Nehemiya 11

Gà mburma ana ti ndzewe a i Yeruzalem a

1 Gà Əbay ana ika miɗ gà mayahaba gər gà mburma ya, ti dere a ti ndze a i Yeruzalem a. I huɗ mezehe gà mayahaba gər gà mburma ata ya ka, ta ge tsetse aka gər gà mburma kurwa aà masəra dər ikaba ya ka, gà weke na a ti dere a, ti ndze a i Yeruzalem i huɗ kwite ata tsəɗaŋŋa, pam biy Mbulum a. Gà tswiɗ ŋa aaha ti zeha aà gà mburma kurwa ŋa aaha ya ka, ti dere a, ti de a aka ahəɗ ŋgiɗ ana i kwite ata ya. 2 I fata ya ka, gà mburma ata ta ge kəkaaha, a gà na ta vəl ba tar aà ma ta mendze i Yeruzalem a. 3 Gà ɓəzla aka miɗ ana ika gà ahəɗ Yahuda ya ka, tar ka, ti ti ndze a ka, i Yeruzalem. Gà asiŋ gà Isərayel ŋgiɗ, gà ɓəzla məbatsa duwa a Mbulum, gà gwala Lewi, gà ɓəzla megeye gà megemir ana i ga mbulum batsah ŋa ata ya, gà mburma ana i ga i bəra gà ɓəzla megemir Salumun a ka, tar ti ndze a ka, i huɗ gà kwite tar, ku mege weke ika meleke ŋgar. 4 Kuɗa ka, gà asiŋ gà gwala gà Yahuda nda asiŋ gà gwala Bendzamen, tar ti dere a ti ndze a ka, i Yeruzalem. Ika magər gà gwala gà Yahuda, gà na tar a riŋ a, Ataya, ŋgat a dara ka, i ga i bəra Peres a, kəla Malaleyel, kəla Sefatiya, Kəla Amariya, kəla Zakariya, dite kəla Uzeya. 5 Asa ka, Naseya ana a dara i gwala Siluni, kəla Zakariya. Yuyarib, Adaya, Hazaya, Kul-Huze nda Baruk. 6 Ki ɗemekwe a gà taŋa ka, aka magər gà na mandza ŋa i Yeruzalem tar dərməka faɗ a nda dzik ndilik gəra tsamakər, gà ɓəzla slagama ana yam a dza a tar are tsa, tə dara i ga i bəra Peres a ya. 7 Ika magər gà mburma ana i gwala Bendzamen a, na a riŋ ka, Salu ana a dara i gwala Yasaya kəla Itiyel a. Mesaya, Kulaya, Pedaya, Yuwed nda Mesulam. 8 Tar nda gà Gabay dite Salay, ta gaw ba fit ka, dərməka tswiɗ nda dzik səla gər a tsamakər na tar gà gwala Bendzamen a. 9 Zuwel kəla Zikiri ŋgat na mala aka miɗ mayahaba gər tar ata ya, dite Yahuda kəla Hasenuwa, ŋgat ka, ma sula mala aka miɗ ana i kwite ata ya. 10 Ika magər gà gwala gà ɓəzla məbatsa duwa a Mbulum ana a riŋ a ka, Yidaya kəla Yuyarib, kəla Yakin. 11 Səraya ana a dara i gwala Ahitub, batsah gà ɓəzla məbatsa duwa a Mbulum a, nda ahər gà bàba gà tsir ŋgar aaha, Merayut, Tsaduk, Mesulam, dite Hilkiya. 12 Dite gà asiŋ a a riŋ asa, tar ka, dərməka tsamakər nda dzik səla gəra sula, na i gwala tar a, na gà mburma ana ta vəl a tar mege gà megemir i ga mbulum batsah ŋa ata ya. Adaya ana a dara i gwala Malkiya nda ahər gà bàba gà tsir ŋgar aaha ya, Pesahur, Zakariya, Amsi, Pelaliya, nda Yeruwam. 13 Dite gà asiŋ a a riŋ asa, tar ka, dərməka sula nda dzik faɗ gəra sula, na gà bàba ŋana, tar gà ɓəzla ga, i gwala tar a. A riŋ asa ka, Amasesay, ana a dara i gwala Immer nda ahər gà bàba gà tsir ŋgar aaha ya, Mesilemut, Azay nda Azarel. 14 Dite gà asiŋ a a riŋ asa mbaŋa ka, dərməka nda dzik səla gəra tsamakər, na gà ɓəzla guvəl ana gà ndzəɗa ŋa i gwala tar a. Mala aka miɗ mayahaba gər tar ata ka, Zabdiyel kəla Hagedulim. 15 Ika magər gà gwala Lewi ya, na a riŋ ka, Semaya a dara i gwala Buni nda ahər gà bàba gà tsir ŋgar aaha ya, Hasabiya, Azarikam kəla Hasub. 16 Dite asa ka, gà Sabitay nda Yuzabad, gà ɓəzla aka miɗ gà gwala Lewi ana tə ndzək tar aà mege gà megemir ika varavada ana a lawara ga mbulum batsah ŋa ata ya. 17 Na a riŋ asa mbaŋa ka, Mataniya ana a dara i gwala Asaf nda ahər gà bàba gà tsir ŋgar aaha Zabdiya, nda Mika. Ŋgat na mala mazla biye ɗa dimis mazləba a Mbulum a, na aka ndze akahər meheme tar a. Bakbukiya ŋgat ilik na i liwiŋ gà damər Mataniya ya, na ta və̀lar megemir mazlakahər ŋgar a. Abda ŋgat a dara i gwala Yedutun nda ahər gà bàba gà tsir ŋgar aaha ya, Galal nda Samuwa ya. 18 Tar fit tserdze ka, dərməka sula nda dzik tsamakər gəra fàɗ, na gà gwala Lewi ana i huɗ kwite ata tsəɗaŋŋa pam biy Mbulum a. 19 Gà ɓəzla makasla biye hərmaga tekeɗe ka, gà Akub nda Talmun. Ta vəl a tar megemir nda gà mburma ana i gwala tar a. Aà makasla gà biye hərmaga. Tar fit tserdze ka, gà mburma dərməka nda dzik təsəla gəra sula. 20 Gà asiŋ gà Isərayel ŋgiɗ aaha, gà ɓəzla məbatsa duwa a Mbulum nda gà gwala Lewi, tar tə ndza ka, i gà asiŋ gà bàba gà kwite ana ika ahəɗ Yahuda ya. Ku mege weke ika meleke ŋgar. 21 Gà ɓəzla megemir ana i ga mbulum batsah ŋa ata ya, tar mandza ŋa ka, i kəsà ana i Yeruzalem tə zalar Ufel a. Tar tserdze ka, aà huɗ mekwere Siha nda Gisepa. Na a ne gà ɓəzla miɗ gà gwala Lewi ana i Yeruzalem a ka, gà Siha nda Gisepa. 22 Mala aka miɗ gà gwala Lewi ana i Yeruzalem a ka, Uzi ana a dara i gwala Mika nda ahər gà bàba gà tsir ŋgar aaha ya ka, Mataniya, Hasabiya nda Bani, ŋgat ka, ika magər gà gwala Asaf. Gwala Asaf ata ka, ta vəlar megemir malàha dimis i ga mbulum batsah ŋa ata mbaŋa asa. 23 Gà ɓəzla malaha dimis ata ka, ta gis a ahəm aà məpala ahəm ana ti tike ya, nda gà məpala ahəm ana a ɗif a à megemir malaha dimis ata kəla wur gà pat a. 24 Dite Petakiya kəla Mesesabel ana i gwala Zerah kəla Yuda ya, ŋgat na a pete a aà mayahaba gər gà Isərayel ika varavada Əbay gà Perisiya ya. 25 Gà asiŋ gà gwala gà Yahuda ŋgiɗ ka, tar tə ndza ya zaakwa zaakwa ika gər gà kwite Kiriyat-Arba i huɗ kəsà ana bise nda tar a. Dite i Dibun nda gà huɗ gà kəsà ana tar aba bise nda tar a. Tə ndza i Yikabitsayel, nda gà kəsà ana bise nda gà tar a. 26 Tə ndza asa mbaŋa ka, i Yeesuwa, i Mulada dite i Bet-Pelet. 27 I Hatsar-Suwal i Beer-Seva nda gà kəsà ana a mbe a tar aaha ya. 28 I Tsiklak, i Mekuna nda gà kəsà ana a mbe a tar aaha ya. 29 I Eyn-Remun, Tsureya nda Yarmut. 30 I Zanuwah, Adullam nda gà kəsà ana a mbe a tar aaha ya. I Lakis nda gà kəsà ana a mbe a tar aaha ya. Azeka, nda gà kəsà ana a mbe a tar aaha ya, na tə ndza ya, daga ara i Beer-Seva tsikw aka tulwah Hinum. 31 Gà mburma ana i gwala Bendzamen a, tə ndza ka, i Geva, i Mikmas, i Ayya, i Betel, nda gà kəsà ana a mbe a tar aaha ya. 32 I Anatut, i Nuba, i Ananiya. 33 i Hatsur, i Rama, i Gitayim. 34 I Hadid, i Sebuyim, i Nebalat, 35 I Ludu, i Unu, ika tulwah gà ɓəzla mvə̀ɗa duwa. 36 Gà asiŋ gà mayahaba gər gà gwala Lewi, tə ndə̀zl ika ahəɗ Yahuda ya, tə da aka ahəɗ Bendzamen.