà gər ikəka təsəla,
gà mbukum ŋgar ibam,
kurwa,
dite məkəs ata mandza ŋa ikəka ya:
8 Dukw dala ata kə ŋgatar a ka,
a riŋ nda gà mesife piŋŋe,
ama kinehe ka,
mesife ŋgar a riŋ asa tsa.
Dite a ta mère a i biye ana kwitsikw ŋa ya ka,
bise asa mbaŋa.
Aka màra ka,
Mbulum a ta kiɗ a ŋgat a biye fit kweleŋ.
Akahər ana Mbulum a ge gər ahəɗ a ka,
aka wetse aba zləm gà mburma ana ti ta ŋget a mesife ya,
a wakita ŋgar a,
dite gà na aka wetseye tar tsiye tekeɗe,
tar riŋ i ŋgal mbaŋa.
Gà taŋa aka wetseye tsiye,
ti ta ŋget a dukw dala ata ka,
a ta ge aà ter a kamala dukw mene aà mburma ya.
Aɗaba piŋŋe ka,
a riŋ nda gà mesife ŋgar,
dite kinehe ka,
a riŋ nda mesife asa tsa.
Ama a pat ŋgiɗ ka,
a ta mère a mba asa.
9 Wur ana a tsereke a dukw ata ka,
say na Mbulum aka vəlar metsehe ya.
Aɗaba gà gər ata təsəla ya ka,
kamala megweɗe ya,
gà kwite ana təsəla,
məkəs ata mandza ŋa ikəka ya.
Dite ti ɗif a ka,
à gà Əbay ana təsəla ŋa ya mbaŋa.
10 Ama mekwere gà Əbay gà ə̀zləm ŋana ika magər tar a ka,
aka ndəv.
Biy ŋgiɗ ilik ka,
a riŋ a kwere a hiywe mba.
Ama biy ŋgiɗ ilik ka,
mekwere ŋgar aka ndze aɗəm zukw tsa.
Aɗaba ŋgat aka da a mekwere aləka ka,
a ti ndze a iɗəm hinne tsa.
11 Dukw dala ata a riŋ nda gà mesife piŋŋe ya,
ama kinehe ka,
a riŋ asa tsiye.
Ŋgat ka,
Əbay matsamakər ŋana.
Aɗaba piŋŋe ka,
a riŋ i liwiŋ gà Əbay ata təsəla ya.
Aka màra ka,
Mbulum a ti dzeye a iɗəm à ŋgat a fit a biye.
12 Gà mbukum ata kurwa kə̀ ŋgatar a ka,
ti ɗif a à gà Əbay ana kurwa,
tàa da a mekwere tar zukw tsiye.
Ama ka,
ti ti dzèye a ter a ndzəɗa aà mekwere nda gà dukw dala ata,
i huɗ mendze zaakwa ya.
13 Gà Əbay kurwa ŋa ata tserdze ya ka,
tə dza akaba bazlam a təv ilik ŋa.
Ti ti dzèye a gà ndzəɗa tar tserdze ka,
a dukw dala ata,
dite ka,
ma kwara.
14 Ti ta ge a guvəl aà wele ana a ndzikiɗ ba Kəla Təmaŋ a.
Ama ŋgat ka,
a ti zè a tar nda ndzəɗa,
à mbè aà teriŋa.
Aɗaba ŋgat ka,
batsah ŋa ika gər gà bàba ŋana,
dite ika gər gà Əbay ŋa ana ta kwere a ya mbaŋa asa.
Gà mburma ŋgar ti zezem a ŋgat ka,
nda gəzləŋ ilik.
A zal a tar,
dite a pala tar ka,
aà ti zezem a ŋgat.
Kamala taŋa ya,
tar tekeɗe,
ti ta mbè aà ter a mbaŋa.»
15 I dəba ŋa ya,
gawla Mbulum ata a gweɗiŋ asa:
«Yam ata kə̀ ŋgatar,
dəm muva ŋa ata a ndza aà guva ŋa ya ka,
a sasar meɗife à gà mburma ana gà slàla tar pampam,
nda gà na ta fèfil a ndaka gà ahəm ŋgiɗ pampam,
ku mege i ŋga ika gər ahəɗ tserdze ya.
16 Dite dukw dala ata nda gà mbukum kurwa kə̀ ŋgatar a ka,
ti ti ne a are a dəm ata muva ŋa ya.
Ti ti dzik a ihər gà dukw maslawa ŋgar a fit,
a ndze a ɗwàzɗwàzuzzwa kataya.
I fata ya ka,
ta gìsebiŋa,
ta pèpìɗiŋa.
Mezehe ŋana ka,
ta wene a nda akwa tewer tewer fit kweleŋ.
17 Aɗaba Mbulum na a vəl metsehe a gà Əbay ata kurwa ya,
dite ka,
tə dza akaba ahəm ika magər tar,
ta vəl ndzəɗa tar a dukw dala ata tserdze,
aà ma kwara à gər ŋgar.
Mbulum a ge dər kataya ka,
aà ta ge a dukw ana a sasar a,
dite ka,
dukw ana a tsik piŋŋe,
a gwa,
a ta ge a ba ya ka,
aka ge ba kaɗəŋ a.
18 Ama məkəs ata kə̀ ŋgatar a ka,
a sasar à meɗife à batsah kwite ana a kwere a gà Əbay ana ika gər ahəɗ tserdze ya.»