Pul a fàfəl a gà na ta wala megemir ŋgar a
10
1 Iye Pul,
a sèsiŋ i fèfil a kurum a aka gər ba gà.
Kamkam kurum,
aɗaba gà misle ŋgiɗ ika magər kurum tar riŋ ihər ta gweɗe a aà iye ka,
akahər ana ŋgat ɗa mandza ŋa ika magər kwa ya ka,
tiɓìzl a hənawakwa à gər a bəɗ.
Ama i təv ana aka da aà kwa ya diriŋ a ka,
ŋgakŋgakəkka,
à fèfil a kwere a nda ndzəɗa ya kuɗa.
Ar ka,
kamala ana magəɗa kwa a ger a asa tsiye.
Ama iye ka,
a sèsiŋ i ge a ŋgwal ŋa a mburma ivaɗ,
i fèfil a ter a ka,
nda himmè bazlam,
kamala *Kiristi ya mbaŋa.
2 Aɗaba taŋa,
iye ihər i ge a kurum a kamkam asa mbaŋa:
Mbəɗum à madzala gà gər kurum,
na dite Yàa daha a təv kurum ka,
ki ŋgwim aà iye bàlaarì,
i fàfəl a kurum nda ndzəɗa asa tsiye.
Gà asiŋ gà misle ŋgiɗ riŋ ika magər kurum i fata ka,
tar riŋ ihər ta gweɗe aà iye a ka,
waytsa megemir gà ana i ge a ya ka,
biy Mezite Mesife Mbulum tsa.
I zezem a ka,
dukw gər ahəɗ ɗekɗek pəra.
Ama medzibe gà mburma ata ka,
i sər,
i sle a aà meɗife a ter a à ndzəɗa gà dukw ŋgar.
3 Kaɗəŋ,
aɗaba mə̀r ka,
gà mburma taf masakəŋa.
Ama guvəl ana mə̀r ihər mìi ge a ya ka,
kamala biy gà mburma gər ahəɗ a tsa.
4 Dukw ahər mə̀r tekeɗe,
kamala biy gà mburma gər ahəɗ a tsa asa mbaŋa.
Gà dukw ahər ata ka,
Mbulum ivaɗ na a vəl a mə̀r a.
Ar ka,
ndzəɗa ŋa hinne.
Nda taŋa na mìi mbezle a dər à təv màŋgwàɓà gà ɓəzla mene are Mbulum ana tə dzayawa aɗəm ba ya.
Mìi gis a dər ahəm aà are a gà na ŋgəraw ti dzele a duwa nda pàrsa ŋa ya.
5 Dite mìi mbete a à bazlam gà mburma ana tə sə̀ŋgə̀rawa à ba tar,
ta hìndìk a a vatwa a mburma,
dite ka,
tə sər Mbulum nda ndzer tsiye tserdze.
Dukw ana mìi tsik a ya ka,
a sàs a mə̀r mburma ta miyak à madzala gà gər tar ana ŋgwala tsiye,
dite ta gəs ahəm aà Kiristi ivaɗ.
6 Na kàa ɗifwim a mə̀r kataya ka,
mìi sir a dər ndzer,
taŋa ka,
ki giswim aà mə̀r a ahəm lele.
Mər tekeɗe,
mìi hèdzèl a ba,
mìi tètìk a a gà na ta gəs aà mə̀r ahəm tsiye ya.
7 Kurum kà fə̀rum ka,
aà dukw ana a pàt aba,
are kurum a ŋgatar a ɗekɗek pəra tsa.
Ama na wura ika magər kurum,
a gweɗe a,
waytsa,
iye ka,
mburma Kiristi ka,
ma sər dər,
mə̀r tekeɗe,
gà mburma Kiristi kamala ŋgat a mbaŋa.
8 I sər,
ndzəɗa ana BATSAH kwa ŋa a viliŋ a ahər a ka,
a za biy wele ata asa mbaŋa.
Biytsa taŋa ka,
i sə̀ŋgə̀r à ba gà hinne,
ama ka,
hwarwa a giŋ a ɓav tsa.
Aɗaba BATSAH kwa ŋa na a viliŋ ndzəɗa ata ya.
A viliŋ taŋa ka,
aà mazlàkà dər kurum,
aà magəsa ŋgat,
tsəka,
aà medzeye à kurum tsa.
9 I tsik taŋa ka,
aɗaba a sèsiŋ tsa na ki gweɗwim a ka,
i waya mandza aà kurum magəɗa nda gà wakita gà ata ya.
10 Aɗaba gà asiŋ gà misle ŋgiɗ ika magər kurum ta gweɗe a,
Pul a wetse a mə̀r wakita ŋgar ata,
dukw ana a wetse aɗəm a ka,
mawura ba ŋa hinne,
nda ndzəɗa na a tsik aɗəm a.
Ama akahər ana ŋgat mandza ŋa ɗa ika magər kwa ya ka,
mbile ŋa,
dite bazlam ŋgar ana a tsikewa ya tekeɗe ibam,
biy taf masakəŋa ana,
meme?
11 Gà na ta fèfil a kamala taŋa ya ka,
tə sər dər,
dukw ana mì wetse a kurumaha a gà wakita mə̀r a ka,
mìi ta ge a kalkal kamala taŋa ya mbaŋa,
na i təv ana maa daha,
mìi ndze a riŋ ika magər kurum a.
12 Gà mburma ata ka,
tar ta gweɗe a,
waytsa,
mə̀r ka,
gà bàba ŋa.
Ama mə̀r ka,
mìi sle a aà megweɗe a,
mə̀r ka,
gà bàba ŋa tə tsa.
A sàs a mə̀r ka,
mìi geye akaba a à ba mə̀r nda gà tar ti tsidze.
Aɗaba tar ta fə̀r aà ba tar ka,
kamala ana wura a riŋ i dəba tar asa tsiye,
dite ti live a ba à ba tar ŋa ika magər tar kamala taŋa ya ɗekɗek pəra.
Ama metsehe tar a riŋ tsidze na taŋa ya.
13 Mər ka,
mìi zlibe a à ba mə̀r nda ahər mə̀r ŋa,
kamala taŋa ya tsa.
Mìi ŋgeye a ba ka,
nda megemir ana Mbulum a vəl a mə̀r a ahər a,
tsəka,
nda duwa ŋgiɗ tsa.
Na a ne megemir ata Mbulum a vəl a mə̀r a ka,
ŋgwal bazlam ana mì dawa dər aka ahəɗ ŋgiɗ pampam,
haa a təv kurum tekeɗe ya.
14 Kurum ka,
ika ahəɗ ana Mbulum a ɗif a mə̀r dər,
dite a sləraha aɗəm mə̀r aà metsike a kurum bazlam ŋgwal ŋa ata aka gər Kiristi ya mbaŋa.
Kamala taŋa ya,
i təv ana mì daha a təv kurum a,
mì zazam ka,
dukw ana Mbulum a tsik a mə̀r a,
tsəka,
maa tàwàɗ ika kwiye ŋa ya tsa.
15 Aɗaba taŋa,
mìi ge a aba zlapa taf nda megemir ana gà misle ŋgiɗ ta ge ya tsa.
Mege megemir gà mburma ata ka,
ahəm mə̀r tə tsa.
Ama mì tike madzala gà gər mə̀r ka,
aka kurum ivaɗ.
Mì waya ka,
megìse kurum ana kə̀ gəsum Yesuw nda gəzləŋ kurum a,
mà səkah ɓəŋɓəŋ lele,
dite megemir mə̀r ana mìi ge ika magər kurum a tekeɗe,
à sìkèh a mbaŋa.
Ku mege kataya tekeɗe,
mìi ge a ka,
à zè a biy na Mbulum a tsik a mə̀r a ɓav tsa.
16 I dəba ŋa ya ka,
mìi ŋget a vatwa aà mada aka miɗ aka ahəɗ ana diriŋ ika miɗ kurum a kuɗa,
dite na mìi ti tsik a bazlam ŋgwal ŋana a gà mburma ana i fata,
tàa tsaraka ilik zukw tsiye mbaŋa ya.
Mì waya mada a fata ka,
aɗaba a sàs a mə̀r tsa na gà mburma tì zlibe a à mə̀r agəra megemir gà misle ŋgiɗ ana ta geye ya.
17 *Ama ar ka,
kamala ana mewetse ŋa a riŋ i wakita Mbulum a,
ta gwa ka:
«Na wura aka waya maŋgayaba agəra megemir ana a ge ya ka,
say mà ŋgaya ba agəra dukw ana BATSAH kwa ŋa a ge ya ivaɗ a.»
18 Aɗaba Mbulum a waya ka,
gà na tì zlibe a à ba tar a tsa,
say à gà na ŋgat à zlibe a à tar a ivaɗ.