Dimis ana gà mburma Mbulum tì lèh a i mbulum i gər ŋa ya
14
1 I dəba ŋa ya,
i samata asa ka,
i ŋgataha a Kəla Təmaŋ a riŋ mehìtsè ŋa ika gər kwite ana tə zalar Siyuna ya.
Ŋgat a riŋ i fata,
tar nda gà mburma ana ta wetseye zləm ŋgar,
nda gà zləm tsir ŋgar aka yemere tar a.
Gà mburma ata ka,
tar dəbuw dərməka nda dəbuw dzik faɗ gər faɗ.
2 I dəba ŋa ya,
i tsarakara mifefile ana a ɗera i gər ŋa i mbulum a.
A ɗera ka,
kamala maazaw ana a dze a a bəɗ dzuruvva aà madzundzuruv a.
Dite a ɗe asa ka,
gurumumma kamala malaka mbulum a.
Ama mifefile ata i tsarakara ya ka,
a tsahən hinne,
ar ka,
kamala ana tì dze a gandzavəl a mbaŋa asa.
3 Gà mburma ata dəbuw dərməka nda dəbuw dzik faɗ gəra faɗ a ka,
tar gà mehìtsèyè ŋa ika miɗ təv mendze Əbay Mbulum,
nda gà ika miɗ gà bàba ŋana,
dite ika miɗ gà dukw ata faɗ ŋa nda gà mesife ya.
Tar riŋ tì lèh a dimis awiya ŋa.
Ama dimis tar ata ka,
wura a sər malàhà ŋa tsidze,
say gà mburma ata Mbulum a mbùrùɗaha tar ika gər ahəɗ a ya.
4 Gà mburma ata ka,
tar gà tsəɗaŋŋa,
tàa ləm aà gà məkəs tsidze.
Tar ti zezem a ka,
Kəla Təmaŋ ata i sik a i sik a,
haa a təv ana a de aɗəm a ya.
Tar ti ne ka,
gà biy Mbulum nda Kəla Təmaŋ.
Tar na Mbulum a mbala à tar ika magər gà mburma ana ika gər ahəɗ a ya.
5 Tar ka,
pàrsa a riŋ i bazlam tar tsa,
dite dukw ŋgiɗ a riŋ ilik na ta ge a ka,
ta me a ter a iɗəm à bakal a tsidze.
Gà gawla Mbulum makər
6 I dəba ŋa ya ka,
i ŋgataha a gawla Mbulum ŋgiɗ duwa a riŋ ɗevivivvè diriŋ,
a be a nda gəza mbulum.
A dara ka,
aà meɗìfè à bazlam ŋgwal ŋa ana a ndze a aà biybiy a.
A tsik a ka,
a gà mburma ana ika gər ahəɗ a tserdze,
ku mege a gà na slàla tar pam,
nda gà təv gà mendze tar pampam,
kige tsa gà ahəm tar tekeɗe,
pampam a.
7 Gawla Mbulum ata a tsik a tar ka,
nda magala ŋgəlakəkka.
I huɗ mifefile ŋgar ata ya ka,
a gwaɗa a tar:
«Gwim magəɗa a Mbulum.
Dzùmar gurmits a bəɗ,
dite kà zlə̀bum à ŋgat.
Aɗaba pat ŋgar ana a ta ge a seriye a mburma ya ka,
aka à mendze aɗəm.
Zàmbaɗum à ŋgat,
aɗaba ana a ge gà gəza mbulum nda gər ahəɗ,
nda gà batsah duluv,
dite nda gà yam ana à ŋgìzere a i biye ya.»
8 I dəba ŋa ya,
i ŋgataha a gawla Mbulum ŋgiɗ masula ŋa,
a dara i dəba biy ŋgiɗ aaha ya.
Ŋgat a gwa ka:
«Babila batsah kwite ata ka,
Mbulum aka mbàzla dər bìrìm fit kweleŋ.
Kwite ata na a fàr ndzəɗa aka mburma tserdze,
ku mege gà slàla awara tekeɗe,
aà masàyà meɗwìtsè dukw mese ŋgar ana makwàsà ŋa ya,
kamala megweɗe ya ka,
aà megeye mezelme nda təv muva.»
9 I dəba ŋa ya ka,
gawla ŋgiɗ məmakər ŋana a dara asa.
A fàfəl nda magala ŋgəlakəkka,
a gwa:
«Gà na tar riŋ tì dzèye a gurmits a bəɗ a dukw ata a dara i yam a,
dite nda mazàmbàɗà à mendzikiɗe ba ŋgar ŋa ya ka,
gà na tàa ge lambà ŋa aka yemere tar,
kige tsa akahər tar mbaŋa ya ka,
ta beye a tsa.
10 Tar ka,
ti ti seye a meɗwìtsè dukw ana ndùlàkə̀kka makwàsà ŋa biy Mbulum a,
kamala megweɗe ya ka,
mesewere are ana Mbulum a ta vile a ter a ya.
Aɗaba matsəɓatsəɓ ŋgar ana a tsəɓar aka gər tar a ka,
a ti rèh a ter a dər a kəzləm dìts.
Dukw ana ŋgwal ŋa ya ka,
ar iɗəm ilik tsidze.
Wur ana aka dza gurmits a bəɗ a dukw dala ata ya ka,
kùm tì yè a ŋgat a akwa ana dukw ata iɗəm,
a wanawa wàfùfùffa kamala asana ya.
Kamala taŋa ya,
ti ti sèwèr a are ika miɗ gawla Mbulum ata tsəɗaŋŋa ya,
dite ika miɗ Kəla Təmaŋ asa mbaŋa.
11 Hədzək akwa ata a ti sèwèr a are a gà mburma ata ya ka,
a ti tsil a aà gəza mbulum aà biybiy.
Aɗaba wur ana aka zàmbaɗa à dukw dala ata,
kige tsa à mendzikiɗe ba ŋgar ŋa,
dite tàa wetse zləm ŋa aà ba tar a ka,
ti ta ŋget a mesifikaba kwizikw tsidze.
Tì sèwèr a are ka,
kəla pat,
ku mege ndaapat,
ku mege ndaavəɗ asa mbaŋa.»
12 Aɗaba taŋa,
kurum gà mburma Mbulum ana kurum ihər ki giswim ahər a ahəm,
kə̀ gəsum Yesuw nda gəzləŋ kurum a ka,
mə̀rum aba.
Gəsum gəzləŋ ɓəŋɓəŋ lele.
13 I dəba ŋa ya ka,
i tsarakara mifefile i mbulum a asa,
a gweɗiŋ:
«Wetse dukw ana i tsikik a ya.
Bazlam ŋa ka:
Gà na ta mataya i megemir Mbulum a ka,
maŋgayaba ika gər tar,
daga aà kinehe ya.»
I fata ya ka,
Mezite Mesife Mbulum a gwa aaka:
«Haya,
kamala taŋa ya kaɗəŋ.
Aɗaba mege megemir tar ka,
aka ndəv,
tì sifik a ba ka,
nda gà maŋgayaba.
Aɗaba dukw megemir tar ana ta ge ŋgwal ŋa ya ka,
ndərzayya,
makàhà ŋa asa tsa.»
Məpala gà duwa i bəɗ a
14 Aləka i dəba ŋa ya,
i samata ka,
i ŋgataha a hulɓukw duwa herrè,
duwa a riŋ mandza ŋa iɗəm kamala mburma ya.
Felère Əbay a riŋ i gər ŋgar,
malàmbàɗà ŋa nda gura ana tsakala ŋa hinne ya.
Dite matwaha duwa a riŋ i ahər ŋgar matasla ŋa hapəpəpa asa mbaŋa.
15 I dəba ŋa ya ka,
gawla Mbulum ŋgiɗ a dara i ga Mbulum batsah ŋa ata ya asa.
A zalaha a wele aaha ndeɗiŋa mandza ŋa i hulɓukw a,
a fàfəlaraha ŋgəlakəkka.
A gwaɗaraha:
«Dara à matwaha yak a,
kà slə̀vaya dər gà dukw ana gà manàhà ŋa ika gər ahəɗ a.
Aɗaba kinehe ka,
gər ahəɗ aka nah,
məpala gà duwa i bəɗ a ide.»
16 I dəba bazlam ŋgar ata ya tsara ka,
wele ata mandza ŋa i hulɓukw a,
a dara à matwaha ŋgar ata ya kaɗəŋ.
A sàs dər gà dukw ana ika gər ahəɗ a fit kuɗa.
17 Aləka i dəba ŋa ya ka,
i ŋgataha a gawla Mbulum ŋgiɗ,
a dara i gər ŋa i mbulum a asa.
Ŋgat tekeɗe,
a dara i ga Mbulum batsah ŋa ata i gər ŋa ya mbaŋa.
Matwaha a riŋ ihər i ahər ŋgar matasla ŋa hapəpəpa asa.
18 I dəba ŋa ya,
gawla Mbulum ŋgiɗ a dara i təv ana ta vəlawa aaka a riŋ duwa a Mbulum a.
Ŋgat ka,
mala malàmbàɗà à akwa.
A zalaha a biy ŋgiɗ aaha matwaha mazəma ŋa hapəpəpa i ahər ŋgar a.
A fàfəlaraha ŋgəlakəkka.
A gwaɗaraha:
«Samata kwaŋ,
gà mawà gà dukw ana ika gər ahəɗ a ka,
tàa nàhaya lele.
Aɗaba taŋa,
dara à matwaha yak a,
ka da dərraha aka gər ahəɗ,
slə̀vaya dərra iɗəm a.»
19 Kamala taŋa ya,
gawla Mbulum ata a dara à matwaha ŋgar a kaɗəŋ.
A daha,
a slə̀vaya dərra gà mawà gà dukw ata iɗəm a.
I dəba ŋa ya,
a ndzək mawà gà dukw ata,
a daha,
a dza a təv ana ti ɗwitsewa aɗəm a.
Ama gà dukw ata fit dze,
ti ɗif a ka,
à matsəɓatsəɓ Mbulum ana a riŋ à tsìɓer a hinne ya.
20 Təv ata ti ɗwitsewa aɗəm mawà dukw ata ya ka,
kətsah aà guva kə̀sà ya zaakwa.
I təv ana ta ɓəl aaka,
na dite ta ŋget a a meɗwìtsè ŋana ya ka,
məmbəz na a dara iɗəm a ya ivaɗ.
Məmbəz ata a zlala ka,
mbàwwa kamala yam ana i dula ya.
A zlala ka,
kiliwmeter dərməka makər,
ndàra a biye ka,
bats aaka màkəɓatsa piris.