2 Kurintiya 11

Gà Pul nda gà ɓəzla metsìkè bazlam Mbulum ana

nda pàrsa ya

1 Kinehe ka, vilwimiŋ vatwa aà mene à ba gà kamala mala falày ana taf masakəŋa ya zaakwa, nda mege aba zlapa ŋgakŋgakəkka. Haya kaɗəŋ, kamkam vilwimiŋ ahər vatwa. 2 Iye riŋ i ge a sələk aɗaba kurum ka, hinne, kamala biy Mbulum ana a riŋ a ge a sələk aɗaba kurum ana a waya kurum a mbaŋa. Kurum kà nwim ka, kamala dəm ana i ma gà, i waya i vile a a misle ŋgiɗ ilik pəra ya, kamala megweɗe ya, i vile a ka, a *Kiristi. I waya dəm ata ka, wura mə bana aà mendze nda ŋgat tsa. Ma ndza tsəɗaŋŋa, na dite i viler a ya. 3 Iye ihər i ge a magəɗa, aɗaba biytsa wura a riŋ a peze a kurum a za, metsehe kurum ana ki zezemwim a dər Kiristi nda gəzləŋ ilik a ka, a ge a riŋ asa tsa. Aɗaba kurum kà sərum, meme na mesiwiɗ ata a daha, a paza za a Hawa nda wirwir a mbaŋa ya. 4 I ge magəɗa agəra kurum ka, aɗaba ana bəla mala metsìkè kurum bazlam Mbulum nda pàrsa a dehe a a təv kurum, a dzeŋge a kurum a ka, ki vilwimer a vatwa, ki dzwìm a zləm a duwa ana a dzeŋge a kurum a ya lele. Ama tsaatsa, bazlam gà mburma ata ti tsik a aka gər Yesuw a ka, pam nda biy mə̀r, tsəka, ilik tsa. Dite Mezite Mesife ana ti tsikewa ahər, ta gwa, ki ta ŋgetwime a ya tekeɗe, ar ka, pam nda biy na kà lah meŋgetwim akahər ata piŋŋe ya mbaŋa. Aɗaba tar ti tsik a kurum a ka, bazlam ŋgiɗ pam, tsəka, bazlam ŋgwal ŋa ana mì lah metsìkè a kurum akahər ata ya tsa. Ama kurum ka, ka dzum zləm a dukw ana ti tsik a ya ana, meme?

5 Kurum kù gwaɗum aà gà mburma ata ka, waytsa tar ka, gà bàba gà ɓəzla meslire Mbulum kuɗa. Ama iye ka, i sər ndzer, tar ka, tə za dər iye tsa. 6 Bəla iye ka, i sər mifefile ana, dite ka, mà tsahən aà mburma dzekwiŋ a tsa. Ama nda təv masəra bazlam Mbulum ka, i sər lele dukw ŋgar. Taŋa ka, i pàtawa a kurum dər ka, parakka lele, ku mege ndeɗime, ku mege meme tekeɗe ya.

7 Akahər ata, i təv ana i tsikewa kurum bazlam ŋgwal ŋa ana a dara i təv Mbulum a ka, Yàa gwaɗa a kurum, pìlwimiŋ dukw maya ba gà ka, Yàa tsik a kurum tsidze. I həna à gər a bəɗ tiɓìzl aɗaba kurum, na dite i zlèk a kurum ika vatwa Mbulum a ivaɗ. Tsəna, wànà i ge taŋa ana, bakal ivaɗ a? 8 I təv ana iye riŋ i ge a megemir Mbulum ika magər kurum a, na a dzèɗiŋ siŋgwe ka, gà asiŋ gà mburma Mbulum ŋgiɗ pam, tsəka, kurum tsa. I ge à tar matawak ivaɗ, na dite i zlak dər kurum a. 9 Aka na iye riŋ mandza ŋa i təv kurum mba ya ka, kuɗa duwa a slewiŋ za hinne tekeɗe, Yàa wiz aà kurum duwa ilik tsidze. Say gà ɓəzla magəsa Yesuw ana ika ahəɗ Makaduniya ya na tə dara, ta viliŋ dukw ana i ndza dər a fit dze ya. Akahər ata ka, Yàa sèwèr a kurum are nda təv gà dukw ana ti slewa aà iye ya tsa. Dite ka, i sər, ku mege kinehe, ku mege aka miɗ mba tekeɗe ka, a sèsiŋ i wiz aà kurum a duwa tsidze. 10 Iye ihər i ge a zlapa ka, agəra ana Yàa gəs siŋgwe i ahər kurum a ilik tsiye. Iye riŋ i ge a riŋ zlapa ata ka, ika ahəɗ Akaya, wura ilik a sle mimbìɗiŋ a ba aka zlapa gà ata i ge a ya tsa. Aɗaba dukw ana i tsik a kurum a ya ka, ndzer kaɗəŋ, pàrsa iɗəm tsa. Ar ka, kamala ana Kiristi a tsikewa ndzer a hiywe mbaŋa. 11 Aɗaba la na i tsik a kurum taŋa ya? Wànà kù gwaɗum ana, i waya kurum tsa ivaɗ a? Awaŋ, aɗaba Mbulum ka, a sər, i waya kurum nda ndzer dukw ŋgar.

12 Yàa gəs siŋgwe i ahər kurum a tsa. Ama aka miɗ mba tekeɗe, i ta gis a tsa mbaŋa. Aɗaba a sèsiŋ ka, i hìndìk a aka bazlam a gà mburma ana tì sìŋgìr a à ba tar, ta gis a siŋgwe i ahər kurum a, dite ta gweɗe a, waytsa mə̀r ka, gà ɓəzla meslire Mbulum, mìi ger a megemir ka, kalkal kamala ana iye Pul i ge a ya. 13 Tsaatsa, gà mburma ata ka, tar gà ɓəzla meslire Mbulum nda ndzer ŋa tsa. Tar ka, gà ɓəzla pàrsa. Ta bene a mburma nda wirwir, ti newa à ba tar kamala ana tar ka, gà ɓəzla meslire Kiristi ya. 14 Taŋa ka, ma ge aà kurum kamala dukw mene aà mburma ya tsa. Aɗaba pat ŋgiɗ Əbay sitene nda gər ŋgar tekeɗe ka, a ne a à ba ŋgar kamala ana ŋgat ka, gawla Mbulum ana a dara i təv dzaydzay ŋa ya mbaŋa. 15 Aɗaba taŋa, na gà ɓəzla mazlàkà ŋgat tar ihər ti ne a à ba tar kamala ana tar gà ɓəzla meslire Mbulum a ka, ma ne aka kurum kamala dukw mene aà mburma ya ɓav tsa. Ama a pat mandəvandəv gər ahəɗ ka, ti ta ŋget a ŋgwal duwa tsa, kalkal megemir tar ana ta gewa ya mbaŋa.

Pul a sèwèr are ka, agəra ana mala meslire Mbulum a

16 Say i me a kurum aà metsìkè ŋa asa: Wura ma ta gwa aà iye ka, mala falày taf masakəŋa tsa. Ama na bəla ki gweɗwim a aà iye a kamala taŋa ya ka, taŋa vilwimiŋ vatwa aà mege aba zlapa zaakwa mbaŋa, kamala ana kà vəlawum vatwa a gà ɓəzla falày ata taf masakəŋa ya mbaŋa. 17 Dukw ana i tsik a kurum i faha ya ka, taŋa: BATSAH kwa ŋa tsa na a slər ahər iye ya. Awaŋ, i təv ana i ge a aba zlapa kamala taŋa ya ka, i fèfil a kamala wele ana metsehe ŋgar a riŋ tsiye. 18 Ama i samata ka, gà mburma hinne na tar ihər ta ge a zlapa nda dukw gər ahəɗ a. Aɗaba taŋa, iye tekeɗe, i ge a aba zlapa kamala tar a mbaŋa. 19 Kurum kù gwaɗum ana, kurum gà ɓəzla metsehe tsəna? Aɗaba taŋa, na bəla gà ɓəzla falày masakəŋa tàa dara a təv kurum a ka, ki giswim a tar nda gà maŋgayaba hinne. Ki vilwim a ter a vatwa, na dite ta fèfil a kurum a ya. 20 I təv ana ti newa à kurum gà ɓele ya ka, kə̀ gə̀sawum gəzləŋ pəra. Na bəla ti ndzeke a aà kurum duwa ya nda wirwir a, nda gà bəla ta bene a kurum, dite ta fir aà kurum a kamala za ya, kige tsa asa, bəla ta ge a kurum a matawak ŋguɗuts ŋguɗuts ka, ki giswim a ter a gəzləŋ dze ana, meme na taŋa ya? 21 Assàh, iye ka, hwarwa a giŋ a aà metsìkè ŋa hinne. Aɗaba mə̀r ka, mì ge magəɗa, na mìi ge a à kurum a kamala taŋa ya.

Kinehe ka, iye ihər i fèfil a kurum a kamala ana iye mala falày masakəŋa ya kuɗa. Ama na bəla gà misle ŋgiɗ ta ge a zlapa nda dukw ŋgiɗ ka, iye tekeɗe, i ge a zlapa nda dukw ata mbaŋa. 22 Tar ta gweɗe a ka: «Mər tsiye na gwala gà Yahuda ya?» Ama iye tekeɗe, i gwala tar mbaŋa. Ta gweɗe a asa ka: «Mər ana gà Isərayel tsiye?» Ama iye tekeɗe, kataya mbaŋa. Tar ihər ta gweɗe a asa ka: «Mər ana, gà ɓəza Abəraham batsah tsir mə̀r ana akahər ata ya tsiye?» Yaw, dite iye tekeɗe ana, kəla ŋgar mbaŋa tsiye? 23 Tar ta gweɗe a asa mbaŋa ka: «Mər ana gà ɓəzla megemir *Kiristi tsiye?» Ama iye tekeɗe ka, kamala taŋa ya mbaŋa asa. I za dər akaba tar kətəɓ kweleŋ kəla. Iye ihər i fèfil a taŋa ka, kamala ana Yàa be a dala ya. Aɗaba Yàa ge megemir ata ka, hinne, a za biy tar. Dite tàa tike iye a daŋgay ka, sik diŋ, a za biy tar asa. Ta gə̀zlawa iye hinne, i ndzawa ka, kamala ana iye i ɗa məməta ya sik diŋ, a za biy tar asa mbaŋa. 24 Dite gà bàba gà Yahuda tàa gə̀zlawa iye nda màkùràkur pat ilik ka, dzik makər gəra tswiɗ, haa sik ə̀zləm. 25 Gà Əbay gà Ruma tàa gazla iye nda zəva ndày ndày sik makər mbaŋa. Dite gà mburma duwa tàa kalawa iye nda kur sik ilik, ta waya makə̀ɗà iye asa mbaŋa. Dite medzige makər asa na slə̀làh yam aka mbazla à iye a huɗ yam a. Taŋa sik ilik asa ka, Yàa vàk ika magər yam. Ku mege ndaapat, ku mege ndaavəɗ tekeɗe, iye mandza ŋa hiywe ika gər yam pəra. 26 I huɗ mesìweye gà ana i sùwayawa hinne ya ka, i sèwèrewa are agəra maazaw ana a waya mazla iye ya. Gà ɓəzla makàzàlà mburma tàa sliŋ za ka, hinne. Gà na tar gà Yahuda tsiye, ku mege gà gwala gà, gà Yahuda tekeɗe, ta gewiŋ matawak mbaŋa. Kamala taŋa ya, i sèwèrewa are ka, hinne, ku mege i batsah kwite, ku mege i kusak, nda gà ika batsah duluv tekeɗe ya. Gà na ta gwa, waytsa mə̀r ka, gà ɓəzla mazazama Yesuw, tsaatsa pàrsa ya, ti sèwèrewiŋ are ka, hinne mbaŋa asa. 27 I gewa megemir ka, bàlaarì nda mesewere are ŋa pəra. Sik diŋ, Yàa ŋat vatwa aà mendze are tsa. A gà pat ŋgiɗ ka, i ndzawa nda may pəra, mege yam tekeɗe, Yàa sa tsa, i bàsawa. Sik diŋ Yàa ŋgat vatwa aà mazəma duwa tsidze. Mege mə̀tasl tekeɗe, a slewiŋ za hinne mbaŋa, agəra ana petek riŋ aà iye tsiye. 28 Kamala taŋa ya, gà mesewere are ŋgiɗ tar riŋ asa mbaŋa. Ama ka, taŋa ɗekɗek tsa, aɗaba kəla pat i dzalawa gà gər hinne ka, aka gər gà mayahaba gər gà mburma Mbulum ana tserdze ya. Mege metsehe ana i ge a ter a ya, na a riŋ a ŋgiɗits a iye ya. 29 Na wura a riŋ mbile ŋa, ndzəɗa ihər tsa, na ika vatwa Mbulum a ka, taŋa iye tekeɗe, a wir aà iye a kamala wele ata ya mbaŋa. Na bəla wur ana ika vatwa Mbulum a, aka dəɗ a bakal ka, a wir aà iye a i gəzləŋ turturtur hinne.

30 Kà wayum na i ge zlapa ya tsə̀nà? Ama i ge a zlapa ata ka, à mbile gà ata ika miɗ Mbulum a, tsəka, ndzəɗa gà a riŋ tsa. 31 Mbulum Tsir Yesuw BATSAH kwa ŋa ka, a sər, dukw ana iye ihər i tsik a ya ka, ndzer, tsəka, pàrsa iɗəm tsa. Ku weke mà zlə̀b à ŋgat aà biybiy. 32 Akahər ata, i təv ana iye riŋ mandza ŋa i Damas mba ya ka, Əbay duwa a riŋ i fata, zləm ŋgar Aretas. Mala sik ŋgar a riŋ a kwere a kwite ata. Wele ata ka, a dza gà sliwdze aka biye hərmaga zlagam ana a lawara kwite ata tits a, a waya à gis a iye zləmana. 33 Ama gà mburma Mbulum ana i fata ya, tə daha, tə zla tàkwasa duwa, tə dàn ahər liɓir, dite ti tike aɗəm iye kùtùz. Sìrìhihhe tə tarəra à iye a bəɗ a ndaka biye mendiwek zlagam ata ara a bəra ya. Kamala taŋa ya, na dite i be aà ŋgat a ya.