Gawla Mbulum nda gà wakita Kəla Təmaŋ
10
1 I dəba ŋa ya,
i ŋgataha a gawla Mbulum ŋgiɗ duwa ndzəɗa ŋa asa,
a tarəra i mbulum a,
aka gər ahəɗ a.
Ar ka,
tits malàwàrà ŋa nda hulɓukw.
A ne aaka kamala petek ŋgar a.
Màkə̀làh mbulum a lawara gər ŋgar tits,
dite yemere ŋgar ka,
a wàwùzl are hinne,
kamala pat a.
Dite sik ŋgar tekeɗe,
a ndzikiɗ ba kamala arah akwa ya.
2 I fata ka,
kəla wakita duwa a riŋ i ahər ŋgar,
məpəla ŋa dər ikaba ya.
A ɓəl sik ahər mezime ŋgar ka,
aka batsah duluv.
Ama sik ahər gula ka,
a tike aka ahəɗ.
3 A fàfəl ka,
nda magala kamala azil ana à ŋgìrìz a ya.
A fàfəl aba ya kamala taŋa ya ka,
i tsarakara malaka mbulum a,
a ɗe sik təsəla,
a fàfəlar aakara.
4 I tsarakara malaka mbulum ata a ɗe ya ka,
a sèsiŋ mewetse dukw ana a tsik a zləmana.
Ama ka,
i tsarakara mifefile ŋgiɗ duwa a ɗera i mbulum asa.
Wele ŋa a gweɗiŋara ka:
«Ka wetse dukw ata malaka mbulum a tsik sik təsəla ya tsa.
Wura ilik ma sər tsidze.»
5 I dəba ŋa ya,
gawla Mbulum ata i ŋgatar,
a tike sik ŋgiɗ aka batsah duluv a,
dite biy ŋgiɗ a tike aka ahəɗ a ka,
a zla ahər mezime ŋgar a mbulum.
6 A mbaɗa nda zləm Mbulum,
wele ana ŋgat mandza ŋa nda mesife aà biybiy,
a geye gà gəza mbulum nda gər ahəɗ,
dite nda gà yam,
nda gà dukw ana iɗəm tserdze ya asa mbaŋa ya.
I huɗ mimbeɗe ŋgar ata ya ka,
a gwa:
«Dukuməŋa ka,
a ge a mèhìnèkw asa tsa.
A ge a ba ka,
kinehe bise.
7 I təv ana gawla Mbulum matəsəla ŋana a vizl a mezleliŋ ŋgar a ka,
Mbulum a ti ndìv a à gà dukw ana makàhà ŋa,
a gwa,
a ta ge a ba ya.
Ama a ta ge a ba a ka,
kalkal kamala ana a tsik piŋŋe a gà ɓəzla meslire ŋgar,
a gà na ta màwa à guma ŋgar a.»
8 I dəba ŋa ya ka,
wele ana a fèfiliŋara i mbulum a,
a gweɗiŋara:
«Daha,
zla wakita ata məpəla ŋa dər iba ya ya,
i ahər gawla Mbulum ata sik ŋgar mehìtsè ŋa ika batsah duluv,
dite biy ŋgiɗ ika ahəɗ a.»
9 Kamala taŋa ya,
i daha a təv gawla Mbulum ata.
I gwaɗar:
«Kamkam,
viliŋ kəla wakita aaha te.»
Dite a gweɗiŋ:
«Ahiŋ,
papəɗ.
Na kàa papəɗ ka,
a ndze a aà kər a i bazlam a gwingwin,
kamala amum a.
Ama na kàa nde ka,
a wirek a huɗ.»
10 I dəba ŋa ya ka,
i daha,
i zla ihər wakita ata i ahər ŋgar a,
i tikeha.
I papəɗ ka,
a ndza aà iye gwingwin kamala amum a kaɗəŋ.
Ama aləka i nde ka,
a wiriŋ huɗ.
11 I dəba ŋa ya,
ta gweɗiŋ asa:
«Ki ta me a à gà dukw ana Mbulum a ta ge a nda təv gà slàla ŋgiɗ pampam,
nda təv gà ahəɗ ŋgiɗ pampam nda gà Əbay tar ŋa tserdze,
ku mege ta fèfil a ndaka gà ahəm awara pampam tekeɗe ya.
Ki ta me a à bazlam dukw ana Mbulum a ti tsikik a ya.»