Nehemiya 10

Ta mbəɗ gər aka magəsa masla

1 Agəra gà dukw ana tserdze ta gewa à mə̀r a aba gər a ka, a mə̀r gà Isərayel. Maa dza akaba ahər ahəm ŋgiɗ pam, mì wetse mewetse. Gà bàba ŋana ika magər mə̀r a, gà gwala Lewi ana ika magər mə̀r a, dite gà ɓəzla məbatsa duwa a mbulum mə̀r, tə dzaya ahər tar aka wakita nda lamba tar. 2 Araha na gà zləm gà mburma ana tə dzaya aakahər tar a. Mala makwara ahəɗ mə̀r, Nehemiya kəla Hakaliya, nda Sedikiya. 3 Səraya, Azariya, Yeremiya 4 Paskur, Amariya, Malkiya 5 Hatus, Sebaniya, Maluk 6 Harim, Meremut, Ubadiya 7 Daniyel, Ginetun, Baruk 8 Mesulam, Aviya, Miyamin 9 Maaziya, Bilgay, Semaya gà taŋa tserdze ka, gà ɓəzla məbatsa duwa a Mbulum. 10 I gwala Lewi ka, Yesuwa kəla Azaniya, Binuwi gwala Hinadab, Kadamiyel. 11 Dite damər Sebaniya, Hudiya, Kilita, Pelaya, Hanan 12 Mika, Rehub, Hasabiya 13 Zakur, Serebiya, Sebaniya 14 Huldiya, Baani, Beninu 15 Gà bàba ŋana ika miɗ gà mayahaba gər gà mburma ya mbaŋa ka, Parus, Pahat, Muwab, Elam, Zatu, Bani 16 Bune, Azgad, Bebay, 17 Aduniya, Bebay, Adin 18 Ater, Ezekiyas, Azur 19 Hudiya, Hasum, Bisay 20 Harif, Anatut, Nebay 21 Makbiyas, Mesulam, Hezir 22 Mesezabel, Saduk, Yaduwa 23 Pelatiya, Hanan, Anaya 24 Husiya, Hanan, Hasuba 25 Halukes, Peleha, Subek 26 Rehum, Hasabana, Masaya 27 Nda gà Ahiya, Hanan, Anan 28 Maluk, Harim nda Baana. Gà tàŋa tsedze ka, gà ɓəzla aka miɗ gà mayahaba gər gà mburma. 29 Gà mburma aaha ka, gà na gà dzagal ŋa, gà ŋgwal gà mburma, gà na ti tike tar aà ahər a. Ta ŋgatawa meslèke ka, i təv gà asiŋ gà Isərayel ŋgiɗ aaha ya. Gà tar ata ka, gà ɓəzla məbatsa duwa a Mbulum, gà gwala Lewi, nda gà ɓəzla makasla gà biye hərmaga ana aà zlagam kwite ata malawaraŋa ya, gà ɓəzla malaha dimis, gà ɓəzla megemir ana i ga mbulum batsah ŋa ata ya. Ta ŋgatawa mezleke asa mbaŋa ka, i təv gà asiŋa ana, tə ndzək ba aà gà mburma ana, tar mandza ŋa ɗa ika ahəɗ tar, i kwite ana tə duŋ aɗəm tar a, aà mazàzàma məpala ahəm Mbulum. Gà məkəs mə̀r, gà ɓəza mə̀r nda gà dəm mə̀r ana ti sle aà mandza zləm a guma ide ya, tar maràhaŋa nda gà masəra duwa asa mbaŋa. 30 Nda gà tar ata ka, mì tsik i sida ya, nda mimbeɗe aà magəsa ahəm aà məpala ahəm Mbulum kwa ana, a vəl a kwa nda ahər Musa mala meslire ŋgar a. Mì mbaɗa aà magəsa ahəm ndaka vatwa ŋa, aà dukw ana tserdze i huɗ məpala ahəm ana a tsik ahər a, dukw ana a da ndaka vatwa ŋa ya, dite nda dukw ana BATSAH kwa ŋa Mbulum mə̀r a hitse dər aà mege ya. 31 Dite mì gwa i sida ya asa ka, mìi sle aà məvəla vatwa a gà dəm mə̀r, aà mada zal a bəra gà na tə ndza ɗa i kwite mə̀r, aka ana mə̀r mandza ŋa i kwite ana tə duŋ aɗəm mə̀r a tsa. Mər tekeɗe mìi sle aà mendzìke gà dəm tar, aà daala a gà ɓəza mə̀r tsidze. 32 I fata ya ka, na gà mayahaba gər gà mburma ana ɗa mandza ŋa ika ahəɗ ata, tàa ndzək aaha gà dukw madzawa dər, kige tsa wur Dukula ya tekeɗe ka, tàa ndzəkaha aà madzawa dər a pat Sabba, kige tsa a pat megirive ka, mìi sekimewa a tar duwa ya tsidze, ku mege a pat ana pam tsəɗaŋŋa biy Mbulum a, dite ka, mìi miteweha aà gà ahəɗ mə̀r məma aɗəm, sik ilik i huɗ mive təsəla ya, dite mìi mbètewa aà gà gwedere, ku mege biy gà Dukula ya mbaŋa asa. 33 Dite mə̀r nda ahər mə̀r ŋa, mìi hitse aà məpala ahəm məvəla kur siŋgwe anini faɗ ŋana, aà mege gà megemir ana i ga mbulum batsah ŋa ata ya kəla mive. 34 Dukw taf ata a dzayaba ya ka, aà masakama dər peŋ aà məvəla dər dukw taf ŋa a Mbulum ana kəla wur gà pat. Dukw taf ana tə dùl fit a Mbulum a, gà dukw taf gà mawa gà dizl ɗaf ana kəla wur gà pat a. Ti sekemewe a dər asa mbaŋa ka, gà dukw taf ana ta vəlawa a Mbulum a pat Sabba ya, biy malàhalàha mehinne kiye ana a mbəz a, kige tsa, agəra gà pat gà megirive ŋgiɗ a. Ti sekemewe a dər asa ka, gà asiŋ gà dukw taf ŋgiɗ ana ta vəlawa a Mbulum a, nda gà dukw ana gà Isərayel ta vəlawa a Mbulum biy maŋgata məpəl a bakal a. Aka mandəvandəv ŋana asa ka, dukw taf ata a ge a megemir maləmbaɗa batsah ga Mbulum mə̀r 35 Mər gà ɓəzla məbatsa duwa a Mbulum, nda gà gwala Lewi, nda gà mayahaba gər gà mburma ana mezehe ŋa ya. mì ge tsetse aà masəra ikaba, à gà pat wara na kəla aà ga, a ndzikere gà tsalaka a ga mbulum mə̀r batsah ŋa ata ya. Asa ka, kəla aà viye tàa tike gà məpazla ahər ŋa, na mìi ndzìkera gà tsalaka ana a da dər aà madula dər dukw ata, tə zler ɗa, aka təv madula aaka duwa a BATSAH kwa ŋa Mbulum mə̀r, kamala ana məpala ahəm Mbulum a waya ya. 36 Kəla aà mive asa mbaŋa, na mìi ndzikewere a gà malahalah gà dukw ana mì fatawara i gà guvah mə̀r a, nda malahalah manaha gà mawa gà dizl mə̀r, a ga mbulum batsah ŋa ata ya. 37 Mìi petewe a à gà maləkwara mə̀r i ga mbulum, nda gà dukw gənaw mə̀r ana ta wa malahalah ŋa ya. Kamala ana məpala ahəm a waya ya. Mìi ndzikewe a gà malahalah gà sla mə̀r ana ta wuwa ya, biy gà təmaŋ nda gà awak ara a ga mbulum mə̀r batsah ŋa ata ya. I fata ya ka, mì dzawa ahər gà ɓəzla məbatsa duwa a Mbulum ana ta gewa mə̀r megemir i ga mbulum a. 38 Mìi ndzikewere a, gà ŋgwal gà gufa mə̀r asa mbaŋa, gà dukw taf biy manaha duwa, gà guzum ana awiya ŋa ya, nda gà mal. Mìi ndzikewehe a gà dukw taf ata fit ka, a gà meɗikwir ana, aà ga mbulum batsah ŋa ata ya. Mìi dzewe a gà ma kurwa gà dukw mə̀r ana mì palawa i bəɗ a ka, a gà gwala Lewi. Kamala megweɗe ya, dukw ilik i kurwa ya. Gà gwala Lewi nda ahər tar ŋa, na ti dehe a ti ndzikera gà dukw ata i təv ana mì gewa iɗəm megemir a. 39 Mala makəɗa duwa a Mbulum ilik i gwala Haruna ya, na a lekeye a gà gwala Lewi, na akahər ana ti ta ndzikera gà dukw ata ilik i huɗ dukw kurwa ya. Gà gwala Lewi ti ndzikere a i gà ma kurwa gà dukw ata ilik i huɗ gà dukw kurwa ya, a ga mbulum, a gà ga ana tə dzawa aɗəm gà siŋgwe ya. 40 Gà Isərayel nda gà gwala Lewi, ti ndzikere a gà dukw taf, gà ble tar a, nda gà guzum awiya ŋana, nda gà mal a, ara a huɗ gà ga ana aà ga mbulum batsah ŋa ata ya. I fata na gà dukw ata, ta gewa dər megemir i təv ana tsəɗaŋŋa pam biy Mbulum a. I fata asa mbaŋa, na gà ɓəzla məbatsa duwa a Mbulum ana, ta gewa megemir i ga mbulum, ta hitsewa aɗəm a. Nda gà ɓəzla makasla gà biye hərmaga, nda gà ɓəzla malaha dimis. Kamala taŋa ya, na mìi mbiɗewe a dəba a ga mbulum batsah ŋa ata tsiye.