Nehemiya 12

Maɗama gà ɓəzla məbatsa duwa a Mbulum nda gà gwala Lewi

1 Araha na wakita maɗama zləm gà ɓəzla məbatsa duwa a Mbulum nda gà gwala Lewi ana, ta makabara i kwite medwìŋe ya, nda gà Zurubabila kəla Siyaltiyel dite nda gà Yeesuwa ya. Gà Səraya, Irmiya, Ezra. 2 Amariya, Maluk, Hatus. 3 Sekaniya, Rekum, Meremut. 4 Iddu, Ginetuy, Aviya. 5 Miyamin, Maadziya, Bilga. 6 Semaya, Yuyarib, Yedaya. 7 Salu, Amuk, Hilkiya, Yedaya. Araha na gà ɓəzla aka miɗ gà ɓəzla məbatsa duwa a Mbulum, dite nda gà damər tar ana akahər Yeesuwa ya. 8 Ika magər gà gwala Lewi mbaŋa ka, Yeesuwa Binuwa, Kadmiyel, Serebiya, Yahuda nda Mataniya. Mataniya tar nda gà gwala ŋgar ka, ti ne gà ɓəzla malaha dimis mazləba à Mbulum. 9 Gà gwala Lewi gà Bakbukiya nda Unni ka, ta ge a megemir tar ka, ser bise i təv gà damər tar. 10 Yeesuwa ka, tsir Yuyakim, Yuyakim ka, tsir Eliyasib, Eliyasib tsir Yuyada. 11 Yuyada tsir Yanatan dite Yanatan tekeɗe tsir Yadduwa. 12 Akahər ana Yuyakim a ne batsah gà ɓəzla məbatsa duwa a Mbulum a ka, gà ɓəzla aka miɗ gà gwala gà ɓəzla məbatsa duwa a Mbulum ka, taraha. Miraya mala aka miɗ gà gwala Səraya, Hananiya biy gà gwala Irmaya. 13 Misulam tekeɗe mala aka miɗ gà gwala Ezra. Yəhuhanan mala aka miɗ gà gwala Amariya. 14 Yanatan mala aka miɗ gà gwala Meliku. Yusufa mala aka miɗ gà gwala Sebaniya. 15 Adna mala aka miɗ gà gwala Harim. Helkay mala aka miɗ ana i gwala Merayut a. 16 Zakariya mala aka miɗ ana i gwala Iddu a. Mesulam mala aka miɗ ana i gwala Ginetum a. 17 Zikiri mala aka miɗ ana i gwala Aviya ya, wele ana i gwala Miniyanin a, Peltay mala aka miɗ ana i gwala Mawadiya ya. 18 Sammuwa mala aka miɗ ana i gwala Bilga ya. Yunatan mala aka miɗ ana i gwala Semaya ya. 19 Matenay mala aka miɗ ana i gwala Yuyarib a. Uzi mala aka miɗ ana i gwala Yedaya ya. 20 Kalay ka, mala aka miɗ ana i gwala Salay ya ya. Eber mala aka miɗ ana i gwala Amuk a. 21 Sabiya mala aka miɗ ana i gwala Hilkiya ya, dite Netaneyel ana i gwala Yedaya ya. 22 Akahər gà Eliyasib nda Yuyada, Yuhanan nda Yaduwa, tar ka, gà bàba gà ɓəzla məbatsa duwa a Mbulum, Gà wakita a riŋ na mewetse ŋa iɗəm gà zləm gà gwala Lewi ana, tar gà ɓəzla aka miɗ i gà gwala tar a. Kamala tàŋa ya mbaŋa, na ta wetse zləm gà ɓəzla məbatsa duwa a Mbulum tsikw akahər ana, Dariyus a ne Əbay gà Perisiya ya. 23 Gà zləm gà ɓəzla aka miɗ ana, i gwala gà Lewi ya, mewetse ŋa ka, i huɗ wakita ana a pet a, à gà labara ana gà ŋgwal ŋa ya. A ndze ka, tsikw akahər Yuhanan kəla kəla Eliyasib. 24 Gà ɓəzla aka miɗ gà gwala Lewi ka, gà Hasabiya, Seribiya nda Yesuwa kəla Kadamiyel. Aka ndze akahər megemir tar ana i ga mbulum batsah ŋa ata ya ka, ti leh a dimis mazlə̀be a à Mbulum nda meger kəkaaha. Ta hitse a à dər ser aka gà asiŋ gà gwala tar gà Lewi ŋgiɗ aaha. Nda mege kamala tàŋa ya ka, ti zezem a tàŋa ka, magəsa ahəm a dukw ana Dawda mburma Mbulum a hitse dər a. 25 Gà ɓəzla makasla gà biye hərmaga ka, gà Mataniya, Bakbukiya, Ubadiya, Mesulam, Talmun nda Akub. Tar ta kèsle a ka, gà ga mandza aɗəm gà kazlaŋa ana, bise ndaka tseke gà biye hərmaga mada a ga mbulum batsah ŋa ata ya. 26 Gà tar ata tə ndza aà bəra ka, akahər Yuyakim kəla Yeesuwa nda kəla kəla damər Yusadak, akahər Nehemiya ana a ne mala makwara ahəɗ ata ya, nda mala məbatsa duwa a Mbulum Ezra, ŋgat ana mala medzeŋgè məpala ahəm Mbulum a.

Mandə̀ɗà mandəva à mazlazla zlagam a bə̀ra

27 I təv ana tə ndəv aà mazlazlam zlagam ana a lawara Yeruzalem a ka, tə zalaha a gà gwala Lewi fit tserdze, i gà təv ana tar madzaya ŋa iɗəm a. I dəba ŋa ya, ta ge megirive batsah ŋa nda maŋgayaba, aà meɗife dər ka, megemir aka ndəv, nda gà malaha gà dimis mazləba à Mbulum, nda gà dukw maslawa megirive, gà mediye nda gà gandzavəl. 28 Gà ɓəza gà ɓəzla malaha dimis ti yaha ba gər, tə dayara ka, ika gà varavada Yurdan a, i gà kwite ana tə lawara Yeruzalem a, dite ara i gà mekiriwe a ya, gà ga ana bise nda Netufa ya. 29 Tə dayara asa ka, i Bet-Gilgal a, dite ara i gà kwite Geva nda Azmavet ana, gà mburma iɗəm hinne tsiye. Aɗaba gà ɓəzla malaha dimis tàa geye gà awiya gà kwite a lawara Yeruzalem. 30 I dəba ŋa ya, gà ɓəzla məbatsa duwa a Mbulum nda gà gwala lewi, ti ne aba gà tsəɗaŋŋa, dite ta wiz aà mayahaba gər gà mburma tserdze ka, ti ne a ba gà tsəɗaŋŋa kamala tar a mbaŋa. I dəba ŋa ya asa ka, ti ne tsəɗaŋŋa aà gà biye hərmaga nda gà zlagam ana a lawara kwite ata ya. 31 I dəba ŋa ya asa ka, i gwaɗa a gà ɓəzla aka miɗ gà Yahuda, tə tsala aka gər zlagam ana a lawara kwite ata ya. I ndzək ikaba gà ɓəzla malaha dimis a, dalàbə̀ra sula. Malahalah ŋa ana ka, ti de a ndaka tseke ahər mezime zlagam ata, ndaka tseke biye hərmaga daraɓa. 32 Na a zàzàm gà ɓəzla dimis ata ka, gà Husaya nda gà mezehe gà ɓəzla aka miɗ gà Yahuda 33 I dəba tar a mbaŋa ka, gà Azariya, Ezra, Mesulam, 34 nda Yahuda, Bendzamen, Semaya nda Yeremiya. 35 I dəba ŋa ya ka, gà ɓəzla məbatsa duwa a Mbulum a riŋ nda gà mezleliŋ. Zakariya a dara i gwala Asaf a, nda ahər gà bàba gà tsir ŋgar aaha ya, Zakur, Mika, Mataniya, Semaya, Yunatan. 36 I dəba tar a asa mbaŋa ka, gà mburma ana tar nda gà Zakariya ya ka, gà Semaya , Azarel, Milalay, Gilalay, May, Netaneyel, Yahuda nda Hanani. tar ka, nda gà dukw maslawa megirive ana Dawda mburma Mbulum a papaza ya ya. Na ika miɗ gà mburma ata ka, Ezra ana ŋgat mala medzeŋgè məpala ahəm Mbulum a. 37 I təv ana ti ndze aka biye hərmaga yam a ka, ta pər ikaba ya ka, tar ika metsile ana a tsəl a kwite Dawda a. Tə da ndaka gà metsile ana a da ndaka dala gər gà Dawda a. I dəba ŋa ya, ti ndze aka biye hərmaga yam ana, a mbe ndaka tseke are pat ana, a mbizere a, i Yeruzalem a. 38 I fata ya ka, gà ɓəzla malaha dimis dalàbə̀ra masula ŋana, tə da ndaka tseke ahər gula. I zàzam tar, mə̀r nda gà mezehe gà mayahaba gər gà mburma ŋgiɗ, ndaka gər zlagam ata a lawara kwite ya. Mì da piɗ a zlagam ana a mbe aka təv ga madula duwa ya. I dəba ŋa ya, ndaka tseke zlagam ana mawudaɗa ŋa hinne ya. 39 Mì da ndaka dala gər biye hərmaga Efərayim, ndaka biye hərmaga Yesana, dite ndaka biye hərmaga gà kilif. Ndaka zlagam ana a da nda guva biye hərmaga Hananayel a, dite ndaka zlagam ana a da ndaka biye hərmaga ana tə zalar dərməka ya. Maa ndaha ika biye hərmaga gà təmaŋ a. mì da mehitse aka biye hərmaga gà ɓəzla daŋgay. 40 I dəba ŋa ya kuɗa ka, gà ɓəzla malaha dimis ata dalàbə̀ra sula ya, tə ləma akaba, ta hitse a huɗ ga mbulum batsah ŋa ata. mì hitse akaba a fata mbaŋa, nda gà ɓəzla aka miɗ ana ti leke a iye ya. 41 Gà ɓəzla məbatsa duwa a Mbulum, gà Eliyakim, Masaya, Minyanim, Mikaya, Eliyuhaniya, Zakariya nda Hananiya ka, tar a riŋ ta vete a mezleliŋ. 42 Gà mburma ana ta a riŋ i fata ya asa ka, Mesaya, Semaya, Eliyazar, Uze, Yəhuhanan, Malkiya, Elam, Ezer. Taŋa ka, gà ɓəzla malaha dimis, tə dzəba a malaha dimis. Mala mazla à tar dimis ŋa ka, Yizrahiya . 43 A pàt ata ka, gà mburma tə dzaya gà dukw taf hinne aà mezleyer ɗa, dite ta ŋgaya ba. Aɗaba taŋa Mbulum a vəl a tar batsah maŋgayaba. I kwite Yeruzalem ka, gà məkəs nda gà ɓəza, tar fit tserdze i maŋgayaba mbaŋa. I fata ya ka, maŋgəlaka dukw maŋgayaba megirive a ɗe diriŋ. 44 Akahər ŋa ata kuɗa ka, tàa pala gà mburma aà makasla gà ga ana tə dzawa aɗəm, gà dukw taf biy malahalah gà manaha gà duwa ya. Gà malahalah gà dukw ana ta pelere a i dala ya, nda məvəla duwa ilik i huɗ kurwa biy ana ta ge ara i dala ya. Gà mburma ata ti dze a gà dukw ata, a təv ana tə dzawa aɗəm gà dukw ata ta palawa i bəɗ a. Kamala ana məpala ahəm Mbulum a vəl a tar ahər vatwa, a gà ɓəzla məbatsa duwa a Mbulum, nda gà gwala Lewi ya. Gà dukw ata ta palawa ka, i gà guvah ana a lawara gà huɗ gà kwite ata ya. Gà mburma ana i Yahuda tserdze, ta ŋgaya ba a megemir gà ɓəzla məbatsa duwa a Mbulum nda gà gwala Lewi. 45 Gà mburma ata ka, ta gewa megemir a Mbulum tar, nda mege megirive mandza tsəɗaŋŋa. Gà ɓəzla malaha dimis nda gà ɓəzla makasla biye hərmaga, ta gewa i tar mbaŋa ka, dukw ana gà Dawda nda kəla ŋgar Salumun ti tsik a. 46 Aɗaba piŋŋe akahər gà Dawda nda Asaf ka, gà ɓəzla aka miɗ ana ika magər gà ɓəzla malaha dimis a, tar na ta vəlawa ahər vatwa, aà malàha gà dimis mazləba a Mbulum, nda meger kəkaaha ya. 47 Akahər mekwere Zurubabila ka, kamala mekwere Nehemiya ya mbaŋa, gà Isərayel fit tserdze, tə dzawa gà duwa biy gà ɓəzla malaha dimis nda biy gà ɓəzla makasla biye hərmaga kəla wur gà pat. Tə dzawa asa mbaŋa ka, dukw taf ana biy gà gwala Lewi ya. Dite gà gwala Lewi tekeɗe, tə dzawa tar ba ŋa biy tar mbaŋa, a gà ɓəzla məbatsa duwa a Mbulum, ana i gwala Haruna ya.