Gà gawla Mbulum ana tar nda gà mandəvandəv
mesewere are ya
15
1 I dəba ŋa ya ka,
i ŋgataha a batsah dukw ŋgiɗ aà gəza mbulum asa.
A ge aà iye ka,
kamala dukw mene aà mburma ya.
I ŋgataha ka,
a gà gawla Mbulum təsəla nda gà dukw mesewere dər are a mburma aà tar i ahər ilik ilik,
aɗaba tì ndìv a dər ka,
à matsəɓatsəɓ Mbulum ana a riŋ à tsìɓer a,
à tètìk a ter a dər a.
2 I dəba ŋa ya asa ka,
i ŋgataha a dukuməŋa a riŋ,
a ndza kamala duluv yam ana à div a twiytwiy kamala kwataramà ya,
dite akwa iɗəm asa ya mbaŋa.
I fata ya ka,
i ŋgataha a gà mburma ana ta mba aà dukw dala ata ya.
Tàa dzar gurmits a bəɗ,
nda mendzikiɗe ba ŋgar ŋa,
nda gà zləm ŋgar ata ti ɗer maɗàmà duwa ya tsidze.
Gà mburma ata tserdze ya ka,
tar gà mehìtsèyè ŋa aà guva duluv ata a dəv kamala kwataramà ya.
Tar ka,
nda gà gandzavəl ana Mbulum a dzaya a tar a i ahər.
3 Tar ihər tì lèh a dər dimis Musa ana ŋgat mala meslire Mbulum,
a lah akahər ata ya.
Dite i dəba ŋa ya,
tə lah dimis wele ana ŋgat kamala Kəla Təmaŋ a mbaŋa.
I huɗ malàhà dimis tar ata tə lah a ka,
ta gwa:
«Mbulum BATSAH kwa ŋa ka,
mala makwàrà duwa tserdze.
Mege megemir yak ana ki ge a ya ka,
batsah ŋa.
Ar ka,
ŋgwal ŋa ndzer.
Kər na Əbay ika gər ahəɗ tserdze ya.
Dukw ana ki dzele a ya,
ndəna
ki ge a ya ka,
kalkal lele.
Kər ka,
mala mege dukw ana ŋgwal ŋa ndzer a.
4 Batsah mə̀r ŋa,
ku weke ka,
a gik a magəɗa.
Wele ana a gweɗe a ka,
i zèmbeɗe a
à kər tsiye dze ana,
weke?
Aɗaba kər ilik na tsəɗaŋŋa ya.
Gà mburma ana ku mege i ŋga
ika gər ahəɗ tserdze ya,
ti dere a aka miɗ yak a,
tì dzeke a gurmits a bəɗ,
aɗaba ana tar tserdze
tàa ŋgat a megemir yak ana
ki ge ndaka vatwa ŋa lele ya.»
5 I dəba ŋa ya ka,
i samata meme na ta hə̀ndə̀k i ga Mbulum batsah ŋa ana i gər ŋa i mbulum a,
kamala megweɗe ya ka,
mekiriwe ga petek ana gà mburma tə lə̀mawa akaba aɗəm nda gà Mbulum a.
6 Dite i ŋgataha a gà gawla Mbulum ata təsəla,
nda gà dukw mesewere dər are a mburma aà tar i ahər ilik ilik a asa.
Tar riŋ ti dere a i ga ata ya,
gà petek ana ika tar a ka,
gà herrè ŋa ɗekɗek,
tsəɗaŋŋa lele.
Tar ka,
gà madànàyà ba ŋa i gəzləŋ a nda gà slarapa ana malàmbàɗà ŋa nda gura ya.
7 Biy ŋgiɗ ilik ika magər gà dukw ata faɗ nda gà mesife ya,
a daha,
a dzaya gà tasà təsəla màlàmbàɗà ŋa nda gura,
a gà gawla Mbulum ata təsəla ya,
ku weke nda biy ŋgar.
Gà tasà ata ka,
tìsse tìsse maràhàyà ŋa nda matsəɓatsəɓ Mbulum,
wele ana a ndze a nda gà mesife aà biybiy a.
A riŋ a ge a matsəɓatsəɓ hinne turtur nda təv gà mburma.
8 Ama ga Mbulum ata ka,
maràhà ŋa tùtùkwtùkkwa nda hədzək.
Hədzək ata a dara ka,
i təv mezlibe Mbulum ana tì zlibe a dər,
dite i təv ndzəɗa ŋgar a asa mbaŋa.
Ama wura ilik a sle a aà mede a ga Mbulum ata tsidze,
say gà mesewere are ata təsəla ya,
tì ndìv a i ahər gà gawla Mbulum ata ya dzekwiŋ.