8
1 Sawul tekeɗe,
makə̀ɗà ŋgat ata ka,
a tsahən ahər.
Sawul a sèwèr are a gà mburma Mbulum
A pat ata tsara ka,
tə dza ba aà mesewere are a gà mburma Mbulum ana i Yeruzalem a hinne.
Gà ɓəzla magəsa Yesuw nda gəzləŋ tə təz i fata ya fit,
tə da aka ahəɗ Yuda nda Samariya.
Say gà ɓəzla meslire Mbulum ana kurwa gəra sula ya,
na ti zeha i fata ya.
2 Gà asiŋ ŋa ana ta gəs Mbulum lele ya,
tə daha,
ti le məməta Etiyen,
tə tuwa ŋgat hinne.
3 Ama Sawul ka,
a sasar medzeye à gà mburma Mbulum.
A dawa aà ga aà ga tserdze,
a yahawa gà ɓəzla magəsa Yesuw nda gəzləŋ,
ku gà asləka nda gà məkəs tserdze,
a gasawa tar,
a dzawa tar a daŋgay.
Filip a tsik bazlam ŋgwal ŋana i gà kwite ana
ika ahəɗ Samariya ya
4 Gà mburma ana tə təz a ka,
tə da aà kwite aà kwite,
ti tsik a ŋgwal bazlam ana a ɗif à Yesuw Kiristi ya.
5 I liwiŋ tar a ilik ka,
wele ana ndeɗiŋa tə zalar Filip a.
A da a kwite Samariya.
A daha,
a ɗif à Yesuw,
mala məmbala à mburma ana Mbulum a gwa,
i slir a kurumehe a ya,
a gà mburma ana i fata ya.
6 Gà mburma ata tserdze tə dza zləm a bazlam ŋgar ana a tsik a ter a ya lele,
aɗaba ta ŋgat a dukw mene à mburma ŋgar ana a gewa ya.
7 Aɗaba gà sitene tàa dara i ba mburma ya,
nda gà Mewideye ya hinne,
dite gà ɓəzla magàha a bəɗ nda gà ɓəzla metsilgeɗe tàa mbala mbaŋa.
8 Gà mburma ana i kwite ata ya tserdze,
ta ŋgaya ba hinne.
9 Ama wele duwa a riŋ pam asa,
zləm ŋgar Simun.
A ndzawa i kwite ata daga piŋŋe.
A gewa gà dukw mene à mburma ŋgiɗ pampam nda matawala gà dukw ŋgiɗ hinne.
A ge a gà Samariya kamala sunwa ya.
A dzala i gər ŋgar ka,
a gwa:
Iye ŋgwal mburma,
i sər duwa.
10 Gà mburma ata i fata ya tserdze,
ku mege gà bàba ŋa,
tə dzawa gà zləm nda are ka,
aà ŋgat ilik.
Ta gwaɗawa:
«Wele aaha ka,
mala ndzəɗa Mbulum.
Ŋgat na a ne ndzəɗa batsah ŋa ya.»
11 Aka ndza nda dukw màhəram ŋgar ata a gewa ya ka,
hinne na i təv tar a.
A gewa a tar kamala dukw mene à mburma ya.
Aɗaba taŋa na dukw ana a tsik a ya ka,
a da a tar a gər a.
12 Ama i təv ana Filip a dara,
a mà a tar à bazlam Yesuw Kiristi,
dite nda biy *mekwere Mbulum ana a kwere a ya ka,
ta gəs nda gəzləŋ tar lele,
ku mege weke,
gà asləka nda gà məkəs tserdze,
dite ti tsilwiɓ à tar a yam.
13 Simun nda gər ŋgar tekeɗe,
a gəs bazlam ata nda gəzləŋ,
a daha,
ti tsilwiɓ à ŋgat a yam mbaŋa.
I dəba ŋa ya,
a zazamawa Filip a təv ana a de a ya.
Aləka a ŋgatawa a gà bàba gà dukw mene à mburma ata nda mege dukw ŋgiɗ pampam Filip a gewa ya ka,
a ge ahər kamala sunwa ya.
14 I dəba ŋa ya,
gà ɓəzla meslire Mbulum ana i Yeruzalem a,
tə tsaraka ta gwa là,
gà mburma ana i Samariya ya,
tàa gəs bazlam Mbulum ka,
tə slər a taraha gà Piyer nda Yuhana a fata.
15 Aləka gà mburma ata ti ta medeha a Samariya ka,
tə dza ba aà mahàmà a Mbulum agəra gà ɓəzla magəsa Yesuw nda gəzləŋ ata,
dite ta ŋgat Mezite Mesife Mbulum.
16 Aɗaba Mezite Mesife Mbulum aka dara a təv wura ilik ika magər tar ata ya zukw tsa.
Ti tsilwiɓ à tar a yam ka,
nda zləm Yesuw BATSAH kwa ŋa pəra.
17 I dəba ŋa ya,
gà Piyer nda Yuhana tə daha,
tə dza aka tar ahər,
dite ta ŋgat Mezite Mesife Mbulum kuɗa.
18 Simun a fə̀r ka,
gà ɓəzla magəsa Yesuw nda gəzləŋ ta ŋgat Mezite Mesife Mbulum ka,
agəra ana gà ɓəzla meslire Mbulum ti tike aka tar ahər a.
Ŋgat tekeɗe,
a ndzək siŋgwe,
a waya mandza a gà Piyer nda Yuhana,
dite ka,
ta vəlar ndzəɗa aà mege dər kataya te.
19 A gwaɗa a tar:
«Vilwimiŋ ndzəɗa ana gà mburma ti sle aà meŋgete a dər Mezite Mesife ata i ahər gà ya te.»
20 Ama Piyer a gwaɗar aakaha:
«Dzeye akaba nda siŋgwe ŋa dze fit.
Wànà kà dzala ana,
ki sle aà mesikime a dukw ana Mbulum a vile a məfara ŋa ya,
nda siŋgwe ya?
21 Ki sle aà melime kwa akaba nda gà mə̀r i təv megemir mə̀r tsa,
aɗaba kàa gəs bazlam Mbulum a gəzləŋ yak nda ndzer ŋa tsa.
22 Mbəɗ à madzala gà gər yak ana kà dzala ŋgwal ŋa tsiye,
dite ka hama a BATSAH kwa ŋa,
mə pə̀lak à medzibe madzala gà gər ata,
na mege a ge a ba ya.
23 Aɗaba i samata ka,
duwa a riŋ a ndez a kər i ba ka,
hinne,
dite bakal tekeɗe,
aka dàn kər asa.»
24 Simun a tsaraka bazlam ata kataya ka,
a gwaɗa a gà Piyer nda Yuhana:
«Kamkam,
hamum a BATSAH kwa ŋa aɗaba iye,
aɗaba gà dukw ata kinehe kà tsikwim a ka,
ma ŋgat iye tsa te.»
25 Ama gà Piyer nda Yuhana ti tsik bazlam ana Mbulum a ge aɗaba tar a,
a mburma lele ka,
tar ŋa ta mah ba,
ta mbìɗ a gər a Yeruzalem asa.
Aləka i təv ana ti de a ya ka,
tə dza ba aà metsìkè ŋgwal bazlam ana a ɗif à Yesuw Kiristi ya,
a mburma i gà kwite ana pampam ika ahəɗ Samariya ya.
Gà Filip nda mala megemir gà Etiyupiya duwa
26 Ama gawla Mbulum ilik a gwaɗa a Filip:
«Hitse,
kà dəɗ aka vatwa ana a da ndàra gular a,
dite ki ti le aà vatwa ana a da i kusak i Yeruzalem a,
a Gaza ya.»
27 Filip a tsaraka kataya ka,
a hitse i fata ya tsara,
a da.
Aləka a ndze aka vatwa ata ka,
a ŋgat a wele duwa a riŋ,
ŋgat gà Etiyupiya,
madàdàɗa ŋa.
Ŋgat ka,
mala megemir batsah Əbay gà Etiyupiya duwa məkəs ŋa.
Ŋgat a ne Əbay mala maɗàmà siŋgwe i təv mə̀kə̀s ata zləm ŋgar Kandas a.
Wele ata ka,
a màha i Yeruzalem i mazàmbàɗà à Mbulum nda gà Yahuda ya.
28 A mbìɗ a gər a ma ŋgar.
Ama ŋgat ka,
mandza ŋa i puspus ŋgar,
ti zle a dər ŋgat kamala Əbay a.
A riŋ a dzeŋge a dər wakita Ezaya ana mala məmà à bazlam Mbulum a.
29 Ama Mezite Mesife Mbulum a gwaɗa a Filip:
«Val a tsaka puspus aaka a de a ya,
ka dum akaba kalkal.»
30 Filip a tsaraka kataya tsara ka,
a valaha a təv puspus ata bise.
A ta medeha ka,
a tsaraka medzeŋge ana gà Etiyupiya ata a dzeŋge a i wakita Ezaya ana mala məmà à bazlam Mbulum a.
A gwaɗar:
«Wànà kà tsaraka dukw ata ki dzeŋge a ya ibam a?»
31 Wele ata a gwaɗar aakaha:
«Meme na i tsereke a ya,
na wur a riŋ a ɗifiŋ a à dukw ana iɗəm a tsiye?»
I dəba ŋa ya,
a gwaɗa a Filip:
«Tsəlara a təv ga ya,
kà ndzama aɗəm məma.»
32 Ama dukw ana a dzeŋge ya ka,
naha:
«A ne kamala təmaŋ ana ta gis a
a təv mezle ɗa gà duwa ya.
A ne kamala təmaŋ ana tì ses a ihər
gasgas a ka,
a tiwe a tsiye.
Indwe,
aka hə̀ndə̀k ika bazlam ŋgar a tsidze.
33 *Ta gàwàɗar gər masakəŋa,
tə ndaɗa akaba hwarwa nda təv ŋgar.
Weke na a sle aà meŋgete a ɗa
gà gwala ŋgar asa ya?
Aɗaba ana
tàa dzeye à ŋgat a.»
34 I dəba ŋa ya,
mala megemir ata a gwaɗa a Filip:
«Kamkam,
tsikiŋ te,
mala məmà à bazlam Mbulum aaha a tsik kataya dze ana,
aà weke?
Aà ba ŋgar ŋa ya,
tsəna aà misle ŋgiɗ a?»
35 Aləka i dəba ŋa ya,
Filip a dza ba aà məma à bazlam ata a tsaraka i medzeŋge wakita Mbulum a,
dite a tsiker bazlam ŋgwal ŋa ana a ɗif à Yesuw a.
36 I təv ana tar riŋ ti de a ika vatwa ya,
ti ndze a təv ana maŋgə̀rà yam iɗəm a ka,
mala megemir ata a gwa:
«Yam naha,
dukùla na a pala aà iye ahəm dze ka,
ti tsilwiɓ à iye a yam tsiye?»
37 Filip a gwaɗar aakaha:
«Na kàa gəs Yesuw Kiristi nda gəzləŋ ilik ka,
ti tsilwiɓ à kər a a yam.»
Wele ata a gwaɗar aakaha asa:
«Yàa gəs nda gəzləŋ ga ilik.
Ŋgat ka,
Kəla Mbulum.»
38 Dite i dəba ŋa ya,
a hitse a aba à puspus ŋgar a.
Tə tarəra iɗəm a sula məma nda Filip a.
Tə daha a yam ata,
Filip a tsilwiɓ aɗəm à ŋgat kuɗa.
39 Aləka tə dara i yam a lele ka,
Mezite Mesife Mbulum a zla Filip i fata ya.
Mala megemir ata a fə̀r ikaba ya ka,
Filip a riŋ asa tsa,
aka da ihər a.
Ama i dəba ŋa ya,
wele aaha a daha,
a mà aka vatwa ŋgar ana ndeɗiŋa ya mbaŋa,
a daba nda gà maŋgayaba.
40 Ama Filip a ta meɗe zləm ka,
i Azutus.
A da aà kwite aà kwite,
a tsikewa bazlam ŋgwal ŋa ana a ɗif à Yesuw Kiristi ya,
a gà mburma tserdze ika ahəɗ ata,
haa a ndze dər a Kaysariya.