Gà tasà ata nda gà matsəɓatsəɓ Mbulum iɗəm a
16
1 I dəba ŋa ya ka,
i tsarakara mifefile ana a ɗera ŋgəlakəkka i ga Mbulum ata ya ya.
I huɗ mifefile ata ya ka,
ta gwaɗa a gà gawla Mbulum ata təsəla ya:
«Dumaha,
kà dzàyum à gà matsəɓatsəɓ Mbulum ana i gà tasà kurum ata ya,
a bəɗ aka gər ahəɗ.
Dzàyum dər ka,
a gà təsəla ŋa ata i tasà ya fit dze.»
2 I dəba mifefile ata ya tsara ka,
gawla Mbulum malahalah ŋana,
a daha,
a dza à biy ŋgar aka gər ahəɗ.
A dza à bəɗ tsara ka,
gà mbəlak ana ti wir a hinne ya,
mbùkw mbùkw a pataya aba aka gà mburma ana lambà dukw dala ata aà tar,
dite tə zàmbaɗawa à mendzikiɗe ba ŋgar ŋana asa mbaŋa ya.
3 Aləka gawla Mbulum masula ŋana a daha,
a dza à dukw ana i tasà ŋgar a ka,
a batsah duluv.
A dza dər tsara ka,
yam ata a ne kamala məmbəz ana a dara i məməta ya.
Tsam ka,
gà dukw ana i yam ata ya tserdze,
fit ta mata aɗəm.
4 I dəba ŋa ya,
gawla Mbulum məmakər ŋana a daha,
a dza à dukw ana i tasà ŋgar a ka,
a gà dula,
nda gà a biye yam ana a ŋgəzawa ya.
Dite gà yam ata tekeɗe,
ti neye kamala məmbəz a mbaŋa.
5 I fata ya ka,
i tsarakara gawla Mbulum ana a kaslawa gà yam a.
A zàmbaɗa à Mbulum,
a gwaɗar:
«Kər ilik na tsəɗaŋŋa ya.
Kər ka,
kər riŋ daga piŋŋe,
aà gər ana gər ahəɗ a riŋ zukw tsiye.
Dite kinehe tekeɗe,
kər riŋ nda gà mesife hiywe asa mbaŋa ya.
Kər ki ge a seriye aaha a mburma ka,
ndaka vatwa ŋa lele.
6 Gà mburma aaha ka,
tə dzayawa à məmbəz gà ɓəzla məma à guma yak a bəɗ,
nda biy gà asiŋ gà mburma yak ana tserdze ya,
tàa batsaya tar.
Ama kinehe ka,
ki vile a ter a məmbəz ata,
dite tə sa mbaŋa te.
Kamala taŋa ya,
ta ŋget a dukw mayaba tar kaɗəŋ.»
7 I dəba bazlam ŋgar ata ya ka,
i tsarakara mifefile i gər ŋa ya,
a ɗera ika təv ana ta vəlawa aaka duwa a Mbulum a.
A gwa:
«Haya kaɗəŋ,
kər Mbulum Batsah mə̀r ŋa ka,
mala makwàrà gər ahəɗ tserdze.
Kər ka,
mala ndzer,
ki gewa seriye a gà mburma ka,
ndaka vatwa ŋa lele,
pàrsa iɗəm tsa.»
8 I dəba ŋa ya asa ka,
gawla Mbulum məfaɗ ŋana a dza à dukw ana i tasà ŋgar a,
aka pat.
Tsam ka,
a vəlar ndzəɗa aà mewire hinne,
ndàzza kamala akwa ya,
na a wene a mburma ya.
9 I təv ana a wànà tar kamala taŋa ya ka,
gà mburma ata tə ndavaya a zləm Mbulum,
aɗaba ana a slər aka tarəra mesewere are ata ya ya.
Ama ka,
tàa mbəɗ à gəzləŋ tar,
dite tàa dza gurmits a bəɗ a Mbulum ɓav tsa,
ti niw ŋgat ivaɗ.
10 I dəba ŋa ya asa ka,
gawla Mbulum miìzləm ŋana a daha,
a dza à dukw ana i tasà ŋgar a,
aka təv mendze Əbay dukw dala ata.
I təv ana a dza dər tsara ya ka,
luvuŋ a ge ziŋziŋ hinne i mekwere ŋgar ana a kwere a ya tserdze.
Gà mburma ta papaɗa dər zlir hinne,
aɗaba mewire mesewere are tar ata a wir aà ter a ya.
11 Ama ku mege kataya tekeɗe ka,
tàa mbəɗ à gəzləŋ tar,
dite tàa miyak à gà dukw ana ta gewa ya tsidze.
Tə ndavaya a Mbulum ana i gər ŋa ya ivaɗ,
aɗaba mesewere are gà dukw ata nda gà mbəlak tar ata a wir aà ter a ya.
12 I dəba ŋa ya,
gawla Mbulum mendilik ŋana a daha,
a dza à dukw ana i tasà ŋgar a,
a batsah dula ana tə zalar Efrat a.
A dza dər ka,
yam ana i dula ata ya,
a se ndes tsara.
Kamala taŋa ya,
gà Əbay ana ti dere a ndaka tseke pat ana a mbəzawara ya,
ta ŋget a vatwa,
ti dere a aà mege guvəl aka lìdè ŋgiɗ a kuɗa.
13 I dəba ŋa ya ka,
i ŋgataha a gà sitene ana gà ŋgwala tsa ndeyndey a,
makər.
Tar ka,
kamala gà makwambaɗùkw a.
I ŋgiɗ a dara ka,
i bazlam *kə̀rəm a.
Dite biy ŋgiɗ ibam,
a dara i bazlam dukw dala ata ya.
I ŋgiɗ asa ka,
a dara i bazlam mala məmà à bazlam Mbulum ata nda pàrsa ya.
14 Gà sitene ata tə dara ka,
i təv Əbay tar ŋana ya.
Ta gewa ka,
gà dukw mene aà mburma ana pampam a.
Ti de a a təv gà Əbay gər ahəɗ tserdze.
Ti yehe a ter a gər aà mege guvəl aà Mbulum BATSAH kwa ŋana a za duwa tserdze ya,
a pat ana a ta pèt a à ndzəɗa ŋgar a.
15 Yesuw a gwa:
«Gwim metsehe,
tsarakum,
aɗaba i ti dere a ka,
sèrèh kamala mala akəl a.
Ama maŋgayaba ika gər wele ana petek ika ba ŋgar a,
dite ka,
a ndze a are tsa asa ya.
Aɗaba Yàa dara ka,
ma tə da kataya sàgùrɗùmma kataya ze petek,
dite ka,
hwarwa a ger a ika miɗ mburma ya tsa.»
16 Gà sitene ata makər a ka,
ti yaha gər a gà Əbay a tə̀vəməŋa a riŋ tə zalar ndaka ahəm gà Yahuda ka,
Armagadan.
17 I dəba ŋa ya ka,
gawla Mbulum matəsəla ŋana a daha,
a dza à dukw ana i tasà ŋgar a,
a himbiɗ aà gəza mbulum.
A dza dər aba ya ka,
mifefile duwa a ɗera nda magala ya ŋgəlakəkka i təv mendze Əbay Mbulum i ga Mbulum batsah ŋa ata ya.
A gwa ka:
«Aka ndəv.»
18 I fata ya ka,
mewìtìɗè mbulum a dza ba aà mewìtiɗe wùtəɗ wùtəɗ.
Dite malaka mbulum a lakaya ŋgùzlar ŋgùzlar,
dite gər ahəɗ a ɓazla hinne wakit wakit asa.
A gər ana Mbulum a ge mburma ya ka,
gər ahəɗ aka ɓazla kamala taŋa ya ilik tsidze.
A ɓazla ka,
a za duwa tserdze.
19 Dite asa gər ahəɗ a taya ba ikaba ya tùhak tùhak.
Huɗ kwite batsah ŋana tə zalar Babila ya,
a tarətsa ba ikaba ya təv pampam makər,
dite gà asiŋ kwite ana ika gər ahəɗ a tserdze,
ta mbazla mbaŋa.
Kamala taŋa ya,
aɗaba kwite Babila ata ka,
aka məts gər a Mbulum tsa.
A ge matsəɓatsəɓ hinne nda təv ŋgar.
Ar ka,
kamala dukw ana a dzəm tsəka,
a gweɗere a,
sa,
kà ndəv dər iɗəm a ya.
20 Kamala taŋa ya,
gà ahəɗ ana malàwàrà ŋa nda yam a tserdze,
tə dzawa a huɗ yam,
dite gà kwite zubul ŋa ta mbazlaya bìrìm bìrìm fit,
wura aka ŋgatar asa tsa.
21 Gà bàba gà aləndza tə dzawara i mbulum a ɓàràmakkà hinne.
Ama aləndza ata ilik ka,
kiliw dzik faɗ.
A dzawara ka,
aka gà mburma ya.
Gà mburma ata ka,
tə ndavaya dər akaba a Mbulum,
aɗaba ana ti sèwèr a are hinne agəra aləndza ata ya.
Aɗaba mesewere are ata ka,
ŋgwala tsa ndeyndey,
a za duwa tserdze.