Sunwa Yuhana 13

Gà dukw dala duwa sula

1 Aləka i dəba ŋa ya ka, i ŋgataha a dukw dala duwa, a tsəlara i yam ata ya. Gər ikəka ka, təsəla. Gà mbukum ŋgar tekeɗe ka, kurwa. Ga mbukum ata aà gər ŋgar tserdze ya ka, felère Əbay ikəka fit. Gà gər ŋgar ata tserdze ya mbaŋa ka, ta wetse aaka gà zləm gà bazlam ana ŋgwala tsa pampam, biy mandàvàyà dər a Mbulum a. 2 Dukw dala ata i ŋgatar a ka, ar kamala də̀var a. Sik ŋa ka, dùfùkw lele, gèher ikəka ndzavalaŋlaŋ kamala biy batsah dukw ana a ndzikiɗ ba mavəl a. Bazlam ŋgar tekeɗe ka, kamala biy azil a. *Kə̀rəm ata ka, a vəl ndzəɗa ŋgar fit a dukw dala ata. Dite dukw ata a daha, a ndza aka təv mendze Əbay ŋgar, aɗaba aka ŋgat ndzəɗa aà mekwere dukw tserdze. 3 Aləka i samata dukw dala ata ka, gər ŋgar ŋgiɗ ilik ka, kamala ana tàa sàs ikəka ya, aka mət a. Ama kəla ka, mbəlak ŋa aka pàha. Dukw dala ata a ge aà gà mburma ana ika gər ahəɗ tserdze ya ka, kamala dukw mene aà mburma ya. Tə dza ba aà mazazama ŋgat tsara. 4 Gà mburma tserdze, tə zàmbaɗa à kə̀rəm ata nda ndzer, aɗaba ana a vəl ndzəɗa ŋgar a dukw dala ata ya. Dite tə zàmbaɗa à dukw ata mbaŋa. Ta gwa: «Weke na batsah ŋa kamala dukw dala aaha ya? Dite weke asa ya na a sle aà mege ahər a guvəl a? Wura a riŋ kamala taŋa ya tsidze.»

5 Dukw dala ata ka, tàa vəlar vatwa aà mege zlapa ŋgarra ika miɗ mburma, dite aà mandàvàyà a Mbulum mbaŋa asa. A ŋgat ndzəɗa aà mege kamala taŋa ya ka, i huɗ kiye dzik faɗ gəra sula ya. 6 I fata ya ka, a dza ba aà mandàvàyà a Mbulum agəra metsìkè dukw ana a tsik aà zləm ŋgar ŋgwala tsiye, dite a ndavaya a təv mendze ŋgar, nda gà na tar riŋ mandza ŋa i gər ŋa i mbulum a tserdze asa mbaŋa. 7 Ta vəlar vatwa aà mege guvəl aà gà mburma Mbulum mbaŋa, dite ka, mə̀ mba aà tar. Ta vəlar ndzəɗa aà makwàrà gà ahəɗ ana pampam tserdze ika gər ahəɗ a mbaŋa asa, dite aà makwàrà gà mburma ana slàla tar pam, nda gà təv gà mendze tar pampam, kige tsa gà ahəm tar tekeɗe ka, pampam a. Tar ka, i ahər ŋgar tserdze, ta gis a ahər a ahəm. 8 Gà mburma ana ika gər ahəɗ a tserdze, ti ti dzèyer a gurmits a bəɗ. Ama say gà mburma ana tàa wetse zləm tar aka wakita gà na ta ŋget a mesife ya, na tì dzer a gurmits a bəɗ tsiye. Ama tar ka, tàa wetseye gà zləm tar daga aka ana tàa ge gər ahəɗ zukw tsiye ya. Wakita ata ka, biy Kəla Təmaŋ ana ta kəɗ a.

9 «Ku mege weke na gər ŋgar aka ge aà metsereke ka, mà dzar zləm lele. 10 Wele ana Mbulum aka gwa ahər, ta gəs a daŋgay a ka, ta gis a ŋgat kaɗəŋ. Dite wele ana Mbulum aka gwa, ta kəɗ nda masalama ya tekeɗe ka, ta kiɗ a dər ŋgat kaɗəŋ asa. Aɗaba taŋa, gà mburma Mbulum ka, say ta gəs gəzləŋ, tə da aka miɗ aka miɗ nda magəsa ŋgat. Kamala taŋa ya ka, gəzləŋ tar a ndze a ɓəŋɓəŋ lele.»

11 I dəba ŋa ya ka, i ŋgataha a dukw dala duwa a riŋ a ndàra gər i ahəɗ a. Mbukum ihər sula kamala i təmaŋ a. Ama a fàfəl kə̀la ka, kamala kə̀rəm a. 12 Ndzəɗa ŋgar a riŋ kamala malahalah dukw dala ata ya mbaŋa. A gewa megemir ŋgar ka, ika miɗ malahalah dukw dala ata. A fàr ndzəɗa aka gà mburma ana ika gər ahəɗ a, nda gà dukw ana iɗəm a tserdze, a gwaɗa a tar: «Zàmbaɗum à malahalah dukw dala ata mbəlak ŋgar aka pàha ya.» 13 A gewa ka, gà dukw mene aà mburma ana gà bàba ŋa pampam hinne ya. I huɗ dukw ana a gewa ya ka, akwa a terre a aka gər ahəɗ a ndərzayya aà are mburma ya tserdze. 14 Agəra ana ta vəlar ndzəɗa aà megeye gà dukw mene aà mburma ata ika miɗ malahalah dukw dala ata ya ka, a bana dər gà mburma gər ahəɗ. A gwaɗa a tar: «Gwim mendzikiɗe ba malahalah dukw dala ata ta ger mbəlak nda masalama ka, dite a mbəl iɗəm a. Kà zàmbaɗum à ŋgat.» 15 Dukw dala ata ka, aka ŋgat ndzəɗa aà mivizle mesife a mendzikiɗe ba dukw dala ata. Dite mendzikiɗe ba dukw dala ata aka dza ba aà mifefile ka, a bats gà na ti niw mazàmbàɗà à ŋgat a tserdze. 16 Dite dukw dala ata malahalah ŋa ndeɗiŋa ya ka, a kwara gà mburma tserdze. Ku mege gà bàba ŋa, nda gà na meɗè zləm tar a riŋ tsiye, dite ku mege gà Əbay nda gà ɓəzla matawak, kige tsa, gà ɓele nda gà na ti ziwe a gər tar a tekeɗe, tar ka, i ahər ŋgar. A gwa, say ta geye lambà akahər mezime tar, kige tsa aka yemere tar asa mbaŋa. 17 Wele ana lambà ata a riŋ ihər tsiye ka, a sle a aà masàkàmà duwa, kige tsa aà madzàwà à duwa tsidze, say gà na lambà ata a riŋ aà tar a. Na a ne lambà ata ka, zləm dukw dala ata, kige tsa maɗàmà gà dukw ana tə ɗamawa nda zləm ŋgar ŋa ya.

18 Ama ka, say gà mburma ta ge metsehe lele. Aɗaba wele ana metsehe ŋgar a riŋ a ka, a ti sir a gà maɗàmà gà dukw ata. Aɗaba maɗàmà gà dukw ata ti ɗif a ka, à gà mburma ana masakəŋa ya. Maɗàmà ŋa ka, dərməka ndilik nda dzik ndilik gəra ndilik.