Nehemiya 13

Nehemiya a mbəɗ a ahər a mendze gà Isərayel

1 A pat duwa, akahər ŋa ata ka, ti dzeŋge wakita Musa ika miɗ gà mburma tserdze. Mala medzeŋge wakita a ndze aka təv medzeŋge ana a gwa ka, gà Ammuniya nda gà Muwabiya ka, ti sle a aà mede a aka magər gà mayahaba gər gà mburma ana, ti zlibe a à Mbulum a a diydiy tsa. 2 Aɗaba akahər ŋa ata ka, tàa gəs aà ba gà Isərayel aà məvəla tar gà peŋ aà mezime tsa nda yam aà mese tsa. Gà Muwabiya ka, tar ŋa dze tàa rùɓɓa Balaam aà məvəl mezelme a mayahaba gər gà Isərayel. Ama Mbulum mə̀r a mbəɗ a mezelme ata à mepise a ahəm. 3 I dəba ana gà Isərayel tə tsaraka təv medzeŋgè məpala ahəm ata ya ka, tə dzə ba aà madalawa gà mbəlakw ana ika magər tar a tserdze. 4 I dəba gà dukw ata ta geye ba ya ka, mala məbatsa duwa a Mbulum Eliyasib, tàa mbər məvə̀lar megemir makasla gà ga ana ta geyeha aà dəba ga mbulum mə̀r batsah ŋa ata ya. Aɗaba ŋgat ka, gwala tar ilik nda Tubiya. 5 Eliyasib a vəl batsah ga ata a Tubiya, piŋŋe tə dzawa aɗəm gà dukw taf, ana ta palawara i dala ya ya, dizl dukw ana tə dùlawa wirde ŋa a ze hwaŋŋa lele ya, nda gà kazlaŋa megemir ana ta gewa dər megemir i batsah ga mbulum ata ya. Tə dzawa aɗəm asa ka, ba ŋa biy gà ɓəzla məbatsa duwa a Mbulum, dukw ilik i huɗ dukw kurwa ya, biy ble, biy guzum ana awiya ŋa ya, nda gà mal, taŋa ka, metikiŋa aba ya, biy gà gwala Lewi, a gà ɓəzla malaha dimis, dite nda gà ɓəzla makasla gà biye hərmaga ya. 6 Gà dukw ata a geye ba ya fit tserdze ka, iye i Yeruzalem tsa. Aɗaba i huɗ mive dzik makər gəra sula ana Artahsasta a ne Əbay gà Babila ya ka, iye ka, i təv ŋgar. I huɗ mendze zaakwa ya ka, Əbay a viliŋ vatwa. 7 I deba ŋa ya, i mbəɗara gər a Yeruzalem a, i ŋgat a dukw Eliyasib ana a ge ŋgwal ŋa tsiye ka, aɗaba ana a vəl batsah ga ata, ika dalàbə̀ra ga mbulum a, a Tubiya ya. 8 I ge matsəɓatsəɓ hinne, i dzawara aà gà dukw Tubiya ana i ga ata ya tserdze a bəra. 9 I dəba ŋa ya, i vəl vatwa aà mene aà ga ata tsəɗaŋŋa, dite i mara aɗəm aà gà dukw megemir ana i ga mbulum ata ya, gà dukw taf nda gà wirde. 10 I fata ya, i tsara ka asa ka, gà gwala Lewi tàa ŋgat dukw ana ba ŋa biy tar, i təv gà dukw ana ta zleyewar ɗa ya tsa. Aɗaba tàŋa na gà gwala Lewi nda gà ɓəzla malàha dimis ana, ta gewa megemir a BATSAH kwa ŋa ya. Ta miyak à megemir tar, ku weke a da ba aka ahəɗ ŋgar a. 11 Kamala taŋa ya, i pala ahəm a gà ɓəzla aka miɗ, dite i gwaɗa a tar: « Aɗaba la na ga mbulum batsah ŋa aaha, ka miyakum dər kataya ya? I dəba ŋa ya, i yaha gər a gà gwala Lewi, nda gà ɓəzla malàha dimis, dite i maya aà tar, a təv gà megemir tar . » 12 I fata ya ka, gà Yahuda, ta mà aka mandzə̀kayara gà dukw ilik i huɗ kurwa ya, guzum ana awiya ŋa ya, nda mal, aà mandza a huɗ ga ana tə dzawa aɗəm gà dukw ata piŋŋe ya. 13 Aà makasla gà ga ata ka, i tike a aɗəm mala məbatsa duwa a Mbulum Selemiya, mala mewetse duwa Tsaduk, dite i liwiŋ gà gwala Lewi ya ka, Pedaya, aà mazlaka tar ka, i zla Hanan kəla Zakur, dite kəla kəla Mataniya. Aɗaba gà mburma ta gwaɗawa aà gà tar ata ka, gà ɓəzla ndzer, ta vəl a tar megemir madzaya gà dukw taf, ika magər gà damər tar. 14 Da Mbulum gà, dzala aka iye gà gər, aɗaba gà dukw ata te. Mege megemir ana i ge nda mawaya ba agər a ga yak a ka, dite agəra gà megemir ana i gewak i huɗ ga yak a ka, Məməsak gər tsa.

Nehemiya a pala ahəm aà megemir a pàt Sabba

15 Akahər ŋa ata ka, i ŋgatawar ika ahəɗ Yahuda ka, gà asləka gà mburma, ta gə̀zlawa manaha viŋye a pàt Sabba. Gà misle ŋgiɗ tə ndzəkawa gà ble nda gà guzum, nda gà manaha viŋye nda gà mawa figiye, dite nda gà asiŋ gà dukw ŋgiɗ pampam. Ta ŋgeyewa aka hezwèŋe aà mada dər a Yeruzalem. I palawa a tar ahəm, a pat ana tə dzawuwa aà gà dukw tar ata a pat Sabba ya. 16 Asa ka, gà mburma gà Tirus a riŋ mandza ŋa i Yeruzalem. Tə ndzəkawara gà kilif a, nda gà asiŋ gà dukw ŋgiɗ pampam, aà madzàwa dər, a gà mburma ana mandza ŋa i Yeruzalem a, nda gà na i Yahuda ya, a pat Sabba. 17 I dzəba aà məpala ahəm a gà bàba ŋana i Yahuda ya, dite i gwaɗa a tar: « Aàla na kà nwim bakal aà pat Sabba ya? Aàmala na kə gwim dukw bakal ata asa ya? 18 Gà bàba gà tsir kurum, ta ge ɗa ka, kamala taŋa ya. Wànà agəra taŋa tsiye na Mbulum a zlakukwara batsah mesewere are, a huɗ kwite kwa asa ya? Dite kurum tekeɗe, kà nwim a à bakal a pàt Sabba ya. Kamala taŋa ya na, ki sèkwehwimera à matsəɓatsəɓ Mbulum aka gər gà Isərayel a. 19 I fata ya ka, i vəl vatwa aà mahandaka a gà biye hərmaga Yeruzalem, ələk ana pàt Sabba a dze ahər a ba ya. Ələk ana a gis a zirimme ya ka, wura a hindike a iɗəm a asa tsa. Haa aka təv ana Sabba a ndìve a ya. I dzaya gà asiŋ gà mburma ta giŋ a megemir bise nda biye hərmaga mada a huɗ kwite. Ta pele a ahəm aà dukw metsekele ana ti de a dər a Yeruzalem a pat Sabba ya. 20 Sik ilik kige tsa sik sula na gà ɓəzla metsekele nda gà mburma ana tə dzawuwa aà gà duwa ta hinne a ika dəba kwite, haa pàt Sabba a ndehe a iɗəm a ya. 21 I pala a tar ahəm nda magwaɗa a tar: « Aɗaba la na kà hənawum ika ahəm zlagam ana a lawara huɗ kwite ya? Kà hənum ahər asa ka, i gese a kurum . » Gəs aà pat ata ya ka, tàa maha asa tsa, na a pàt Sabba ya. 22 I fata ya ka, i gwaɗa a gà gwala Lewi, ti ne aba tar tsəɗaŋŋa, dite tə da a makasla biye hərmaga mada a kwite aà ta gəs ahəm aà pat Sabba. « Da Mbulum gà, i ndzek are tsehe te, i mawakara a gər a, agər a dukw ata asa mbeete, agər a batsah mawaya mburma yak ka, i ndzàk are tsehe te.»

23 Akahər ata asa mbaŋa ka, Yàa ŋgat a a gà Yahuda tàa ndzək gà məkəs gà Asdudiya nda gà Ammuniya, nda gà biy gà Muwabiya. 24 Dite mezehe gà ɓəza tar, tə fafəlawa ka, ahəm gà Asdudiya. Gà asiŋ a ta fafəlawa gà ahəm gà mbəlakw ŋgiɗ, ama ka, wura ilik a sər mifefile ndaka ahəm gà Yahuda tsa. 25 I fata ya ka, i pala a tar ahəm, dite i vəl a tar mezelme. I gazla gà asiŋ a dite i ndzaha a tarəra ambəz i gər a, i dəba ŋa ya, i vəl a tar dukw mimbeɗe nda zləm Mbulum, aà dite ka, tə dzaya gà dəm tar a zal a bəra gà mbəlakw asa tsiye. Ti zim a mimbeɗe mbaŋa, na dite ti zle a dəm gà mbə̀ləkw aà məkəs, a gà ɓəza tar, kige tsa a ba tar ŋa tsiye. 26 I gwaɗa a tar ka, taŋa tsiye na a da aà Salumun Əbay gà Isərayel à mege bakal a, kataya tsiye? Ika magər gà asiŋ mayahaba gər gà mburma ya ka, Əbay ŋgiɗ a riŋ ilik, a ka ge kamala ŋgat a tsa. Mbulum ŋgar aka waya ŋgat, dite a zla ŋgat kamala Əbay ya, aka gər gà Isərayel fit tserdze. Tsaatsa ka, gà məkəs gà mbə̀ləkw, na ta bana ŋgat aà mege bakal a. 27 Na kurum kàa ndzəkum ba nda gà mbəlakw ka, ki gwim taŋa ka, batsah bakal, na i təv Mbulum a, dite kàa nwim gà ɓəzla magəsa ahəm tsa. Mì waya aà matsaraka ŋa asa tsa, na ta gweɗe a ka, ki gwim a ka, kamala taŋa ya ya. 28 Ilik ŋa, i liwiŋ gà ɓəza Yuyada ya, kəla kəla batsah mala məbatsa duwa a Mbulum Eliyasib, ŋgat malpa Sambalat, gà Hurunitiya. Aɗaba taŋa na i dalawa ŋgat i Yeruzalem a. 29 « Da Mbulum gà, məməsak gər tsidze, na tə nəs à megemir gà ɓəzla məbatsa duwa a Mbulum, nda masla ana kə gəs nda gà ɓəzla məbatsa duwa a Mbulum, nda gà gwala Lewi ya. 30 I fata ya ka, i ne tsəɗaŋŋa aà gà dukw gà mbəlakw ana aà gà mayahaba gər gà mburma tserdze. I mbəɗ gər aà mene a à məpala ahəm awiya ŋa, nda balaari na gà ɓəzla məbatsa duwa a Mbulum, nda gà gwala Lewi ta ge a ya. 31 I ge kamala taŋa ya asa mbaŋa, na ta vile a gà dukw taf tsalaka, na a gà pàt ana tàa hitse a dər a, dite aà gà dukw taf malahalah gà dukw ana ta pala i bəɗ a. « Da Mbulum gà, i màkara à gər a, dite ki giŋ ŋgwal te »