Sunwa Yuhana 11

Gà ɓəzla sida Mbulum sula

1 I dəba ŋa ya, ta viliŋ guvùkw a ahər kamala dukw melìvè dər duwa ya, dite ta gweɗiŋ: «Hitse, ka daha, ka live dər ga Mbulum batsah ŋana, nda dukw ana iɗəm ta vəlawa aaka duwa a Mbulum a tserdze, ŋgada ar ana, hilè ya? Dite ka, ka ɗamaya gà mburma ana ta hamawa iɗəm a Mbulum i fata ya mbaŋa. 2 Ama ka, ka ti live varavada ŋana i bəra ya tsa kəla, miyak dər pəra. Aɗaba təv ata ka, Mbulum aka mbər mivile a gà mburma ana tə sər ŋgat tsiye. Ti ti nis a à ŋgwal kwite ata tsəɗaŋŋa, ga Mbulum ata iɗəm a, i huɗ kiye dzik faɗ gəra sula ya. 3 I ti slir a gà ɓəzla sida sula, dite tì dzèye akaba a petek bùhwa biy na duwa a sle aà tar a. Ti ti ɗif a à bazlam gà a gà mburma, a təv ana aka ndze aɗəm a, kamala megweɗe ya, ti ɗif a dər ka, i huɗ mehinne dəbuw nda dərməka sula nda dzik ndilik a.»

4 Gà ɓəzla sida ata sula gà mehìtsè ŋa ika miɗ Mbulum BATSAH kwa ŋana ŋgat mala makwàrà gər ahəɗ a. Tar ka, kamala gà dizl uliviye ana sula ya. Dite tar asa ka, kamala gà lalampa ana sula ya asa mbaŋa. 5 Aləka na bəla gà ɓəzla mene are tar ta gweɗe a ka, waytsa, mìi ge a ter a dukw ana ŋgwala tsiye ka, akwa a ti dere a i bazlam tar a, a bets a tar. Kamala taŋa ya, ku mege weke na a waya, a ge a ter a swalwa ka, à mìtiŋa. Vatwa a riŋ, na dite a bere a iɗəm a tsa, bàlaarì pəra. 6 I təv ana tar ihər ta me a à guma Mbulum a ka, ndzəɗa tar a ta ge a a riŋ aà mahə̀ndə̀kà a gəza mbulum, na dite ka, yam à dze a asa tsiye. Tar ka, ndzəɗa tar a riŋ aà məmbə̀ɗà à gà yam, a ne a nduzzwa kamala məmbəz a mbaŋa. Dite tar ka, ndzəɗa tar a riŋ aà məvəla gà mesewere are pampam a gà mburma ana ika gər ahəɗ a, kamala ana ta waya ya asa mbaŋa.

7 I təv ana tàa ndəv aba à metsìkè bazlam Mbulum tar ata ya ka, duwa a riŋ a ti tsil aka terre a i biye ya, a ta ge aà ter a guvəl. A mbè aà teriŋa, dite a bets a tar. 8 Ama gà məməta tar ata ka, wura a ti leye a tar tsa, ti ti ndze a ika dàlàbə̀rà, i magər kwite ana ta kəɗ aɗəm Batsah tar ŋa ya. Zləm kwite ata a ne ka, kamala Suduma ya, kige tsa, Ezipt ya. 9 Ama gà məməta tar ata ka, gà mburma ana i gà slàla ŋgiɗ pampam tserdze ya, ti deyere a i gà kwite tar a pampam, kige tsa, gà na ta fàfəlawa ndaka gà ahəm ŋgiɗ pampam a tekeɗe ka, ti dere a, ta fìreye aà ter a mehinne makər nda mezehe ŋa. Ti ta vile a ter a vatwa aà melèyè tar ata tsidze. 10 Dite gà mburma ana ika gər ahəɗ a tserdze, ti ta ŋgeye a ba, agəra ana tàa bats gà mburma ata sula ya ya. Ta gìrìveyiŋa, tì dzèye a ba a gà dukw ana biy taf masakəŋa ya. Ti ta ŋgeye a ba ka, aɗaba ana ta gweɗe a ka, gà ɓəzla məma à guma Mbulum aaha ka, tàa sèwèr a mə̀r are hinne, nda bazlam Mbulum ana ti tsikeyewa a mə̀r a ya. 11 Aləka i dəba mehinne makər nda mezehe ŋa ya ka, Mbulum a vizl mesife ŋgar a ba a gà ɓəzla məma à guma ŋgar ata, dite na ta ŋgat mesife asa ya. I təv ana tàa ŋgat a ka, hùrum ta hitse aà mbulum. Dite gà na tàa ŋgat a tar kamala taŋa ya ka, ta ge magəɗa hinne kuɗa. 12 I dəba ŋa ya, gà ɓəzla məma à guma Mbulum ata sula ya, tə tsarakara mifefile i mbulum a ŋgəlakəkka, a gwaɗa a tarəra: «Tsalumara a mbulum a faha ya.» Kamala taŋa ya, tə tsala a mbulum ka, nda magər hulɓukw ika miɗ gà ɓəzla mene are tar ata ya tserdze. 13 I fata ya tsara ka, ahəɗ a ɓazla wakit wakit hinne. Tseke batsah kwite ŋgiɗ ilik ika magər gà kurwa ŋa ata ya, bìrìm a mbazla fit. Kwite ata a mbazla ya ka, a bats mburma dəbuw təsəla. dite gà asiŋ gà mburma ana ti zeha ya ka, ta ge magəɗa hinne, tə zàmbaɗa à Mbulum ana i gər ŋa, mala makwàrà gà duwa tserdze ya.

14 Kamala taŋa ya, na mesewere are masula ŋa ata aka ndəv iɗəm a ka, məmakər ŋana aka à mendzera bise asa mbaŋa.

Mezleliŋ matəsəla ŋana

15 I dəba ŋa ya ka, gawla Mbulum matəsəla ŋana a vizl a mezleliŋ ŋgar. A vizl aɗəm ka, i tsarakara gà mifefile duwa ndzəɗa ŋa, a ɗeyera i mbulum a parakka lele. I huɗ mifefile ata ya ka, ta gwa: «Gà Mbulum batsah kwa ŋa nda mala məmbə̀là à mburma ŋgar ana a zla ŋgat kamala Əbay a, na tar ihər ta kwere a gər ahəɗ a kuɗa. Mekwere tar ata a ndze a ka, aà biybiy.»

16 Gà dukw ata ti ɗe kataya ka, gà bàba gà mburma ata dzik səla gəra faɗ gà mandzàyà ŋa ika təv mendze Əbay tar ata ika miɗ Mbulum a, tə dzaya gurmits a bəɗ, dite tə zàmbaɗa à Mbulum. 17 I huɗ mezembeɗe tar ata ya ka, ta gwa:

«Mbulum Batsah mə̀r ŋa,

kər ka, kər riŋ daga piŋŋe,

aà gər ana gər ahəɗ a riŋ zukw tsiye.

Dite kinehe tekeɗe, kər riŋ

nda gà mesife hiywe asa mbaŋa.

Mər ihər mìi gik a kəkaaha,

aɗaba ndzəɗa yak ana

duwa tserdze i ahər yak a.

Kà pàt dər a mburma parakka,

kər na mala makwàrà dukw ana tserdze ya.

18 Gà mburma ana i gà slàla ŋgiɗ,

tar gà biy yak tsiye, tar riŋ ihər

ta ge a matsəɓatsəɓ nda təv yak ka, hinne.

Aɗaba taŋa, kinehe ka, pat ana kər

ki ge a matsəɓatsəɓ nda təv tar a ka,

aka sle kuɗa. Pat ŋa aka sle mbaŋa

na ki ge a seriye a gà na ta mata ya ya.

Dite aka sle mbaŋa na ki ta vile a

dukw maya ba a gà ɓəzla məma à guma yak a.

Ki vile a dukw maya ba ata ka,

a gà mburma yak tserdze mbaŋa,

ku mege tar gà bàba ŋa, nda gà bəla

tar gà ɓəza ŋa tekeɗe ya. Ki vile a ka,

a gà na ta gəsawa aà kər ahəm tserdze ya.

Dite gà na tə nəs à gər ahəɗ a ka,

ki ti dzeye a iɗəm à tar a fit kweleŋ.»

19 I dəba ŋa ya, gà bàba ŋa ata ta fàfəl aba ya ka, ga Mbulum batsah ŋana i gər ŋa i mbulum a, a hə̀ndə̀k ba iɗəm a tuwaŋ. Sahər duwa a riŋ iɗəm i fata. Sahər ata ka, wakita ana a ɗif à masəra ba gà Mbulum ana nda gà mburma ya, iɗəm i fata. Sahər ata ka, ku mege weke a ŋgataraha ɗazlzlà lele kuɗa. I fata ya ka, mbulum a dza ba aà mewìtiɗe wùtəɗ wùtəɗ nda malaka mbulum ana a lekeye a gùɗùm gùɗùm a. Dite gər ahəɗ a ɓazla wakit wakit hinne asa. Gà aləndza ibam, gwidiɓiɓiɓe tə dzara i mbulum a.