Madalawa batsah kə̀rəm ana a dalawa məkəs duwa ya
12
1 I dəba ŋa ya ka,
i ŋgataha a duwa batsah ŋa,
a pàt aba aà gəza mbulum.
A ge aà iye kamala dukw mene aà mburma ya.
Dukw ana i ŋgatar a ka,
məkəs duwa a tike akaba pat kamala petek a.
Dite kiye ka,
aà huɗ sik ŋgar.
A ndìwìɗ gər ŋgar ka,
nda gà mawusawus kurwa gəra sula.
A ne aaka kamala felère Əbay a.
2 Məkəs ata ka,
huɗ i gər ŋgar zlèɗìɗe,
aka à mewe.
A riŋ a wir ahər a hinne,
tə̀pasəssà a tiwe a dər aàba.
3 I dəba ŋa ya ka,
i ŋgataha a dukw ŋgiɗ batsah ŋa,
a pàt aba aà gəza mbulum asa.
I ŋgataha aɗəm a dukuməŋa a ndza nduzzwa,
a ndzikiɗ ba ka,
batsah kə̀rəm.
Gər ikəka təsəla.
Dite mbukum aà gər ka,
kurwa.
Gà gər ata ikəka tserdze ya ka,
felère Əbay ikəka fit.
4 I fata ya ka,
a ŋgəlayara à gà mawusawus tseke məmakər ŋana ya,
nda dzimir ŋgar a.
Dite tseke biy ŋgiɗ ilik ika magər ŋa ya,
a dza dərra aka gər ahəɗ a.
A dza dərra ka,
ŋgat ŋa dzeŋ a hitse aka miɗ a məkəs ata a we a kəla ya,
na aka wa kəla ata ka,
à gis a,
à pèpìɗ a ihər a.
5 Məkəs ata a we a kəla ata ka,
asləka ŋa.
Ŋgat a ti ne a ka,
Əbay ana a ta kwere a gà slàla ana pampam ika gər ahəɗ tserdze nda ndzəɗa ya.
Aləka a wa kəla ata ka,
Mbulum a zla a təv ŋgar tsara,
ta val dər aka miɗ Mbulum ana ŋgat ika təv mendze Əbay a.
6 Ama məkəs ata ka,
ŋgat a valaba a dala,
a təv ana Mbulum a làmbaɗar a.
Mbulum a ta ger a riŋ gər i fata.
A ndze a riŋ i fata ka,
mehinne dəbuw nda dərməka sula nda dzik ndilik.
7 I dəba ŋa ya,
ta ge riŋ guvəl i gər ŋa i mbulum.
Gà Misel nda gà gawla ŋgar na ta ge guvəl aà *kə̀rəm ata ya.
Dite gà kə̀rəm ata nda gà gawla ŋgar tekeɗe,
ta ge aà tar guvəl mbaŋa.
8 Ama gà Misel ka,
ta mba aà tar.
Gà kə̀rəm ata ka,
tàa vəl a tar vatwa aà mandza i gər ŋa i mbulum asa tsa.
9 Ti yàra iɗəm batsah kə̀rəm ata a bəra ya.
Ŋgat ka,
miviye mesiwiɗ ana akahər ata a banawa ɗa gà mburma ika gər ahəɗ a.
Tə zalar ka,
Əbay sitene,
kige tsa *Sadan.
Kùtsùkw ti yàra iɗəm ŋgat aka gər ahəɗ a,
tə dzara à tar a ka,
nda gà gawla ŋgar ata ya tserdze.
10 I dəba ŋa ya,
i tsarakara mifefile duwa i gəza mbulum a,
a fàfəl ŋgəlakəkka.
I huɗ mifefile ŋgar ata ya ka,
a gwa:
«Kinehe ka,
Mbulum aka mbala à kwa fit kweleŋ.
A pàt ka,
à ndzəɗa ŋgar ana
a za duwa tserdze ya.
Ŋgat na mala makwàrà mburma ya.
Kinehe ka,
*Kiristi,
wele ana Mbulum
a gwa,
i ti slir a kurumehe a ya ka,
aka pàt à ndzəɗa ŋgar kuɗa.
Aɗaba tàa yàra iɗəm wele ana
a gewa seriye aà gà damər kwa ya.
A gewa aà tar seriye ka,
ika miɗ Mbulum,
ku mege ndaapat,
ku mege ndaavəɗ tekeɗe ya.
11 Ama gà damər kwa ata ka,
tàa mba aà ŋgat.
Ta mba ahər ka,
aɗaba Kəla Təmaŋ ana
a mburuɗ tar nda məmbəz ŋgar a.
Ta mba ahər asa ka,
aɗaba ana
ti tsikewa bazlam Mbulum a mburma ya.
Kamala taŋa ya,
ta vəl gà mesife tar a ahər ka,
a Mbulum.
Ku mege ta mete a tekeɗe ka,
ti dzele a tsa.
12 Aɗaba taŋa,
maŋgayaba ma ge
i gər ŋa i mbulum,
nda gà na a riŋ
mandza ŋa i fata ya tserdze,
ŋgayum ba.
Ama kurum gà gər ahəɗ nda batsah duluv ka,
waya ba kurum a,
aɗaba
Əbay sitene ana a tarəra a təv kurum a ya.
A riŋ a ge a matsəɓatsəɓ nda təv kurum ka,
hinne,
aɗaba ana a sər ka,
mendze ŋgar a riŋ
hinne asa tsa,
kwizikw pəra ya.»
13 Ama kə̀rəm ata a samata,
tàa yàra ŋgat aka gər ahəɗ a ka,
a dza ba aà madalawa məkəs ata a wa kəla asləka ŋa ya.
14 Ama məkəs ata ka,
tàa dzàyar gwezleviyek zləra sula,
na dite a be a dər a dala,
a təv ana Mbulum a ta kesle a iɗəm ŋgat a ya.
A ti ndze a i fata ka,
mive makər nda mezehe ŋa.
I fata ka,
kə̀rəm ana a ne mesiwiɗ ata ya,
a sle a aà magəsa ŋgat asa tsa.
15 Aləka kə̀rəm ata ka,
à vìnehere a yam i bazlam ŋgar a kamala maazaw ana i batsah dula ya,
dite ka,
ma zazam məkəs ata,
ma zlala à ŋgat.
16 Ama ka,
Mbulum aka zlak məkəs ata,
gər ahəɗ a hə̀ndə̀k ba ikaba ya tuwaŋ,
dite yam ata a dara i bazlam kə̀rəm ata ya,
a zlala aɗəm fit.
17 Aləka kə̀rəm ata a samata kataya tsara ka,
a ge matsəɓatsəɓ hinne nda təv məkəs ata.
A mbəɗara gər a dəba ya,
a dara,
a ge guvəl aà gà asiŋ gà ɓəza ŋgar ŋgiɗ.
Gà ɓəza ŋgar ata ka,
gà na ta gəsawa ahəm aà Mbulum,
nda mazazama ndzer Yesuw ana a ɗif dər a ya.
18 I dəba ŋa ya ka,
kə̀rəm ata a da,
a ta mendzeba aà guva batsah duluv.